Ko Te Kau Maʼu Pepa ʼo Kalaate ʼe Ko He Kau Gāue Faʼafai ʼo Te Taʼukai!

“E LAHI te taukai, kae e lavaki te kau gaue. Koia, koutou faikole ki te Aliki o te taukai, ke ina fekaui mai he kau gaue ki tana taukai.” (Mateo 9⁠:​37, 38) Neʼe ʼi ai te ʼuhiga makehe ʼo te ʼu palalau ʼaia ki te kau maʼu pepa ʼo te 116 kalasi ʼo te Faleako Faka Tohi-Tapu ʼo Kalaate ʼo te Watchtower ʼaē neʼe teuteu ʼolo ki tanatou ʼu telituale faka misionea.

ʼI te Moeaki ʼaho 13 ʼo Malesio 2004, ko te toko 6 684 neʼe fakatahitahi ʼi te Faleako ʼo te Sosiete Watchtower ʼi Patterson, ʼi New York, pea mo ʼihi fale ʼo te Petele ʼaē neʼe feala ai ke muliʼi ʼi te ʼu televisio ia te polokalama ʼo te tufa ʼo te ʼu pepa ako, ʼaē neʼe fai ai te ʼu tokoni pea mo te ʼu fakaloto mālohi ki te kau ako ʼo te kalasi ʼaia. ʼE tou lava fakaʼaogaʼi fuli ia te tokoni ʼaē ke tou faʼafai ʼi tatatou gāue ʼi te taʼukai fakalaumālie.

Moʼo kamata te fono, ko Theodore Jaracz, ʼaē ʼe kau ʼi te Kolesi Pule pea neʼe kau ki te fitu kalasi ʼo Kalaate, neʼe ina faka maʼuhigaʼi ia te ʼu palalau ʼaenī ʼa Sesu: “Koutou ʼolo pea ke koutou fai ni ʼu tisipulo ʼi te hahaʼi ʼo te ʼu fenua fuli pe.” (Mateo 28⁠:​19, 20, MN ) Neʼe feʼauga lelei te ʼu palalau ʼaia mai te ʼaluʼaga ʼaē neʼe fekauʼi te kau maʼu pepa ke ʼolo ʼo gāue ʼi te ʼu fenua kehekehe e 20! Neʼe ina fakamanatuʼi ki te kau ako ko te ʼu meʼa fuli ʼaē neʼe nātou ako ʼi te Folafola ʼa te ʼAtua, neʼe tokoni age ke nātou liliu ko he kau gāue faʼafai ʼi te taʼukai fakalaumālie maʼuhiga ʼaupito.​—Mateo 5⁠:⁠16.

E Feafeaʼi Hanatou Fai Ke ʼi Ai He Fua ʼo Tanatou Gāue ʼi Te Taʼukai

Ko te ʼuluaki tēhina faiakonaki neʼe ko Robert Wallen, ʼaē kua lauʼi taʼu tana kau ki te faiako ʼo te Faleako ʼo Kalaate. ʼI tana palalau ki te kupu tāfito “Te Kalitate Maʼuhiga ʼAē Ko Te Manavaʼofa,” neʼe ina ʼui fēnei ki te kau ako: “Ko te manavaʼofa ʼe ko he meʼa ʼe lava logoʼi e te kau tuli pea mo lava sio kiai te hahaʼi kivi.” Neʼe ʼiloʼi e Sesu ia te ʼu mamahi ʼaē neʼe tau mo te hahaʼi, pea neʼe ina faigaʼi ke ina fakafimālieʼi ia nātou. (Mateo 9⁠:36) ʼE maʼu anai e te kau ako ia te ʼu faigamālie lahi ke nātou fai feiā​—ʼi te gāue fai faka mafola, mo te loto kokelekasio, mo te ʼapi ʼa te kau misionea, pea mo tonatou maʼuli faka taumatuʼa. Neʼe uga fēnei ia nātou e te tēhina faiakonaki: “Ke hā te kalitate maʼuhiga ʼaē ko te manavaʼofa ʼi tokotou maʼuli mokā koutou tauhi ki ʼihi. Ko takotou agalelei ʼe feʼauga lelei ki tokotou maʼuli ʼo te ʼaho fuli ʼi te ʼapi ʼa te kau misionea. Koia, koutou faiga ke koutou kofuʼi te manavaʼofa.”​—Kolose 3⁠:⁠12.

Ko te tēhina ʼaē neʼe hoa mai, ia Gerrit Lösch, ʼaē ʼe kau ʼi te Kolesi Pule pea neʼe kau ki te 41 kalasi ʼo Kalaate, neʼe ina fai te akonaki ʼaenī “Ko He Kau Fai Faka Mafola Ki Te Hāofaki.” (Isaia 52⁠:⁠7) Ke feala ki te hahaʼi ke nātou hāo mokā fakaʼauha anai te tuʼu ʼo te ʼu faʼahiga meʼa ʼaenī, ʼe tonu ke nātou maʼu te ʼatamai mālama totonu mai te Folafola ʼa te ʼAtua, mo nātou fakahā tanatou tui ki te kaugamālie, pea mo nātou papitema. (Loma 10⁠:10; 2 Timoteo 3⁠:15; 1 Petelo 3⁠:21) Kae ko te tupuʼaga tāfito ʼo tatatou tala te hāofaki ʼe mole ʼuhi ko te hāofaki ʼo te hahaʼi,  kae ko te fakavikiviki ki te ʼAtua. Koia, neʼe tokoniʼi fēnei e te Tēhina ko Lösch ia nātou ʼaē ka liliu ko te kau misionea: “Koutou ʼave te logo ʼo te Puleʼaga ki te ʼu potu taupotu ʼo te kele, pea mo koutou liliu ko he kau fai faka mafola faʼafai ʼo te hāofaki, pea koutou fai te ʼu potu fuli ʼaia moʼo fakavikiviki kia Sehova.”​—Loma 10⁠:⁠18.

Koʼeni te fehuʼi neʼe fai e Lawrence Bowen ʼaē neʼe kau ki te kau faiako ʼo Kalaate, “E Feafeaʼi Hakotou Fakatapa Te Mālama Fakalaumālie?” Neʼe ina toʼo te ʼu palalau ʼa Sesu ia Mateo 6⁠:22 pea mo ina fakaloto mālohiʼi te kau maʼu pepa ke “lelei” tonatou mata moʼo “fakatapa te mālama fakalaumālie ʼaē ʼe ina faka kolōliaʼi ia Sehova pea mo ʼaoga ki te hahaʼi.” Mai te kamataʼaga ʼo tona minisitelio, neʼe tuku e Sesu ia he faʼifaʼitaki lelei ʼo ʼuhiga mo te faʼahi ʼaia ʼo tokaga tāfito ki te fakahoko ʼo te finegalo ʼo te ʼAtua. Ko tana metitasio ki te ʼu meʼa fakaofoofo ʼaē neʼe akoʼi age e tana Tāmai ʼi te lagi, neʼe tokoni kia Sesu ke ina kātakiʼi tona ʼu fakahalaʼi e Satana ʼi te toafa. (Mateo 3⁠:16; 4⁠:​1-11) Neʼe fakamoʼoni e Sesu ia tana falala katoa kia Sehova ʼo fakahoko te meʼa ʼaē neʼe fakatotonu age e te ʼAtua ke ina fai. ʼO feiā mo te kau misionea, ke feala hanatou kātakiʼi te ʼu faigataʼaʼia ʼaē ka tau mo nātou, ʼe tonu ke nātou haga taupau tanatou ʼu agamāhani lelei ʼo te ako ʼo te Tohi-Tapu pea mo te falala katoa kia Sehova.

Ko Mark Noumair, ʼaē ʼe kau ki te kau faiako ʼo Kalaate pea neʼe kau ki te 77 kalasi ʼo Kalaate, neʼe  ina fakaʼosi te ʼu faiakonaki ʼaia ʼo palalau ki te akonaki ko tona kupu tāfito ʼaenī “Koʼeni Mātou ʼi Tou Nima.” (Sosue 9⁠:25) Neʼe ina fakaloto mālohiʼi te kau ako ke nātou faʼifaʼitakiʼi te aga ʼa te kau Kapaonite ʼo te temi muʼa. Logola ko Kapaone neʼe “ko he kolo lahi . . . pea ko ʼona tagata neʼe ko te ʼu tagata mālolohi,” kae neʼe mole loto ia te kau Kapaonite ke nātou ʼiloa peʼe ke foaki age hanatou ʼu meʼa ʼo mulimuli ki te ʼu meʼa ʼaē neʼe nātou loto kiai. (Sosue 10⁠:⁠2) Neʼe nātou tali lelei ke nātou liliu “ko he hahaʼi tae fafie pea mo ʼohu vai” maʼa te kau Levite moʼo lagolago ki te tauhi kia Sehova. (Sosue 9⁠:27) Ei, ko te kau maʼu pepa neʼe nātou ʼui ki te Sosue Lahi, ia Sesu Kilisito, “Koʼeni mātou ʼi tou nima.” ʼI te temi ʼaē ʼe nātou kamata ai tanatou gāue foʼou, ʼe tonu ke nātou tali te ʼu gāue fuli ʼe fakatotonu age e te Sosue Lahi.

Te ʼu Fakamatala Mo Te ʼu Fakafehuʼi

Neʼe fēnei te kupu tāfito ʼo te fai palalau ʼaē neʼe fai mo te kau ako, “Fakaāva Lahi Te Tohi-Tapu” pea neʼe takitaki e Wallace Liverance, ʼaē neʼe kau ki te 61 kalasi ʼo Kalaate pea mo kau ki te kau faiako. Neʼe nātou fakamatala te ʼu meʼa neʼe hoko ʼi tanatou fai faka mafola lolotoga te temi ʼaē neʼe nātou kau ai ki te ako. Neʼe ʼiloga lelei te malave ʼi tonatou loto tanatou ako loloto ia te Tohi-Tapu lolotoga māhina e nima, pea mo ina uga ia nātou ke nātou vaevae te ʼu meʼa ʼaia mo te hahaʼi. (Luka 24⁠:32) Lolotoga te ako ʼaia ia māhina e nima, neʼe ʼi ai te tēhina neʼe ina faka mafola te ʼu meʼa ʼaē neʼe ina ako ki tona tēhina totonu. Ko te faʼahi ʼaia neʼe ina fakaloto mālohiʼi tona tēhina ke ina kumi te kokelekasio ʼo te kolo ʼaē ʼe nofo ai pea mo kamata hana ako Tohi-Tapu. Kua liliu nei ko he kaugā fagona mole heʼeki papitema.

Hili te ʼu fakamatala, ko Richard Ashe mo John Gibbard neʼe nā fakafehuʼi te ʼu kaugana ʼa Sehova kua nātou fualoa ʼi te moʼoni, ʼo kau ki ai mo te ʼu tagata taupau feʼoloʼaki ʼaē neʼe fakahoko age kia nātou te ako makehe ʼi te Faleako ʼo te Sosiete Watchtower. Neʼe nātou kau ki te kau maʼu pepa ʼo te ʼu kalasi muʼamuʼa ʼo te Faleako ʼo Kalaate. Neʼe fakamatala e te tahi tēhina te ʼui fēnei ʼa te Tēhina ko Knorr lolotoga te ako: “ ʼI Kalaate, ʼe lahi anai te ʼu meʼa ʼaē ka koutou ako. Kae kapau ʼe koutou mavae ʼi henī kua koutou liliu ʼo fialahi, pea neʼe kovi te ako ʼaē neʼe mātou fai atu. ʼE mātou loto ke koutou mavae kua koutou liliu ʼo lotoʼofa.” Neʼe tokoniʼi te kau ako ʼo te 116 kalasi e te ʼu tagata taupau feʼoloʼaki ke nātou ʼoʼofa ki te hahaʼi pea mo vakaʼi te ʼu meʼa ʼaē ʼe ʼaoga kia nātou, mo nātou felogoi mo te hahaʼi ohage ko tona fai e Kilisito, pea ke nātou tali ʼaki te agavaivai te ʼu gāue fuli ʼaē ʼe fakatoʼo age kia nātou. ʼE mahino ia, ko te maʼuliʼi ʼo te tokoni ʼaia ʼe ʼaoga anai ki te kau misionea foʼou moʼo fakatuputupu tanatou gāue ʼi tanatou telituale.

ʼE Fekauʼi Nātou Ohage Ko He Kau Gāue Faʼafai ʼo Te Taʼukai!

Neʼe feala ki te nofoʼaki ke nātou logo ki te akonaki ʼa te tēhina ko Stephen Lett, ʼe kau ʼi te Kolesi Pule. Neʼe ina fai te akonaki tāfito ʼaenī: “ ʼE Fekauʼi Koutou Ohage Ko He Kau Gāue Faʼafai ʼo Te Taʼukai!” (Mateo 9⁠:38) Ka hoko he temi tānaki taʼukai, ʼe nounou te temi moʼo tānaki te fulumeto. ʼE ʼaoga ai ke gāue kinakina te kau tānaki taʼukai. Pea ʼe toe maʼuhiga age te gāue ʼaia lolotoga te fakaʼosi ʼo te tuʼu ʼaenī! ʼI te taʼukai fakalaumālie lahi ʼaenī, ʼe ʼi ai te hahaʼi ʼe tonu ke hāofaki. (Mateo 13⁠:39) Neʼe fakaloto mālohiʼi e te Tēhina ko Lett ia te kau maʼu pepa kae ʼaua naʼa nātou ‘fakapikopiko ʼi tanatou gāue,’ kae ke nātou “loto mafana” pea mo “tauhi [kia Sehova, MN ]” ʼi te taʼukai ʼaenī ʼe mole toe hoko anai ʼi he tahi temi. (Loma 12⁠:11) Neʼe toʼo e te tēhina faiakonaki ia te ʼu palalau ʼa Sesu: “Koutou hiki ake outou fofoga pea koutou mamata; kua hina te u gaueʼaga ki tona tanaki.” (Soane 4⁠:35) Neʼe ina fakaloto mālohiʼi ai te kau maʼu pepa ke nātou faʼafai ʼi te gāue ʼo te taʼukai ʼo nātou faiga fakamalotoloto ke nātou kaku ki te hahaʼi ʼi te temi pea mo te koga meʼa ʼaē ʼe faigamālie ai te hahaʼi pea mo fai fagonogono ʼi te ʼu faigamālie fuli. Ko tanatou tokaga ʼo fakatupu he ʼu faigamālie ʼe feala ke iku ai ki he fai fagonogono lelei. Ko Sehova ʼe ko he ʼAtua faʼafai, pea ʼe ina fakaʼamu kia tatou fuli ke tou faʼifaʼitakiʼi ia ia pea mo tou gāue mālohi ʼi te taʼukai fakalaumālie.​—2 Hau 19⁠:31; Soane 5⁠:⁠17.

ʼI te fakaʼosi ʼo te polokalama, ko te Tēhina ko Jaracz ʼaē neʼe pelesita ʼi te fono ʼaia, neʼe ina fakahā te ʼu fakaʼalofa mai te ʼu filiale kehekehe pea mo fakatoʼo ki te kau ako tanatou ʼu pepa. Neʼe lau e te tēhina ʼo te kalasi te tohi ʼa te kau maʼu pepa, ʼe fakahā ai tanatou fakafetaʼi ki te ako ʼaē neʼe fai age kia nātou. ʼE mahino ia ko te polokalama ki te tufa ʼo te ʼu pepa fakamoʼoni ʼa te 116 kalasi neʼe tokoni kia nātou fuli ʼaē neʼe kau kiai ke nātou liliu ko he kau gāue faʼafai ʼo te taʼukai.

[Paki ʼo te pasina 25]

KO TE ʼU AGAAGA ʼO TE KALASI

ʼE nātou ʼōmai mai te ʼu fenua e: 6

ʼE nātou ʼolo ki te ʼu fenua e: 20

Ko te kau ako e: 46

Te Fakafuafua ʼo tonatou ʼu taʼu: 34,2

Te Fakafuafua ʼo tanatou ʼu taʼu ʼi te moʼoni: 17,2

Te Fakafuafua ʼo tonatou ʼu taʼu ʼi te gāue temi katoa: 13,9

[Paki ʼo te pasina 26]

Ko te 116 Kalasi ʼo Te Faleako Faka Tohi-Tapu ʼo Kalaate ʼo Te Sosiete Watchtower

ʼI te lisi ʼaē ʼe tuʼu ʼi lalo, ʼe kamata mai muʼa ʼo aʼu ki muli, pea ko te ʼu higoa ʼaē ʼe tuʼu ʼi te lisi ʼe lau mai te faʼahi hema ki te faʼahi mataʼu.

(1) Ceansu, R.; Sparks, T.; Piña, C.; Turner, P.; Cheney, L. (2) Suardy, M.; Sjöqvist, Å.; Amadori, L.; Smith, N.; Jordan, A.; Boissonneault, L. (3) Matlock, J.; Ruiz, C.; Dular, L.; Vigneron, M.; Henry, K. (4) Sjöqvist, H.; Laux, J.; Ruzzo, J.; Gustafsson, K.; Boissonneault, R.; Jordan, M. (5) Henry, D.; Turner, D.; Kirwin, S.; Florit, K.; Ceansu, S. (6) Amadori, S.; Cheney, J.; Ross, R.; Nelson, J.; Ruiz, J.; Vigneron, M. (7) Florit, J.; Matlock, D.; Ross, B.; Laux, C.; Ruzzo, T.; Dular, D.; Kirwin, N. (8) Gustafsson, A.; Nelson, D.; Suardy, W.; Piña, M.; Smith, C.; Sparks, T.