Te ʼu Fehuʼi ʼa Te Kau Lautohi

Neʼe ʼi ai koa he ʼu vaʼe ʼo te gata ʼaē neʼe palalau kiā Eva?

Ohagē ko tona fakamatala iā Senesi 3:14, neʼe palalau ia Sehova ʼAtua ki te gata ʼaē neʼe ina kākāʼi ia Eva ʼi te ʼōloto ʼo Eteni. Neʼe ʼui fēnei e te ʼAtua: “Koteʼuhi neʼe ke fai te aga ʼaia, ʼe ke malaʼia ʼi te ʼu manu lalata fuli pea mo te ʼu manu fuli ʼo te vao. ʼE ke totolo anai ʼi tou fatu, pea ʼe ke kai anai ki te efu ʼi te ʼu ʼaho fuli ʼo tou maʼuli.” ʼE mole tohi ʼi te Tohi-Tapu ko te manu ʼaē neʼe fakaʼaogaʼi moʼo kākāʼi ia Eva neʼe ʼi ai tona ʼu vaʼe pea kua puli ia. Logolā neʼe feala ke manatu fēia ʼihi ʼuhi ko te ʼu palalau ʼaē iā Senesi 3:14, kae ʼe mole tonu leva ke tou manatu, neʼe ʼi ai te ʼu vaʼe ʼo te ʼu gata ʼi muʼa ʼo te hoko ʼo te malaʼia ʼaia. Koteā tona tupuʼaga?

Koteʼuhi neʼe fakahagahaga tāfito ia te fakamāu ʼa Sehova kiā Satana—te laumālie fakapulipuli ʼaē neʼe ina fakaʼaogaʼi kovi te gata. ʼE fakamatala ʼi te Tohi-Tapu ko Satana ko “te tamai ʼo te loi” pea ko “te gata olisinale.” ʼE hā mai ʼi te ʼu kupusiga palalau ʼaia e lua, ʼe faka ʼuhiga ki te fakaʼaogaʼi e Satana ia te manu, ia te gata, moʼo fakaneke ia Eva ke talagataʼa ki te fakatotonu ʼa te ʼAtua.—Soane 8:44; Fakahā 20:2.

Neʼe fakatupu e te ʼAtua ia te ʼu gata, pea ʼe hā mai neʼe fakahigoaʼi e Atama ia te ʼu manu ʼaia ko te ʼu gata ʼi muʼa ʼo te fakahala ʼa Satana. ʼE mole tonu ke tou tuku ia te hala ki te gata ʼaē neʼe palalau kiā Eva, pea ʼe mole he ʼatamai ʼo te gata ke ina fakakaukauʼi he meʼa. Neʼe mole ʼiloʼi e te gata ia tona kākāʼi e Satana, pea neʼe mole lava mahino ki te fakamāu ʼaē neʼe fai e te ʼAtua kiā nātou ʼaē neʼe talagataʼa.

Kae he koʼē koa neʼe palalau ia te ʼAtua ʼo ʼuhiga mo te fakatō laloʼi ʼo te gata? Ko te agaaga ʼo te gata ʼi tona nofoʼaga māhani, ʼaē ko te totolo ʼi tona fatu pea mo tana fakaʼaogaʼi ia tona ʼalelo ohagē ʼe ina ʼepo ia te efu, neʼe ina fakatā lelei ia te fakatō laloʼi ʼo Satana. ʼI muʼa atu neʼe ina maʼu tona tuʼulaga māʼoluga ʼi tana kau ki te kau ʼāselo ʼa te ʼAtua, kae ʼi te temi nei kua fakahifo ia ki he ʼaluʼaga mālalo ʼaē ʼe ʼui ʼi te Tohi-Tapu ko te Taletale.—2 Petelo 2:4.

Pea tahi ʼaē meʼa, ohagē pē ko he gata ʼe ina lava ʼuʼusi he vaʼe ʼo he tagata, ko Satana ʼi tona kua fakatō laloʼi ʼe ina ‘ ʼuʼusi anai te vaʼe’ ʼo te “hako” ʼo te ʼAtua. (Senesi 3:15) Ko te koga tāfito ʼo te hako ʼaia neʼe ko Sesu Kilisito, ʼaē neʼe maʼuli mamahi fakatemi ʼuhi ko te kau gāue ʼa Satana. Kae ki muli age, ko te ʼulu ʼo te gata fakatā ʼe moloki anai ʼo talu ai e Kilisito pea mo tona ʼu tehina Kilisitiano fakanofo ʼaē kā fakatuʼuake. (Loma 16:20) Koia ko te malaʼia ʼaē neʼe fakahagahaga e te ʼAtua ki te gata neʼe ina fakatātā tonu ia te fakatō laloʼi pea mo te pulihi ʼo talu ai ia “te gata olisinale” fakapulipuli, ia Satana te Tēvolo.