Te Tofiʼa ʼAē ʼe Maʼuhiga ʼAupito

ʼI TONA temi matuʼa, neʼe ʼui fēnei e te ʼapositolo ko Soane: “E mole lahiʼage toku fiafia ki niʼihiʼage mea i te mea aeni, i taku logo e mauli aku fanau i te mooni.”​—3 Soane 4.

Neʼe palalau te ʼapositolo agatonu ʼaia ki tana fānau fakalaumālie. Kae ko te meʼa ʼaē neʼe logoʼi e te ʼapositolo ʼe lagi logoʼi e te ʼu mātuʼa tokolahi. Neʼe nātou fai te ʼu faiga mālohi moʼo pusiaki tanatou fānau ʼi “te akonaki pea mo te manatu ʼa Sehova,” pea ʼi te temi nei ʼe nātou fiafia ʼi tanatou sisio ki te lahilahi ake ʼo tanatou fānau ʼo “mauli . . . i te mooni.” (Efeso 6⁠:​4, MN ) ʼI tona fakahagatonu, ko te akoʼi ʼo takita fānau ki te ala ʼo te maʼuli heʼegata ʼe tou foaki ai kia nātou he tofiʼa ʼe maʼuhiga ʼaupito. Ka tou pipiki ki te ʼAtua, ʼo tou maʼuliʼi te ʼu meʼa ʼaē ʼe loto ia Sehova ke fai e te kau Kilisitiano, ʼe tou “mau te fakapapau o te mauli, o te mauli nei pea mo te mauli kahau.”​—1 Timoteo 4⁠:⁠8.

ʼE maʼuhiga ʼaupito kia Sehova te Tāmai haohaoa ia te ʼu mātuʼa Kilisitiano ʼaē ʼe nātou faiga mālohi ʼi te faʼahi fakalaumālie ke nātou akoʼi tanatou fānau. Ka muliʼi fakalelei e te fānau ia te ako fakalaumālie ʼaia, pea ʼe nātou fiafia ʼaupito ʼi te tauhi fakatahi mo tanatou ʼu mātuʼa. Ka lalahi te fānau ʼaia, pea ʼe nātou manatuʼi te ʼu tuʼuga meʼa fakafiafia ʼaē neʼe hoko kia nātou. ʼE ʼi ai ʼihi ʼe nātou manatuʼi ʼaki he loto fiafia tanatou ʼuluaki kau ki te Ako ʼo Te Minisitelio Faka Teokalatike. * Peʼe lagi nātou manatuʼi tanatou ʼuluaki lau ʼo he vaega faka Tohi-Tapu ʼi tanatou fai faka mafola ʼi te ʼu ʼapi mo tanatou ʼu mātuʼa. ʼE mole nātou lava galoʼi te lau age e tanatou ʼu mātuʼa ia Te Tohi ʼo Te ʼu Hisitolia Faka Tohi-Tapu peʼe ko te tohi Écoutez le grand Enseignant. * ʼE manatuʼi e Gabriel ia te meʼa ʼaē neʼe ina leleiʼia ʼaupito: “ ʼI toku taʼu fā, ʼi te ʼaho fuli neʼe hiva mai taku faʼe kae lolotoga kuka. ʼE ʼi ai te katiko ʼe kei ʼau manatuʼi lelei. Ki muli age, neʼe tokoni mai te hiva ʼaia ke ʼau faka maʼuhigaʼi ia te gāue kia Sehova.” ʼE lagi mo koutou ʼe koutou manatuʼi te hiva matalelei ʼaia ʼe talanoa kiai ia Gabriel. Ko te numelo 157 ʼi te tohi hiva Tou Vikivikiʼi Ia Sehova ʼi Tatatou ʼu Hiva, pea ko tona kupu tāfito “Atolasio Kia Sehova ʼi Tou Temi Tūpulaga.”

ʼE kamata fēnei te hiva: “Neʼe viki e te tamaliki, te ʼAlo ko Sesu Kilisito.” Neʼe ʼi ai te tamaliki neʼe nātou maʼu te pilivilesio ʼaē ko te fakatahi mo Sesu, pea ʼe mahino ia neʼe nātou fakafiafiaʼi ia ia ʼaki tanatou aga fakahagatonu. Neʼe fakaʼaogaʼi e Sesu ia te akoʼi gafua ʼo te tamaliki  liliki ohage ko he faʼifaʼitaki ke muliʼi e tana kau tisipulo. (Mateo 18⁠:​3, 4) Koia ʼe maʼuhiga te tamaliki ʼi te tauhi ʼa Sehova.

ʼAki te faʼifaʼitaki lelei ʼo tanatou aga​—ʼi tonatou ʼapi, mo te faleako, pea mo te tahi ʼu koga meʼa​—ʼe tokolahi te tamaliki neʼe nātou faka kolōliaʼi te ʼAtua mo tonatou famili. Ko he tapuakina kia nātou hanatou maʼu ʼo he ʼu mātuʼa ʼe tui. (Teutalonome 6⁠:⁠7) Ko te ʼu mātuʼa Kilisitiano ʼe nātou fai te meʼa ʼaē ʼe ʼui e te ʼAtua ʼi tona ʼuhiga Tāmai ʼofa, ʼaē ʼe ina akoʼi tana kau fakatupu ke nātou haʼele ʼi te ala ʼaē ʼe tonu ke nātou haʼele ai. Pea ʼe maʼu ai te ʼu tapuakina e te ʼu mātuʼa! Pea kia nātou leva, ʼe nātou fiafia mokā “talagafua ki te ʼu mātuʼa te fānau”! (Isaia 48⁠:​17, 18) Ko Angélica, ʼaē ʼe gāue ʼi te temi nei ʼi te ʼu pilō ʼo te kau Fakamoʼoni ʼa Sehova ʼi Mekesike, ʼe ina ʼui fēnei: “Neʼe faiga tuʼumaʼu taku ʼu mātuʼa ke nā maʼuliʼi te ʼu pelesepeto ʼo te Tohi-Tapu. Neʼe ʼau fiafia ai ʼi te temi ʼaē neʼe kei ʼau veliveli ai. Neʼe ʼau fiafia.”

ʼE maʼuhiga ʼaupito ki te taʼi kau Kilisitiano ʼaia, ia te taupau fakalelei ʼo te tofiʼa fakalaumālie ʼaē neʼe foaki age e tanatou ʼu mātuʼa. ʼE lagi koutou lahilahi ake ʼi he famili ʼe akoʼi atu ai te ʼu aga faka Kilisitiano ʼaē ʼe tonu ke fai. Kapau koia ʼaia, ʼe fakaloto mālohiʼi fēnei koutou e te katiko: “Tūpulaga, ke ke nofo maʼa.” ʼE hoko mai anai te temi kia koutou ke koutou fai he tonu, koia ʼi te temi nei ke “ke falala kia Sehova./Fakamamaʼo ʼi te hahaʼi ʼaē ʼe agakovi.”

Kapau ʼe ke faka maʼuhigaʼi fau tou ʼofainaʼi e te hahaʼi, pea ʼe feala ke pulinoa te ako ʼaē neʼe fai atu pea mo faka ʼalunoa tau ʼu ʼamanaki ki te ka haʼu. Ko tau faigaʼi ʼaē ke ke logona ʼe feala aipe ke mole kei tokagaʼi koe. Ko ʼihi tūpulaga neʼe nātou fakakaugā ki te kau tūpulaga neʼe lagi mole nātou māmio kovi fau peʼe lagi nātou agalelei, kae ʼe mole nātou leleiʼia te ʼu lekula ʼo te maʼuli faka Kilisitiano. Neʼe ʼasi lelei te faʼahi ʼaia ʼi te meʼa neʼe hoko kia Tara, ʼaē ʼi te foʼi fime viteo Les jeunes sʼinterrogent . . . Comment se faire de vrais amis ? ʼE mahino anai ki te kau Kilisitiano tūpulaga ohage ko Tara, ko te fakakaugā kia nātou ʼaē ʼe mole nātou faka maʼuhigaʼi te tauhi moʼoni, ʼe ko te ʼu fakakaugā kovi ʼe nātou fakatupu tuʼutāmaki. ʼE ʼaoga ni ʼu taʼu moʼo fakatuputupu he ʼu aga ʼe lelei, kae ʼe vave tona maumauʼi.

Koia ʼe mole faigafua takita pipiki ki te ʼAtua. Kae ohage ko tona ʼui e te hiva, “ke ke manatuʼi te ʼAtua,/ʼO tauhi ʼaki te moʼoni,” ʼe feala ai anai ke koutou fakatuʼu he fakatafito mālohi ke koutou maʼu ai te fiafia moʼoni. Pea ʼe ke fakavikiviki kia te ia ʼi muʼa ʼo te aʼu mai ʼo te temi matuʼa. ʼE koutou mahino lelei anai ʼaki te tokaga  ʼofa ʼa Sehova, ʼe mole ʼi ai he meʼa ʼe ina lava tāʼofi ia koutou mai te fai ʼo te meʼa ʼaē ʼe lelei kia te ia. Ko te faʼahiga fai pe ʼaia ke koutou tuputupu ai ʼo koutou liliu ko he tahi kua lahi ʼe aga fakapotopoto pea mo pipiki ki te ʼAtua. Pea tahi ʼaē meʼa, kapau ʼe koutou fakaʼaogaʼi fakapotopoto te ako faka Kilisitiano, pea ʼe koutou maʼu ai anai te faigamālie ʼaē ke koutou “fakafiafia ia Sehova lolotoga [tokotou] tūpulaga.” ʼE mole koa la ko he pilivilesio lahi ʼaia?​—Tāʼaga Lea 27⁠:⁠11.

Koia, ʼu tūpulaga, koutou manatuʼi tuʼumaʼu te maʼuhiga ʼo te ako ʼaē ʼe foaki atu e Sehova pea mo takotou ʼu mātuʼa Kilisitiano. ʼOfa pe ke koutou fai te meʼa ʼaē ʼe leleiʼia e Sehova ʼuhi ko tona ʼofa ʼaē kia koutou. Ohage ko Sesu Kilisito pea mo te tūpulaga ko Timoteo, ʼe koutou fakafiafia anai takotou Tāmai ʼaē ʼe ʼi selo pea mo takotou ʼu mātuʼa. Pea kapau leva ʼe koutou liliu ʼi he temi ʼo maʼu fānau, pea ʼe mahino ia ʼe koutou manatu tahi anai mo Angélica, ʼaē ʼe ina ʼui fēnei: “Kapau ʼe ʼau maʼu haku tamasiʼi, ʼe ʼau faiga mālohi anai ke ʼau fakatuputupu ʼi tona loto talu mai tana kei veliveli te ʼofa kia Sehova, ke liliu te ʼofa ʼaia ko hona takitaki maʼuhiga ʼaupito ʼi tona maʼuli.” ʼE mahino ia, ko te ala faitotonu ʼaia ʼe ina taki ki te maʼuli heʼegata ʼe ko he tofiʼa ʼe maʼuhiga ʼaupito!

[Kiʼi nota]