Tou Kumi Ke Tou Fakahoko He Fakatuʼutuʼu ʼe ʼi Ai Hona ʼUhiga Moʼoni ʼi Totatou Maʼuli

“Ko te ʼu meʼa fuli ʼaē ʼe mānava—ke natou vikiʼi ia Sah.”—Pesalemo 150:6.

 1. Kotou fakamatala te faiga ʼa te tūpulaga ke ina maʼu he fakatuʼutuʼu lelei ʼi tona maʼuli.

 ʼE MANATUʼI fēnei e te tūpulaga ko Seung Jin, ʼaē neʼe maʼuli ʼi Kolea a: “Neʼe au ako ke au tōketā he neʼe au fia fakaʼaogaʼi toku maʼuli moʼo tokoni ki te hahaʼi. Neʼe au toe manatu ʼe au maʼuli fiafia anai ʼi toku tuʼulaga tōketā pea mo lelei anai toku totogi. Neʼe au lotomamahi ʼi taku mahino leva ʼaē ʼe fakatuʼakoi te lava tokoni ʼa he tōketā ki te hahaʼi. Pea neʼe au ako te fai pena pāki, kae neʼe mole lahi hona fua lelei ki te hahaʼi, heʼe maʼa ʼaku neʼe au manatu pē au kiā au totonu. Neʼe au fia liliu ko he tagata faiako, kae mole tuai, pea neʼe mahino kiā au neʼe au akoʼi ki te kau tūpulaga he ʼu meʼa kua ʼosi ʼiloʼi, kae neʼe mole au foaki age he takitaki neʼe feala ke natou maʼu ai ia te fiafia moʼoni.” Ohagē ko te tokolahi, neʼe faiga ia Seung Jin ke ina maʼu he fakatuʼutuʼu lelei ʼi tona maʼuli.

 2. (a) Koteā te faka ʼuhiga ke tou maʼu ia he fakatuʼutuʼu ʼi totatou maʼuli? (b) ʼE tou ʼiloʼi feafeaʼi neʼe ʼi ai te fakatuʼutuʼu ʼa te Tupuʼaga ʼi tana fakatupu tātou ʼi te kele?

² Ke feala hatatou maʼu ia he fakatuʼutuʼu moʼoni, ʼe tonu ke tou maʼu he tupuʼaga ʼo totatou maʼuli, he fakatuʼutuʼu ʼe tou mahino lelei kiai, pea mo tou faiga tāfito kiai. ʼE feala koa ke maʼu e te tagata ia he fakatuʼutuʼu fēia? ʼEī! Neʼe faʼu tātou ʼaki he ʼatamai, mo he leʼo ʼo loto, pea mo te fealagia ke tou fakakaukau, ʼo hā ʼaki mai ʼe ʼi ai te fakatuʼutuʼu ʼa te Tupuʼaga ʼi tana fakatupu tātou ʼi te kele. Koia ʼe feala ke tou maʼu pea mo fakahoko tatatou fakatuʼutuʼu moʼoni ʼaki pē tatatou mulimuli ki te fakatuʼutuʼu ʼa te Tupuʼaga.

 3. Koteā te faka ʼuhiga ʼo te fakatuʼutuʼu ʼa te ʼAtua ʼo ʼuhiga mo te tagata?

³ ʼE fakahā ʼi te Tohi-Tapu ʼe lahi te ʼu ʼaluʼaga ʼe pipiki ki te fakatuʼutuʼu ʼa te ʼAtua ʼo ʼuhiga mo tātou. Ohagē lā, ko te fakaofoofo ʼo totatou faʼu, ʼe hā lelei ai te ʼofa ʼaupitō ʼa te ʼAtua. (Pesalemo 40:5; 139:14) Koia, ko te maʼuli ʼo mulimuli ki te fakatuʼutuʼu ʼa te ʼAtua ko tona faka ʼuhiga ke tou ʼoʼofa ʼaupitō ki te hahaʼi, ohagē pē ko te ʼAtua. (1 Soane 4:7-11) Ko tona tahi faka ʼuhiga, ko tatatou fakalogo ki te ʼu fakatotonu ʼa te ʼAtua, ʼaē kā tokoni mai anai ke tou māʼuʼuli ʼo mulimuli ki tana fakatuʼutuʼu ʼofa.—Tagata Tānaki 12:13; 1 Soane 5:3.

 4. (a) Koteā ʼaē ʼe tonu ke tou fai ke tou maʼu he fakatuʼutuʼu moʼoni ʼi totatou maʼuli? (b) Koteā te fakatuʼutuʼu ʼaē ʼe lahi tokotahi ʼe feala ke faiga kiai he tahi?

⁴ Neʼe toe fakatuʼutuʼu e te ʼAtua ke māʼuʼuli fiafia pea mo tokalelei te hahaʼi pea ke natou tokalelei mo te ʼu fakatupu fuli pē. (Senesi 1:26; 2:15) Kae koteā ʼaē ʼe tonu ke tou fai ke feala hatatou māʼuʼuli fiafia, mo fīmālie, pea mo tokalelei? Ohagē ko he tamasiʼi ʼe fiafia pea mo fīmālie ʼi tana ʼiloʼi ʼaē ʼe ovi age tana ʼu mātuʼa, ʼo fēia mo tātou ʼe tonu ke tou felōgoi lelei mo totatou Tamai ʼaē ʼe ʼi selō ke tou maʼu he ʼuhiga moʼoni pea mo he fakatuʼutuʼu ʼo totatou maʼuli. (Hepeleo 12:9) ʼE faka fealagia e te ʼAtua ke tou felōgoi mo ia, heʼe ina tali ke tou fakaovi age kiā te ia pea mo ina fakalogo ki tatatou ʼu faikole. (Sake 4:8; 1 Soane 5:14, 15) Kapau ʼe tou ‘haʼele mo te ʼAtua’ ʼi te tui pea mo liliu ko hona ʼu kaumeʼa, pea ʼe feala ke tou fakafiafiaʼi ai tatatou Tamai ʼaē ʼe ʼi selō pea mo tou vikiʼi ia ia. (Senesi 6:9; Tāʼaga Lea 23:15, 16; Sake 2:23) ʼE ko te fakatuʼutuʼu lahi tokotahi ʼaia ʼe feala ke faiga e he tahi kiai. Neʼe tohi fēnei e te tagata fai pesalemo: “Ko te ʼu meʼa fuli ʼaē ʼe mānava—ke natou vikiʼi ia Sah.”—Pesalemo 150:6.

Koteā Takotou Fakatuʼutuʼu ʼi Tokotou Maʼuli?

 5. He koʼē ʼe mole ko he aga fakapotopoto te fakamuʼamuʼa ʼo te kumi koloa?

⁵ Ko te fakatuʼutuʼu ʼa te ʼAtua ʼo ʼuhiga mo tātou, ko tana loto ʼaē ke tou tōkakaga lelei kiā tātou pea mo totatou fāmili. ʼE tonu ke tou tōkakaga ki te ʼu meʼa ʼaē ʼe ʼaoga kiā tātou pea mo totatou fāmili ʼi te faʼahi  fakasino pea mo fakalaumālie. Kae ʼe tonu ke tou fakafuafua lelei ia te faʼahi ʼaia, ke mole liliu tatatou gāue pea mo te ʼu faʼahi ʼaē ʼe tou hoha kiai ʼo maʼuhiga age ʼi te ʼu gāue fakalaumālie. (Mateo 4:4; 6:33) Meʼa fakaʼofaʼofa foki, heʼe tokolahi te hahaʼi ʼe natou faiga tāfito pē nātou ke natou maʼu koloa. Kae ʼe mole ko he aga fakapotopoto hatatou faiga ke tou maʼu ia te ʼu meʼa fuli ʼaē ʼe ʼaoga kiā tātou, ʼaki pē te ʼu koloa. ʼI te sivisivi neʼe hoki fai pē ʼo ʼuhiga mo te hahaʼi maʼu paʼaga ʼi Asia, ʼe fakahā ai ko te tokolahi iā nātou “ ʼe mole natou maʼu te fīmālie pea ʼe natou māʼuʼuli hoha, logolā tanatou maʼu tuʼulaga pea mo hagē kua natou maʼu te ʼu koloa fuli pē ʼaē ʼe natou loto kiai.”—Tagata Tānaki 5:11.

 6. Koteā te tokoni ʼaē neʼe foaki e Sesu ʼo ʼuhiga mo te kumi koloa?

⁶ Neʼe talanoa ia Sesu ki “te mālohi fakahala ʼo te ʼu koloa.” (Maleko 4:19) Koteā te ʼu fakahala ʼaē ʼe fai e te ʼu koloa? ʼE hagē ʼe fiafia he tahi mokā ina maʼu te ʼu koloa, kae ʼe faihala ia. Neʼe tohi fēnei e te Hau poto ko Salomone: “Ko ʼaē ʼe manako ki te paʼaga ʼe mole mākona anai ʼi te paʼaga.” (Tagata Tānaki 5:10) Kae ʼe feala koa ke tou fakatuʼutuʼu ke tou maʼu koloa pea ʼi te tahi faʼahi ke tou tauhi ki te ʼAtua ʼaki totatou nefesi kātoa? Kailoa ia, ʼe mole feala. Neʼe fakamahino fēnei e Sesu: “ ʼE mole feala ke kaugana he tahi ki ni pule e lua; koteʼuhi, heʼe fehiʼa anai ia ki he tahi kae ʼofa ia ki tona lua, peʼe pipiki anai ia ki he tahi, kae ina meʼa noaʼi anai tona lua. ʼE mole feala ke kotou kaugana ki te ʼAtua pea mo te ʼu Koloa.” Neʼe fakaloto mālohiʼi e Sesu ia tana ʼu kaugana ke mole natou tānaki he ʼu koloa ʼi te kele, kae ko “he ʼu koloa ʼi selō,” ko tona faka ʼuhiga ke natou maʼu he matagafua ʼe lelei iā muʼa ʼo te ʼAtua, ʼaē ʼe ina “ ʼiloʼi . . . te meʼa ʼaē ʼe ʼaoga kiā koutou ʼi muʼa ia ʼo hakotou kole kiā te ia.”—Mateo 6:8, 19-25.

 7. ʼE tou lava puke maʼu feafeaʼi ia “te maʼuli moʼoni”?

⁷ ʼI tana faitohi ki tona kaumeʼa ko Timoteo, neʼe fai e te ʼapositolo ko Paulo te tokoni mālohi ʼo ʼuhiga mo te faʼahi ʼaia. Neʼe ina ʼui fēnei kiā Timoteo: “Fakatotonu kiā nātou ʼaē ʼe maʼu koloa . . . ke mole natou falala ki he ʼu koloa ʼe fakalākilua, kae [ke natou falala] ki te ʼAtua ʼaē ʼe ina foaki fakalahi mai kiā tātou ia meʼa fuli pē ke tou fiafia ai . . . , ke natou loto foaki, mo lotolelei ʼo vahevahe, ʼo natou tānaki ai maʼa nātou ki he koga meʼa ʼe mole lava kaihaʼasia, he fakatafito taulekaleka ki te temi kā haʼu, koteʼuhi ke natou puke maʼu ia te maʼuli moʼoni.”—1 Timoteo 6:17-19.

Koteā Ia “Te Maʼuli Moʼoni”?

 8. (a) He koʼē ʼe faiga e te hahaʼi tokolahi ke natou maʼu koloa pea mo maʼu tuʼulaga? (b) Koteā ʼaē ʼe mole natou mahino kiai?

⁸ Maʼa te hahaʼi tokolahi, ko te kupuʼi palalau “te maʼuli moʼoni” ʼe ko te ʼu koloa pea mo te ʼu fakafiafia. ʼE tohi fēnei ʼi te sulunale ʼi Asia: “Ko nātou ʼaē ʼe natou sioʼi te ʼu ʼata peʼe ko te televisio, ʼe natou holi ki te ʼu meʼa ʼaē ʼe natou sisio kiai, pea mo natou moemisi ki te ʼu meʼa ʼaē ʼe feala ke natou maʼu.” Ko te tokolahi ʼe natou fakatuʼutuʼu ʼi tonatou maʼuli ke natou maʼu koloa pea mo maʼu tuʼulaga. Tokolahi neʼe ʼalunoa tonatou temi tūpulaga, tonatou maʼuli mālōlō, tonatou maʼuli faka fāmili pea mo tonatou ʼaluʼaga fakalaumālie ʼi tanatou kumi ia te ʼu meʼa ʼaia. ʼE tokosiʼi ia nātou ʼaē ʼe natou manatu ko te ʼu faʼahi ʼaē ʼe fakahā ʼi te ʼu ʼata peʼe ʼi te televisio, ʼe ko he fakahā pē ia ʼo “te manatu ʼo te mālamanei”—te faʼahiga manatu ʼaē ʼe ina fakaneke ia te toko lauʼi miliale hahaʼi ʼi te kele pea mo ina uga nātou ke mole natou mulimuli ki te fakatuʼutuʼu ʼa te ʼAtua ʼo ʼuhiga mo tātou. (1 Kolonito 2:12; Efesi 2:2) ʼE mole tou punamaʼuli ai ki te mole maʼuli fiafia ʼa te tokolahi iā ʼaho nei!—Tāʼaga Lea 18:11; 23:4, 5.

 9. Koteā ʼaē ʼe mole feala ke fakahoko e te tagata, pea koteā tona tupuʼaga?

⁹ ʼE feafeaʼi kiā nātou ʼaē ʼe mole natou manatu pē kiā nātou, kae natou gāue kinakina moʼo tokoni ki te hahaʼi, ʼo natou faiga ke pulihi ia te hoge, te mahaki, pea mo te heʼe faitotonu? ʼI te agamāhani, ko tanatou ʼu faiga ʼaia ʼaē ʼe tāu mo feʼauga ke vikiʼi pea mo tanatou ʼu sākilifisio, ʼe fua lelei ki te hahaʼi tokolahi. Kae logolā tanatou ʼu faiga, kae ʼe mole natou lava fetogi anai ʼi he temi ia te tuʼu ʼaenī ke liliu ʼo lelei pea mo faitotonu. Koteā tona tupuʼaga? Heʼe ʼi tona ʼuhiga moʼoni “ko te mālamanei kātoa ʼe takoto ia ʼi te mālohi ʼo te agakovi”—ia Satana—pea ʼe mole ina loto ke fetogi.—1 Soane 5:19.

10. Ko te temi fea ʼaē kā maʼu anai e te kau agatonu ia “te maʼuli moʼoni”?

¹⁰ ʼI meʼa fakaʼofaʼofa foki mo kapau ʼe mole maʼu e he tahi he ʼamanaki, ʼo gata pē mo tona maʼuli ʼi te tuʼu ʼaenī! Neʼe tohi fēnei e Paulo: “Kapau neʼe tou tuku tatatou falala kiā Kilisito ʼo ʼuhiga pē mo te maʼuli ʼaenī, pea ko tātou ʼaē ʼe fakaʼofaʼofa tāfito ʼi te hahaʼi fuli pē.” Ko te ʼu palalau ʼaenī ʼe fai e nātou ʼaē ʼe mole hanatou ʼamanaki: “Tou kakai pea mo tou ʼiʼinu, heʼe tou mamate anai ʼapogipogi.” (1 Kolonito 15:19, 32) Kae ʼe ʼi ai te kā haʼu, ‘ ʼohagē ko te fakapapau mai e te ʼAtua, ʼe tou fakatalitali ki he ʼu lagi foʼou pea mo he kele foʼou ʼaē ʼe tonu ke nofo ai te  faitotonu.’ (2 Petelo 3:13) ʼI te temi ʼaia, ʼe feala ke maʼu e te kau Kilisitiano “te maʼuli moʼoni,” ʼaē ko te “maʼuli heʼegata” ʼi te haohaoa, ʼi selō peʼe ʼi te kele, ʼo fakalogo ki te takitaki ʼofa ʼo te Puleʼaga ʼo te ʼAtua!—1 Timoteo 6:12.

11. He koʼē ʼe ko he fakatuʼutuʼu ia te gāue ʼaē moʼo lagolago ki te Puleʼaga ʼo te ʼAtua?

¹¹ ʼE gata pē anai ki te Puleʼaga ʼo te ʼAtua te fealagia ʼaē ke ina fakatokatoka ia te ʼu fihifihia ʼo te mālamanei. Ko te gāue kinakina moʼo lagolago ki te Puleʼaga ʼe ko te fakatuʼutuʼu pē ʼaia e tahi ʼe feala ke faiga kiai he tahi. (Soane 4:34) ʼI tatatou fakahoko ia te gāue ʼaia, ʼe tou maʼu ai he ʼu felōgoi maʼuhiga mo totatou Tamai ʼaē ʼe ʼi selō. ʼE tou toe maʼu mo te fiafia ʼi te gāue tahi mo te ʼu lauʼi miliona tehina mo tuagaʼane fakalaumālie, ʼaē ʼe natou faiga mo nātou ki te fakatuʼutuʼu ʼaia ʼi tonatou maʼuli.

Tou Fai Te ʼu Sākilifisio ʼAē ʼe Lelei

12. Koteā ʼaē ʼe kehekehe ai te maʼuli ʼi te tuʼu ʼaenī pea mo “te maʼuli moʼoni”?

¹² ʼE ʼui ʼi te Tohi-Tapu ko te mālamanei “ ʼe puli ia . . . pea mo tona loto.” ʼE fakaʼauha anai ia te mālamanei kātoa ʼa Satana, ʼo fēia mo te logona ʼa te hahaʼi pea mo te ʼu koloa, “kae ko ʼaē ʼe ina fai te finegalo ʼo te ʼAtua ʼe nofo maʼu ia ʼo talu ai.” (1 Soane 2:15-17) ʼO mole hagē ko te ʼu koloa ʼaē ʼe mole tologa, mo te kolōlia ʼaē ʼe feala ke pulihi, pea mo te ʼu fakafiafia vaʼiganoa ʼo te tuʼu ʼaenī, ko “te maʼuli moʼoni”—te maʼuli ʼo heʼegata ʼo fakalogo ki te Puleʼaga ʼo te ʼAtua—ʼe tologa ia pea mo tāu mo feʼauga ke tou fai he ʼu sākilifisio, mo kapau foki ʼe tou fai te ʼu sākilifisio ʼaē ʼe lelei.

13. Neʼe feafeaʼi ki te taumātuʼa ke nā fai te ʼu sākilifisio ʼaē ʼe lelei?

¹³ Tou vakaʼi ia te faʼifaʼitaki ʼa Henry pea mo Suzanne. Neʼe nā tui mālohi ki te fakapapau ʼa te ʼAtua ʼaē, ko nātou fuli ʼaē ʼe natou fakamuʼamuʼa ia te Puleʼaga ʼi tonatou maʼuli, ʼe natou maʼu anai ia te tokoni ʼa te ʼAtua. (Mateo 6:33) Koia, neʼe nā filifili ai ke nā māʼuʼuli ʼi he ʼapi ʼe mole faʼa totogi kovi, ke mole nā gāue toko lua ʼi te mālama, kae ke nā fakalahi age tonā temi ki te ʼu gāue fakalaumālie mo tanā ʼu taʼahine e toko lua. (Hepeleo 13:15, 16) Neʼe ʼi ai tonā kaumeʼa lelei neʼe mole mahino ki tonā faʼahiga maʼuli ʼaia. Neʼe ina ʼui fēnei age kiā Suzanne: “Kapau ʼe ʼi ai he ʼaho ʼe ke fia maʼuli ai ʼi he ʼapi ʼe matalelei age, ʼe tonu anai ke ke fai he sākilifisio.” Kae ko Henry pea mo Suzanne neʼe nā ʼiloʼi ko te fakamuʼamuʼa ʼo Sehova ʼi tonā maʼuli, ʼe nā “maʼu [ai] te fakapapau ʼo te maʼuli ʼaenī pea mo te maʼuli ʼaē kā haʼu.” (1 Timoteo 4:8; Tito 2:12) Neʼe liliu tanā ʼu taʼahine ko he ʼu tuagaʼane ʼe nā faka mafola te evaselio ʼi te temi kātoa. Maʼa te kiʼi fāmili ʼaia, neʼe natou filifili te ʼu meʼa ʼaē ʼe maʼuhiga tāfito, heʼe neʼe lahi te ʼu lelei neʼe natou maʼu ʼi tanatou fakatuʼutuʼu ʼaē ke natou kumi ia “te maʼuli moʼoni.”—Filipe 3:8; 1 Timoteo 6:6-8.

ʼAua Naʼa Kotou ‘Fakaʼaogaʼi Kātoa Ia Te Mālamanei’

14. Koteā te ʼu tuʼutāmaki ʼe feala ke hoko mo kapau ʼe tou galoʼi tatatou fakatuʼutuʼu moʼoni?

¹⁴ Kae ʼe feala ke hoko he tuʼutāmaki mo kapau ʼe tou galoʼi tatatou fakatuʼutuʼu moʼoni pea mokā mole kei tou puke maʼu ia “te maʼuli moʼoni.” ʼE feala anai ke “toho ia [tātou] e te ʼu tuʼania, te ʼu koloa, pea mo te ʼu lelei ʼo te maʼuli ʼaenī.” (Luka 8:14) Kapau ʼe mole tāʼofi e he tahi tona ʼu holi ki te ʼu koloa pea mo tana “tuʼania ʼo ʼuhiga mo te meʼa maʼuli,” ʼe feala ke liliu ʼo gāue lahi ʼi te tuʼu ʼaenī. (Luka 21:34, kiʼi nota ʼi te lalo pāsina) Meʼa fakaʼofaʼofa foki, ko ʼihi neʼe natou maʼu ia te holi ʼa te hahaʼi iā ʼaho nei ʼaē ko te fia maʼu paʼaga, ʼo natou “hē mamaʼo ʼi te tui pea mo natou fehukiʼaki ia nātou totonu ʼaki te ʼu mamahi lahi,” ʼo puli ai mo tanatou ʼu felōgoi maʼuhiga mo Sehova. Ko he fua kovi lahi ʼaia neʼe natou maʼu ʼi tanatou mole haga “taupau maʼu ia te maʼuli heʼegata”!—1 Timoteo 6:9, 10, 12; Tāʼaga Lea 28:20.

15. Neʼe fua lelei feafeaʼi ki he fāmili tanatou ‘mole fakaʼaogaʼi kātoa ia te mālamanei’?

¹⁵ Neʼe fakatokaga e Paulo kiā “nātou ʼaē ʼe natou fakaʼaogaʼi te mālamanei, ke natou hagē ko nātou ʼaē ʼe mole natou fakaʼaogaʼi kātoa.” (1 Kolonito 7:31) Ko Keith pea mo Bonnie neʼe nā mulimuli ki te tokoni ʼaia. ʼE fakamatala fēnei e Keith: “Neʼe au liliu ko he Fakamoʼoni ʼa Sehova ʼi te ʼosi pē ʼo taku ako te gāue ʼaē ko te tōketā toʼo nifo. Neʼe tonu ke au filifili: neʼe feala ke lahi haku hahaʼi ke au faitoʼo pea mo lahi mo taku falā, kae kapau ʼe au fai te faʼahi ʼaia pea ʼe mole kei mā fakahoko anai tamā tauhi ki te ʼAtua. Neʼe au filifili ke mole lahi taku hahaʼi ʼaē ke au faitoʼo, ke maʼu hoku temi lahi ki te maʼuli fakalaumālie pea mo te ʼu meʼa ʼaē ʼe loto kiai toku fāmili, he neʼe ko tamā ʼu taʼahine e toko nima. Logolā neʼe mole lahi te falā ʼaē neʼe matou maʼu, kae neʼe matou ako te taupau lelei ʼo te falā, pea neʼe matou maʼu tuʼumaʼu pē te ʼu meʼa ʼaē neʼe ʼaoga kiā mātou. Neʼe felōgoi lelei tomatou fāmili, neʼe feʼofaniʼaki pea mo fiafia ʼaupitō. Ki muli age, ko mātou fuli neʼe matou kau ki te minisitelio temi kātoa. ʼI te temi nei, ko tamā ʼu taʼahine ʼe natou māʼuʼuli fiafia mo tonatou ʼu ʼohoana, ko te  toko tolu kua natou maʼu fānau. ʼE toe fiafia mo tonatou fāmili ʼi tanatou haga fakamuʼamuʼa ia te finegalo ʼo Sehova.”

Kotou Fakamuʼamuʼa Ia Te Fakatuʼutuʼu ʼa Te ʼAtua ʼi Tokotou Maʼuli

16, 17. Ko te faʼifaʼitaki ʼo te ʼu hahaʼi popoto fea ʼaē ʼe tou maʼu ʼi te Tohi-Tapu, pea koteā ʼaē ʼe tou manatuʼi ʼo ʼuhiga mo nātou?

¹⁶ ʼE tuʼu ʼi te Tohi-Tapu te ʼu faʼifaʼitaki ʼo nātou ʼaē neʼe natou fai ia te fakatuʼutuʼu ʼa te ʼAtua pea mo nātou ʼaē neʼe mole natou fai. Ko te hahaʼi ʼe mole natou taʼu tahi, mai te ʼu agaʼi fenua kehekehe, pea mo te ʼu ʼaluʼaga kehekehe, ʼe feala ke natou tāʼofi he ako mai te ʼu faʼifaʼitaki ʼaia. (Loma 15:4; 1 Kolonito 10:6, 11) Ko Nimelote neʼe ina laga te ʼu kolo lalahi, kae neʼe ina fai te faʼahi ʼaia ʼo fakafeagai kiā Sehova. (Senesi 10:8, 9) Kae ko te tokolahi neʼe natou tuku he faʼifaʼitaki lelei. Ohagē lā ko Moisese, neʼe mole ina fakatuʼutuʼu ʼi tona maʼuli ke ina taupau tona tuʼulaga ʼaliki ʼi Esipito. Kae kiā ia ko tana ʼu gāue ʼaē ki te ʼAtua neʼe “ko he ʼu koloa maʼuhiga age ia ʼi te ʼu koloa ʼo Esipito.” (Hepeleo 11:26) Ko te tōketā ko Luka neʼe lagi ina faitoʼo te ʼu mahaki ʼaē neʼe tau mo Paulo pea mo ʼihi atu. Kae neʼe tokaga tāfito ia ʼo tala ia te evaselio pea mo fai tana ʼu tohi ʼaē ʼe tuʼu ʼi te Tohi-Tapu. Ko Paulo neʼe mole ʼiloa ʼuhi ko tana poto ʼi te Lao, kae ʼuhi ko tana ʼu gāue misionea, he neʼe ko te “ ʼapositolo . . . ʼo te ʼu puleʼaga.”—Loma 11:13.

¹⁷ ʼE tou ʼuluaki manatuʼi ia Tavite, mole ʼuhi he ko he tagata pule ʼi te kautau peʼe ko he tagata fai māholo peʼe fai hiva, kae neʼe ko ‘he tagata neʼe fiafia ai te loto ʼo te ʼAtua.’ (1 Samuele 13:14) ʼE mole tou ʼiloʼi ia Taniela ʼi tana gāue faka kōvanā ʼi Papiloni, kae ʼe tou ʼiloʼi ia ia ʼi tona ʼuhiga polofetā agatonu ʼa Sehova; ʼe mole tou ʼiloʼi ia Esitele ʼuhi he neʼe ko te fineʼaliki ʼo Pelesia, kae ʼuhi he neʼe ko he faʼifaʼitaki ʼo te lototoʼa pea mo te tui; ko Petelo, mo Atelea, mo Sake pea mo Soane, ʼe mole tou ʼiloʼi nātou ʼuhi he neʼe ko he ʼu tagata tautai popoto, kae ʼuhi he neʼe ko te ʼu ʼapositolo ʼa Sesu. Pea ko te faʼifaʼitaki lelei tokotahi, ia Sesu, ʼe mole tou ʼiloʼi ia ia ʼi tona ʼuhiga “tagata tufuga ʼakau,” kae ʼi tona ʼuhiga “Kilisito.” (Maleko 6:3; Mateo 16:16) Neʼe mahino kiā nātou fuli ʼaia, tatau aipē pe neʼe natou popoto, peʼe maʼu koloa, peʼe maʼu tuʼulaga, kae neʼe mole fakatafito tonatou maʼuli ki te ʼu gāue faka mālama, kae ki tanatou tauhi ki te ʼAtua. Neʼe natou ʼiloʼi ko te fakatuʼutuʼu ʼaē ʼe lelei tokotahi pea mo fakapale lahi, neʼe ko tanatou liliu ko he tagata peʼe ko he fafine ʼe gāue ki te ʼAtua.

18. Neʼe fakatotonu e te Kilisitiano tūpulaga ke ina fakaʼaogaʼi feafeaʼi tona maʼuli, pea koteā ʼaē neʼe mahino kiai?

¹⁸ Ko Seung Jin, ʼaē neʼe tou talanoa ki ai ʼi te kamata, neʼe toe mahino mo ia ki te faʼahi ʼaia. ʼE ina fakamahino fēnei: “Neʼe mole au fakaʼaogaʼi toku mālohi kātoa ki te fai faitoʼo, ki te fai pena, peʼe ki te faiako, kae neʼe au fakatotonu ke au fakaʼaogaʼi toku maʼuli ke ʼalutahi mo taku foaki ʼaē ʼo toku maʼuli ki te ʼAtua. ʼI te temi nei ʼe au gāue ʼi he koga meʼa ʼe ʼaoga lahi ai he kau faiako ʼo te Tohi-Tapu, ʼo au tokoni ki te hahaʼi ke natou maʼu ia te maʼuli heʼegata. ʼI te māhani ʼi muʼa atu, neʼe au manatu ko te minisitelio temi kātoa ʼe mole fakafiafia anai ia. ʼI te temi nei, ko toku maʼuli ʼe fakafiafia ʼaupitō age, ʼi taku faiga ʼaē ke lelei age toku ʼulugaaga pea mo taku lava akoʼi te hahaʼi ʼo he tahi agaʼi fenua. ʼE au mahino kapau ʼe tou fakatuʼutuʼu ke tou mulimuli ki te fakatuʼutuʼu ʼa Sehova, pea ʼe tou maʼu ai he ʼuhiga moʼoni ʼi totatou maʼuli.”

19. ʼE tou lava maʼu feafeaʼi te fakatuʼutuʼu moʼoni ʼi totatou maʼuli?

¹⁹ ʼI totatou ʼuhiga Kilisitiano, ʼe tou maʼu te ʼu lelei ʼaki te ʼatamai mālama ʼaē ʼe ina haofaki te ʼu maʼuli pea mo te ʼamanaki ʼaē ke haofaki ia tātou. (Soane 17:3) Koia, “ ʼaua naʼa ʼalu noa takotou tali ia te ʼofa makehe ʼo te ʼAtua.” (2 Kolonito 6:1) Kae tou fakaʼaogaʼi te ʼu ʼaho pea mo te ʼu taʼu maʼuhiga ʼo totatou maʼuli moʼo fakavikiviki kiā Sehova. Tou faka mafola ia te ʼatamai mālama ʼaē ʼe ina foaki te fiafia moʼoni ʼi te temi nei pea mo ina taki ki te maʼuli heʼegata. ʼI tatatou fai te faʼahi ʼaia, ʼe tou ʼiloʼi ai anai te moʼoni ʼo te ʼu palalau ʼaenī ʼa Sesu: “ ʼE lahi age te fiafia ʼi takita foaki, ʼi takita tali.” (Gāue 20:35) Pea ʼe tou maʼu anai te fakatuʼutuʼu moʼoni ʼi totatou maʼuli.

[Kiʼi nota]

ʼE Feala Koa Hakotou Fakamahino?

• Koteā te fakatuʼutuʼu ʼaē ʼe lahi tokotahi ʼe feala ke tou faiga kiai ʼi totatou maʼuli?

• He koʼē ʼe mole ko he aga fakapotopoto te maʼuli ʼo kumi pē te ʼu koloa?

• Koteā “te maʼuli moʼoni” ʼaē ʼe fakapapauʼi mai e te ʼAtua?

• ʼE tou lava fakaʼaogaʼi feafeaʼi totatou maʼuli moʼo fakahoko ia te fakatuʼutuʼu ʼa te ʼAtua?

[Fehuʼi]