ʼE Maʼuli Te Folafola ʼa Sehova

Ko He ʼu Puani ʼAoga ʼo Te Tohi ʼa Osea

KUA teitei pē ke puli ia te tauhi moʼoni ʼi te ʼu telepī e hogofulu ʼo te puleʼaga ʼo te potu noleto ʼo Iselaele. ʼI te temi hau ʼa Selopoame 2, neʼe mahu ai ia Iselaele ʼi te faʼahi fakakoloa, kae neʼe kua vave masiva ʼi te ʼosi mate ʼo te hau ʼaia. Ko te ʼaluʼaga ʼaē kā hoko ki muli age, ʼe ko he temi tokakovi pea mo fetofetogi ai ia te politike. Ko te toko fā ʼi te ʼu hau e ono ʼaē neʼe hoa mai kiai neʼe fakapōgi. (2 Hau 14:29; 15:8-30; 17:1-6) Neʼe kamata ia te ʼu taʼu gāue loaloaga faka polofetā e 59 ʼa Osea ʼi te taʼu 804 ʼi muʼa ʼo totatou temi, ʼi te temi ʼaē neʼe mafola ai ia te tokakovi.

Ko te manatu ʼa Sehova ʼo ʼuhiga mo te talagataʼa ʼo te puleʼaga ʼo Iselaele ʼe fakatā lelei ʼi te ʼu meʼa ʼaē ʼe hoko ʼi te ʼohoana ʼa Osea. ʼI te fai faka mafola ʼa Osea, neʼe ina fakahā ai ia te ʼu agahala ʼa Iselaele pea mo fakakikite ia te ʼu tautea ʼaē kā hoko anai kiā te ia pea mo te puleʼaga ʼo Suta. Neʼe fakaʼaogaʼi e Osea ʼi te tohi ʼaē ʼe toʼo ki tona higoa, ia te ʼu palalau ʼe malū pea mo malave gafua kae ʼe mālohi pea mo matatonu mo te ʼu meʼa ʼaē neʼe hoko. Pea ko tana tohi ʼe kau ki te Folafola ʼa te ʼAtua, koia ko he logo ʼe maʼuli pea mo gāue mālohi.—Hepeleo 4:12.

“TOʼO HOU ʼOHOANA ʼE FAI FOLONIKĀSIO”

(Osea 1:1–3:5)

Neʼe ʼui maʼa Sehova kiā Osea: “ ʼAlu ʼo toʼo hou ʼohoana ʼe fai folonikāsio.” (Osea 1:2) Neʼe fakalogo ia Osea ki te fakatotonu ʼaia pea neʼe ina maʼu tona foha mo Komele. ʼE iloga ia ko te ʼu tamaliki e toko lua ʼaē neʼe ina fānauʼi ki muli age neʼe ko he ʼu toe taka. Ko te faka ʼuhiga ʼo tonā ʼu higoa ʼaē ko Loluama pea mo Loami, ʼe fakahā mai ia te mole kei manavaʼofa ʼa Sehova ki Iselaele pea mo tana kua fakafisi ki tana hahaʼi heʼe agatonu.

Koteā ia te manatu ʼa Sehova ʼo ʼuhiga mo tana hahaʼi fakafeagai? Neʼe ina ʼui fēnei kiā Osea: “Toe ʼalu, ʼofa ki he fafine ʼe ʼofa ki ai he tahi tagata pea mo fai feʼauʼaki, ohagē pē ko te ʼofa ʼa Sehova ki te ʼu foha ʼo Iselaele logopē lā tanatou ʼoʼofa ʼaē ki ʼihi atu ʼu ʼatua.”—Osea 3:1.

Te ʼu Tali Ki Te ʼu Fehuʼi Faka Tohi-Tapu:

1:1—He koʼē ʼe talanoa ia Osea ki te ʼu hau e toko fā neʼe natou pule ki Suta ʼi te lolotoga ʼo tana minisitelio kae ʼe palalau pē ia ki te hau e tahi ʼo Iselaele? Koteʼuhi ʼe ko te ʼu hau pē mai te hōloga ʼo Tavite ʼaē neʼe fakamoʼoni kiai ʼe ko te ʼu takitaki ʼaia neʼe filifili e te ʼAtua ʼi tana hahaʼi. Ko te ʼu hau ʼo te puleʼaga ʼo te potu noleto neʼe mole natou hifo mai te hōloga ʼo Tavite kae ko te ʼu hau ʼaē ʼo Suta neʼe hifo mai nātou mai ai.

1:2-9—Neʼe ʼohoana moʼoni koa ia Osea mo he fafine ʼe fai folonikāsio? Neʼe ʼohoana moʼoni ia Osea mo he fafine neʼe liliu ki muli age ko he fafine tono. Neʼe mole fai e te polofetā he palalau ʼe hā mai ai ko te ʼu meʼa ʼaē neʼe hoko ʼo ʼuhiga mo tona maʼuli neʼe ko hana moemisi peʼe ko he meʼa neʼe hā age ki ai.

1:7—Ko te temi fea ʼaē neʼe fakahā ai ki te ʼapi ʼo Suta ia te manavaʼofa pea mo te haofaki? Neʼe hoko ʼi te taʼu 732 ʼi muʼa ʼo totatou temi, ʼi te temi ʼo te Hau ko Esekiasi. ʼI te temi ʼaia, neʼe fakagata ai leva e Sehova ia te fia laga tau ʼa te kau Asilia ki Selusalemi, ʼo ina fekauʼi ia he ʼāselo ke ina matehi ʼi he pō pē ʼe tahi ia te ʼu fili mālohi e toko 185 000. (2 Hau 19:34, 35) Neʼe haofaki ai leva e Sehova ia Suta, mole ʼaki “he nahau, peʼe ʼaki he heletā, peʼe ʼaki he tau, peʼe ʼaki he ʼu hōsi peʼe ko he ʼu tagata heka hōsi,” kae ʼaki he ʼāselo.

1:10, 11—Talu te tō ʼo te puleʼaga ʼo te potu noleto ʼo Iselaele ʼi te taʼu 740 ʼi muʼa ʼo totatou temi, neʼe feafeaʼi te “fakatahitahi ʼi te logo  tahi” ia te ʼu foha ʼo Iselaele pea mo te ʼu foha ʼo Suta? Tokolahi ia te hahaʼi ʼo te ʼu puleʼaga ʼo te potu noleto neʼe ʼomai ki Suta, ʼi muʼa ʼo te ʼave faka pōpula ʼo te hahaʼi ʼo te fenua ʼo Suta ki Papiloni ʼi te taʼu 607 ʼi muʼa ʼo totatou temi. (2 Fakamatala 11:13-17; 30:6-12, 18-20, 25) ʼI te temi ʼaē neʼe toe liliu ai ia te kau Sutea ʼaē neʼe ʼaunofo ki tonatou fenua ʼi te taʼu 537 ʼi muʼa ʼo totatou temi, ko te hahaʼi ʼaē mai te hōloga ʼo te puleʼaga ʼo te potu noleto ʼo Iselaele neʼe kau iā nātou ʼaia neʼe toe liliu ki tonatou fenua.—Esitalasi 2:70.

2:21-23—Koteā ʼaē neʼe fakakikite e Sehova ʼi tana ʼu palalau ʼaenī: “ ʼE au tō anai ia [Siseleele] ohagē ko he pulapula maʼa ʼaku ki te kele, pea ʼe au manavaʼofa anai kiā ia”? Ko te higoa ʼo te ʼuluaki foha ʼo Osea ʼaē mo Komele neʼe ko Siseleele. (Osea 1:2-4) Ko te faka ʼuhiga ʼo te higoa ʼaia “ ʼE Tō Anai e Te ʼAtua,” ʼe ina fakakikite ia te haga ʼaē ʼa Sehova ʼo fakatahitahiʼi ia te toe ʼo te hahaʼi agatonu ʼi te taʼu 537 ʼi muʼa ʼo totatou temi pea mo tō nātou ohagē ko he pulapula ʼi Suta. Ko te fenua ʼaē neʼe tuku lāvaki lolotoga taʼu e 70 kua tonu leva ʼi te temi ʼaia ke toe fakatupu ai te fulumeto, te vino huʼa malie, pea mo te lolo. ʼAki he ʼu palalau fakatuketuke, ʼe ʼui ʼi te lea faka polofetā ko te ʼu meʼa lelei ʼaia ʼe natou toe faka fealagia anai ki te kele ke ina toe tuku mai tona ʼu meʼa fakagako kele ʼaē ke tupu ai hanatou hohomo lelei, pea ʼe kole anai e te kele ki te lagi ke ina fakatō ifo ia te ʼua. Pea ko te lagi ʼe ina kole anai ki te ʼAtua ke ina foaki mai he ʼu ʼao ke feala hana fakatō ifo ia te ʼua. Ko te ʼu faʼahi fuli ʼaia neʼe tonu ke hoko moʼo tokoni ki te foaki ʼo te ʼu meʼa ʼaē ʼe ʼaoga ki te maʼuli ʼo te toe ʼo te kau Iselaele ʼaē neʼe toe liliu ki tonatou fenua. ʼE faka ʼuhiga e te ʼapositolo ko Paulo pea mo Petelo ia te koga tohi ʼo Osea 2:23 ki te toe fakatahitahiʼi ʼo te toe ʼo te kau Iselaele fakalaumālie.—Loma 9:25, 26; 1 Petelo 2:10.

Te ʼu Puani ʼe Tou Lava Tāʼofi:

1:2-9; 3:1, 2. Kotou fakakaukauʼi age muʼa ia te maʼuli faka sākilifisio ʼaē neʼe fai e Osea ke fakalogo ki te finegalo ʼo te ʼAtua, ʼo nofo mo tona ʼohoana! ʼO ʼuhiga mo te fai ʼo te finegalo ʼo te ʼAtua, ʼe tou tali anai koa ke tou lītuʼa ki he ʼu meʼa ʼe tou manako kiai?

1:6-9. Ko Sehova ʼe fehiʼa ki te tono fakalaumālie ohagē pē ko tana fehiʼa ki te tono ʼi te faʼahi fakasino.

1:7, 10, 11; 2:14-23. Neʼe hoko te meʼa ʼaē neʼe fakakikite e Sehova ʼo ʼuhiga mo Iselaele pea mo Suta. ʼE hoko tuʼumaʼu ia te folafola ʼa Sehova.

2:16, 19, 21-23; 3:1-4. ʼE lotolelei ia Sehova ʼo fakamolemole kiā nātou ʼaē ʼe natou fakahemala fakamālotoloto. (Nehemia 9:17) Ohagē ko Sehova, ʼe tonu ke tou maʼu ia te ʼofa pea mo te manavaʼofa ʼi tatatou ʼu felōgoi pea mo ʼihi.

‘ ʼE ʼI AI TE FAKAMĀU ʼA SEHOVA’

(Osea 4:1–13:16)

“[ʼE] ʼi ai te fakamāu ʼa Sehova ki te hahaʼi ʼo te fenua.” Koteā ia tona tupuʼaga? Koteʼuhi “[ʼe] mole ʼi ai he moʼoni, peʼe ko he lotoʼofa, peʼe ko he ʼiloʼi ʼo te ʼAtua ʼi te fenua.” (Osea 4:1) Ko te hahaʼi agatuʼu ʼo Iselaele neʼe natou aga fakakākā pea mo ligitoto, pea neʼe natou fai  folonikāsio ʼi te faʼahi fakasino pea mo te faʼahi fakalaumālie. Mole ʼui ke natou kumi tokoni ki te ʼAtua, kae “neʼe natou pāui ki Esipito; neʼe natou ʼolo ki Asilia.”—Osea 7:11.

Neʼe tala e Sehova ia tana fakamāu, ʼo ʼui māʼana: “ ʼE tonu anai ke fakaʼauha ia Iselaele.” (Osea 8:8) ʼE mole ʼāteaina ia te puleʼaga ʼo Suta mai te hala. ʼE ʼui fēnei iā Osea 12:2: “ ʼE ʼi ai te fakamāu ʼa Sehova ki Suta, ʼio ke huʼi maʼua kiā Sakopo ʼo mulimuli ki tona ʼu ala; ʼo mulimuli ki tana ʼu faʼahiga fai ʼe ina liufaki age anai.” Kae ʼe hoko moʼoni anai ia te fakafoʼou ʼo te fenua, ohagē ko tona fakapapauʼi mai e te ʼAtua: “Mai te nima ʼo te Seole ʼe au toe totogi anai ia nātou; ʼe au toe ʼaumai anai ia nātou mai te mate.”—Osea 13:14.

Te ʼu Tali Ki Te ʼu Fehuʼi Faka Tohi-Tapu:

6:1-3—Ko ai ʼaē neʼe ina ʼui: “Kotou ʼomai pea ke tou liliu kiā Sehova”? Neʼe lagi fefakaloto mālohiʼaki ia te kau Iselaele heʼe agatonu ke natou toe liliu kiā Sehova. Kapau neʼe hoko he meʼa fēia, pea lagi neʼe mole ko hanatou fakahemala moʼoni, heʼe ko tanatou lotoʼofa neʼe mole fualoa pea mo fakatemi ohagē pē “ko te ʼu ʼao ʼo te ʼuhu pea . . . [mo] te hahau ʼaē ʼe puli vave.” (Osea 6:4) Kae neʼe lagi feala ki te tagata faiakonaki ke ina kolekole kiā Osea mo te hahaʼi ke natou toe tafoki mai kiā Sehova. Koia, neʼe tonu ki te hahaʼi talagataʼa ʼo te ʼu telepī e hogofulu ʼo te puleʼaga ʼo Iselaele ke natou fakahemala moʼoni pea mo liliu kiā Sehova.

7:4—Ko te ʼaluʼaga fea ʼaē neʼe fakatatau ai ia te kau Iselaele ʼaē neʼe tono ki he “gutuʼumu kakaha”? Ko te fakatā ʼaenī ʼe ina fakahā mai ia te mālohi ʼo te ʼu holi kovi ʼaē ʼi tonatou ʼu loto.

Te ʼu Puani ʼe Tou Lava Tāʼofi:

4:1, 6. Kapau ʼe tou fia nonofo ʼi te ʼofa ʼo Sehova, ʼe tonu ke tou haga kumi ia te ʼatamai mālama ʼo ʼuhiga mo ia pea mo tou maʼuliʼi ia te ʼu meʼa ʼaē ʼe tou akoʼi.

4:9-13. ʼE tauteaʼi anai e Sehova ia nātou ʼaē ʼe natou fai ia te ʼu felāveʼi fakasino heʼeʼaoga pea mo natou kau ki he tauhi ʼe heʼemaʼa.

5:1. Ko nātou ʼaē ʼe natou takitaki ʼi te hahaʼi ʼa te ʼAtua, ʼe tonu anai ke natou fakafeagai mālohi ki te ʼapositasia. Heʼe feala anai ke fakahalaʼi nātou ke natou tō ki te lotu hala, ʼo liliu ai te lotu hala ko ‘he hele pea mo he kupega’ kiā nātou.

6:1-4; 7:14, 16. Ko te ʼui pē ʼaē ʼe kita fakahemala kae mole hā ʼi takita aga, ʼe faka ʼuhiga ia ko he fakahemala ʼe mālualoi pea mo vaʼiganoa. Ke feala ki he tahi neʼe agahala ke ina maʼu ia te manavaʼofa ʼo te ʼAtua, ʼe tonu ke fakahemala fakamālotoloto, ke ina fakahā ia tana maliu mai ki he meʼa ʼe “māʼoluga age,” ko tona faka ʼuhiga ki he tauhi ʼe tauʼoluga age. ʼE tonu ki tana ʼu gāue ke ʼalutahi mo te ʼu lēkula māʼoluga ʼa te ʼAtua.—Osea 7:16, kiʼi nota ʼi te lalo pāsina.

6:6. Ko te maʼuli ʼi te agahala, ʼe ko hakita fakahā ʼaia ʼe mole kita ʼofa agatonu ki te ʼAtua. ʼE mole feala ki he ʼu tuʼuga sākilifisio fakalaumālie ke natou fakamatatau ia te ʼaluʼaga kovi ʼaia.

8:7, 13; 10:13. Ko te pelesepeto ʼo ʼuhiga mo “te meʼa ʼaē ʼe tō e te tagata, ʼe ko te meʼa pē ʼaia ʼaē kā ina utu anai,” neʼe hoko moʼoni ʼo ʼuhiga mo te kau Iselaele ʼaē neʼe tauhi taulāʼatua.—Kalate 6:7.

8:8; 9:17; 13:16. Neʼe hoko moʼoni ia te ʼu lea faka polofetā ʼo ʼuhiga mo te puleʼaga ʼo te potu noleto, ʼi te temi ʼaē neʼe maluʼi ai e te kau Asilia ia te kolo hau ko Samalia. (2 Hau 17:3-6) ʼE feala ke tou falala ʼe fakahoko anai e te ʼAtua ia te ʼu meʼa ʼaē ʼe palalau kiai.—Faka au 23:19.

8:14. Neʼe tuku ifo e Sehova ia te “afi ki te ʼu kolo [ʼo Suta]” ʼi te taʼu 607 ʼi muʼa ʼo totatou temi ʼaki te kau Papiloni, ʼo ina fakahoko ai te fakakikite ʼo te fakaʼauha ʼo Selusalemi pea mo te fenua ʼo Suta. (2 Fakamatala 36:19) ʼE mole feala ki te folafola ʼa te ʼAtua ke tō noa.—Sosue 23:14.

9:10. Logolā neʼe kua foaki ia tonatou maʼuli ki te ʼAtua moʼoni, kae ko te kau Iselaele neʼe natou “ ʼolo kiā Paale ʼo Peole, neʼe natou foaki tonatou maʼuli ki te meʼa fakaufiufi.” ʼE tou aga fakapotopoto anai mo kapau ʼe tou fakalogo ki te fakatokaga ʼo ʼuhiga mo tanatou faʼifaʼitaki kovi pea mo tou tōkakaga ke ʼaua naʼa tou  maumauʼi ia tatatou fakapapau ʼaē kiā Sehova.—1 Kolonito 10:11.

10:1, 2, 12. ʼE tonu ke tou tauhi ki te ʼAtua ʼaki he loto ʼe mole mālualoi. Kā ‘tou tō maʼa tātou ʼi te faitotonu; ʼe tou utu ʼo mulimuli ki te lotoʼofa ʼo te ʼAtua.’

10:5. Ko Peti-Aveni (ko tona faka ʼuhiga “ ʼApi ʼo te Agakovi”) ʼe ko he higoa kovi neʼe foaki ki Petele ʼaē (ko tona faka ʼuhiga “ ʼApi ʼo te ʼAtua”). ʼI te temi ʼaē neʼe ʼave ai ia te pipi ʼo Peti-Aveni ki te tahi fenua, neʼe lāuga ia te hahaʼi ʼo Samalia ʼi te toʼo ʼo tanatou tamapua ʼaē neʼe natou tauhi kiai. ʼI aga heʼe fakapotopoto leva hatatou falala ki he tamapua mate ʼe mole feala pē lā ke ina haofaki ia ia totonu!—Pesalemo 135:15-18; Selemia 10:3-5.

11:1-4. ʼE tokaga tuʼumaʼu ia Sehova ki tana hahaʼi ʼaki ia te ʼofa. Ko te fakalogo ki te ʼAtua ʼe mole mamafa ia kiā tātou ʼi he temi.

11:8-11; 13:14. Ko te folafola ʼa Sehova ʼo ʼuhiga mo te toe fakatuʼu ʼo te tauhi moʼoni ʼi tana hahaʼi ‘neʼe mole toe liliu mai kiā te ia kae mole hona fua.’ (Isaia 55:11) ʼI te taʼu 537 ʼi muʼa ʼo totatou temi, neʼe fakaʼosi ai leva tanatou maʼuli ʼaunofo ʼi Papiloni pea neʼe toe liliu ia te tokosiʼi ʼo te kau Iselaele ki Selusalemi. (Esitalasi 2:1; 3:1-3) Ko meʼa fuli neʼe palalau kiai ia Sehova ʼaki tana ʼu polofetā ʼe hoko moʼoni anai ia.

12:6. ʼE tonu anai ke tou fakatuʼutuʼu mālohi ke tou lotoʼofa, ke tou maʼuliʼi ia te faitotonu, pea mo tou falala tuʼumaʼu kiā Sehova.

13:6. Ko te kau Iselaele “neʼe kua natou mākokona pea neʼe kua kamata fia māʼoluga ʼonatou loto. Ko te tupuʼaga lā ʼaia ʼo tanatou galoʼi [ia Sehova].” ʼE tonu ke tou tōkakaga naʼa tou fia faka māʼoluga pē ia tātou totonu.

“KO TE ʼU ALA ʼA SEHOVA ʼE FAITOTONU”

(Osea 14:1-9)

Neʼe kolekole fēnei e Osea: “Toe liliu mai, Ê Iselaele, kiā Sehova tou ʼAtua, koteʼuhi neʼe ke tūkia ʼi tau hala.” Neʼe fakaloto mālohiʼi e Osea ia te hahaʼi ke natou ʼui fēnei kiā Sehova: “Fakalelei age ʼo fakamolemole te agahala; pea tali te meʼa ʼaē ʼe lelei, pea moʼo liufaki atu, ʼe matou momoli atu anai te ʼu vītulo kei mui ʼo tomatou ʼu laugutu.”—Osea 14:1, 2.

ʼE tonu ki te tagata agahala ʼaē ʼe fakahemala ke haʼu kiā Sehova, ke mulimuli ʼi tona ʼu ala, pea mo ina foaki hana sākilifisio fakavikiviki. Koteā ia tona tupuʼaga? Koteʼuhi “ko te ʼu ala ʼa Sehova ʼe faitotonu, pea ko te kau faitotonu ʼaē kā natou haʼele ai anai.” (Osea 14:9) ʼE tou fiafia ʼi te kaugamālie ʼo te hahaʼi ʼaē kā natou ‘ ʼomai anai kiā Sehova pea mo tona agaʼofa, ʼi te temi fakaʼosi ʼo te ʼu ʼaho’!—Osea 3:5.

[Paki ʼo te pasina 13]

Ko te maʼuli faka fāmili ʼa Osea neʼe ina fakatātā ia te ʼu felōgoi ʼa Sehova pea mo Iselaele

[Paki ʼo te pasina 15]

Neʼe gata leva te ʼafio ʼa te ʼu telepī e hogofulu ʼo Iselaele ʼi te temi ʼaē neʼe tō ai ia Samalia ʼi te taʼu 740 ʼi muʼa ʼo totatou temi