ʼE Lava Hoko Koa He Fetogi ʼAki Takotou ʼu Faikole?

KO AI koa ia tatou neʼe mole heʼeki hoko ki ai he faigataʼaʼia neʼe mole tou ʼiloʼi peʼe koteā hona puleʼaki? ʼE fakahā e te Tohi-Tapu neʼe mahino ki te ʼapositolo ko Paulo ia te lava fetogi ʼo te ʼu taʼi ʼaluʼaga ʼaia e te faikole.

ʼI te temi ʼaē neʼe pilisoniʼi ai ia Paulo ʼi Loma ʼuhi ko tona tukugakoviʼi hala, neʼe ina kole ki tona ʼu tēhina ke nātou hūfaki ia ia, ʼo ina ʼui fēnei age: “E au lesili kole atu te mea aia ke koutou fai, ke vave toku tuku atu kia koutou.” (Hepeleo 13⁠:​18, 19) ʼI te tahi lakaga, neʼe fakahā e Paulo tana falala ʼaē ʼe tali e te ʼAtua te ʼu faikole ʼaē ke faka ʼāteaina vave ia ia. (Filemone 22) Mole tuai pea neʼe faka ʼāteaina ia Paulo pea neʼe ina toe hoko atu tana gāue faka misionea.

Kae ʼe feala koa ʼaki te faikole ke hoko he fetogi ʼi tokotou ʼu fihifihia? ʼE mahalo pe. Kae koutou manatuʼi ko te faikole ʼe mole ko he aga faka lotu feiā pe. ʼE ko he felogoi moʼoni mo tatatou Tāmai ʼofa pea mo mālohi ʼaē ʼe ʼi selo. ʼAua naʼa tou tuʼania ʼi te tala fakahagatonu ʼi tatatou ʼu faikole te meʼa ʼaē ʼe tou loto kiai, kae hili ʼaia pea tou fakatalitali leva ki te faʼahiga tali ʼa Sehova ki tatatou ʼu faikole.

ʼE lagi mole tali fakahagatonu ia te ʼAtua ki te ʼu faikole fuli, peʼe lagi mole ina tali tuʼumaʼu ohage ko te meʼa ʼe tou ʼamanaki kiai peʼe ʼi te lakaga ʼaē ʼe tou ʼamanaki kiai. Ohage foki la ko Paulo neʼe faikole liuliuga ʼo ʼuhiga mo tona “tala ʼi te kakano.” Ko te ʼAtua neʼe mole ina pulihi ia te faʼahiga fihifihia ʼaē neʼe tau mo Paulo, kae neʼe fakafimālieʼi ʼaki te ʼu palalau ʼaenī: “Ko toku ʼofa makehe ʼe feʼauga kia te koe; heʼe ko toku mālohi ʼe lolotoga fakaliliu ʼo haohaoa ʼi te vaivai.”​—2 Kolonito 12⁠:​7-9, MN.

ʼE feala mo tatou ke tou falala tatau aipe peʼe mole pulihi e te ʼAtua he faʼahiga fihifihia ʼe tau mo tatou, kae ʼe ina lava tuku mai “te faigamalie ke [tou] hao ai pea mo te malohi ke [tou] faa tali.” (1 Kolonito 10⁠:13) Kua vave pulihi pe e te ʼAtua ia te ʼu mamahi e tau mo te tagata. ʼO fakatalitali ki te temi ʼaia, ʼe lava hoko he fetogi ki totatou ʼaluʼaga mo kapau ʼe tou haga kia ‘Ia ʼaē ʼe fagono ki te faikole.’​—Pesalemo 65⁠:⁠2.