‘Neʼe Ina Akoʼi Mātou Ke Mātou Fakaʼapaʼapa Ki Tana Lotu’

NEʼE fakahā age ki te Fakamoʼoni ʼa Sehova ʼi te koga meʼa ʼo Rovigo, ʼi Italia, kua ina maʼu te kosea pea ʼe kovi. Neʼe ʼave tuʼa lahi ki te lopitali, ʼo ina kole ai ke faitoʼo ia ia kae ʼaua naʼa fakaʼaogaʼi te toto, pea kua faitoʼo pe leva ʼi tona ʼapi e te kau afilimie ʼaē ʼe nātou taupau te hahaʼi ʼaē ʼe kosea.

Ko te tuagaʼane ʼaia ʼaē ʼe taʼu 36, neʼe tui mālohi pea mo loto mālohi, pea neʼe malave ki te kau tōketā pea mo te kau afilimie. Mole faʼa fualoa ʼi muʼa ʼo tona mate ʼuhi ko te kosea, ko te afilimie neʼe kau ki tona taupau neʼe faitohi ʼi te nusipepa ki te kau gāue afilimie ʼo ʼuhiga mo te meʼa ʼaē neʼe hoko ki te fafine mahaki ʼaia ʼe ina fakahigoaʼi ko Angela.

“Neʼe ia Angela ia te fia maʼuli. ʼE mahino ki te meʼa ʼaē ʼe hoko kia ia pea mo tona mahaki kovi, pea ohage pe ko mātou, ʼe ina faigaʼi ke ina maʼu he puleʼaki, he faitoʼo. . . . Ko mātou te kau afilimie, neʼe mātou kamata feʼiloʼiʼaki lelei mo ia. Neʼe mole fakafifihi mai ki tamatou tokoni age ki tona faitoʼo. Neʼe ina faka faigafua tamatou ʼu felogoi ʼuhi ko tana palalau fakahagatonu. Neʼe ko he meʼa fakafiafia tona taupau, koteʼuhi neʼe ko he lakaga ʼaia ke mātou felāveʼi ai mo he tahi ʼe fakamalotoloto pea neʼe ko he lakaga ʼaoga. . . . Neʼe mātou manatu atu aipe ʼe faigataʼa anai hamatou faitoʼo tona mahaki ʼuhi ko tana lotu.” Neʼe ko te manatu ʼaia ʼa te afilimie, koteʼuhi maʼa ia neʼe tonu ke ʼai he foʼi huki toto kia Angela, kae neʼe fakafisi kiai.​—Gaue 15⁠:​28, 29.

“ ʼI tomatou ʼuhiga hahaʼi ʼe mātou taupau te hahaʼi mahaki, neʼe mātou ʼui age kia Angela neʼe mole mātou manatu tahi mo ia ʼo ʼuhiga mo te tonu ʼaē neʼe ina fai, kae ʼaki tana fakamahino, neʼe mātou mahino ai ki te maʼuhiga ʼaupito ʼo te maʼuli kia ia. Neʼe mātou toe mahino ai foki ki te maʼuhiga ʼo tana lotu kia ia pea mo tona famili. Neʼe pipiki maʼu aipe ia Angela ki tana lotu. Neʼe mole lotovaivai ʼi tana mahaki. ʼE lototoʼa pea mo loto faiga. ʼE fia maʼuli, pea ʼe faiga mālohi ke maʼuli, pea koia ʼaē ʼe kei hoko atu ai tona maʼuli. Neʼe ina fakahā tana fia pipiki ki te tonu ʼaē kua ina fai, pea mo tana tui. ʼE ina maʼu he lotomālohi ʼi te agamāhani ʼe mole maʼu e mātou, pea ʼe mole mātou maʼu he tui mālohi ohage ko ia. . . . Neʼe akoʼi mai e Angela ia te maʼuhiga ʼaē ke mātou fakaʼapaʼapa ki tana lotu, tatau aipe peʼe mole ʼalutahi mo tomatou ʼu maʼua gāue. . . . ʼE mātou ʼiloʼi papau ʼe maʼuhiga ʼaupito te ʼu meʼa ʼaē neʼe akoʼi mai e Angela, koteʼuhi ʼe mātou felāveʼi tuʼumaʼu mo te hahaʼi kehekehe, mo tonatou ʼu ʼaluʼaga kehekehe, mo te ʼu lotu kehekehe, pea ʼe mātou lava ako mai te hahaʼi kehekehe pea mo foaki age kia nātou ia he faʼahiga meʼa pe.”

Neʼe faka maʼuhigaʼi leva e te nusipepa ki te kau Afilimie Italia ia te ʼu Lekula Ki Te ʼu Aga ʼe tonu ke fai e te hahaʼi ʼaē ʼe nātou fai te ʼu faitoʼo, pea ko te ʼu lekula ʼaia neʼe tāʼofi ʼi te taʼu 1999, ʼaē ʼe ʼui fēnei ai: “ ʼE fai te gāue ʼa te kau afilimie, ʼo nātou fakaʼapaʼapa ki te lotu ʼo ia ʼaē ʼe mahaki, feiā mo tana agaʼi fenua, mo te aga ʼaē ʼe tonu ke ina fai, peʼe ko he tagata peʼe ko he fafine.” ʼI ʼihi temi, ʼe lagi faigataʼa ki te kau tōketā mo te kau afilimie ke nātou fakaʼapaʼapa ki te lotu ʼo ia ʼaē ʼe mahaki, kae ʼe fai he fakafetaʼi kia nātou ʼaē ʼe nātou loto lelei ke nātou fakaʼapaʼapa ki te loto ʼo nātou ʼaē ʼe mahahaki.

Ko te fakatotonu ʼa te kau Fakamoʼoni ʼa Sehova ʼo ʼuhiga mo tonatou maʼuli pea mo tonatou ʼu faitoʼo, ʼe ko he ʼu meʼa neʼe nātou fakakaukauʼi lelei. Kia nātou ʼe maʼuhiga ʼaupito ia te meʼa ʼaē ʼe ʼui e te Tohi-Tapu, pea ohage ko te meʼa ʼaē neʼe hoko kia Angela, ko nātou ʼe mole ko he ʼu hahaʼi ʼe tauhi fakavale. (Filipe 4⁠:⁠5) ʼI te malamanei katoa, kua kaugamālie te kau gāue taupau mahaki kua nātou lotolelei ke nātou fakaʼapaʼapa ki te leʼo ʼo loto ʼo te kau Fakamoʼoni ʼaē ʼe mahahaki.