ʼE Moʼoni Koa Kiā Koutou Ia Te Fakatuʼuake?

“E ʼi ai anai he fakatuʼuake.”—Gāue 24:15.

 1. He koʼē ʼe hagē te mate ʼe ko he meʼa ʼe moʼoni?

 “ ʼI TE mālamanei ʼe fakaʼapē lua ia meʼa fuli gata pē ki te mate pea mo te totogi ʼo te tukuhau.” Ko te ʼu palalau ʼaia neʼe tohi ʼi te taʼu 1789 e te tagata fai politike Amelika ko Benjamin Franklin, pea neʼe fakamoʼoni kiai ʼihi ʼe totonu ia tana manatu. Kae tokolahi te hahaʼi aga fakakākā ʼe mole natou totogi fakalelei ia tonatou tukuhau. Kae ʼe mole feala ia ki te mate ke ina kākāʼi he tahi. Kā mole tou maʼu he tokoni, pea ʼaki pē te temi ʼe tou aʼu kiai, heʼe tou mamate fuli. Ko te Seole ia te faitoka ʼo te mālamanei, ʼe ina toʼo te hahaʼi ʼaē ʼe tou ʼoʼofa ai. (Tāʼaga Lea 27:20) Kae tou vakaʼi age muʼa te manatu fakaloto fīmālie.

2, 3. (a) He koʼē ʼe mole mamate anai ʼihi ohagē ko tona hoko ʼaē ki te tokolahi? (b) Koteā ʼaē kā tou vakaʼi anai ʼi te ʼalatike ʼaenī?

² Ko te Folafola ʼa Sehova ʼe ina foaki mai ia te ʼamanaki moʼoni ʼo te fakatuʼuake, ko he toe fakamaʼuli ʼo he tahi neʼe kua mate. ʼE mole ko he moemisi ia, pea ʼe mole he mālohi ʼi te ʼatulaulau ʼe ina lava tāʼofi ia Sehova ke ina fakahoko moʼoni ia te ʼamanaki ʼaia. Kae ki ʼihi, ʼe mole natou mamate anai ohagē ko te tokolahi iā ʼaho nei. Koteā tona tupuʼaga? Heʼe ko te “toe hahaʼi tokolahi” ʼe mole malau ʼe natou hao anai ʼi “te mamahi lahi,” ʼaē kua vave hoko mai. (Fakahā 7:9, 10, 14) Pea ki muli age ʼe natou māʼuʼuli anai ʼo heʼegata. Koia, kiā nātou ʼaia ʼe lagi mole natou ʼiloʼi anai ia te mate. Tahi ʼaē, “ ʼe pulihi anai ia te mate.”—1 Kolonito 15:26.

³ ʼE tonu ke tou tui papau ki te fakatuʼuake ohagē ko te ʼapositolo ko Paulo, ʼaē neʼe ina ʼui fēnei: “ ʼE ʼi ai anai he fakatuʼuake ʼo te kau faitotonu pea mo te kau heʼe faitotonu.” (Gāue 24:15) Tou vakaʼi age muʼa te ʼu fehuʼi e tolu ʼo ʼuhiga mo te fakatuʼuake. ʼUluaki fehuʼi, koteā ʼaē ʼe moʼoni ai te ʼamanaki ʼaia? Lua, ʼe feafeaʼi hakotou lava maʼu he loto fīmālie ʼaki te ʼamanaki ʼo te fakatuʼuake? Tolu, ʼe malave feafeaʼi ki tokotou maʼuli ʼo te temi nei ia te ʼamanaki ʼaia?

ʼE Hoko Moʼoni Ia Te Fakatuʼuake

 4. ʼE liliu feafeaʼi te fakatuʼuake ʼe ko he fakatafito ʼo te fakatuʼutuʼu ʼa Sehova?

⁴ ʼE lahi te ʼu tupuʼaga ʼe moʼoni ai te fakatuʼuake. ʼUluaki, ʼe ko te fakatafito ʼo te fakatuʼutuʼu ʼa Sehova. Tou manatuʼi, neʼe taki e Satana ia te mālamanei ki te agahala, mo tona fua kovi ko te mate. Koia, neʼe ʼui fēnei e Sesu ʼo  ʼuhiga mo Satana: “Neʼe ko he fakapō ia ʼi tana kamata.” (Soane 8:44) Kae neʼe fakapapau e Sehova ko tona “ ʼohoana” peʼe ko tana kautahi ʼi te lagi, ʼe ina fakatupu anai he “hako” kā ina maumauʼi ia te ʼulu ʼo te “gata olisinale,” ʼo fakaʼauha ʼo talu ai ʼosi ia Satana. (Senesi 3:1-6, 15; Fakahā 12:9, 10; 20:10) Ko Sehova neʼe ina fakahā māmālie tana fakatuʼutuʼu ʼo ʼuhiga mo te Hako ia te Mēsia, pea neʼe hā lelei ko te Hako ʼe ina fakaʼauha anai ia Satana pea mo tana ʼu gāue. ʼE ʼui fēnei ʼi te Folafola ʼa te ʼAtua: “Neʼe hā te ʼAlo ʼo te ʼAtua ʼuhi ko te fakatuʼutuʼu ʼaenī, ke ina maumauʼi te ʼu gāue ʼa te Tēvolo.” (1 Soane 3:8) Ko te mate ʼaē neʼe tou maʼu mai te agahala ʼa Atama, ʼe kau ʼi te ʼu gāue tāfito ʼa Satana ʼaē kā fakaʼauha e Sehova ʼaki ia Sesu Kilisito. ʼO ʼuhiga mo te faʼahi ʼaia, ko te sākilifisio faitotogi ʼa Sesu pea mo te fakatuʼuake ʼe ko he ʼu fakatuʼutuʼu maʼuhiga ʼaupitō.—Gāue 2:22-24; Loma 6:23.

 5. He koʼē koa ʼe faka kolōliaʼi anai ia te huafa ʼo Sehova ʼaki te fakatuʼuake?

⁵ Kua fakatuʼutuʼu e Sehova ke ina faka kolōliaʼi tona huafa taputapu. Neʼe moamoagaʼi e Satana ia te huafa ʼo te ʼAtua pea neʼe ina fakatupu mo te ʼu loi. Neʼe loi kiā Atama mo Eva ‘ ʼe mole nā mamate anai’ mo kapau ʼe nā kai ki te fuaʼi ʼakau ʼaē neʼe tapuʼi age e te ʼAtua. (Senesi 2:16, 17; 3:4) Talu mai ai, neʼe fai e Satana ia te ʼu loi fēia, ohagē lā ko te akonaki loi ʼaē ko te nefesi ʼe maʼuli mokā mate te sino. Kae ʼaki te fakatuʼuake, ʼe fakahā anai e Sehova ia te loi ʼo te ʼu akonaki fuli ʼaia. ʼE ina fakahā anai ʼo talu ai ko ia tokotahi pē ʼe ko te Haofaki pea mo te Fakamaʼuli.

6, 7. ʼE feafeaʼi ia Sehova ʼo ʼuhiga mo te fakatuʼuake ʼo te hahaʼi, pea ʼe tou mahino feafeaʼi ki te ʼu meʼa ʼaē ʼi tona loto?

⁶ Kua loto lā e Sehova ke ina fakahoko ia te fakatuʼuake. ʼE fakahā lelei ʼi te Tohi-Tapu ia te ʼu manatu ʼa te ʼAtua ʼo ʼuhiga mo te faʼahi ʼaia. Ohagē lā, kotou fakatokagaʼi te ʼu palalau ʼaenī ʼa te tagata agatonu ko Sopo: “Kapau ʼe mate he tagata mālohi, ʼe feala koa hana toe tuʼuake? ʼI te ʼu ʼaho fuli pē ʼo toku maʼua fekau, ʼe au talitali anai, ʼo aʼu ki te haʼu ʼo toku fetogi. ʼE ke pāui anai pea ʼe au tali atu anai. ʼE ke fakatalitali mālohi anai ke ke sio ki te gāue ʼo tou ʼu nima.” (Sopo 14:14, 15) Koteā te faka ʼuhiga ʼo te ʼu palalau ʼaia?

⁷ Neʼe ʼiloʼi e Sopo mokā mate, ʼe fakatalitali anai ʼi te mate. Neʼe ina fakatatau ia te temi ʼaia ki he “maʼua fekau,” ko he temi ʼe fakatalitali ai anai ʼo aʼu ki tona toe fakamaʼuli age. Maʼa ia, neʼe moʼoni ia te fakamaʼuli ʼaia. Neʼe ʼiloʼi e Sopo ʼe hoko moʼoni anai tona toe fakatuʼuake. Koteā tona tupuʼaga? He neʼe mahino ia ki te ʼu manatu ʼa Sehova. ʼE “fakatalitali mālohi” anai ia Sehova ke toe sio ki tana tagata kaugana agatonu. ʼEī, kua fakaʼamu lā e te ʼAtua ke ina fakatuʼuake ia te kau agatonu fuli. ʼE toe foaki anai e Sehova ki ʼihi ia te faigamālie ʼaē ke natou maʼuli heʼegata ʼi te Palatiso ʼi te kele. (Luka 23:43; Soane 5:28, 29) ʼUhi heʼe ko te finegalo ʼo te ʼAtua ke ina fai ia te fakatuʼutuʼu ʼaia, ko ai koa anai ʼe ina lava tāʼofi ia ia?

 8. Neʼe ‘tuku feafeaʼi e Sehova ia he fakamoʼoni’ ʼo ʼuhiga mo tatatou ʼamanaki ki te kā haʼu?

⁸ ʼE moʼoni tatatou ʼamanaki ki te kā haʼu ʼuhi ko te fakatuʼuake ʼo Sesu. ʼI te temi ʼaē neʼe fai e Paulo te akonaki ʼi Ateni, neʼe ina ʼui fēnei: “[Ko te ʼAtua] kua ina fakatuu he aho e ina fakamauʼi ai i te faitotonu te malama-nei, aki he tagata kua ina hinoi, pea ko te fakamooni kua ina tuku ki te tagata fuape: nee ina fakatuuake ia mai te mate.” (Gāue 17:31, Tauhi Foou) Ko ʼihi ʼi te nofoʼaki neʼe natou vāʼi ia Paulo ʼi tanatou logo ki te fakatuʼuake. Kae ko te tokosiʼi, neʼe natou tui nātou kiai. Lagi neʼe tupu tanatou tui he neʼe ʼi ai te fakamoʼoni ʼo te ʼamanaki ʼaia. ʼI te temi ʼaē neʼe fakatuʼuake ai ia Sesu e Sehova, neʼe ko tana milakulo lahi ʼaia neʼe Ina fai. Neʼe ina fakatuʼuake tona ʼAlo mai te mate ki te maʼuli, kua liliu ia ko he laumālie mālohi. (1 Petelo 3:18) Ko te Sesu ʼaē neʼe fakatuʼuake kua maʼuhiga age ia ʼi te temi ʼaē neʼe maʼuli ʼuluaki ai ʼi te lagi ʼi muʼa ʼo tana tupu tagata. Kua maʼu e Sesu ia te maʼuli tuputupua pea ʼe tuʼulaga lua ʼi te mālohi ia Sehova, pea kua nofo nei Sesu ʼi te tuʼulaga ke ina fakahoko te ʼu fakatotonu mai tana Tamai. Ko  Sesu ʼe ko te puleʼaki ʼaē kā fakaʼaogaʼi e Sehova moʼo fakatuʼuake te hahaʼi fuli ʼaē, ki te maʼuli ʼi te lagi peʼe ʼi te kele. ʼE ʼui fēnei e Sesu ʼo ʼuhiga mo ia totonu: “E ko au te Tuuʼake mo te Mauli.” (Soane 5:25; 11:25, Tauhi Foou) ʼAki tana fakatuʼuake tona ʼAlo, neʼe ko he fakamoʼoni ʼaia ʼa Sehova maʼa tana ʼu kaugana agatonu fuli.

 9. ʼE fakamoʼoni feafeaʼi e te fakamatala ʼi te Tohi-Tapu ia te moʼoni ʼo te fakatuʼuake?

⁹ Neʼe sio mata te ʼu hahaʼi ki te fakatuʼuake pea neʼe fakamatala ʼi te Folafola ʼa te ʼAtua. ʼE fakamatala fakalelei ʼi te Tohi-Tapu ia te ʼu hisitolia ʼo ʼuhiga mo te ʼu fakatuʼuake e valu, ko te hahaʼi neʼe kua mamate pea neʼe toe fakatuʼuake ki te maʼuli. Ko te ʼu milakulo ʼaia neʼe mole fai fakafufū kae neʼe fai ʼi muʼa ʼo te kaugamālie, pea ʼi te agamāhani neʼe sio mata ia te hahaʼi kiai. Neʼe fakatuʼuake e Sesu ia Lasalo, ʼaē neʼe kua mate kua hili kiai ʼaho e fā, ʼi muʼa ʼo te toe hahaʼi tokolahi neʼe putu—lagi neʼe ko te fāmili ʼo te tagata, tona ʼu kaumeʼa pea mo tona ʼu vāhaʼa fale. ʼI te mālohi ʼaupitō ʼo te fakamoʼoni ʼaia neʼe ko te ʼAtua ʼaē neʼe ina fekauʼi mai Sesu, neʼe mole fakafisi ia te ʼu fili takitaki lotu ʼo Sesu ki te meʼa ʼaē neʼe hoko. Kae neʼe natou fonofono ke natou matehi ia Sesu pea mo Lasalo! (Soane 11:17-44, 53; 12:9-11) ʼEī, ʼe tou lava falala ko te fakatuʼuake ʼe hoko moʼoni anai. Neʼe foaki mai e te ʼAtua ia te hisitolia ʼo te ʼu fakatuʼuake neʼe hoko ʼi te temi muʼa moʼo fakaloto fīmālieʼi ia tātou pea mo fakamālohiʼi tatatou tui.

Tou Maʼu Ia Te Loto Fīmālie ʼi Te ʼAmanaki ʼo Te Fakatuʼuake

10. Koteā ʼaē kā tokoni mai anai ke tou loto fīmālie ʼaki te ʼu hisitolia ʼo te fakatuʼuake ʼi te Tohi-Tapu?

¹⁰ ʼE kotou fakaʼamu koa ki he fakafīmālie mokā kotou ʼamanaki mate? ʼE tou maʼu ia te fakaloto fīmālie ʼi te ʼu hisitolia ʼo te fakatuʼuake ʼaē ʼe fakamatala ʼi te Tohi-Tapu. Kapau ʼe kotou lau ia te ʼu hisitolia ʼaia, pea mo fakakaukauʼi te ʼu meʼa ʼaē neʼe hoko, ʼe feala ai ke liliu ia te ʼamanaki ʼo te fakatuʼuake ʼo moʼoni kiā koutou. (Loma 15:4) Ko te ʼu fakatuʼuake ʼaia ʼe mole ko he ʼu fāgana. Neʼe hoko moʼoni te fakatuʼuake ki te ʼu hahaʼi neʼe maʼuli moʼoni ohagē pē ko tātou, neʼe natou māʼuʼuli ʼi te temi pea mo te ʼu koga meʼa moʼoni. Tou vakaʼi age muʼa he faʼifaʼitaki—ko te ʼuluaki fakatuʼuake ʼi te hisitolia ʼo te Tohi-Tapu.

11, 12. (a) Koteā te tuʼutāmaki neʼe hoko ki te fafine vītua ʼi Salefate, pea neʼe koteā tana tali ʼuluaki kiai? (b) Kotou fakamatala te mālohi ʼaē neʼe foaki age e Sehova ki tana polofetā ko Elia ʼaē ke ina fakafīmālieʼi te fafine vītua.

¹¹ Tou fakakaukauʼi age muʼa ia te hisitolia. Lolotoga te ʼu vāhaʼa, neʼe nofo ia te polofetā ko Elia ʼi te ʼapi ʼo te fafine vītua ʼi Salefate, ʼi te koga fale ʼi tona falefata. Neʼe ko he temi fakaʼofaʼofa ʼaia. Neʼe moamoa te fenua ʼi te laʼā pea mo te hoge. Tokolahi neʼe mamate ai. Neʼe kua fakaʼaogaʼi e Sehova ia te polofetā ko Elia moʼo fai ia te milakulo moʼo fakapale ia te tui ʼa te fafine vītua agavaivai ʼaia, pea ke tologa ai tona maʼuli. Ko ia pea mo tana kiʼi tama neʼe kua vave ʼosi pē ia tanā meʼa kai, pea neʼe foaki age e te ʼAtua ia te mālohi kiā Elia ke ina fai he milakulo, ʼo hoko atu pē te maʼu ʼo tanā moʼi falena pea mo te moʼi lolo moʼo taupau tonā maʼuli fakasino. Kae ki muli age neʼe tau leva ia te fafine vītua mo te tahi tuʼutāmaki. Neʼe hoko te mahaki faka punamaʼuli ki tana tamasiʼi, pea mole tuai kiai pea mate. ʼI meʼa fakaʼofaʼofa neʼe hoko ki te fafine vītua! Neʼe faigataʼa tona maʼuli koteʼuhi mole kei ʼi ai hona ʼohoana moʼo tokoni ki ai ʼi te faʼahi faka sino, pea koʼenī kua toe mate atu mo tana kiʼi tama ʼulu tokotahi. ʼI tona mamahi, neʼe lāuga kiā Elia pea mo tona ʼAtua, ia Sehova! Koteā ʼaē kā fai anai e te polofetā?

¹² Neʼe mole haga ia Elia ʼo fakatonutonuʼi ia te fafine vītua ʼi tana lāuga ʼaia. Kae neʼe ina ʼui fēnei age: “ ʼAumai tau tama.” ʼI tana ʼosi fua te tamasiʼi ki te laufata, neʼe faikole liuliuga ia Elia ke toe maʼuli ia te tamasiʼi. Pea neʼe logoʼi e Sehova ia tana kole! Kotou fakafuafua age muʼa ia te fiafia ʼaē neʼe maʼu e Elia ʼi tana sio ki te toe tuku manava ʼa te tamasiʼi. Pea neʼe ʼavahi age e te tamasiʼi ʼona mata, pea mo loloʼa ʼi tana kua toe maʼuli age. Neʼe hifo age ia Elia mo te  tamasiʼi ʼo foaki ki tana faʼē, ʼo ʼui māʼana: “Koʼenī tau tama kua toe maʼuli.” ʼE mole maʼu mo he palalau feʼauga moʼo fakamatala te fiafia ʼaē neʼe maʼu e te vītua. Neʼe ina ʼui fēnei: “ ʼIo kua au ʼiloʼi ʼi te temi nei ko koe ko te tagata ʼa te ʼAtua, pea ʼe moʼoni te folafola ʼa Sehova ʼaē ʼe haʼu mai tou gutu.” (1 Hau 17:8-24) Neʼe toe lahi age ia tana tui ʼaē kiā Sehova pea mo tana tagata faifekau.

13. He koʼē ʼe tou maʼu ia te loto fīmālie iā ʼaho nei ʼaki te hisitolia ʼo te fakatuʼuake ʼo te tama ʼo te fafine vītua e Elia?

¹³ Kapau ʼe kotou metitāsioʼi te taʼi hisitolia fēia, ʼe mahino ia ʼe kotou lotomālohi ai. ʼE mahino mai ʼe feala kiā Sehova ke ina fakaʼauha ia te mate ʼaē ko hotatou fili! Kotou fakakaukauʼi age muʼa ki te ʼaho ʼaē kā lahi ʼaupitō age anai ia te fiafia ʼa te fafine vītua ʼo ʼuhiga mo te fakatuʼuake ʼo te kau mate! ʼE lahi age anai te fiafia ʼi te lagi ohagē pē ko te fiafia ʼaē ʼa Sehova mokā ina takitaki anai tona ʼAlo moʼo fakatuʼuake ia te hahaʼi ʼi te kele kātoa. (Soane 5:28, 29) Neʼe kua toʼo koa e te mate ia he tahi neʼe kotou ʼofa mamahi ai? ʼI meʼa taulekaleka hata ʼiloʼi ko Sehova ʼe feala pea ʼe ina toe fakatuʼuake anai te kau mate ki te maʼuli!

Tokotou ʼAmanaki Pea Mo Tokotou Maʼuli ʼi Te Temi Nei

14. ʼE malave feafeaʼi ki tokotou maʼuli ia te ʼamanaki ʼo te fakatuʼuake?

¹⁴ ʼE malave feafeaʼi ki tokotou maʼuli ia te ʼamanaki ʼo te fakatuʼuake iā ʼaho nei? ʼE kotou lava maʼu ia te lotomālohi mai te ʼamanaki ʼaia mokā kotou tau mo he ʼu fihifihia, mo he ʼu fakataga, peʼe ko he ʼu tuʼutāmaki. ʼE loto e Satana ke kotou mātataku ʼaupitō ki te mate ʼo tupu ai hakotou mole nonofo agatonu pea mo kotou fia kumi anai hokotou holaʼaga. Kotou manatuʼi ko Satana neʼe ina ʼui fēnei kiā Sehova: “Ko meʼa fuli ʼaē ʼe maʼu e te tagata, ʼe ina foaki anai ia moʼo haofaki tona maʼuli.” (Sopo 2:4) ʼAki te taʼi palalau ʼaia, neʼe moamoagaʼi e Satana ia tātou fuli, ʼo kau ai mo koutou. ʼE hoko atu anai koa takotou tauhi ki te ʼAtua mo kapau ʼe kotou tau mo he ʼu fihifihia? ʼAki te ʼamanaki ʼo te fakatuʼuake, ʼe feala hakotou lotomālohi ʼo fai te finegalo ʼo takotou Tamai ʼaē ʼe ʼi selō.

15. ʼE fakaloto fīmālie feafeaʼi tātou e te ʼu palalau ʼa Sesu ʼaē ʼe tuʼu iā Mateo 10:28 mokā tou tau mo he ʼu fihifihia?

¹⁵ Neʼe ʼui fēnei e Sesu: “ ʼAua naʼa kotou manavasiʼi kiā nātou ʼaē ʼe natou tāmateʼi te sino kā mole feala ke natou tāmateʼi te nefesi; kā ke kotou manavasiʼi kiā ia ʼaē ʼe feala tana fakaʼauha te nefesi pea mo te sino ʼi te Seʼeni.” (Mateo 10:28) ʼE mole tonu ke tou mātataku kiā Satana pea mo tana ʼu kaugana ʼi te kele. ʼIo, lagi ko ʼihi ʼe natou lava gaohi koviʼi tātou, ʼo natou matehi kita. Kae ko tanatou agakovi ʼaia ʼe faka temi pē ia. ʼE feala kiā Sehova ke ina toʼo te agakovi fuli ʼaē neʼe fai ki tana ʼu kaugana agatonu, pea ʼe  ina fakahoko anai, tatau aipē peʼe tonu ke ina fakatuʼuake ia nātou. Ko Sehova tokotahi pē ʼe tuha ke tou mātataku ki ai, ke tou manavasiʼi lahi pea mo fakaʼapaʼapa ki ai. Ko ia tokotahi pē ʼe ina maʼu ia te mālohi moʼo toʼo ia te maʼuli pea mo te ʼu fakapapau fuli ʼo ʼuhiga mo te kā haʼu, moʼo maumauʼi ia te sino pea mo te nefesi ʼi te Seʼeni. Kae meʼa lelei foki, heʼe mole loto e Sehova ke hoko he meʼa fēia kiā koutou. (2 Petelo 3:9) ʼUhi ko te ʼamanaki ʼo te fakatuʼuake, ʼe feala kiā tātou ʼaē ko te ʼu kaugana ʼa te ʼAtua ke tou tui tuʼumaʼu ʼe puipui tātou. ʼE tou maʼu anai te maʼuli heʼegata mo kapau ʼe tou nofo agatonu tuʼumaʼu, pea ʼe mole he meʼa ʼe lava fai e Satana peʼe ko tana ʼu kau gāue ʼo ʼuhiga mo te faʼahi ʼaia.—Pesalemo 118:6; Hepeleo 13:6.

16. ʼE malave feafeaʼi tatatou ʼu manatu ki te ʼu meʼa ʼaē ʼe tou fakamuʼamuʼa?

¹⁶ Kapau ʼe moʼoni kiā tātou ia te ʼamanaki ʼo te fakatuʼuake, pea ʼe tou māʼuʼuli anai ʼo mulimuli ki te faʼahi ʼaia. ʼE tou mahino ‘peʼe tou māʼuʼuli peʼe tou mamate, kae ʼe ko tātou ʼe ʼa Sehova.’ (Loma 14:7, 8) ʼE tou muliʼi anai ia te tokoni ʼaenī ʼa Paulo mo kapau ʼe tou fakamuʼamuʼa te ʼu meʼa tāfito: “Kotou fakagata takotou muliʼi te tuʼu ʼo te ʼu faʼahiga meʼa ʼaenī, kae ke kotou fetogi ia koutou ʼo fakafoʼou tokotou ʼatamai, ke feala ai hakotou ʼiloʼi papau peʼe koteā te finegalo ʼo te ʼAtua, tona lelei, tona tali lelei, pea mo tona haohaoa.” (Loma 12:2) Tokolahi te hahaʼi ʼe natou loto mānumānu ke natou maʼu ia meʼa fuli. ʼUhi heʼe kiā nātou ʼe nounou ia te maʼuli, ʼe hagē ʼe vaʼiganoa tanatou kumi ia te fiafia, pea kapau ʼe natou maʼu ia he faʼahiga tauhi, ʼe mahino ia ʼe mole ʼalutahi mo te ‘finegalo haohaoa ʼo te ʼAtua.’

17, 18. (a) ʼE fakamoʼoni feafeaʼi ʼi te Folafola ʼa Sehova ki te nounou ʼo te maʼuli ʼo te tagata, kae koteā ʼaē ʼe loto kiai e te ʼAtua maʼa tātou? (b) He koʼē ʼe tou fia fakavikiviki kiā Sehova ʼi te ʼaho fuli?

¹⁷ ʼE moʼoni ko te maʼuli ʼe nounou. “[ʼE] fakalaka vave, pea ʼe tou feleleʼi ai [ki te mate]” lagi ko ʼihi ʼi tonatou taʼu 70 peʼe ʼi tonatou taʼu 80. (Pesalemo 90:10) ʼE tutupu ake te hahaʼi pea natou mamate ohagē ko te luna, ohagē ko te fakalaka ʼo te malu, ohagē ko he manava. (Pesalemo 103:15; 144:3, 4) Kae ko te ʼAtua neʼe mole ina fakatuʼutuʼu ke tou māʼuʼuli ʼi he kiʼi temi siʼi pea mo maʼu he faʼahiga poto pea mo he maʼuli, ʼi he ʼu kiʼi taʼu pea ʼosi, pea tou māhahaki pea mo mamate. Neʼe fakatupu e Sehova ia te tagata ʼaki te fakaʼamu ʼaē ke maʼuli heʼegata. ʼE ʼui fēnei mai ʼi te Tohi-Tapu: “[Ko] te ʼu temi ʼe mole ʼiloʼi honatou gataʼaga, neʼe ina ʼai ki tonatou loto.” (Tagata Tānaki 3:11) ʼE ko he ʼAtua aga fefeka koa, ke ina foaki mai he faʼahiga fakaʼamu pea ki muli age kua faigataʼa hona fakahoko? Kailoa ia, heʼe “ko te ʼAtua ʼe ʼofa.” (1 Soane 4:8) ʼE ina fakaʼaogaʼi anai ia te fakatuʼuake moʼo faka fealagia ia te maʼuli heʼegata ki te hahaʼi ʼaē kua mamate.

¹⁸ ʼUhi ko te ʼamanaki ʼo te fakatuʼuake, ʼe feala ke tou maʼuli tokalelei ʼi te kā haʼu. ʼE mole tonu ke tou mātataku, ʼo tupu ai hatatou fia fakaʼaogaʼi ia totatou ʼu fealagia kātoa moʼo fai ia meʼa lelei fuli ʼi te temi nei. ʼE mole tonu ke tou fakaʼaogaʼi “kātoa” te mālama ʼaenī kā ʼamanaki fakaʼauha. (1 Kolonito 7:29-31; 1 Soane 2:17) ʼAua naʼa tou hagē ko nātou ʼaē ʼe mole hanatou ʼamanaki moʼoni, heʼe tou maʼu ia te mahino taulekaleka ʼaenī: kapau ʼe tou agatonu kiā Sehova ʼAtua, pea ʼe tou maʼu anai te maʼuli heʼegata moʼo fakavikiviki kiā te ia pea mo maʼu ia te maʼuli. ʼAki te ʼu meʼa fuli ʼaia, tou fakavikiviki ʼi te ʼaho fuli kiā Sehova, ʼaē ʼe ina faka fealagia ke hoko moʼoni ia te ʼamanaki ʼo te fakatuʼuake!

ʼE Kotou Tali Feafeaʼi Anai?

• ʼE tonu ke tou feafeaʼi ʼo ʼuhiga mo te fakatuʼuake?

• Ko te ʼu tupuʼaga fea ʼe tou tui ai ʼe hoko moʼoni anai ia te ʼamanaki ʼo te fakatuʼuake?

• ʼE feafeaʼi hotatou loto fīmālie ʼaki te ʼamanaki ʼo te fakatuʼuake?

• ʼE malave feafeaʼi ki totatou maʼuli ia te ʼamanaki ʼo te fakatuʼuake?

[Fehuʼi]

[Paki ʼo te pasina 20]

“Koʼenī tau tama kua toe maʼuli”