“Ko Toku Tokoni ʼe Haʼu Mai Ia Sehova”

ʼE Tapuakina e Sehova Ia Te Maʼuli Faka Sākilifisio

NEʼE fagona lelue te tagata ʼi te vao matuʼa ʼo Cameroun. Neʼe ʼalu lelue lolotoga ni ʼu hola ʼo ʼalu ʼaia ʼo fakalaka ʼi te ala pela kua hake ai te vai, ʼo felāveʼi mo te ʼu faigataʼaʼia, kae neʼe ʼalu ko te fakaloto mālohiʼi ʼo te ʼu hahaʼi. Moʼo fai te ʼu ako ʼa te ʼu hahaʼi neʼe nonofo mamaʼo, ko ʼihi ʼi Zimbabwe ʼe nātou haʼele iā kilometa e 15 ʼo nātou fakalaka ʼi te ʼu vaitafe, ʼo ʼamo ʼi tonatou fuga ʼulu, tonatou ʼu mutuʼi meʼa pea mo ʼonatou sūlie ke ʼaua naʼa palapala. ʼI te tahi kolo, ko te fafine ʼe ʼala ʼi te hola fā māfoatā ke ʼalu ʼo ʼaʼahi pea mo fai te ako ʼa te fafine afilimie, ʼaē ko tona kiʼi hola pe ʼaia e tahi ʼo te ʼaho ʼe ʼava ai.

Ko te faʼahi fea ʼaē ʼe tatau ai te ʼu faiga ʼa te ʼu hahaʼi ʼaia? Ko nātou fuli ʼe ko te kau Fakamoʼoni ʼa Sehova ʼe gāue temi kātoa moʼo faka mafola ia te moʼoni ʼo te Tohi-Tapu. ʼE ko te kau pionie kātoa, mo te kau pionie makehe, mo te kau misionea, mo te ʼu tagata taupau feʼoloʼaki, mo te toko lauʼi afe kau gāue ʼi te ʼu Petele ʼi te malamanei kātoa. Pea ʼe nātou ʼiloga kehe ʼi tonatou maʼuli faka sākilifisio. a

Te Tupuʼaga Lelei ʼo Tanatou Fai Te Gāue ʼAia

ʼE fakalogo te kau Fakamoʼoni ʼa Sehova ki te tokoni ʼa te ʼapositolo ko Paulo kiā Timoteo: “Faigai ia koe, o hage ko he tagata kua tuha ke ke tuu ia mua o te Atua, ko he tagata gaue e mole ufiufi, e ina ave fakahagatonu te folafola o te mooni.” (2 Timoteo 2:15) Kae koteā koa ʼaē ʼe ina ʼekenaki te ʼu toko teau afe kau Fakamoʼoni ke nātou gāue temi kātoa ʼi te minisitelio?

Ka fehuʼi age ki te kau minisi temi kātoa te tupuʼaga ʼo tanatou faiga mālohi ʼi te gāue kiā Sehova, ʼe nātou tali ʼe tupu ko tonatou ʼofa ki te ʼAtua pea mo te hahaʼi. (Mateo 22:​37-39) Ko te faʼahi ʼaia ʼe maʼuhiga ʼaupito, koteʼuhi kapau ʼe mole ko te ʼofa ʼaē ʼe ina ʼekenaki te faiga ʼaia, pea ʼe mole hona ʼaoga anai.​—1 Kolonito 13:​1-3.

Ko He Gāue ʼe Fai ʼAki He Loto Faka Sākilifisio

ʼE tali fuli e te kau Kilisitiano ia te pāui ʼaenī ʼa Sesu: “Kapau e i ai he tahi e fia mulimuli mai ia te au, ke fakafisi kia te ia totonu, pea ke ina too tona [“pou fakamamahi,” MN ] o mulimuli mai ia te au.” (Mateo 16:24) Ko te fakafisi kiā kita totonu, ko tona faka ʼuhiga ke kita tali ke takitaki kātoa kita e Sehova ʼAtua pea mo Sesu Kilisito. ʼI tanatou tali te pāui ʼaia, ko te tokolahi ʼe nātou gāue ʼaki he loto faka sākilifisio ʼi te selevisi temi kātoa.

Tokolahi te kau Fakamoʼoni ʼe nātou faiga mālohi ke nātou fakalahi tanatou gāue kiā Sehova. Koutou tokagaʼi te faʼitaʼitaki ʼa Júlia te tuagaʼane ʼe taʼu 56 pea ʼe pionie kātoa ʼi São Paulo, ʼi Pelesile. ʼE ina fakamatala fēnei: “Neʼe telefoni mai te Tēhina Siaina ʼo fehuʼi mai peʼe au fia ako te lea faka Siaina. ʼUhi ko taku kua finematuʼa, neʼe mole au manatu au ke au ako he tahi lea. Kae hili te ʼu ʼaho kiai, neʼe au ʼio kiai. ʼI te temi nei, kua au lava fai te ʼu ʼuluaki palalau faka Tohi-Tapu ʼi te lea Faka Siaina.”

ʼE fakamatala fēnei e te filiale ʼa te kau Fakamoʼoni ʼa Sehova ʼi Pérou: “ ʼI te ʼu taʼu pe ʼaenī, ko te toko teau tupu kau pionie kātoa neʼe  nātou ʼolo ki te ʼu telituale ʼaē ʼe mole heʼeki fakahoko ai te gāue, ʼo nātou fakahā ai tonatou lotomālohi mo tonatou loto faka sākilifisio. Neʼe nātou ʼolo ki te ʼu kolo mamaʼo ʼe mole maʼu ai te ʼu faʼahiga meʼa ʼo te maʼuli ʼo te temi nei pea ʼe faigataʼa te maʼu gāue ʼi ai. Ko te ʼu tēhina mo te ʼu tuagaʼane ʼaia ʼe nātou maʼuli faka sākilifisio ke nātou haga nonofo maʼu ʼi tonatou ʼu telituale. Kae ko te faʼahi ʼaē ʼe maʼuhiga tāfito, heʼe ʼi ai te ʼu fua lelei ʼo tanatou gāue mai te tahi potu ki te tahi potu. ʼE fakamatala e te ʼu tagata taupau feʼoloʼaki neʼe hoki fakatuʼu pe te ʼu kūtuga foʼou ʼaki te tokoni ʼa te kau pionie kātoa ʼaia ʼe nātou maʼuli faka sākilifisio.”

Ko ʼihi Kilisitiano neʼe nātou felāveʼi mo te ʼu tuʼutāmaki ʼi tanatou fia ʼolo ʼo tokoni ki tonatou ʼu tēhina. (Loma 16:​3, 4) ʼE fakamatala fēnei e te tagata taupau feʼaluʼaki ʼe nofo ʼi te kolo ʼi Afelika ʼe hoko ai te tau: “ ʼI muʼa ʼo tamā tau atu ki te ʼu tuʼakoi fakaʼosi ʼaē ʼe ina fakavaha te ʼu telituale ʼaē ʼe nofoʼi e te kau fakafeagai pea mo te ʼu telituale ʼo te puleʼaga, neʼe tutuʼu ʼi ʼomā tafa ʼo ʼoku mo toku ʼohoana te ʼu pule solia e toko fā ʼo te kau fakafeagai ki te puleʼaga pea mo tanatou kau tagata leʼo, ʼo nātou fia ʼiloʼi peʼe ko ai ia māua. ʼI tanatou ʼosi sisio ki ʼamā pasipo pea mo nātou sio ai ʼe mā ʼōmai mai te koga meʼa ʼaē ʼe puleʼi e te puleʼaga, neʼe nātou ʼiʼita ai. Neʼe nātou lau ʼe au gāue maʼa te puleʼaga. Neʼe nātou fakatuʼutuʼu ai ke nātou lī au ki te foʼi luo. Neʼe au fakamatala age te gāue ʼaē ʼe mā fai, pea neʼe nātou tuku age ai māua.” Neʼe fakafetaʼi lahi te ʼu kokelekasio ki te taumātuʼa ʼaia ʼe maʼuli faka sākilifisio ke nā ʼaʼahi ia nātou!

Logola te ʼu faigataʼaʼia ʼaia ʼe hoko kiā nātou, kae ʼe haga tuputupu pe te kaugamālie ʼo te kau minisi gāue temi kātoa ʼi te malamanei kātoa. (Isaia 6:8) ʼE leleiʼia e te kau gāue faʼafai ʼaia tonatou pilivilesio ʼaē ko te tauhi kiā Sehova. ʼAki he loto faka sākilifisio feiā, ko te toko lauʼi miliona kau Kilisitiano ʼe nātou fakavikiviki kiā Sehova. Pea ko ia ʼe ina tapuakina lahi ia nātou. (Tāʼaga Lea 10:22) ʼAki he loto falala ki te tapuakina pea mo te lagolago hoholo ʼaia, ʼe maʼu e te kau gāue faʼafai ia te ʼu manatu ʼa te tagata fai pesalemo ʼaē neʼe hiva fēnei: “Ko toku tokoni ʼe haʼu mai ia Sehova.”​—Pesalemo 121:⁠2.

[Kiʼi nota]

[Fakamatala ʼo te pasina 9]

“Ko tau hahaʼi ʼe nātou foaki fakamalotoloto anai ia nātou ʼi te ʼaho ʼo tou ʼu mālohi faka solia.”​—PESALEMO 110:3

[Talanoa ʼo te pasina 8]

ʼE LELEIʼIA E SEHOVA TANA ʼU KAUGANA AGATONU

“Koutou liliu ʼo mālolohi, mo tāʼofi maʼu, ke lahi tuʼumaʼu takotou ʼu gāue ʼi te ʼAliki, ʼi takotou ʼiloʼi ʼaē ko takotou ʼu gāue ʼe mole vaʼiganoa ʼo ʼuhiga mo te ʼAliki.”​—1 Kolonito 15:​58, MN.

“ ʼE mole heʼe agatonu te ʼAtua ke ina galoʼi takotou gāue pea mo te ʼofa ʼaē neʼe koutou fakahā ʼo ʼuhiga mo tona huafa.”​—Hepeleo 6:​10, MN.