ʼE Koutou Faka Tui Koa ʼe Maʼuli Moʼoni Te Tevolo?

ʼE FAKAHĀ ʼi te Tohi-Tapu, ko te Tevolo ʼe maʼuli moʼoni. Ohage pe ko tata mole sio ki te ʼAtua, ʼe mole feala ke tou sio mata ki te Tevolo. ʼE ʼui ʼi te Tohi-Tapu: “Ko te Atua e laumalie.” (Soane 4:24) Koia, ko te Tevolo ʼe ko te laumālie fakapulipuli. Kae ko tona kehekehe mo te Tupuʼaga, heʼe ko te Tevolo neʼe ʼi ai tona kamataʼaga.

ʼI muʼa ʼo tana fakatupu ia te tagata, neʼe faʼu e Sehova ʼAtua ia te ʼu tuʼuga laumālie fakapulipuli. (Sopo 38:​4, 7) ʼI te Tohi-Tapu, ʼe fakahigoaʼi te ʼu laumālie ʼaia ʼe ko te kau ʼāselo. (Hepeleo 1:​13, 14) Ko te ʼAtua neʼe ina faʼu ia nātou fuli ʼe ko he ʼu laumālie haohaoa​—neʼe mole he tahi neʼe tevolo pe neʼe agakovi. Kae neʼe tupu feafeaʼi ia te Tevolo? ʼI te Tohi-Tapu, ko te kupu “tevolo” ko tona faka ʼuhiga “ko he tahi ʼe fasituʼu,” pea ʼe faka ʼuhiga ki he tahi ʼe loi ʼo ʼuhiga mo niʼihi. Pea ko te kupu “Satana” ko tona faka ʼuhiga “Ko He Tahi ʼe Fakafeagai.” Ohage pe ko he tahi neʼe agatonu ʼi te kamata kae ʼe liliu ko he tagata kaihaʼa he neʼe kaihaʼa, ʼo toe feiā pe, ko te tahi ʼāselo haohaoa ʼa te ʼAtua neʼe mulimuli ki tona holi ʼaē ʼe mole lelei pea neʼe liliu ko Satana te Tevolo. ʼE fakamahino mai ʼi te Tohi-Tapu te ʼu meʼa ʼaē ʼe hoko ʼi muʼa ʼo te fai ʼo he agahala: “ ʼE ʼahiʼahiʼi te tagata takitokotahi mokā ina tuku ia ia ke taki pea mo kākāʼi e tona holi ʼo ia totonu. Pea ko te holi, ka fakatupu, pea ʼe ina fānauʼi te agahala, pea ko te agahala, ka kua ʼosi fai, pea ʼe ina fakatupu te mate.”​—Sakopo 1:​14, 15, MN.

ʼE mahino ia, neʼe hoko te ʼaluʼaga ʼaia ʼi te kamata. ʼI te temi ʼaē neʼe faʼu ai e Sehova ʼAtua ia te ʼuluaki taumātuʼa ia Atama mo Eva, ko te ʼāselo ʼaē neʼe ʼamanaki fakafeagai ki te ʼAtua, neʼe ina tokagaʼi ia nāua. Neʼe ina ʼiloʼi te fakatotonu ʼa Sehova kiā Atama mo Eva ke nā fakafonu te kele ʼaki ni hahaʼi agatonu, ʼe nātou atolasio anai ki te Tupuʼaga. (Senesi 1:28) ʼI te temi ʼaia neʼe mahino ai ki te ʼāselo ʼaia, ʼe feala anai hana maʼu he fakavikiviki pea mo he fakaʼapaʼapa mai te tagata. ʼI tana mānumānu ki te ʼu faʼahi ʼaia, neʼe ina holi ai leva ki te pilivilesio ʼaē ʼe ʼāteaina pe ki te Tupuʼaga​—ia te tauhi age ʼa te hahaʼi kiā te ia. ʼO mole ʼui ke ina līaki te manatu kovi ʼaia, kae ko te foha fakalaumālie ʼo te ʼAtua neʼe ina fakatuputupu te holi ʼaia ʼo aʼu ki tana fakahoko he loi pea mo he fakafeagai ki te ʼAtua. Tou vakaʼi age muʼa te meʼa ʼaē neʼe ina fai.

Neʼe fakaʼaogaʼi e te ʼāselo fakafeagai ʼaia ia he gata ke palalau ki te ʼuluaki fafine ko Eva. Neʼe fehuʼi  fēnei e te gata kiā Eva: “ ʼE moʼoni koa la neʼe ʼui atu e te ʼAtua ke ʼaua naʼa koulua kai ki te ʼakau fuli pe ʼaē ʼi te ʼōloto?” ʼI te fakahā age e Eva te fakatotonu ʼa te ʼAtua pea mo te tautea ʼaē ka hoko anai mo kapau ʼe nā talagataʼa, neʼe tali fēnei age e te gata: “ ʼE moʼoni ia ʼe mole koulua mamate anai. Heʼe ʼiloʼi e te ʼAtua, ko te ʼaho pe ʼaē ʼe koulua kai anai kiai [te fua ʼo te fuʼu ʼakau ʼi te lotomalie ʼo te ʼōloto], ʼe ava anai tokolua ʼu mata pea ʼe koulua hage anai ko te ʼAtua, ʼo ʼiloʼi te meʼa ʼaē ʼe lelei pea mo te meʼa ʼaē ʼe kovi.” (Senesi 3:​1-5) ʼI tana ʼu palalau ʼaia, neʼe ina fia ʼui ko te ʼAtua neʼe mole ina fakahā age ia te moʼoni kiā Atama mo Eva. ʼI tana kai ki te fuaʼi ʼakau, neʼe manatu ia Eva ʼe hage anai ia ko te ʼAtua, ʼe ina filifili ʼāteaina anai ia te meʼa ʼaē ʼe lelei peʼe kovi kiā ia totonu. Neʼe ko te ʼuluaki loi ʼaia. ʼAki tana ʼu palalau ʼaia kiā Eva, neʼe liliu ai te ʼāselo ʼo gutuloi, pea mo fakafeagai ki te ʼAtua. Koia ʼe ʼui ʼi te Tohi-Tapu ko te fili ʼaia ʼo te ʼAtua ʼe ko “te gata olisinale, ia ia ʼaē ʼe fakahigoaʼi ko te Tevolo mo Satana.”​—Apokalipesi 12:​9, MN.

“Koutou Nonofo Tōkakaga”

Neʼe iku te loi ʼaē neʼe fai e te Tevolo kiā Eva. ʼE ʼui fēnei ʼi te Tohi-Tapu: “Pea neʼe sio ai te fafine ko te fuʼu ʼakau neʼe lelei ki te kai pea neʼe ko he meʼa neʼe holi kiai te ʼu mata, ʼio, ko te ʼakau neʼe lelei tona sioʼi. Koia neʼe ina toʼo ai tona fuaʼi ʼakau ʼo kai. Pea neʼe ina toe ʼavage foki ki tona ʼohoana ʼi te temi ʼaē neʼe nofo ai mo ia, pea neʼe ina kai.” (Senesi 3:6) Neʼe fakalogo ia Eva kiā Satana kae neʼe talagataʼa ki te ʼAtua. Neʼe ina toe taki mai mo Atama ke ina maumauʼi mo ia te lao ʼa te ʼAtua. Koia, neʼe iku te ʼu kākā ʼa te Tevolo ki te ʼuluaki taumātuʼa he neʼe nā fakafeagai mo nāua ki te ʼAtua. Talu mai te ʼaho ʼaia, kua mālohi te ʼu fai fakahala ʼa Satana ki te hahaʼi. He koʼe ʼe ina fai ia te ʼu fakahala ʼaia? ʼE ina fai moʼo fakamaliu kehe ia te hahaʼi mai te tauhi ki te ʼAtua moʼoni, kae nātou tauhi age kiā te ia. (Mateo 4:​8, 9) Koia, ʼe fakatokaga fēnei mai ʼi te Tohi-Tapu: “Koutou nonofo ʼalaʼala, koutou nonofo tōkakaga. Ko tokotou fili, ia te Tevolo, ʼe feʼaluʼaki ohage ko he laione ʼe gugulu, ʼo ina kumi ke ina kai he tahi.”​—1 Petelo 5:8, MN.

ʼE fakahā lelei ʼi te Tohi-Tapu ko te Tevolo ʼe maʼuli moʼoni​—ʼe ko he ʼāselo neʼe ina fakaliliu ia ia totonu ko he laumālie agakovi pea mo kākā! Ke feala hatatou nonofo tōkakaga, ʼe tonu ke tou tui papau ko te Tevolo ʼe maʼuli moʼoni. Kae ʼe mole gata pe ʼi tatatou nonofo tōkakaga pea mo nonofo ʼalaʼala, ʼe tonu ke tou toe mahino ki te ʼu “fakatuʼutuʼu” pea mo te ʼu gāue ʼa Satana moʼo fakahēʼi ia te hahaʼi. (2 Kolonito 2:​11, MN ) Koteā tana ʼu kākā? Pea ʼe tou lava tekeʼi feafeaʼi tana ʼu kākā ʼaia?

ʼE ʼIloʼi e Te Tevolo Te ʼu Vaivaiʼaga ʼo Te Tagata

Talu mai te fakatupu ʼo te malamanei neʼe sioʼi e te Tevolo te maʼuli ʼa te hahaʼi. ʼE ina ʼiloʼi te ʼu agaaga ʼa te tagata​—te ʼu meʼa ʼe ʼaoga kiā ia, te ʼu meʼa ʼaē ʼe ina leleiʼia, pea mo tana ʼu holi. ʼE ʼiloʼi lelei e Satana, neʼe fakatupu te tagata ʼaki te holi ki te ʼu meʼa fakalaumālie, pea neʼe poto te Tevolo ʼi te gāueʼi ʼo te faʼahi ʼaia. ʼO feafeaʼi? Neʼe ina akoʼi ki te malamanei ia te ʼu akonaki faka lotu hala. (Soane 8:44) ʼE lahi te ʼu akonaki faka lotu ʼo ʼuhiga mo te ʼAtua ʼe fefakafeagaiʼaki pea ʼe faigataʼa hatatou mahino kiai. ʼI takotou manatu, ko ai koa ʼaē neʼe ina fai ia te fakatuʼutuʼu ʼaia? ʼE mole feala ke moʼoni ia he ʼu akonaki ʼe fefakafeagaiʼaki. Koia, neʼe faʼu pe e Satana te ʼu tuʼuga akonaki faka lotu ʼaia moʼo fakahalaʼi ʼo te hahaʼi. ʼO ʼuhiga mo ia, ʼe ʼui ʼi te Tohi-Tapu ʼe ko “te atua o te malama-nei” pea ʼe ina fakakiviʼi te ʼatamai ʼo te hahaʼi.​—2 Kolonito 4:⁠4.

Kapau ʼe mahino te hahaʼi ki te ʼAtua moʼoni pea ʼe nātou ʼiloʼi anai te ʼu akonaki faka lotu hala. ʼI te Tohi-Tapu, ʼe fakatatau te moʼoni ʼo te Folafola ʼa te ʼAtua ki te kiliʼi pipi ʼaē neʼe haʼi ʼi te koga loto ʼo te tagata solia ʼi te temi muʼa, moʼo puipui tona ʼu ifiifi. (Efeso 6:14) Kapau ʼe koutou ako ke koutou maʼu ia te ʼatamai mālama ʼo ʼuhiga mo te Tohi-Tapu pea mo mulimuli ki tana ʼu fakatotonu, pea ʼe hage pe ʼe koutou haʼi he kiliʼi pipi ʼi tokotou koga  loto, heʼe puipui anai koutou e te Folafola ʼa te ʼAtua mai te ʼu akonaki faka lotu hala.

ʼI te holi ʼa te tagata ki te ʼu meʼa fakalaumālie neʼe ina fia ʼiloʼi te ʼu meʼa ʼaē ʼe mole ina ʼiloʼi. Koia neʼe kākāʼi ai ia ia e Satana ʼaki he tahi ʼu loi. Neʼe fakaʼaogaʼi e Satana te ʼu meʼa fai fakalauʼakau moʼo puleʼi te tokolahi, heʼe ina ʼiloʼi tanatou fia mahino ki te ʼu meʼa fakatemonio pea mo fakamanamana. Ohage ko te mounu ʼaē ʼe fakaʼaogaʼi e he tagata kapu manu moʼo puke he manu, ʼe toe feiā mo Satana moʼo fakahalaʼi te hahaʼi ʼo te malamanei, ʼe ina fakaʼaogaʼi te ʼu meʼa fai fakalauʼakau, ohage ko te fai fakakikite ʼaki te ʼu nima, te lau ʼo te ʼu fetuʼu, te fakamoe ʼa he tahi ʼaki he ʼu palalau moʼo puleʼi tona ʼatamai, te ʼu meʼa fakatemonio, te fai fakakikite ʼaki te ʼu kate.​—Levitike 19:31; Pesalemo 119:110.

ʼE koutou lava puipui feafeaʼi ia koutou ke ʼaua naʼa koutou tō ki te hele ʼo te fai fakalauʼakau? ʼE ʼui fēnei iā Teutalonome 18:​10-12: “ ʼAua naʼa maʼu ʼi tou loto fale he tahi ʼe ina tutu tona foha peʼe ko tona ʼofafine ʼi te ʼafi, peʼe ko he tahi ʼe fai fakakikite, peʼe ko he tahi ʼe gaohi meʼa fakamanamana, peʼe ko he tahi ʼe ina kumi he ʼu fakaʼiloga, peʼe ko he tahi ʼe gaohi meʼa fakatemonio, he tahi ʼe gaohi meʼa mana, he tahi ʼe kumi ki he ʼu fakaʼiloga, he tahi ʼe fai fakalauʼakau, he tahi ʼe na fakalauʼakauʼi he tahi ʼaki he faitoʼo, he tahi ʼe ʼalu ki he tagata ʼe palalau mo te ʼu laumālie, he tahi ko tana gāue ʼe ko te fakakikite ʼo te ʼu meʼa ʼaē ka hoko. Heʼe ko te tagata fuli pe ʼaē ʼe ina fai te ʼu meʼa ʼaia ʼe ko he meʼa fakalialia ia kiā Sehova, pea ʼe tupu la ko te ʼu meʼa fakalialia ʼaia ʼaē ʼe kapu ai e Sehova tou ʼAtua, ia nātou ʼaia mai ia te koe.”

ʼE tala fakahagatonu mai ʼi te Tohi-Tapu: Ke ʼaua naʼa tou kau ki he faʼahiga meʼa ʼe lagolago ki te ʼu meʼa fai fakalauʼakau. Pea koteā te ʼu meʼa ʼaē ʼe tonu ke koutou fai, mo kapau ʼe koutou fia ʼāteaina ʼi te temi nei mai he aga fakalauʼakau ʼe koutou kau ai? ʼE koutou lava faʼifaʼitaki te aga ʼa te kau ʼuluaki Kilisitiano ʼo Efeso. ʼI te temi ʼaē neʼe nātou tali ai “te folafola ʼa Sehova,” ʼe ʼui ʼi te Tohi-Tapu ko te “tokolahi iā nātou ʼaē neʼe nātou fai te ʼu meʼa fakatemonio, neʼe nātou tānaki tanatou ʼu tohi pea nātou tutu iā muʼa ʼo te hahaʼi fuli.” Neʼe totogi kovi te ʼu tohi ʼaia, he neʼe 50 000 piesi siliva. (Gaue 19:​19, 20, MN ) Kae ko te kau Kilisitiano ʼo Efeso, neʼe mole nātou toe lotolotolua, neʼe nātou tutu atu aipe tanatou ʼu tohi.

ʼE Fakaneke e Satana Te ʼu Vaivaiʼaga ʼa Te Hahaʼi

Ko te ʼāselo haohaoa neʼe liliu ko Satana te Tevolo he neʼe mulimuli ki tona holi ʼaē ke tauhi age te hahaʼi kiā te ia. Neʼe ina toe fakaneke ʼi te loto ʼo Eva ia te fiatuʼu, te holi ʼaē ke tatau mo te ʼAtua. Ia ʼaho nei, ʼe puleʼi e Satana ia te tokolahi ʼi tana fakaneke ʼi tonatou loto ia te fiatuʼu. Ohage la, ko ʼihi ʼe nātou manatu ʼe lelei age tonatou lanu, mo tonatou fenua, pea mo tonatou puleʼaga. Kae ko he aga ʼe fakafeagai ki te ʼu akonaki faka Tohi-Tapu! (Gaue 10:​34, 35) ʼE ʼui fakalelei ʼi te Tohi-Tapu: “[Ko te ʼAtua] ʼaki te tagata e tahi neʼe ina fakatupu ʼaki te ʼu puleʼaga tagata fuli pe.”​—Gaue 17:​26, MN.

Ko te puleʼaki lelei moʼo tauʼi te fiatuʼu ʼaē ʼe fakaneke e Satana ke tou maʼu, ʼe ko te agavaivai. ʼE tokoniʼi fēnei mai tatou ʼi te Tohi-Tapu: “ ʼAua naʼa lahi fau takotou manatu ʼo ʼuhiga mo koutou ʼo fakalaka ʼi te manatu ʼaē ʼe tonu ke koutou maʼu.” (Loma 12:​3, MN ) ʼE ʼui fēnei ʼi te Tohi-Tapu: “Ko te ʼAtua ʼe  fakafeagai ki te hahaʼi fiatuʼu, kae ʼe ina foaki te ʼofa makehe ki te hahaʼi agavaivai.” (Sakopo 4:​6, MN ) ʼE tonu ʼi totatou maʼuli ʼo te ʼaho fuli ke tou agavaivai pea mo maʼuliʼi te ʼu kalitātē ʼaē ʼe leleiʼia e te ʼAtua, ke feala ai hatatou tekei te ʼu fakahala ʼa Satana.

ʼE toe fia gāueʼi foki e te Tevolo te vaivaiʼaga ʼa te tagata, ʼaē ko te ʼu holi kovi ʼo ʼuhiga mo te ʼu felāveʼi fakasino. Neʼe fakatuʼutuʼu e Sehova ʼAtua ke maʼuli fiafia te tagata. ʼE maʼuli fiafia anai te tagata, mo kapau ʼe ina fai te ʼu felāveʼi fakasino ʼo mulimuli pe ki te ʼu tuʼakoi ʼaē neʼe fakagafua mai e te ʼAtua. Kae ko Satana ʼe ina faigaʼi ke fakahoko te ʼu holi ʼaia ʼi he ʼu ʼaluʼaga heʼeʼaoga. (1 Kolonito 6:​9, 10) ʼE tonu ke koutou manatu tuʼumaʼu ki he ʼu meʼa ʼe maʼa pea mo fakapoipoi. (Filipe 4:8) ʼAki te ʼu manatu ʼaia, ʼe feala ai anai ke koutou lolomi takotou ʼu manatu pea mo takotou ʼu holi.

Koutou Haga Fakafeagai Ki Te Tevolo

ʼE koutou lava tekeʼi koa te Tevolo? Ei, ʼe koutou lavaʼi. ʼE fakapapau fēnei mai ʼi te Tohi-Tapu: “Koutou fakafehagai ki te temonio pea e hola mamao anai maià koutou.” (Sakopo 4:7) Tatau aipe peʼe koutou fakafeagai kiā Satana, kae ʼe hoko atu pe anai tana fakatupu ia he ʼu faigataʼaʼia ʼuhi ko takotou ako ia te ʼatamai mālama ʼo ʼuhiga mo te ʼAtua. ʼE faigaʼi anai e te Tevolo ke ina fakahalaʼi koutou ʼi “he tahi temi faigamālie.” (Luka 4:​13, MN ) Kae ʼe mole tonu ke koutou mātataku ki te Tevolo. Kapau ʼe koutou fakafeagai tuʼumaʼu kiā ia, ʼe mole ina lava fakamamaʼo anai koutou mai te ʼAtua moʼoni.

Kae ke feala hakotou fakafeagai ki te Tevolo pea mo puipui ʼo koutou mai tana ʼu kākā, ʼe tonu ke koutou ʼiloʼi pe ko ai ia ia pea ʼe feafeaʼi tana fakahalaʼi ia te hahaʼi. ʼE ko te matapuna pe e tahi ʼo te ʼatamai mālama moʼoni​—ko te Folafola ʼa te ʼAtua ia te Tohi-Tapu. Koia koutou haga ako te Tohi-Tapu, pea mo maʼuliʼi te ʼu meʼa ʼaē ʼe koutou ako. Ko te kau Fakamoʼoni ʼa Sehova ʼo tokotou kolo, ʼe nātou fiafia anai ʼi te tokoni atu ke fai hakotou ako Tohi-Tapu ʼi te temi ʼaē ʼe koutou faigamālie ai. Koutou kole kiā nātou ke fai hakotou ako Tohi-Tapu, peʼe koutou faitohi kiā nātou ʼaē ʼe nātou tā te nusipepa ʼaenī.

Kapau ʼe koutou fakatuʼutuʼu ke koutou ako te Tohi-Tapu, ʼe tonu ke koutou ʼiloʼi ko Satana ʼe ina fakaʼaogaʼi anai te ʼu fakafeagai peʼe ko te ʼu fakataga moʼo tāʼofi takotou ako ia te moʼoni ʼaē ʼe haʼu mai te Folafola ʼa te ʼAtua. Ko ʼihi ia nātou ʼaē ʼe koutou ʼoʼofa ai, ʼe feala ke nātou ʼiʼita ʼi takotou ako te Tohi-Tapu. ʼE nātou ʼiʼita anai heʼe mole nātou ʼiloʼi ia te ʼu moʼoni taulekaleka ʼaē ʼe tuʼu ʼi te Tohi-Tapu. Lagi ko ʼihi ʼe nātou vāʼi anai koutou. Kae kapau ʼe koutou tuku takotou ako, ʼe fiafia anai koa te ʼAtua? ʼE fia fakaloto vaivaiʼi koutou e te Tevolo ke tuku takotou kumi ia te ʼAtua moʼoni. He koʼe ʼe koutou tuku anai ke mālo ia Satana? (Mateo 10:​34-39) ʼAua naʼa koutou tuku age he faigamālie kiā ia. ʼE ko Sehova te Matapuna ʼo tokotou maʼuli. Koia, koutou haga fakafeagai mālohi ki te Tevolo kae koutou ‘fakafiafia te loto ʼo Sehova.’​—Tāʼaga Lea 27:⁠11.

[Paki ʼo te pasina 6]

Ko nātou ʼaē neʼe liliu ko te kau Kilisitiano, neʼe nātou tutu tanatou ʼu tohi fai fakalauʼakau

[Paki ʼo te pasina 7]

Tou fakatotonu ke tou ako te Tohi-Tapu