“ ʼU Fānau, Kotou Fakalogo Ki Takotou ʼu Mātuʼa”

“ ʼU fānau, kotou fakalogo ki takotou ʼu mātua ʼi te fakatahi mo te ʼAliki, heʼe totonu te meʼa ʼaia.”—Efeso 6:1, MN.

 1. ʼE lava haofaki feafeaʼi koutou mokā kotou fakalogo?

 ʼE LAGI kei tou māʼuʼuli nei he neʼe tou fakalogo, kae lagi kua mamate ʼihi ʼuhi he neʼe mole natou fia fakalogo. Koteā ʼaē neʼe tou fakalogo kiai? Ohagē ko te ʼu fakatokaga ʼo totatou sino ʼaē ‘neʼe taulekaleka tona faʼu.’ (Pesalemo 139:14) ʼE sio totatou ʼu mata ki te ʼu ʼao fakapōʼuli, pea mo logo totatou ʼu taliga ki te haʼulu ʼo te mana. Pea ʼe tou mātataku mokā tapa te hila ʼi te ʼaele. Ko nātou ʼaē neʼe akoʼi kiai te ʼu tuʼutāmaki ʼaē ʼe lava hoko mai te ʼu meʼa ʼaia, ʼe ko he ʼu fakatokaga kiā nātou moʼo kumi he faʼahi ke natou hao mai te ʼafā mo te tapa ʼo tona ʼu hila pea mo te ʼua maka ʼaē ʼe feala ke fakatupu tuʼutāmaki ki te maʼuli.

 2. He koʼē ʼe ʼaoga ki te fānau ia he ʼu fakatokaga, pea he koʼē ʼe tonu ke natou fakalogo ki tanatou ʼu mātuʼa?

² ʼE ʼaoga kiā koutou ʼu tūpulaga ia he ʼu fakatokaga ʼo ʼuhiga mo te ʼu tuʼutāmaki ʼaē ʼe feala ke hoko, pea ko te maʼua ʼaia ʼo takotou ʼu mātuʼa ke natou foaki atu te ʼu fakatokaga ʼaia. ʼE lagi kei kotou manatuʼi, neʼe kua ʼui atu pē: “ ʼAua naʼa ke fā ki te meʼa ʼaia, heʼe vela.” “ ʼAua naʼa ke ʼalu ki he vaitafe heʼe ke tuʼutāmaki ai anai.” “Fakasiosio muʼa ki te faʼahi mataʼu pea mo te faʼahi hema ʼi muʼa ʼo hau fakalaka ʼi he ala.” Kae meʼa fakaʼofaʼofa, heʼe ko te ʼu fānau neʼe natou lāvevea peʼe mo mamate ʼuhi he neʼe mole natou fia fakalogo ki te ʼu fakatokaga ʼaia. Ko te fakalogo ki te ʼu mātuʼa “e tonu”—koia ʼaē ʼe tonu ai ke fai pea mo ʼaoga. ʼE toe fakapotopoto foki. (Tāʼaga Lea 8:33) ʼE ʼui ʼi te tahi vaega ʼo te Tohi-Tapu ʼe “lelei” te aga ʼaia ki totatou ʼAliki ko Sesu Kilisito. ʼE fakatotonu atu e te ʼAtua ke kotou fakalogo ki takotou ʼu mātuʼa.—Kolose 3:20; 1 Kolonito 8:6.

Te ʼu Fakapale ʼe Tologa ʼo Te Fakalogo

 3. Koteā “te mauli mooni” ki te tokolahi iā tātou, pea ʼe lava maʼu feafeaʼi e te fānau te maʼuli ʼaia?

³ Ko te fakalogo ki takotou ʼu mātuʼa ʼe ina puipui koutou ʼi tokotou “mauli nei,” pea mo toe faka fealagia atu ke kotou maʼu ia te maʼuli “kahau,” ʼaē ʼe higoaʼi ko “te mauli mooni.” (1 Timoteo 4:8; 6:19) Tokolahi iā tātou, ko te faka ʼuhiga ʼo te maʼuli moʼoni ʼe ko he maʼuli heʼegata ʼi he kele ʼo te mālama foʼou ʼo te ʼAtua, ʼaē ʼe ina fakapapau kiā nātou ʼaē ʼe natou fakalogo agatonu ki tana ʼu fakatotonu. ʼE ʼui fēnei ʼi te fakatotonu maʼuhiga ʼaupitō ʼi te ʼu fakatotonu ʼaia: “Fakaapaapa ki tau tamai mo tau fae, ko te uluaki fekau aia fakatahi mo he fakapapau: ke ke mau te manuia mo te mauli loa i te kelekele.” Koia kapau ʼe kotou fakalogo ki takotou ʼu mātuʼa, pea ʼe kotou maʼuli fiafia anai. ʼE fīmālie anai tokotou kā hau, pea ʼe kotou maʼu anai mo te maʼuli heʼegata ʼi te palatiso ʼi te kele!—Efeso 6:2, 3.

 4. ʼE lava fakaʼapaʼapa feafeaʼi te fānau ki te ʼAtua pea mo fua lelei ai kiā nātou?

⁴ Kā kotou fakaʼapaʼapa ki takotou ʼu mātuʼa ʼo fakalogo kiā nātou, ʼe kotou toe fakaʼapaʼapa ki te ʼAtua heʼe ko ia ʼaē ʼe ina fakatotonu atu ke kotou fakalogo kiā nātou. Pea ʼe toe fua lelei pē kiā koutou. ʼE ʼui fēnei ʼi te Tohi-Tapu: “Ko au, Sehova, ko au tou ʼAtua, ia Ia ʼaē ʼe ina akoʼi koe ke ʼaoga kiā te koe.” (Isaia 48:17; 1 Soane 5:3) ʼE fua lelei feafeaʼi kiā koutou takotou fakalogo? ʼE fiafia anai takotou faʼē pea mo takotou tamai ʼi takotou fakalogo, pea ʼe mahino ʼe nā fakahā anai tonā fiafia ʼi he ʼu faʼahiga ʼaluʼaga ʼe kotou fiafia ai ʼi tokotou maʼuli. (Tāʼaga Lea 23:22-25) Kae ko te meʼa ʼaē ʼe maʼuhiga age, heʼe ko takotou fakalogo ʼe fakafiafia ai takotou Tamai ʼaē ʼe ʼi selō,  pea ʼe ina fakapale anai koutou ʼi hona ʼaluʼaga fakatalakitupua! Kotou fakatokagaʼi te tapuakinaʼi pea mo te puipui e Sehova ia Sesu, ʼaē neʼe ina ʼui fēnei ʼo ʼuhiga mo ia totonu: “ ʼE au fai tuʼumaʼu te ʼu meʼa ʼaē ʼe ina leleiʼia.”—Soane 8:29, MN.

Ko Sesu Ko He Tufuga Faiva

 5. Ko te ʼu tupuʼaga fea ʼaē ʼe tou tui ai ko Sesu neʼe ko he tufuga faiva?

⁵ Ko Sesu neʼe ko te ʼuluaki tupu ʼo tana faʼē ko Malia. Ko Sosefo tana tamai tauhi neʼe ko te tagata tufuga ʼakau. Neʼe liliu mo Sesu ko te tagata tufuga ʼakau, ʼe lagi neʼe ko Sosefo ʼaē neʼe ina akoʼi age te gāue. (Mateo 13:55; Maleko 6:3; Luka 1:26-31) ʼI takotou manatu, neʼe ko te tagata tufuga ʼakau feafeaʼi ia Sesu? ʼI tana kei maʼuli ʼi te lagi, ʼi muʼa ʼo tana tupu faka milakulo ʼi te fatu ʼo te fafine tāupoʼou ko Malia pea ʼi tana fakatātā ia te poto, neʼe ina fakamahino fēnei: “Neʼe au liliu ai . . . [iā] tafa [ʼo te ʼAtua] ko he tufuga faiva pea neʼe au liliu ko he tahi neʼe ʼofa tāfito ki ai ʼi te ʼaho mo te ʼaho.” Ko Sesu ʼaē neʼe ʼofainaʼi e te ʼAtua ʼi tana ʼi selō neʼe ko he tufuga faiva. ʼI takotou manatu ʼi tana kei tūpulaga ʼi te kele, neʼe toe gāue kinakina koa ko he tagata tufuga ʼakau faiva?—Tāʼaga Lea 8:30; Kolose 1:15, 16.

 6. (a) ʼI takotou manatu, he koʼē neʼe gāue kinakina ia Sesu ʼi tana kei veliveli? (b) Ko te ʼu faʼahi fea ʼaē ʼe feala ai ki te tamaliki ke natou faʼifaʼitakiʼi ia Sesu?

⁶ ʼE mahino ia, ʼi te kei veliveli ʼa Sesu, ʼi ʼihi temi neʼe gaoʼi, pea ʼe ʼui ʼi te Tohi-Tapu neʼe gaoʼi te tamaliki ʼi te temi muʼa. (Sakalia 8:5; Mateo 11:16, 17) Kae mai tona ʼaluʼaga ʼaē neʼe ko ia te ʼuluaki ʼo te fāmili neʼe lahi ai te ʼu tamaliki kae neʼe mole natou maʼu meʼa, neʼe tonu foki ke toe kau ki te ʼu gāue ʼo te loto fale, ʼi tuʼa atu ʼi te gāue tufuga ʼakau ʼaē neʼe akoʼi age e Sosefo. Ki muli age, neʼe liliu ia Sesu ko te tagata fai faka mafola pea neʼe tokaga tāfito ki tana minisitelio ʼo ina meʼa noaʼi ai hona ʼu lelei fakasino. (Luka 9:58; Soane 5:17) ʼE ʼi ai koa he ʼu faʼahi ʼo tokotou maʼuli ʼe kotou lava faʼifaʼitakiʼi ai ia Sesu? ʼE kole atu koa e takotou ʼu mātuʼa ke kotou fakamaʼa tokotou koga fale peʼe ko he tahi age ʼu gāue? ʼE nā fakaloto mālohiʼi koa koutou ki te tauhi ki te ʼAtua ke kotou kau ki te ʼu fono pea mo faka mafola takotou tui ki niʼihi? ʼI takotou manatu, kana neʼe ko Sesu ʼaē neʼe kole age ki ai te ʼu meʼa ʼaia, ʼe fakalogo koa anai?

Ko He Tahi ʼe Ina Ako Lelei Pea Mo Faiako Lelei Te Tohi-Tapu

 7. (a) Ko ai ʼaē neʼe lagi ʼalu mo Sesu ki te Pāsikate? (b) Neʼe ʼifea Sesu ʼi te temi ʼaē neʼe toe liliu ai tona fāmili ki tonatou ʼapi, pea he koʼē neʼe nofo ia ʼi te fale lotu?

⁷ Neʼe fakatotonu ki te hahaʼi tagata fuli ʼo he fāmili Iselaele ke natou ʼolo ʼo tauhi kiā Sehova ʼi te fale lotu ʼi te ʼu ʼaho lafeti e tolu ʼa te kau Sutea. (Teutalonome 16:16) ʼI te taʼu 12 ʼo Sesu, neʼe ʼalu mo tona fāmili kātoa ki Selusalemi moʼo fai te Pāsikate. ʼE mahino ia neʼe kau ai mo te fānau ʼa Malia mo Sosefo. Kae ko nātou ʼaē neʼe ʼolo mo te fāmili ʼo Sesu, neʼe kau ai ia Salome, ʼaē lagi neʼe ko te tehina ʼo Malia, mo tona ʼohoana  ko Sepeteo pea mo tanā ʼu tama ko Sakopo mo Soane, ʼaē ki muli age neʼe nā liliu ko te ʼu ʼapositolo. a (Mateo 4:20, 21; 13:54-56; 27:56; Maleko 15:40; Soane 19:25) ʼI tanatou toe liliu, lagi ʼi te manatu ʼa Sosefo mo Malia neʼe kaugā fagona ia Sesu mo honatou kāiga, koia lā ʼaē neʼe mole nā tuʼaniaʼi ai tana puli. Kae hili ʼaho e tolu kiai, ʼi te maʼu atu leva e Malia mo Sosefo ia Sesu ʼi te fale lotu, “nee nofo ia i te lotolotoga o te kau faiʼako o fagono kia natou pea mo fakafehufehui natou.”—Luka 2:44-46.

 8. Koteā ʼaē neʼe fai e Sesu ʼi te fale lotu, pea he koʼē neʼe punamaʼuli te hahaʼi?

⁸ Neʼe “fakafehuhui” feafeaʼi e Sesu ia te kau faiako? Neʼe mole ina fai tana ʼu fehuʼi ʼuhi he neʼe fia ʼiloʼi meʼa fuli peʼe fia maʼu logo. Ko te kupu faka Keleka ʼaē neʼe fakaʼaogaʼi ʼi te vaega, ʼe feala ke faka ʼuhiga ki he fakafehuʼi mokā fai he fakamāu pea mo fakahā he ʼu fakamoʼoni moʼo tali ki te ʼu fehuʼi ʼaia. ʼEī, logolā tana kei tūpulaga, kae neʼe kua liliu ia Sesu ʼo poto ʼi te ako ʼo te Tohi-Tapu pea neʼe punamaʼuli ai te kau faiako lotu popoto! ʼE ʼui fēnei ʼi te Tohi-Tapu: “Nee punamauli ia natou fuape nee fagono kia te ia i tona poto mo tana u tali.”—Luka 2:47.

 9. ʼE feafeaʼi hakotou lava muliʼi te faʼifaʼitaki ʼa Sesu ʼo ʼuhiga mo te ako ʼo te Tohi-Tapu?

⁹ ʼI takotou manatu, neʼe feafeaʼi kiā Sesu logolā tana kei tūpulaga hana fakatupu he punamaʼuli, māʼiapē lā ki he kau faiako popoto ʼaki tona ʼatamai mālama ki te Tohi-Tapu? ʼE mahino ia, neʼe ina maʼu te ʼatamai mālama ʼuhi heʼe ko tana ʼu mātuʼa ʼaē neʼe manavasiʼi ki te ʼAtua neʼe nā foaki age kiā ia talu mai tana tupu ia te ako fakaʼatua. (Ekesote 12:24-27; Teutalonome 6:6-9; Mateo 1:18-20) ʼE tou tui papau ko Sosefo neʼe ina ʼave ia Sesu ki te sinakoka ke logo ki te lau pea mo te ʼu fai palalau ʼo ʼuhiga mo te Tohi-Tapu. ʼE kotou toe maʼu koa mo te tapuakina ʼaia, ko takotou ʼu mātuʼa ʼe nātou ako te Tohi-Tapu mo koutou pea mo ʼave koutou ki te ʼu fono faka Kilisitiano? ʼE maʼuhiga koa kiā koutou tanatou ʼu faiga, ohagē ko te loto fakafetaʼi ʼa Sesu ki te ʼu faiga ʼo tana ʼu mātuʼa? ʼE kotou fakahā koa ki niʼihi ohagē ko Sesu ia te ʼu meʼa ʼaē ʼe kotou ako?

Neʼe Fakalogo Ia Sesu

10. (a) He koʼē neʼe tonu ke ʼiloʼi e te ʼu mātuʼa ʼa Sesu ia te koga meʼa ʼaē neʼe nofo ai? (b) Koteā te faʼifaʼitaki lelei neʼe tuku e Sesu ki te tamaliki?

¹⁰ ʼI takotou manatu, neʼe koteā te manatu ʼa Malia mo Sosefo ʼi tana maʼu atu Sesu ʼi te fale lotu kae kua hili kiai ʼaho e tolu? ʼE lagi neʼe nā fiafia ʼi tana maʼu atu ia ia ki te fale ʼaia. Kae neʼe punamaʼuli ia Sesu ʼi te mole ʼiloʼi ʼaē e tana ʼu mātuʼa tana nofo ʼi te fale lotu. Neʼe nā ʼiloʼi te tupu faka milakulo ʼa Sesu. Tahi ʼaē, logolā tanā mole mahino kātoa kiā meʼa fuli ʼo ʼuhiga mo ia, kae neʼe nā ʼiloʼi tona tuʼulaga ki te kā haʼu, ʼaē ko te Haofakiʼaga pea mo te Takitaki ʼo te Puleʼaga ʼo te ʼAtua. (Mateo 1:21; Luka 1:32-35; 2:11) Koia, neʼe fehuʼi fēnei age e Sesu kiā nāua: “Kotea te tupuaga o taulua kumi au? Pe mole koulua iloi e tonu ke au nofo i te api o taku Tamai?” Kae ʼi tana fakalogo, neʼe toe liliu ia Sesu mo tana ʼu mātuʼa ki Nasaleti. ʼE ʼui fēnei ʼi te Tohi-Tapu: “Nee fakalogo ia kia naua.” Pea “nee taupau e tana fae ia meafuape i tona loto.”—Luka 2:48-51.

11. Koteā te ako ʼo ʼuhiga mo te fakalogo ʼe feala ke kotou maʼu mai ia Sesu?

¹¹ ʼE faigafua koa kiā koutou hakotou faʼifaʼitakiʼi te maʼuli ʼo Sesu, ʼo kotou fakalogo tuʼumaʼu ki takotou ʼu mātuʼa? Peʼe ʼi takotou manatu ʼe mole natou mahino tuʼumaʼu ki te ʼu meʼa ʼaē ʼe hoko ʼi te mālama ʼo te temi ʼaenī, pea ʼe lahi age takotou mahino ki te ʼu meʼa ʼaia? ʼE moʼoni, lagi ʼe lahi age te ʼu meʼa ʼaē ʼe kotou mahino kiai—lagi te fakaʼaogaʼi ʼo te ʼu telefoni feʼāveʼaki, mo te ʼu olotinatea, peʼe ko he tahi age ʼu meʼa ʼo te temi nei. Kae kotou fakakaukauʼi age muʼa ia Sesu, ʼaē ʼaki “tona poto mo tana u tali” neʼe ʼofolele ai te kau faiako popoto. ʼE lagi kā fakatatau ia koutou kiā te ia, ʼe veliveli age pē ia te ʼu meʼa ʼaē ʼe kotou mahino kiai. Kae neʼe fakalogo ia Sesu ki tana ʼu mātuʼa. ʼE mole ʼui leva neʼe ʼalutahi tuʼumaʼu tana manatu mo te ʼu tonu ʼaē neʼe fai e tana ʼu mātuʼa. Kae ʼi tona temi tūpulaga “nee fakalogo ia kia naua.” Koteā te ako  ʼe feala ke kotou maʼu mai tana faʼifaʼitaki?—Teutalonome 5:16, 29.

ʼE Mole Ko He Meʼa Faigafua Ia Te Fakalogo

12. ʼE lava haofaki feafeaʼi tokotou maʼuli e te fakalogo?

¹² ʼE mole ko he meʼa faigafua tuʼumaʼu ia te fakalogo, ohagē ko te meʼa neʼe hoko ki te ʼu kiʼi finemui e toko lua, neʼe nā feleleʼi ʼi te ala lahi kae neʼe mole ʼolo ʼi te ala ʼaē neʼe teuteuʼi maʼa te hahaʼi ke fakalaka ai. Neʼe nā fakaneke tona kaumeʼa ko John ʼaē ʼe ʼamanaki ʼalu ʼi te ala ʼaē neʼe teuteuʼi maʼa te hahaʼi, ʼo nā ʼui fēnei age: “Haʼu John. Haʼu lā, John!” ʼI tana lotolotolua, ko te tahi kiʼi taʼahine neʼe ina vāʼi ia ia: “ ʼE ke fula!” Logolā te mole fēia ʼa John, kae neʼe ina tali age: “ ʼE au fakalogo pē ki te fakatotonu ʼaē neʼe fai mai e taku faʼē.” Ki muli age ʼi te ala ʼaē neʼe teuteuʼi maʼa te hahaʼi ke fakalaka ai, neʼe logo ia John ki te kikī ʼo te tāʼofi ʼo te ʼu teka pea neʼe tautonu age tana sio ifo mo te temi pē ʼaē neʼe fakaʼī ai te ʼu kiʼi taʼahine e te motokā. Neʼe mate te tahi kiʼi taʼahine, pea ko te tahi neʼe lavea kovi ʼo tuʼusi ai tona tahi vaʼe. Ko te faʼē ʼa te ʼu kiʼi taʼahine ʼaē neʼe kua ina ʼui age pē kiā nāua ke nā ʼolo ʼi te ala ʼaē neʼe teuteuʼi maʼa te hahaʼi, neʼe ina ʼui ki muli age ki te faʼē ʼa John: “Kana neʼe nā fakalogo lā ohagē ko tau tama.”—Efeso 6:1.

13. (a) He koʼē ʼe tonu ke kotou fakalogo ki takotou ʼu mātuʼa? (b) Ko te temi fea ʼaē ʼe lelei ai anai ki he tamasiʼi ke mole ina fai te meʼa ʼaē ʼe ʼui age e tana ʼu mātuʼa?

¹³ He koʼē ʼe ʼui e te ʼAtua: “ ʼU fānau, kotou fakalogo ki takotou ʼu mātuʼa”? Kapau ʼe kotou fakalogo ki takotou ʼu mātuʼa, ʼe kotou toe fakalogo pē ki te ʼAtua. Tahi ʼaē, ʼe lahi age te mahino ʼo takotou ʼu mātuʼa ki te maʼuli. Ohagē lā, ʼi te ʼu taʼu e nima ʼi muʼa ʼo te hoko ʼo te fakaʼī ʼaē neʼe tou talanoa kiai ʼi muʼa atu, ko te faʼē ʼa John neʼe ʼi ai tona kaumeʼa pea neʼe mate tana tamasiʼi he neʼe faiga ke fakalaka ʼi te ala lahi ʼaia! ʼE moʼoni ia, ʼe mole faigafua tuʼumaʼu ia te fakalogo ki takotou ʼu mātuʼa, kae ko te ʼAtua ʼaē ʼe ina ʼui atu ʼe tonu ke kotou fai ia te faʼahi ʼaia. Kae kapau leva ko takotou ʼu mātuʼa—peʼe ko niʼihi—ʼe natou ʼui atu ke kotou loi, mo kaihaʼa, peʼe mo fai he tahi age meʼa ʼe fakafeagai ki te ʼu lao ʼa te ʼAtua, ʼe tonu anai ke kotou “fakalogo ki te ʼAtua ohagē ki he pule, ʼi he fakalogo ia ki te tagata.” Koia ʼaē ʼi te ʼosi ʼui ʼaē ke “kotou fakalogo ki takotou ʼu mātuʼa,” ʼe toe ʼui ʼi te Tohi-Tapu, “ ʼi te fakatahi mo te ʼAliki.” Ko tona faka ʼuhiga ke kotou fakalogo iā meʼa fuli ʼe ʼalutahi mo te ʼu lao ʼa te ʼAtua.—Gaue 5:29, MN.

14. He koʼē ʼe faigafua age ki he tahi ʼe haohaoa hana fakalogo, kae he koʼē ʼe ʼaoga kiā ia ʼaia ke ina akoʼi te fakalogo?

¹⁴ ʼI takotou manatu kana neʼe kotou haohaoa lā ohagē ko Sesu—“māʼoniʼoni, mavae kehe mai te kau agahala,”—ʼe faigafua tuʼumaʼu anai koa te fakalogo ki takotou ʼu mātuʼa? (Hepeleo 7:26, MN ) Kana neʼe kotou haohaoa lā, ʼe mole kotou fai anai he meʼa ʼe kovi, ohagē ko te temi nei. (Senesi 8:21; Pesalemo 51:5) Kae māʼia mo Sesu, neʼe tonu ke ina ako ia te fakalogo. ʼE ʼui fēnei ʼi te Tohi-Tapu: “Logope, [ko Sesu] nee ko te Alo, nee ina ako te fakalogo i te u mamahi nee ina  tali.” (Hepeleo 5:8) Neʼe tokoni feafeaʼi ia te ʼu mamahi ʼaē neʼe tau mo Sesu ke ina ako ai ia te fakalogo, pea ko he ako neʼe mole feala ke ina maʼu ʼi tana nofo ʼi te lagi?

15, 16. Neʼe akoʼi feafeaʼi e Sesu ia te fakalogo?

¹⁵ ʼAki te takitaki ʼa Sehova, neʼe puipui e Sosefo mo Malia ia Sesu mai te tuʼutāmaki ʼi tana kei veliveli. (Mateo 2:7-23) Kae ʼe mahino ia, neʼe toʼo e te ʼAtua mai ia Sesu tana puipui makehe. ʼE ʼui ʼi te Tohi-Tapu neʼe “momoli [e Sesu] te u kole mo te u tagi, fakatahi mo tana keke leo lahi pea mo ona loimata,” he neʼe lahi fau tona ʼu mamahi fakaʼatamai pea mo fakasino. (Hepeleo 5:7) Ko te temi fea ʼaē neʼe hoko ai te faʼahi ʼaia?

¹⁶ Neʼe hoko tāfito ʼi te ʼu hola fakaʼosi ʼo te maʼuli ʼa Sesu ʼi te kele, ʼi te faiga mālohi ʼaē e Satana ke ina maumauʼi Tana agatonu. ʼE ʼiloga ia neʼe lahi age te mamahi ʼa Sesu, ʼi tana tuʼania ʼaē ko tona mate ohagē ko he tagata agakovi, ʼe feala ai anai ke ʼulihi ai te matagafua ʼo tana Tamai, koia “nee asili faikole . . . [ʼi te ʼōloto ʼo Setesemane], nee liliu leva tona kakava o toto pea nee [tafe kalukalu] ifo ia te ia ki te kele.” Ki muli age, ʼi te mamahi fau ʼo tona faʼahiga matehi ʼi te pou fakamamahi neʼe “keke leo lahi [Sesu] pea mo ona loimata.” (Luka 22:42-44; Maleko 15:34) Koia neʼe ina “ako te fakalogo i te u mamahi nee ina tali,” ʼo ina fakafiafia ai te loto ʼo tana Tamai. ʼI te temi nei kua ʼafio ia ʼi te lagi, ʼe mahino ia Sesu ki te ʼu meʼa ʼaē ʼe tou mamahi kiai ʼi te ʼu temi fuli ʼaē ʼe tou faiga ai ke tou fakalogo.—Tāʼaga Lea 27:11; Hepeleo 2:18; 4:15.

Tou Ako Te Fakalogo

17. ʼE tonu ke tou faka ʼuhiga feafeaʼi ia te tali ʼo te akonaki?

¹⁷ Kā akonakiʼi koutou e takotou tamai mo takotou faʼē, pea ʼe nā fakahā atu ʼe nā loto ke lelei tokotou maʼuli, ʼe nā ʼofa kiā koutou. ʼE lagaʼi te fehuʼi ʼaenī ʼi te Tohi-Tapu: “Ko ai te foha ʼaē ʼe mole akonakiʼi e tana tamai?” ʼE fakaʼofaʼofa anai mo kanapau lā neʼe mole feʼauga te ʼofa ʼo takotou ʼu mātuʼa kiā koutou, ke nā toʼo he temi pea mo faiga moʼo akonakiʼi ʼo koutou? ʼO toe fēia mo Sehova, ʼuhi heʼe ʼofa kiā koutou, koia ʼaē ʼe ina fakatonutonuʼi koutou. “ ʼE moʼoni, ʼi te moʼi temi pē ʼaia ko te akonaki fuli pē ʼe hagē ia ʼe mole ko he meʼa fakafiafia, kae ko he meʼa fakaloto mamahi; kae ki muli age ʼe ina foaki kiā nātou ʼaē neʼe ina akoʼi ia he fua lelei, ʼaē ko te faitotonu.”—Hepeleo 12:7-11, MN.

18. (a) Koteā ʼaē ʼe fakamoʼoni kiai te akonaki ʼofa? (b) Koteā te ʼu fua lelei neʼe kotou fakatokagaʼi ia nātou ʼaē neʼe akonakiʼi ʼaki te ʼofa?

¹⁸ Ko te hau ʼi te Iselaele ʼo te temi muʼa, ʼaē neʼe fakatokagaʼi e Sesu tona poto lahi, pea ko te hau ʼaia neʼe palalau ki te ʼaoga ʼaē ke akonakiʼi te fānau e te ʼu mātuʼa ʼaki te ʼofa. Neʼe tohi fēnei e Salomone: “Ko ʼaē ʼe ina tāʼofi tana kauʼi ʼakau, ʼe fehiʼa ia ki tona foha, kae ko ʼaē ʼe ʼofa ki ai, ʼe ina kumi moʼoni ʼaki te fakatonutonu.” Neʼe toe ʼui e Salomone ko he tahi ʼe ina tali te fakatonutonu ʼofa, ʼe feala ai ke haofaki tona nefesi mai te mate. (Tāʼaga Lea 13:24; 23:13, 14; Mateo 12:42) ʼE manatuʼi e te tuagaʼane ʼi tana kei veliveli, kapau neʼe mole nofo lelei ʼi te fono, neʼe ʼui age e tana matuʼa ʼe ina akonakiʼi anai ia ia mokā natou liliu ki fale. ʼI te temi nei ʼe ina manatuʼi ko tana matuʼa neʼe ina akonakiʼi ia ia ʼaki te ʼofa, ke tupu ai hana maʼuli fiafia.

19. He koʼē ʼe tonu ke kotou fakalogo tāfito ki takotou ʼu mātuʼa?

¹⁹ Kotou loto fakafetaʼi ki takotou ʼu mātuʼa, mo kapau neʼe natou ʼoʼofa kiā koutou, ʼo natou toʼo he temi pea mo kinakina ʼi te akonakiʼi ʼo koutou ʼaki te ʼofa. Kotou fakalogo ki takotou ʼu mātuʼa, ohagē ko te fakalogo ʼa totatou ʼAliki ko Sesu Kilisito ki tana ʼu mātuʼa, ko Sosefo mo Malia. Kae kotou fakalogo tāfito kiā nāua heʼe ko takotou Tamai ʼaē ʼe ʼi selō, ia Sehova ʼAtua ʼaē ʼe ina ʼui atu. Pea ʼe fua lelei anai kiā koutou, pea ʼe “fua lelei kiā [koutou] pea mo [kotou] maʼuli fualoa ʼi te kele.”—Efeso 6:2, 3, MN.

[Kiʼi nota]

ʼE Kotou Tali Feafeaʼi Anai?

• Koteā te ʼu fua lelei ʼaē ʼe feala ke maʼu e te fānau mokā natou fakalogo ki tanatou ʼu mātuʼa?

• ʼI tana kei veliveli, koteā te faʼifaʼitaki lelei neʼe tuku e Sesu ʼi tana fakalogo ki tana ʼu mātuʼa?

• Neʼe ako feafeaʼi e Sesu ia te fakalogo?

[Fehuʼi]

[Paki ʼo te pasina 14]

ʼI te taʼu hogofulu-mā-lua ʼo Sesu neʼe poto lelei ʼi te Tohi-Tapu

[Paki ʼo te pasina 16]

Neʼe ako feafeaʼi e Sesu ia te fakalogo ʼi tona ʼu mamahi?