ʼE Kei ʼAoga Koa Te “Tauhi ʼĀfea”?

ʼI TE taʼu 1786, neʼe tā te tohi e te tagata tōketā Falani, ko te kupu tāfito ʼo te tohi: Traité dʼanatomie et de physiologie (Ko He Sivisivi ʼo Te Agaaga ʼo Te Sino Mo Tona Faʼufaʼu). ʼI tona temi, neʼe ʼui ko te tohi ʼaia neʼe totonu ʼaupitō ʼo ʼuhiga mo te fakamahino ʼo te agaaga ʼo te sino, pea mole heʼeki faʼa fualoa neʼe ʼi ai te tohi ʼi te ʼu tohi ʼaia neʼe fakatau ki te falā e 2 400 000! Kae iā ʼaho nei, tokosiʼi anai te kau mahaki ʼe kei natou falala ki he tōketā fai tafa ʼe mulimuli ki he ʼu tokoni faka tōketā ʼāfea ʼe fakahā ʼi he tohi kua hili kiai ni ʼu sēkulō. Ko te totonu pea mo te ʼaoga ʼo te taʼi tohi ʼaia, ʼe mole kei faʼa ʼaoga ki he tahi ʼe mahaki ʼi te temi nei.

ʼE toe fēia mo te manatu ʼa te tokolahi ʼo ʼuhiga mo te tohi ʼe faka higoaʼi ko te Tauhi ʼĀfea. ʼE natou leleiʼia tana fakamatala ʼo te hisitolia ʼo Iselaele pea mo vikiʼi tona faʼahiga tohi, kae ʼi tanatou manatu ʼe mole kei ʼaoga ke muliʼi tana ʼu tokoni heʼe kua ʼāfea iā taʼu e 2 400. ʼI te temi nei, ko te poto ʼo te tagata pea mo te fakatau koloa, ʼo fēia mo te maʼuli faka fāmili ʼe mole kei tatau ia mo te temi ʼaē neʼe tohi ai te Tohi-Tapu. Ko Philip Yancey ia te tagata ʼaē neʼe ina tohi te Christianity Today, neʼe ina ʼui fēnei ʼi tana tohi The Bible Jesus Read: “ ʼI ʼihi temi ʼe faigataʼa hata mahino ki tana ʼu fakamatala, pea kapau ʼe kita mahino ki ʼihi ʼu manatu, ʼe fakatupu lotomamahi ki te hahaʼi ʼo te temi nei. Pea ʼuhi ko tona ʼu faʼahi ʼaia pea mo ʼihi age, ʼi te agamāhani ko te Tauhi ʼĀfea ia te koga ʼuluaki ʼo te Tohi-Tapu ʼe mole lau e te hahaʼi.” ʼE mole tou punamaʼuli ki te faʼahi ʼaia.

Hili pē taʼu e 50 ki te ʼosi mate ʼo te ʼapositolo ko Soane lagi ʼi te taʼu 100 ʼo totatou temi, neʼe ʼui e te tama maʼu koloa ko Marcion, ʼe mole tonu ki te kau Kilisitiano ke natou lau ia te Tauhi ʼĀfea. Pea ʼo mulimuli ki te manatu ʼa te tagata fai hisitolia Pilitānia ko Robin Lane Fox, neʼe ʼui e Marcion ʼo ʼuhiga mo te “ ‘ ʼAtua’ ʼo te Tauhi ʼĀfea, neʼe ko he ʼAtua ‘agamālohi’ heʼe tokoni pē ia ki te hahaʼi agakovi pea mo te ʼu hahaʼi agamālohi ohagē lā ko te Hau ʼo Iselaele ko Tavite. Kae ko Kilisito neʼe palalau ʼo ʼuhiga mo he ʼAtua māʼoluga, ko he ʼAtua foʼou mo kehekehe mo te ʼAtua ʼo te Tauhi ʼĀfea.” ʼE ʼui e Fox ko te ʼu akonaki ʼaia “neʼe liliu ko he ʼu akonaki ʼa ‘Marcion’ pea kei fia logo pē kiai te ʼu hahaʼi, tāfito lā ia nātou ʼe palalau ki te lea faka Silia ʼo te Potu ʼEsitē ʼo aʼu ki te fā sēkulō.” Ko ʼihi akonaki ʼi te ʼu akonaki ʼaia ʼe kei fakaʼaogaʼi pē e ʼihi. Pea hili kiai taʼu e 1 600 tupu, neʼe tohi fēnei e Philip Yancey: “ ʼE mole kei ʼiloʼi e te kau Kilisitiano ia te Tauhi ʼĀfea pea ʼe teitei pē ke mole kei talanoa kiai he tahi ʼi te temi ʼaenī.”

Kua fetogi koa ia te Tauhi ʼĀfea e he tahi age tohi? ʼE feafeaʼi hatatou mahino ki te “Sehova ʼo te ʼatu kautau” ʼaē ʼe talanoa kiai ʼi te Tauhi ʼĀfea pea mo “te ʼAtua ʼo te ʼofa pea mo te tokalelei” ʼaē ʼe talanoa kiai ʼi te Tauhi Foʼou? (Isaia 13:13; 2 Kolonito 13:11) ʼE kei ʼaoga koa kiā koutou ia te Tauhi ʼĀfea iā ʼaho nei?