“Ko Takotou Tamai ʼe Manavaʼofa”

“Ke kotou haga manavaʼofa ohagē ko takotou Tamai ʼe manavaʼofa.”—Luka 6:36.

1, 2. Neʼe hā feafeaʼi ʼi te ʼu palalau ʼa Sesu ki te kau sekelipa pea mo te kau Faliseo, pea mo tana kau tisipulo, ko te manavaʼofa ʼe ko he kalitātē maʼuhiga?

 KO TE Lao ʼaē neʼe foaki e Moisese ki Iselaele, neʼe maʼu ai te ʼu fakatotonu pea mo te ʼu lao e 600. Logolā neʼe tonu ke fakahoko te ʼu fakamaʼua ʼo te Lao ʼa Moisese, kae neʼe toe maʼuhiga ʼaupitō te fakahā ʼo te manavaʼofa. Tou vakaʼi age muʼa ia te ʼu palalau neʼe fai e Sesu ki te kau Faliseo, ʼaē neʼe mole natou manavaʼofa. Tuʼa lua neʼe ina fakatonutonuʼi nātou, ʼo ina fakahā lelei neʼe fakatotonu fēnei e te ʼAtua: “ ʼE au loto ki te manavaʼofa kae mole ko te sākilifisio.” (Mateo 9:10-13; 12:1-7; Osea 6:6) ʼI te fakaʼosi ʼo tana minisitelio, neʼe ʼui fēnei e Sesu: “Malaʼia kiā koutou, kau sekelipa mo koutou kau Faliseo, kau mālualoi! Koteʼuhi ʼe kotou foaki te vahe e tahi ʼi te hogofulu ʼo te menite, pea mo te aneto magoni, pea mo te kumino, kae neʼe kotou lotonoa ki te ʼu meʼa ʼaē ʼe maʼuhiga ake ʼo te Lao, ʼaē ko te faitotonu pea mo te manavaʼofa pea mo te agatonu.”—Mateo 23:23.

² ʼE mahino ia, neʼe maʼuhiga ʼaupitō kiā Sesu ia te manavaʼofa. Neʼe ina ʼui fēnei ki tana ʼu tisipulo: “Ke kotou haga manavaʼofa ohagē ko takotou Tamai ʼe manavaʼofa.” (Luka 6:36) Kae ke feala hatatou “liliu ko he kau faʼifaʼitaki ʼo te ʼAtua” ʼi te faʼahi ʼaia, ʼe tonu ke tou ʼiloʼi te faka ʼuhiga moʼoni ʼo te manavaʼofa. (Efesi 5:1) Tahi ʼaē meʼa, kapau ʼe tou ʼiloʼi te ʼu lelei ʼo te manavaʼofa, pea ʼe uga anai tātou ke lahi age tatatou fakahā te kalitātē ʼaia ʼi totatou maʼuli.

Te Manavaʼofa Kiā Nātou ʼAē ʼe Nonofo ʼi Te Faigataʼaʼia

 3. He koʼē ʼe tonu ke tou haga kiā Sehova moʼo ako ia te faka ʼuhiga moʼoni ʼo te manavaʼofa?

³ Neʼe hiva fēnei ia te tagata fai pesalemo: “Ko Sehova ʼe agaʼofa mo manavaʼofa, tuai ʼi te ʼita pea lahi ʼi te lotoʼofa. Ko Sehova ʼe agalelei ki te hahaʼi fuli pē, pea ʼe ʼiloga tona ʼu manavaʼofa ʼi tana ʼu gāue fuli.” (Pesalemo 145:8, 9) Ko Sehova ʼe ko “te Tamai ʼo te manavaʼofa pea ko te ʼAtua ʼo te fakaloto fīmālie fuli.” (2 Kolonito 1:3) Ko he tahi ʼe manavaʼofa ʼe ina gaohi fakalelei he tahi. ʼE ko he agaaga maʼuhiga ʼaia ʼo te ʼulugaaga ʼo te ʼAtua. Ko tana faʼifaʼitaki pea mo tana takitaki ia tātou ʼe ina akoʼi mai te faka ʼuhiga moʼoni ʼo te manavaʼofa.

 4. Koteā ʼaē ʼe tou ako mai iā Isaia 49:15 ʼo ʼuhiga mo te manavaʼofa?

⁴ Ohagē ko tona fakamatala iā Isaia 49:15, ʼe ʼui fēnei e Sehova: “ ʼE feala koa ke galoʼi e he fafine ia ia ʼaē ʼe ina fafaga, pea ke mole ʼofa mamahi ki te tama ʼo tona fatu?” Ko te ʼu kupu Faka Hepeleo ʼaē ʼe ʼi ai tonatou pikipikiga mo te kupu ʼaē neʼe fakaliliu ki te “ ʼofa mamahi,” ʼe fakaʼaogaʼi ʼo ʼuhiga mo te manavaʼofa ʼaē ʼe tuʼu iā Pesalemo 145:8, 9, ʼaē ʼi te palakalafe 3. Ko te meʼa ʼaē ʼe logoʼi e Sehova ʼi tona manavaʼofa, ʼe fakatatau ki te ʼofa ʼaē ʼe maʼu e he faʼē ki tana tamasiʼi ʼaē ʼe ina fafaga. ʼE lagi fia kai te tamasiʼi peʼe loto ki he tahi age meʼa. Ko te ʼofa peʼe ko te lotomahino ʼa te faʼē ʼe ina uga anai ia ia ke tokaga ki te meʼa ʼaē ʼe ʼaoga ki tana tamasiʼi. ʼE fēia te ʼofa ʼo Sehova kiā nātou ʼaē ʼe ina fakahā age tona manavaʼofa kiā nātou.

 5. Neʼe fakahā feafeaʼi e Sehova kiā Iselaele ‘tana mahu ʼi te manavaʼofa’?

⁵ ʼE lelei takita manavaʼofa ʼaē ki te hahaʼi ʼaē ʼe nonofo ʼi te faigataʼaʼia, kae ʼe toe lelei age mo kapau ʼe kita fai he meʼa maʼa nātou. Tou vakaʼi peʼe koteā ʼaē neʼe fai e Sehova ʼi te maʼuli pōpula ʼo tana kau ʼatolasio ʼi Esipito, kua hili kiai taʼu e 3 500. Neʼe ina ʼui fēnei kiā Moisese: “ ʼEī, neʼe au sio tonu ki te maʼuli mamahi ʼo taku hahaʼi ʼi Esipito pea neʼe au logo ki tanatou tagi ʼuhi ko  nātou ʼaē neʼe natou faka gāueʼi nātou, heʼe au ʼiloʼi lelei te ʼu mamahi ʼaē ʼe tau mo nātou. Pea ʼe au hifo anai moʼo haofaki ʼo nātou mai te kau Esipito pea mo fakahake ia nātou ki he fenua lelei pea mo lahi, ki he fenua ʼe tafe ai te huʼa pipi pea mo te meli.” (Ekesote 3:7, 8) Hili teitei taʼu e 500 ʼi te ʼosi faka ʼāteaina ʼo te kau Iselaele mai Esipito, neʼe fakamanatuʼi age fēnei e Sehova kiā nātou: “Ko au ʼaē neʼe au fakamavae Iselaele ʼi Esipito pea mo faka ʼāteaina koutou mai te nima ʼo Esipito pea mai te nima ʼo te ʼu puleʼaga fuli ʼaē neʼe natou gaohi koviʼi koutou.” (1 Samuele 10:18) ʼUhi ko tanatou hehē mai te ʼu lao faitotonu ʼa te ʼAtua, neʼe hoko tuʼumaʼu pē ia te ʼu faigataʼaʼia ki te kau Iselaele. Kae neʼe manavaʼofa Sehova kiā nātou pea mo lahi te ʼu lakaga neʼe ina haofaki ai nātou. (Kau Tuʼi Fakamāu 2:11-16; 2 Fakamatala 36:15) ʼE fakahā ai te tokoni ʼofa ʼa te ʼAtua kiā nātou ʼaē ʼe nonofo ʼi te faigataʼaʼia, pea mo te tuʼutāmaki, peʼe tau mo he ʼu faigataʼaʼia. Ko Sehova ʼe “mahu ʼi te manavaʼofa.”—Efesi 2:4.

 6. Neʼe faʼifaʼitakiʼi feafeaʼi e Sesu Kilisito ia tana Tamai ʼo ʼuhiga mo te manavaʼofa?

⁶ Ko Sesu Kilisito neʼe ina faʼifaʼitakiʼi lelei tana Tamai ʼo ʼuhiga mo te manavaʼofa. Neʼe tali feafeaʼi e Sesu ʼi te temi ʼaē neʼe kolekole age e te ʼu tagata kivi e lua: “ ʼAliki, ʼofa mai kiā māua, ʼAlo ʼo Tavite”? Neʼe nā kole kiā Sesu ke ina fai he milakulo, ke feala he toe ava ʼo tonā ʼu mata. Neʼe fai e Sesu te faʼahi ʼaia, kae neʼe mole ina fai ohagē ko hona maʼua. ʼE ʼui fēnei ʼi te Tohi-Tapu: “ ʼI te malave ʼo te fakaʼofaʼofa iā te ia, neʼe fāfā ia Sesu ki ʼonā mata, pea ʼi te moʼi lakaga pē ʼaia neʼe nā sisio ai.” (Mateo 20:30-34) Neʼe ʼofa ia Sesu ki te hahaʼi, ʼo ina fai ai te ʼu tuʼuga milakulo, ʼo fakamālōlō te kau kivi, te hahaʼi ʼaē neʼe ʼulusinoʼi e he temonio, te kau kilia, pea mo heʼu mātuʼa neʼe maʼuli mamahi hanatou tamasiʼi.—Mateo 9:27; 15:22; 17:15; Maleko 5:18, 19; Luka 17:12, 13.

 7. ʼAki te ʼu faʼifaʼitaki ʼa Sehova ʼAtua pea mo tona ʼAlo, koteā te ako ʼe tou tāʼofi ʼo ʼuhiga mo te manavaʼofa?

⁷ Ko te ʼu faʼifaʼitaki ʼa Sehova ʼAtua pea mo Sesu Kilisito ʼe fakahā ai ko faʼahi e lua ʼo te manavaʼofa—tonā ʼofa pea mo tanā fakaʼofaʼofa ki te hahaʼi ʼaē ʼe nonofo ʼi te faigataʼaʼia, pea mo fai he meʼa moʼo tokoni kiā nātou. Ko he tahi ʼe manavaʼofa ʼe ina fai te ʼu faʼahi ʼaia e lua. ʼI te Tohi-Tapu, ʼe tautau faka ʼuhiga ia te manavaʼofa ki te fai ʼo he aga ʼe lelei kiā nātou ʼaē ʼe nonofo ʼi te faigataʼaʼia. Kae ʼe fakahā feafeaʼi te manavaʼofa mokā hoko he fakamāu? ʼE toe faka ʼuhiga koa ki he aga ʼe hagē ko he aga ʼe mole lelei, ohagē ko te mole fakahoko ʼo he fakatūʼā?

Te Manavaʼofa Ki Te Kau Agahala

8, 9. Koteā ʼaē neʼe fai e Sehova ʼi tona manavaʼofa ʼaē kiā Tavite ʼi tana ʼosi agahala mo Pati-Sepa?

⁸ Tou vakaʼi te meʼa ʼaē neʼe hoko ʼi te ʼosi palalau ʼa te polofetā ko Natane mo Tavite, te Hau ʼo te Iselaele ʼāfea, ʼo ʼuhiga mo te tono ʼa Tavite pea mo Pati-Sepa. Neʼe fakahemala Tavite pea neʼe faikole fēnei: “Fakahā mai tou ʼofa, ê ʼAtua, ʼaki tou finegaloʼofa. ʼAki te lahi ʼo tou ʼu manavaʼofa, molehi taku ʼu talagataʼa. Fufulu kātoa au mai taku hala, pea mo fakamaʼa au mai taku agahala. Koteʼuhi, ʼe au ʼiloʼi taku ʼu talagataʼa, pea ko taku agahala ʼe nofo tuʼumaʼu ʼi ʼoku muʼa. Kiā koe, kiā koe tokotahi, neʼe au agahala, pea neʼe au fai te meʼa ʼaē ʼe kovi ʼi ʼou mata.”—Pesalemo 51:1-4.

⁹ Neʼe fakahemala moʼoni ia Tavite. Neʼe fakamolemole e Sehova tana agahala pea neʼe mole mamafa fau tana fakamāuʼi ia ia pea mo Pati-Sepa. ʼO mulimuli ki te Lao ʼa Moisese, neʼe tonu ke matehi ia Tavite pea mo Pati-Sepa. (Teutalonome 22:22) Logolā neʼe mole pulihi ia te ʼu fua ʼo tanā aga, kae neʼe tuku e Sehova ke nā māʼuʼuli. (2 Samuele 12:13) ʼE fakahā e te ʼAtua tona manavaʼofa, ʼo ina fakamolemole te agahala. Kae ʼe ina fakahoko te tūʼā ʼaē ʼe tonu ke fai.

10. Logolā ʼe manavaʼofa Sehova ʼi tana fai fakamāu, kae he koʼē ʼe mole tonu ke tou manatu ʼe manavaʼofa tuʼumaʼu pē anai Sehova?

¹⁰ Mai tona ʼaluʼaga ʼaē “ ʼaki pē te tagata e tahi [ia Atama] neʼe hū te agahala ki te mālamanei” pea “ko te totogi ʼaē ʼe foaki e te agahala, ko te mate,” ʼe tonu ke mamate te hahaʼi fuli pē. (Loma 5:12; 6:23) ʼE feala ke tou fakafetaʼi kiā Sehova ʼi tona fakahā tana manavaʼofa mokā fai fakamāu! Kae ʼaua naʼa tou manatu ʼe manavaʼofa  tuʼumaʼu pē anai te ʼAtua. ʼE ʼui fēnei iā Teutalonome 32:4: “Ko [te] ʼu ala fuli [ʼa Sehova] ʼe faitotonu.” Kā manavaʼofa te ʼAtua, pea ʼe mole ina tuku keheʼi tana ʼu lao haohaoa ʼo ʼuhiga mo te faitotonu.

11. Neʼe fakahā feafeaʼi e Sehova te aga ʼaē ʼe tāu mo feʼauga ʼo ʼuhiga mo te faitotonu, kiā Tavite ʼi tana agahala mo Pati-Sepa?

¹¹ ʼE mahino ia, ʼo ʼuhiga mo te faʼahi ʼo Tavite pea mo Pati-Sepa, neʼe tonu ke fakamolemole ia te agahala ʼi muʼa ʼo tonā fakahao mai te fakatūʼā ki te mate. Neʼe mole fakagafua ki te kau tuʼi fakamāu ʼo Iselaele ke natou fai ia te faʼahi ʼaia. Kapau neʼe natou fai ia te fakamāu, pea neʼe mole feala hanatou fetogi te fakatūʼā, kae neʼe tonu ke natou fakahoko te fakatūʼā ki te mate. Neʼe ko te fakatotonu ʼaia ʼo te Lao. Kae ʼuhi ko te fuakava ʼaē neʼe ina fai mo Tavite, neʼe loto e Sehova ke ina ʼiloʼi pe neʼe feala ke ina fakamolemole ia te agahala ʼa Tavite. (2 Samuele 7:12-16) Koia, ko Sehova ʼAtua, “te Tuʼi Fakamāu ʼo te kele kātoa,” ʼaē ʼe ina “vakavakaʼi te loto,” neʼe ina filifili ke ina fai te fakamāu. (Senesi 18:25; 1 Fakamatala 29:17) Neʼe feala ke ʼiloʼi lelei e te ʼAtua te loto ʼo Tavite, mo ina fakafuafua ia tana fakahemala moʼoni, pea mo ina fakamolemole age ki ai.

12. Ke tou maʼu ia te manavaʼofa ʼo te ʼAtua, koteā ʼaē ʼe tonu ke tou fai?

¹² Ko te manavaʼofa ʼaē ʼe fakahā e Sehova kiā tātou ʼi tana faka fealagia ʼaē ke tou ʼāteaina mai te tūʼā ʼo te agahala, ʼe ʼalutahi mo tona faitotonu. Ke feala ke fakamolemole te ʼu agahala kae mole maumauʼi ai tana ʼu lao faitotonu, neʼe foaki e Sehova te sākilifisio faitotogi ʼo tona ʼAlo, ia Sesu Kilisito—te fakahā lahi tokotahi ʼaia ʼo te manavaʼofa. (Mateo 20:28; Loma 6:22, 23) ʼE tonu ke tou ‘tui ki te ʼAlo’ ke feala hatatou maʼu ia te manavaʼofa ʼo te ʼAtua, ʼaē ʼe feala ke ina haofaki tātou mai te fakatūʼā ʼaē ki te mate ʼuhi ko totatou ʼuhiga agahala.—Soane 3:16, 36.

Ko He ʼAtua Manavaʼofa Pea Mo Faitotonu

13, 14. ʼE fakamalu ifo koa e te manavaʼofa ʼo te ʼAtua tona faitotonu? Kotou fakamahino.

¹³ Logolā ko te manavaʼofa ʼo Sehova ʼe mole ko he maumauʼi ʼo tana ʼu lao faitotonu, kae ʼe feala koa ke tou ʼui ʼe fetogi e tona manavaʼofa ia te fakahoko ʼo tona faitotonu, ohagē ʼe mole lelei tona faitotonu? Ko te manavaʼofa ʼe ina fakamalu ifo koa ia te fakahoko ʼo te faitotonu ʼa te ʼAtua? Kailoa ia.

¹⁴ ʼAki ia te polofetā ko Osea, neʼe ʼui fēnei e Sehova ki te kau Iselaele: “ ʼE au liliu anai ko tou ʼohoana ki he ʼu temi ʼe mole ʼiloʼi hona gataʼaga, pea ʼe au liliu anai ko tou ʼohoana ʼi te agatonu pea mo te faitotonu pea ʼi te lotoʼofa pea mo te ʼu manavaʼofa.” (Osea 2:19) ʼE fakahā lelei ʼi te ʼu palalau ʼaia ko te manavaʼofa ʼo Sehova ʼe ʼalutahi tuʼumaʼu pē mo tona tahi ʼu kalitātē, ohagē ko tona faitotonu. Ko Sehova ʼe ko he “ ʼAtua manavaʼofa, pea mo agaʼofa, . . . ʼe ina fakamolemole te hala pea mo te talagataʼa pea mo te agahala, kae ʼe mole ina fakahao anai mai te tūʼā.” (Ekesote 34:6, 7) Ko Sehova ʼe ko he ʼAtua manavaʼofa pea mo faitotonu. ʼO ʼuhiga mo ia, ʼe ʼui fēnei ʼi te Tohi-Tapu: “Ko te Maka, ʼe haohaoa tana gāue, heʼe ko tona ʼu ʼala fuli ʼe faitotonu.” (Teutalonome 32:4) Ko te faitotonu ʼa te ʼAtua ʼe haohaoa, ohagē pē ko tona manavaʼofa. ʼE mole ʼi ai hona kalitātē ʼe māʼoluga age ʼi tona kalitātē ʼaē, peʼe ʼaoga he tahi kalitātē moʼo fakamalu ifo tona tahi kalitātē. ʼE felōgoi lelei te ʼu kalitātē ʼaia e lua.

15, 16. (a) Koteā ʼaē ʼe hā ai ko te faitotonu ʼa te ʼAtua ʼe mole fefeka? (b) ʼI te temi ʼaē kā fakamāuʼi ai e Sehova te tuʼu agakovi ʼaenī, koteā ʼaē ʼe feala ke falala kiai tana hahaʼi ʼatolasio?

¹⁵ Ko te faitotonu ʼa Sehova ʼe mole fefeka ia. ʼI te agamāhani, ʼe fakahoko te faitotonu ʼo  mulimuli ki te ʼu lao, pea ʼi te fakamāu, ʼe fakamaʼua ke fai te fakatūʼā ʼo mulimuli ki te aga kovi ʼaē neʼe fai. Kae ko te faitotonu ʼa te ʼAtua ʼe toe ʼaoga moʼo haofaki ʼo te hahaʼi ʼaē ʼe agalelei. Ohagē lā, ʼi te fakaʼauha ʼo te hahaʼi agakovi ʼo te ʼu kolo ʼo Sotoma pea mo Komola, neʼe haofaki ia te pāteliaka ko Lote pea mo tona ʼu ʼofafine e toko lua.—Senesi 19:12-26.

¹⁶ ʼE tou lava falala, ʼi te temi ʼaē kā fakahoko ai e Sehova tana fakamāu ki te tuʼu agakovi ʼaenī, ʼe ina haofaki anai ia “te toe hahaʼi tokolahi” ʼo te kau ʼatolasio moʼoni, ʼaē “neʼe natou fō tonatou ʼu kofu pea mo natou fakahihina ʼi te taʼataʼa ʼo te ʼAkeno.” ʼE natou ‘hao anai mai te mamahi lahi.’—Fakahā 7:9-14.

He Koʼē ʼe Tonu Ke Tou Manavaʼofa?

17. Koteā te tupuʼaga tāfito ʼaē ʼe tonu ai ke tou manavaʼofa?

¹⁷ ʼAki te faʼifaʼitaki ʼa Sehova pea mo Sesu Kilisito, ʼe tou ako ai te faka ʼuhiga moʼoni ʼo te manavaʼofa. Iā Tāʼaga Lea 19:17, ʼe foaki mai he tupuʼaga maʼuhiga ke tou fakahā ia te manavaʼofa, heʼe ʼui fēnei ai: “Ko ia ʼaē ʼe ina fakahā te ʼofa kiā ia ʼe veliveli, ʼe ina tokagaʼi ia Sehova, pea ko Ia ʼe ina liufaki anai kiā ia.” ʼE fiafia ia Sehova mokā tou femanavaʼofaʼaki ʼo mulimuli ki tana faʼifaʼitakiʼi pea mo ʼaē ʼo tona ʼAlo. (1 Kolonito 11:1) Pea ʼe uga tātou ke tou manavaʼofa, heʼe kā tou manavaʼofa ki he tahi pea ʼe toe manavaʼofa mai kiā tātou.—Luka 6:38.

18. He koʼē ʼe tonu ke tou faiga ke tou manavaʼofa?

¹⁸ ʼE lahi te tahi ʼu kalitātē ʼe pipiki ki te manavaʼofa. ʼE kau kiai ia te lotoʼofa, te ʼofa, pea mo te agalelei. Ko te fakaʼofaʼofa peʼe ko te loto mahino ʼe ina uga tātou ke tou fai he ʼu gāue ʼaki he loto manavaʼofa. Logolā ko te manavaʼofa ʼo Sehova ʼe mole ina fakamalu ifo tona faitotonu, kae ʼe tuai ʼi te ʼita pea mo faʼa kātaki ʼo ina tuku he temi feʼauga ki te kau agakovi ke natou liliu ʼo fakahemala. (2 Petelo 3:9, 10) Koia ʼe pipiki te manavaʼofa ki te faʼa kātaki pea mo te kātaki fualoa. ʼAki te tahi ʼu kalitātē ʼaē ʼe pipiki ki te manavaʼofa—ohagē ko te ʼu kalitātē kehekehe ʼo te fua ʼo te laumālie ʼo te ʼAtua—ʼe feala ʼaki te kalitātē ʼaia ke tou gāueʼi te ʼu kalitātē fuli ʼaē. (Kalate 5:22, 23) ʼE maʼuhiga ʼaupitō ke tou faiga ke tou manavaʼofa ki te hahaʼi!

“Fiafia Ia Nātou ʼAē ʼe Manavaʼofa”

19, 20. ʼE feafeaʼi te mālo ʼo te manavaʼofa ʼi te fakamāu?

¹⁹ ʼE fakahā mai e te tisipulo ko Sake pe koʼē ʼe tonu ke tou manavaʼofa tuʼumaʼu ki te hahaʼi. Neʼe ina tohi fēnei: “ ʼE mālo te manavaʼofa ʼi te fakamāu.” (Sake 2:13b) Neʼe talanoa ia Sake ʼo ʼuhiga mo te manavaʼofa ʼaē ʼe fakahā e he tahi ʼe ʼatolasio kiā Sehova. ʼE mālo te manavaʼofa ʼi te fakamāu heʼe kā hoko mai te temi ʼaē ʼe tonu ai ki he tahi ke ‘huʼi tona ʼu maʼua ki te ʼAtua,’ ʼe manatuʼi anai e Sehova tana ʼu gāue manavaʼofa pea mo loto fakamolemole anai kiā ia ʼo fakatafito ki te sākilifisio faitotogi ʼo Tona ʼAlo. (Loma 14:12) ʼE mahino ia, neʼe manavaʼofa te ʼAtua kiā Tavite ʼi tana agahala mo Pati-Sepa, heʼe ko Tavite neʼe ko te tagata neʼe loto manavaʼofa. (1 Samuele 24:4-7) ʼI te tahi age faʼahi, “ko te fakamāu ʼe mole fai anai ʼaki te manavaʼofa ki ʼaē neʼe mole manavaʼofa.” (Sake 2:13a) ʼE mahino papau ia ko “nātou ʼaē neʼe mole manavaʼofa” ʼe kau ʼi te hahaʼi ʼaē kiā mata ʼo te ʼAtua ʼe “tonu ke matehi”!—Loma 1:31, 32.

²⁰ ʼI tana Akonaki ʼi te Moʼuga, neʼe ʼui fēnei e Sesu: “Fiafia ia nātou ʼaē ʼe manavaʼofa, heʼe fai anai kiā nātou te manavaʼofa.” (Mateo 5:7) ʼE fakahā lelei ʼi te ʼu palalau ʼaia ko nātou ʼaē ʼe natou fia maʼu te manavaʼofa ʼo te ʼAtua ʼe tonu ke natou manavaʼofa mo nātou! ʼI te ʼalatike kā hoa mai, ʼe tou vakaʼi anai peʼe feafeaʼi hatatou loto manavaʼofa ʼi totatou maʼuli ʼo te ʼaho fuli.

Koteā ʼAē Neʼe Kotou Ako?

• Koteā te faka ʼuhiga ʼo te manavaʼofa?

• Ko te ʼu faʼahi fea ʼaē ʼe feala ai ke tou loto manavaʼofa?

• Koteā te ʼu faʼahi ʼaē ʼe fakahā ai e Sehova ko ia ko he ʼAtua manavaʼofa pea mo faitotonu?

• He koʼē ʼe tonu ke tou loto manavaʼofa?

[Fehuʼi]