ʼU Fafine ʼOhoana—Kotou Fakaʼapaʼapa Lahi Ki Tokotou ʼu ʼOhoana

“Ke [kotou] fakalogo . . . ʼu fafine ʼohoana ki [ʼokotou] ʼohoana.”—Efeso 5:22, MN.

 1. He koʼē ʼi ʼihi temi ʼe faigataʼa ia te fakaʼapaʼapa ki te tagata ʼohoana?

 ʼE LAHI te ʼu fenua kā ʼohoana he taʼahine pea mo he tama, ko te taʼahine ʼe fai tana fakapapau, ʼe fakaʼapaʼapa lahi anai ki tona ʼohoana. Kae ʼe hā mai ʼi te faʼahiga gaohi ʼaē ʼo te hahaʼi fafine e te ʼu tagata ʼohoana e tokolahi, ko te fakapapau ʼaia ʼe faigataʼa hona fakahoko. Koia neʼe lelei te ʼohoana ʼi te kamata. Ko te ʼAtua neʼe ina toʼo te hui vakavaka ʼo Atama, te ʼuluaki tagata, pea neʼe ina faʼu ʼaki te fafine. Neʼe ʼui fēnei e Atama: “Ko ia ʼaenī ko te hui ʼo toku hui pea mo te kakano ʼo toku kakano.”—Senesi 2:19-23.

 2. Koteā ʼaē neʼe hoko ki te maʼuli ʼo te hahaʼi fafine pea mo te nofo ʼohoana ʼi te ʼu taʼu ʼaenī kua hili?

² Logolā te kamataʼaga lelei ʼaia ʼo te ʼohoana, ko te kautahi neʼe fakatuʼu ʼi te ʼu taʼu 1960 ʼi Amelika, ʼe higoa ko te faka ʼāteaina ʼo te hahaʼi fafine—ko he faiga ʼa te hahaʼi fafine ke natou ʼāteaina mai te takitaki ʼa te tagata. ʼI te temi ʼaia, neʼe lagi ko te toko 300 tagata ʼohoana ki te fafine ʼohoana e tahi ʼaē neʼe natou liʼaki tonatou ʼu fāmili. Pea ʼi te fakaʼosi ʼo te ʼu taʼu 1960 neʼe ko te toko 100 tagata ʼohoana ki te fafine ʼohoana e 1. ʼI te temi nei kua hagē pē te hahaʼi fafine ko te hahaʼi tagata, kua natou lea kovi, mo ʼinu kava, mo suluka, pea mo aga heʼeʼaoga. Kua maʼuli fiafia ai age koa lā te hahaʼi fafine? Kailoa. ʼI ʼihi fenua, ʼe teitei ki te vaelua ʼo te hahaʼi ʼaē ʼe ʼohoana ʼe natou toe māvete pē. Kua lelei age koa te ʼu faiga ʼa ʼihi fafine ke lelei age tonatou maʼuli faka taumātuʼa peʼe kua lēsili kovi age ia?—2 Timoteo 3:1-5.

 3. Koteā te tupuʼaga tāfito ʼo te maʼuli fihifihia ʼo te nofo ʼohoana?

³ Koteā te tupuʼaga tāfito ʼo te maʼuli fihifihia ʼo te nofo ʼohoana? ʼE feala pē ke ʼui, ʼe ko te fihifihia ʼaē neʼe hoko talu mai ia Eva ʼi tona fakahalaʼi ʼaē e te ʼāselo agatuʼu, “te gata olisinale, ia ia ʼaē ʼe fakahigoaʼi ko te Tēvolo pea mo Satana.” (Apokalipesi 12:9, MN; 1 Timoteo 2:13, 14) Neʼe mole fakaʼapaʼapa ia Satana ki te ʼu meʼa ʼaē neʼe akoʼi e te ʼAtua. Ohagē lā ko te ʼohoana, neʼe fakaliliu e te Tēvolo ʼe ko he fakatuʼutuʼu ia ʼe faigataʼa fau pea mo fefeka. Ko te ʼu loi ʼaē ʼe fai pea ʼe tala ʼi te ʼu logo ʼo te mālamanei—ʼaē ʼe ina puleʼi—ʼe ina fai tāfito ke manatu te hahaʼi ko te ʼu fakatotonu ʼa te ʼAtua ʼe fakapalatahi pea kua ʼāfea. (2 Kolonito 4:3, 4) Kae kā tou ʼiloʼi te manatu ʼa te ʼAtua ʼo ʼuhiga mo te tuʼulaga ʼo te fafine ʼi te ʼohoana, pea ʼe tou mahino ai anai ʼe fakapotopoto pea mo ʼaoga ia te Folafola ʼa te ʼAtua.

Te Fakatokaga Ki Te Hahaʼi ʼOhoana

4, 5. (a) He koʼē ʼe tonu ke fakakaukauʼi lelei e he fafine mokā fia ʼohoana? (b) Koteā ʼaē ʼe tonu ke fai e he fafine ʼi muʼa ʼo hana ʼohoana?

⁴ ʼE fakatokaga mai ʼi te Tohi-Tapu, ʼi te mālamanei ʼaē ʼe puleʼi e te Tēvolo, māʼiapē lā mo nātou ʼaē ʼe lelei tonatou ʼu maʼuli faka taumātuʼa, ʼe natou tau anai mo te ʼu “mamahi”. Logolā ko te ʼohoana ʼe ko he fakatuʼutuʼu fakaʼatua, kae ʼe fakatokaga mai ʼi te Tohi-Tapu kiā nātou ʼaē kua ʼohoana. Ko te tagata faitohi Tohi-Tapu neʼe ina ʼui ʼo ʼuhiga mo te fafine neʼe mate tona ʼohoana pea kua ʼāteaina ia ke toe ʼohoana: “E fiafiaʼage ia mo kapau e nofo feia.” Neʼe toe fakaloto mālohiʼi foki e Sesu ia te nofo selipatea kiā nātou ʼaē ‘ ʼe feala ke natou tuku ke hoko te meʼa ʼaia.’ Kae kapau ʼe natou fia ʼohoana, ke natou ʼohoana “i te Aliki” pē, mo he tahi ʼe tauhi ki te ʼAtua pea kua foaki tona maʼuli pea mo papitema.—1 Kolonito 7:28, 36-40; Mateo 19:10-12.

⁵ Ko te tupuʼaga tāfito ʼaē ʼe tonu ai ki he fafine  ke tokaga ki te tagata ʼaē ʼe ʼohoana mo ia, heʼe ko te fakatokaga ʼe haʼu mai te Tohi-Tapu: “Ko te fafine ohoana e haʼi e te lao ki tona ohoana.” Kapau ʼe mate tona ʼohoana peʼe hala ki tuʼa ʼo nā māvete ai, kua “ateaina [ia] mai te lao o tona ohoana.” (Loma 7:2, 3) Ko te femanakoʼaki ʼa he tama mo he taʼahine ʼi tanā ʼuluaki felāveʼi, ʼe mole ko he fakatafitoʼaga lelei ki he ʼohoana fiafia. Koia ko he fafine selipatea, ʼe tonu ke ina fai te fehuʼi ʼaenī: ‘Kua au tali koa te fakatuʼutuʼu ʼaē ke au fakalogo ki te lao ʼa te tagata ʼaenī?’ ʼE tonu ke vakaʼi te fehuʼi ʼaenī ʼi muʼa ʼo te ʼohoana, kae ʼaua naʼa fai mokā kua ʼosi te ʼohoana.

 6. Koteā te tonu kua feala ki te hahaʼi fafine ke natou fai iā ʼaho nei, pea he koʼē ʼe maʼuhiga?

⁶ ʼE lahi te ʼu fenua iā ʼaho nei, ʼe feala ki he fafine ke ina filifili peʼe ina tali peʼe kailoa he tahi ʼe fia ʼohoana mo ia. Kae lagi ko he meʼa faigataʼa ʼaupitō anai ki he fafine hana fai he tonu ʼe lelei, heʼe feala ke mālohi iā ia tana holi ʼaē ke fakapelepeleʼi pea mo ʼofainaʼi. Neʼe tohi fēnei e te tagata faitohi: “Kā lahi fau hata loto ki he meʼa—peʼe kita fia ʼohoana peʼe kita fia hake ʼi he moʼuga—pea ʼe lahi anai te ʼu fakatuʼutuʼu ʼaē kā tou hoko fai pea mo fakaʼaogaʼi pē anai te ʼu meʼa ʼaē ʼe ʼui mai pea mo kita fia logo kiai.” ʼE lagi mate anai he tahi ʼe hake ʼi he moʼuga he neʼe ina fai he tonu ʼe mole fakapotopoto; pea ki he tahi ʼe fakatuʼutuʼu ke ʼohoana ʼe feala anai ke fua kovi mo kapau neʼe kovi tana fili.

 7. Koteā te tokoni poto neʼe fai ʼo ʼuhiga mo te kumi ʼohoana?

⁷ ʼE tonu ke fakakaukauʼi lelei e te fafine ia te ʼu meʼa ʼaē ʼe pipiki ki te lao ʼa he tagata ʼe fia ʼohoana mo ia. Kua hili nei kiai te ʼu taʼu, neʼe ʼui fakalelei fēnei e te kiʼi finemui Initia: “Ko tatatou ʼu mātuʼa kua nātou mātutuʼa age pea mo lahi age tonatou poto, pea ʼe mole kākāʼi gafua nātou ohagē ko tātou. . . . ʼE faigafua pē haku faihala.” Ko te ʼu tokoni ʼaē ʼe foaki atu e takotou ʼu mātuʼa pea mo ʼihi hahaʼi fotufotuʼa, ʼe maʼuhiga ʼaupitō. Ko te tagata fai tokoni poto neʼe ina fakaloto mālohiʼi talu mai fualoa ia te kau tūpulaga ke natou feʼiloʼiʼaki mo te ʼu mātuʼa ʼo ia ʼaē kā ʼohoana mo ia, pea mo sivisivi tana ʼu felōgoi mo tana ʼu mātuʼa pea mo tona ʼu tehina mo tokolua.

Te Faʼahiga Fakahā e Sesu Te Fakalogo

8, 9. (a) Neʼe feafeaʼi kiā Sesu tana fakalogo ʼaē ki te ʼAtua? (b) Koteā te fua lelei ʼe feala ke maʼu ʼi te fakalogo?

⁸ Ko te fakalogo ʼe feala ke mata faigataʼa, kae ohagē ko Sesu ʼe faka ʼuhiga anai e te hahaʼi fafine ʼe maʼuhiga ia te fakalogo. Logolā ko tana fakalogo ʼaē ki te ʼAtua neʼe tonu ke mamahi, pea mo mate ʼi he pou fakamamahi, kae neʼe fiafia aipē ia Sesu ʼi tana fakalogo ʼaē ki te ʼAtua. (Luka 22:41-44; Hepeleo 5:7, 8; 12:3) ʼE feala ki te hahaʼi fafine ke natou muliʼi te faʼifaʼitaki ʼa Sesu, heʼe ʼui ʼi te Tohi-Tapu: “Ko te pule o te fafine e ko te tagata; pea ko te pule o Kilisito e ko te Atua.” (1 Kolonito 11:3) Kae ʼi tona fakahagatonu, ʼe mole tonu ke ʼui e te hahaʼi fafine, ʼe gata pē mokā natou ʼohoana pea hoki natou fakalogo ai ki te tuʼulaga pule ʼo te hahaʼi tagata.

⁹ ʼE fakamahino ʼi te Tohi-Tapu, ko te hahaʼi fafine peʼe kua ʼohoana peʼe kei natou selipatea, kae ʼe tonu ke natou fakalogo ki te tuʼulaga pule ʼo te ʼu tagata ʼaē kua fakapotopoto ʼi te faʼahi  fakalaumālie pea ʼe natou takitaki te kōkelekāsio faka Kilisitiano. (1 Timoteo 2:12, 13; Hepeleo 13:17) Pea ʼe tuku e te hahaʼi fafine he faʼifaʼitaki ki te kau ʼāselo ʼi te fakatuʼutuʼu faka kautahi ʼa te ʼAtua mokā natou fakalogo ki te takitaki ʼa te ʼAtua. (1 Kolonito 11:8-10) Tahi ʼaē, ko te ʼu fafine ʼohoana ʼaē kua mātutuʼa ʼe natou tuku he ako ʼaki tanatou faʼifaʼitaki lelei pea mo tanatou ʼu tokoni ʼaoga, ki te ʼu fafine kei finemui ke natou “fakalogo ki ʼonatou ʼohoana.”—Tito 2:3-5, MN.

10. Neʼe koteā te faʼifaʼitaki ʼaē neʼe tuku mai e Sesu ʼo ʼuhiga mo te fakalogo?

¹⁰ Neʼe mahino kiā Sesu ia te maʼuhiga ʼo te fakalogo faka Kilisitiano. ʼI te tahi ʼaluʼaga, neʼe ina fakahā ki te ʼapositolo ko Petelo ʼe tonu ke totogi te tukuhau ki te kau takitaki pule, ʼo ina fakahā age kiā Petelo te falā ʼo te tukuhau ʼaē ke totogi. Ki muli age, neʼe tohi fēnei e Petelo: “Koutou fakalogo ki te u tuulaga-taki fakamalama uhi ko te Aliki.” (1 Petelo 2:13; Mateo 7:24-27) ʼO ʼuhiga mo te faʼifaʼitaki maʼuhiga ʼo te fakalogo ʼa Sesu, ʼe tou lau fēnei: “Neʼe ina meʼa noaʼi ia ia totonu, pea mo liliu ai ko he kaugana, ʼo hā ohagē he tagata. Tahi ʼaē meʼa, ʼi tana liliu leva ʼaē ʼo tagata, neʼe ina fakamālaloʼi ia ia totonu pea neʼe talagafua ʼo aʼu ki te mate.”—Filipe 2:5-8, MN.

11. He koʼē neʼe fakaloto mālohiʼi e Petelo te ʼu fafine ʼohoana ke natou fakalogo ki ʼonatou ʼohoana tatau aipē mo kapau ʼe mole natou tui?

¹¹ ʼI te temi ʼaē neʼe fakaloto mālohiʼi ai e Petelo ia te kau Kilisitiano ke natou fakalogo logolā ko he kau pule takitaki aga fefeka mo heʼe faitotonu ʼo te mālamanei, neʼe ina fakamahino fēnei: “Koteuhi, nee paui koutou ki te mea aia, pea mo Kilisito nee tali mamahi o uhiga mo koutou, pea nee ina tuku kia koutou he faifaitakiʼaga ke koutou mulimuli i ona aluʼaga.” (1 Petelo 2:21) ʼI te ʼosi fakahāhā te ʼu mamahi ʼaē neʼe tau mo Sesu pea mo te loto ʼutaki ʼaē neʼe ina fakahā, neʼe fakaloto mālohiʼi fēnei e Petelo ia te ʼu fafine ʼaē ʼe ʼohoana mo te ʼu tagata ʼe mole tui: “ ʼO toe fēia mo koutou fafine, kotou fakalogo ki ʼokotou ʼohoana totonu, heʼe kapau ʼe ʼi ai niʼihi ʼe mole fakalogo ki te folafola, ke natou tafoki mai ʼuhi ko te aga ʼo tonatou ʼu ʼohoana, kae heʼeki fai he palalau, he neʼe natou sio mata ki takotou aga ʼaē ʼe maʼa pea mo he fakaʼapaʼapa lahi.”—1 Petelo 3:1, 2, MN.

12. Koteā te ʼu fua lelei neʼe maʼu ʼuhi ko te fakalogo ʼa Sesu?

¹² Lagi ʼe ʼui anai ʼe tou fula mo kapau ʼe tou fakalogo logolā hotatou fakalainoaʼi pea mo hotatou lea koviʼi. Kae neʼe mole ko te manatu ʼaia ʼa Sesu. Neʼe tohi fēnei e Petelo: “Nee ina tali te u leakovi, pea nee mole leakovi ia, i tana tali mamahi nee mole ita ia.” (1 Petelo 2:23) Ko ʼihi ʼi tanatou sisio ki te ʼu mamahi ʼo Sesu neʼe natou liliu ʼo tui kiā te ia, kae neʼe mole natou tui kātoa ki ai, ʼe kau ai te tagata kaihaʼa neʼe tautau ʼi te pou ʼi ʼona tafa pea mo te ofisie ʼaē neʼe fakatuʼutuʼu moʼo matehi ia ia. (Mateo 27:38-44, 54; Maleko 15:39; Luka 23:39-43) ʼO toe fēia, neʼe ʼui e Petelo ko ʼihi ʼi te ʼu tagata ʼohoana heʼe tui—māʼia mo natou ʼaē neʼe agakovi—ʼe natou liliu anai ko he kau Kilisitiano ʼi tanatou ʼosi sio ki te aga fakalogo ʼo tonatou ʼu hoa. Kua tou sio ki te moʼoni ʼo te pelesepeto ʼaia ʼaki te ʼu meʼa ʼaē ʼe hoko iā ʼaho nei.

Te ʼOfa ʼAē ʼe Lava Maʼu e Te ʼu Fafine ʼOhoana

13, 14. ʼE fua lelei feafeaʼi ki te ʼu tagata ʼohoana heʼe tui ia te fakalogo ʼo tonatou ʼu hoa?

¹³ Ko te ʼu fafine ʼohoana Fakamoʼoni neʼe natou maʼu tonatou ʼu hoa ʼaki pē tanatou aga faka Kilisitiano. Mole heʼeki faʼa fualoa kiai, ʼi te fakatahi faka tisitilike ʼa te kau Fakamoʼoni ʼa Sehova, neʼe ʼui fēnei e te tagata ʼo ʼuhiga mo tona ʼohoana Fakamoʼoni: “Neʼe ko au ia neʼe ko te vale ʼi taku gaohi koviʼi toku ʼohoana. Kae neʼe fakaʼapaʼapa lahi aipē kiā au. Neʼe mole he temi neʼe ina fakalainoaʼi ia au. Pea neʼe mole ina faigaʼi ke ina fakakinauʼi mai tana lotu. Neʼe tokaga ia kiā au ʼaki te ʼofa. Kā ʼalu ki he fakatahi, ʼi muʼa ʼo tana ʼalu neʼe gāue kinakina moʼo teuteuʼi haku meʼa kai fakatomuʼa pea mo fakamaʼa te ʼapi. ʼAki tana aga, neʼe tupu ai leva taku fia mahino ki te Tohi-Tapu. Pea ʼi te temi nei kua au ʼi henī mo koutou!” ʼEī, neʼe “tafoki mai . . . kae heʼeki fai he palalau” ʼaki pē te aga ʼo tona ʼohoana.

¹⁴ Ohagē ko tona ʼui e Petelo, ko te meʼa ʼaē ʼe maʼuhiga ʼe mole ko te ʼu palalau ʼaē ʼe fai e te fafine kae ko tana aga, pea ʼe fua lelei. Neʼe hoko te  meʼa fēia ki te fafine neʼe ina ako te ʼu moʼoni faka Tohi-Tapu pea neʼe fakatuʼutuʼu ke kau ki te ʼu fono faka Kilisitiano. Neʼe kalaga fēnei age tona ʼohoana: “Agnes, kapau ʼe ke fakalaka ʼi te matapā ʼaia, ʼe mole ke toe liliu mai anai ki henī!” Pea neʼe mole fakalaka ia ʼi “te matapā ʼaia” kae neʼe hū ia ʼi te tahi age matapā. Ko te tahi fono, neʼe ina fakamatakuʼi fēnei ia ia: “Kā ke toe liliu mai anai kua au puli ʼi henī.” Pea neʼe hoko te faʼahi ʼaia, neʼe puli iā ʼaho e tolu. ʼI tana liliu mai, neʼe fehuʼi age e Agnes: “ ʼE ke fia kai?” Neʼe mole he faʼahi neʼe tōtō ai ia Agnes ʼo ʼuhiga mo tana tauhi kiā Sehova. Ki muli age neʼe tali e tona ʼohoana ke fai hana ako Tohi-Tapu, pea neʼe ina foaki tona maʼuli ki te ʼAtua, pea ki muli age neʼe liliu ko he tagata taupau ʼaki tona ʼu pilivilēsio lahi.

15. Ko te “teuteu” fea ʼaē ʼe fakaloto mālohiʼi te ʼu fafine ʼohoana Kilisitiano ke natou maʼu?

¹⁵ Neʼe fakaloto mālohiʼi e te ʼapositolo ko Petelo ia te faʼahiga aga neʼe hā ʼi te ʼu fafine ʼohoana ʼi te ʼu palakalafe ki muʼa atu, ia tanatou “teuteu,” neʼe mole lahi fau tanatou “fī ʼo te lauʼulu” peʼe ko tanatou “ ʼai ʼo he ʼu kofu tuʼa.” Kae neʼe ʼui fēnei e Petelo: “Ko [tokotou teuteu] . . . [ʼe ko] te ʼuhigaʼi tagata fufū ʼaē ʼo te loto, ʼi te kofu ʼaē ʼe mole feala ke kovi ʼo te loto tokalelei mo malū, ʼaia ʼe ko he meʼa maʼuhiga ʼaupitō kiā mata ʼo te ʼAtua.” ʼE fakahā e te hahaʼi fafine tanatou fakapotopoto, ʼi te ʼaveʼave ʼo tonatou leʼo pea mo tanatou aga, ʼo mole natou fakafifihi anai peʼe fakakinakina. Kapau ʼe fai fēia ia he fafine Kilisitiano, pea ʼe ina fakahā ai tana fakaʼapaʼapa lahi ki tona ʼohoana.—1 Petelo 3:3, 4, MN.

Te ʼu Faʼifaʼitaki Ke Muliʼi e Te Hahaʼi Fafine

16. Ko te ʼu faʼahi fea ʼaē ʼe liliu ai ia Sala ko he faʼifaʼitaki lelei ki te ʼu fafine ʼohoana Kilisitiano?

¹⁶ Neʼe tohi fēnei e Petelo: “Nee i ai ihi temi, nee teuteu feia te u fafine maonioni nee falala ki te Atua pea nee natou fakalogo ki onatou ohoana.” (1 Petelo 3:5) Neʼe ʼiloʼi e te ʼu fafine ʼaia kapau neʼe natou fia fakafiafia ia Sehova, pea neʼe tonu ke natou fakalogo ki tana ʼu tokoni heʼe natou maʼu ai anai he maʼuli faka fāmili fiafia pea mo te fakapale ʼo te maʼuli heʼegata. ʼE talanoa ia Petelo ʼo ʼuhiga mo Sala, te ʼohoana finemui ʼo Apalahamo, ʼo kotou fakatokagaʼi neʼe “fakalogo kiā Apalahamo, ʼo ina fakahigoaʼi ko tona ‘ ʼAliki.’ ” Neʼe lagolago ia Sala ki tona ʼohoana ʼaē neʼe manavasiʼi ki te ʼAtua, ʼaē neʼe fakatotonu age e te ʼAtua ki ai ke ʼalu ki he fenua mamaʼo. Neʼe situʼa ki te maʼuli lelei logolā te ʼu tuʼutāmaki ʼaē neʼe lava hoko ki ai. (Senesi 12:1, 10-13) Neʼe talanoa ia Petelo kiā Sala ʼuhi ko he faʼifaʼitaki ʼo ʼuhiga mo te lototoʼa, ʼo ʼui māʼana: “Kua kotou liliu ai ko tana fānau, mo kapau ʼe kotou haga fai te meʼa ʼaē ʼe lelei ʹo mole kotou manavasiʼi ki he faʼahiga meʼa ʼe fakatupu mataku.”—1 Petelo 3:6, MN.

17. He koʼē neʼe manatu ia Petelo ʼo ʼuhiga mo Apikaela ohagē ko he faʼifaʼitaki maʼa te ʼu fafine ʼohoana Kilisitiano?

¹⁷ Ko Apikaela neʼe ko te tahi fafine neʼe manavasiʼi pea mo falala ki te ʼAtua, pea lagi koia ʼaē  neʼe manatu ai ia Petelo ki ai. “Neʼe poto lelei” ia kae ko tona ʼohoana ko Napale “neʼe aga fefeka pea neʼe kovi tana ʼu aga.” ʼI te mole fia tokoni ʼa Napale kiā Tavite pea mo tana ʼu tagata gāue, neʼe tutuʼu atu aipē Tavite mo tana ʼu hahaʼi ke nātou ʼolo ʼo matehi ia Napale mo tona loto fale kātoa. Kae ko Apikaela neʼe ina foimo fai te fakatuʼutuʼu moʼo haofaki tona loto fale. Neʼe ina teuteuʼi te meʼa kai ʼo ina ʼai ki te ʼu ʼāsino pea mo ʼalu ʼo faka fetaulaki mo Tavite mo tana kautau ʼaē neʼe fagona mai ʼi te ala. ʼI tana sio kiā Tavite, neʼe hifo ifo ʼi te ʼāsino, ʼo tō tuʼutuli ʼi ʼona vaʼe, pea mo kolekole age ke ʼaua naʼa ina fai he meʼa ʼe kovi. Neʼe malave ʼaupitō kiā Tavite te aga ʼa Apikaela. Pea ina ʼui fēnei age: “Ke tapuakiʼi ia Sehova, te ʼAtua ʼo Iselaele, ia ia ʼaē neʼe ina fekauʼi koe ke ke felāveʼi mo au ʼi te ʼaho ʼaenī! Pea ke tapuakiʼi mo tau fakapotopoto.”—1 Samuele 25:2-33.

18. Kapau ʼe ʼamanaki higa te ʼu fafine ʼohoana ki he ʼu faiga mālohi ʼa he tahi tagata, ko ai te faʼifaʼitaki ʼaē ʼe feala ke natou muliʼi, pea koteā tona tupuʼaga?

¹⁸ Ko te tahi faʼifaʼitaki maʼa te hahaʼi fafine ʼohoana, ʼe ko te finemui Sulamite ʼaē neʼe nofo agatonu ki te tama tauhi ovi agavaivai ʼaē neʼe fakapapau ke ʼohoana mo ia. Neʼe mālohi aipē tona ʼofa ʼaē kiā te ia logolā te ʼu faiga mālohi ʼa te hau maʼu koloa ke nā fakatahi. Neʼe ina ʼui fēnei ʼo ʼuhiga mo tona ʼofa ʼaē ki te tama tauhi ovi: “Tuku au ohagē ko he fakamaʼu ʼi tou mafu, ohagē ko he fakamaʼu ʼi tou nima; heʼe ko te ʼofa ʼe mālohi ohagē ko te mate . . . ʼE mole feala ki he ʼu tuʼuga vai ke natou tāmateʼi te ʼofa, pea mo te ʼu vaitafe lalahi ʼe mole natou lava ʼave ai.” (Hiva ʼa Salomone 8:6, 7) ʼOfa pē ke toe fēia mo te ʼu fafine ʼohoana fuli ʼaē kua natou ʼio ke ʼohoanaʼi nātou, ke natou nofo agatonu ki ʼonatou ʼohoana pea mo fakaʼapaʼapa lahi kiā nātou.

Ko He Tahi Tokoni Fakaʼatua

19, 20. (a) Koteā te tupuʼaga ʼaē ʼe tonu ai ki te ʼu fafine ʼohoana ke natou fakalogo ki ʼonatou ʼohoana? (b) Ko ai te faʼifaʼitaki lelei ʼe maʼu e te ʼu fafine ʼohoana?

¹⁹ ʼOsi ʼaia, kotou vakaʼi te ʼu vaega ki muʼa atu pea ki muli mai ʼo te vaega faka Tohi-Tapu ʼaenī: “Ke [kotou] fakalogo . . . ʼu fafine ʼohoana ki [ʼokotou] ʼohoana.” (Efeso 5:22, MN ) He koʼē ʼe maʼuhiga te taʼi fakalogo ʼaia? ʼE hoko atu fēnei te vaega: “Koteuhi ko te tagata ohoana e ko te pule o te fafine, o hagepe ko Kilisito e ko te Pule o te [“kōkelekāsio,” MN ].” Koia ʼaē, ʼe fakaloto mālohiʼi fēnei te hahaʼi fafine ʼohoana: “[Ohagē pē] ko te [“kōkelekāsio,” MN ] e fakalogo kia Kilisito, pea e feia mo te u fafine ohoana ki onatou ohoana i te meafuape.”—Efeso 5:23, 24, 33.

²⁰ Ke natou fakalogo ki te fakatotonu ʼaia, ʼe tonu ia ki te ʼu fafine ʼohoana ke natou ako pea mo muliʼi te faʼifaʼitaki ʼa te kōkelekāsio ʼo te kau tisipulo fakanofo ʼa Kilisito. Kotou lau ia 2 Kolonito 11:23-28 pea kotou mahino ai ki te ʼu mamahi neʼe ʼūtakiʼi e te tehina ʼo te kōkelekāsio, ia te ʼapositolo ko Paulo, ʼi tana agatonu ki tona Pule ko Sesu Kilisito. Ohagē ko Paulo, ko te ʼu fafine ʼohoana ʼo fēia mo te kōkelekāsio ʼe tonu ke natou fakalogo agatonu kiā Sesu. ʼE fakahā e te ʼu fafine te faʼahi ʼaia, ʼaki tanatou fakalogo ʼaē ki tonatou ʼu ʼohoana.

21. Koteā ʼaē ʼe lelei ke ʼiloʼi e te ʼu fafine ʼohoana ke natou haga fakalogo ai ki tonatou ʼu ʼohoana?

²¹ Kapau ʼe tokolahi te ʼu fafine ʼohoana ʼi te temi nei ʼe lagi faigataʼa tanatou fakalogo, kae ko he fafine poto ʼe ina tokagaʼi anai te ʼu fua lelei ʼo tana fakalogo. Ohagē lā, kapau ko he tagata ʼohoana ʼe mole tui, kae ko tona ʼohoana ʼe fakalogo ki tana takitaki ia meʼa fuli ʼaē ʼe mole fakafeagai ki te ʼu lao peʼe ko te ʼu pelesepeto ʼa te ʼAtua, ʼe lagi ina maʼu anai he fakapale taulekaleka ʼi tana lava ‘haofaki tona ʼohoana.’ (1 Kolonito 7:13, 16) Tahi ʼaē, ʼe fiafia ʼi tana ʼiloʼi ʼaē ko te ʼAtua ʼe ina leleiʼia tana aga pea ʼe ina fakapale lahi anai ia ia ʼi tana muliʼi te faʼifaʼitaki ʼo tona ʼAlo ʼofaina.

ʼE Kei Kotou Manatuʼi Koa?

• He koʼē ʼe feala ke mata faigataʼa ki he fafine te fakaʼapaʼapa ki tona ʼohoana?

• He koʼē ʼe maʼuhiga ʼaupitō ke tou fakakaukauʼi lelei peʼe tonu ke tou tali he tahi ʼe fia ʼohoana mo kita?

• Neʼe liliu feafeaʼi ia Sesu ko he faʼifaʼitaki ki te ʼu fafine ʼohoana, pea koteā te ʼu fua lelei ʼe lava maʼu mokā muliʼi tona faʼifaʼitaki?

[Fehuʼi]

[Paki ʼo te pasina 9]

He koʼē ʼe maʼuhiga ʼaupitō ke tou fakakaukauʼi lelei peʼe tonu ke tou tali he tahi ʼe fia ʼohoana mo kita?

[Paki ʼo te pasina 11]

Koteā te ako ʼe lava maʼu e te ʼu fafine ʼohoana mai te ʼu agaaga ʼa Apikaela?