Te ʼu Fehuʼi ʼa Te Kau Lautohi

ʼE lelei koa ki he Fakamoʼoni ʼa Sehova hana kau ki he fai ʼohoana ʼo hona kāiga peʼe ko hona feʼilo ʼe mole ko he Fakamoʼoni?

Ko te ʼu fai ʼohoana ʼe ko he ʼu lakaga fakafiafia, pea koia ʼaē ʼe lagi fia vaevae ai e he Kilisitiano ia te fiafia ʼaia. ʼE mahino ia ko nātou ʼaē ʼe kei taʼu veliveli ʼe tonu ke natou fakalogo ki ʼanatou mātuʼa peʼe ko he tahi ʼe leʼoleʼo kiā nātou, pea ko te tonu fakaʼosi ʼe ko te ʼu mātuʼa peʼe ko ia ʼaē ʼe leʼoleʼo ki te fānau ʼaē kā natou fai. (Efesi 6:1-3) Kae ʼe feafeaʼi mo kapau ko he tagata ʼe mole ko he Fakamoʼoni ʼa Sehova ʼe ina kole ki tona ʼohoana Kilisitiano ke nā kaugā ʼolo ki te fai ʼohoana ʼi he ʼēkelesia? Ko te leʼo ʼo loto ʼo te tuagaʼane ʼe lagi ina fakagafua kiā ia ke ʼalu pē ʼo sio, pea ʼe ina fakatotonu ke mole ina fai he ʼu meʼa ʼe pipiki ki te lotu ʼo ʼuhiga mo te ʼaho ʼaia.

Koia, peʼe tou kau peʼe kailoa ki he fai ʼohoana, ʼe ko he tonu ʼe tou fai e tātou takitokotahi. Kae, ʼe tonu ki te kau Kilisitiano takitokotahi ke natou manatuʼi ʼe natou tuʼu maʼua kiā Sehova pea ʼe tonu anai ke natou vakaʼi he ʼu pelesepeto faka Tohi-Tapu mokā natou fai he tonu ʼo ʼuhiga mo tanatou kau ʼaē ki he fai ʼohoana ʼo he tahi ʼe mole ko he Fakamoʼoni.

Ko te meʼa ʼaē ʼe tonu ke maʼuhiga ʼi te manatu ʼa he Kilisitiano, ʼe ko tana loto ʼaē ke leleiʼia ia ia e te ʼAtua. Neʼe ʼui fēnei e Sesu: “Ko te ʼAtua ʼe ko te Laumālie, pea ko nātou ʼaē ʼe ʼatolasio kiā te ia, ʼe tonu ke natou ʼatolasio kiā te ia ʼaki te laumālie pea mo te moʼoni.” (Soane 4:24) Koia, ko te kau Fakamoʼoni ʼa Sehova ʼe mole natou fai he ʼu aga ʼo he tahi age ʼu lotu, ohagē ko te ʼu faikole, te ʼu toʼotoʼoga ʼaē ʼe fakafeagai ki te moʼoni ʼo te Tohi-Tapu.—2 Kolonito 6:14-17.

ʼE mahino ki te Kilisitiano ko te tonu ʼaē kā ina fai, ʼe feala ke toe malave ki ʼihi. Kapau ʼe kotou fakatotonu ke kotou kau ki te fai ʼohoana, ʼe mole ʼiʼita anai koa tokotou kāiga mo kapau ʼe mole kotou lagolago ki te fakafiafia kātoa ʼo te fai ʼohoana? ʼE toe maʼua foki ke kotou tokagaʼi peʼe malave feafeaʼi anai ki te ʼu tehina mo tuagaʼane. (Loma 14:13) Tatau aipē peʼe ʼi takotou manatu peʼe ko te manatu ʼo ʼihi ʼo tokotou fāmili ʼe mole hoko anai he fihifihia mo kapau ʼe kotou kau ki te fai ʼohoana ʼa he tahi ʼe mole ko he Fakamoʼoni, kae ʼe feala koa ke fua kovi ki tokotou ʼu tehina mo tuagaʼane ʼi te faʼahi fakalaumālie? ʼE feala koa ke hoha ai te leʼo ʼo loto ʼo niʼihi?

ʼE feala ke hoko he ʼu faigataʼaʼia ʼi te ʼu toʼotoʼoga ʼo he fai ʼohoana ʼo hokotou kāiga ʼe mole ko he Fakamoʼoni. ʼE feafeaʼi mo kapau ʼe kole atu ke kotou kau iā nātou ʼaē ʼe mulimuli ki te taʼahine peʼe ko te tama ʼaē ʼe ʼohoana? Peʼe feafeaʼi mo kapau ko tokotou ʼohoana ʼe mole ko he Fakamoʼoni pea ʼe loto ke kotou kau ki te toʼotoʼoga kātoa? Kapau ko te ʼohoana ʼe fakatapu pē ʼi te lameli e he tuʼi fakamāu peʼe ko he tahi age ʼe gāue ki te puleʼaga, pea ʼe lagi ko takotou kau ʼaē kiai ʼe kotou fakahā pē ia takotou fakamoʼoni ki te ʼohoana ʼaia ʼi muʼa ʼo te lao faka puleʼaga.

Kae ko he toʼotoʼoga ʼo he fai ʼohoana ʼe fai ki te ʼēkelesia peʼe fai e he tagata lotu, ʼe fakatupu ai he tahi ʼu fihifihia. ʼO fakalogo ki tokotou leʼo ʼo loto ʼaē neʼe akoʼi e te Tohi-Tapu, pea ke mole kotou fai he ʼu meʼa ʼe fakafeagai ki takotou tui peʼe ko he meʼa ʼe feala ke fua kovi ki te fai ʼohoana, ʼe lagi kotou fakatotonu anai ke mole kotou ʼolo kiai. (Tāʼaga Lea 22:3) ʼE feala ke kotou hao mai he hoha lahi, ʼo fēia mo tokotou fāmili, mo kapau ʼe kotou fakamahino fakatomuʼa ia takotou tui ʼaē ʼe fakatafito ki te Tohi-Tapu, ʼo kotou fakahā age te ʼu meʼa ʼaē ʼe feala ke kotou fai peʼe ko he tahi age meʼa ʼe feala ke kotou fai.

ʼI tanatou kua ʼosi vakavakaʼi te ʼu ʼaluʼaga fuli, ʼe lagi manatu anai ʼihi Kilisitiano ʼe lelei age pē hanatou mole kau ki he fai ʼohoana ʼe mole ko he ʼu Fakamoʼoni ʼa Sehova. Kae kapau ʼe manatu ia he Kilisitiano ʼe feala pē hana maumauʼi he ʼu pelesepeto fakaʼatua mo kapau ʼe kau kiai, pea ʼe lagi manatu anai ʼe lahi age pē leva te ʼu tuʼutāmaki ʼaē kā hoko kae veliveli te ʼu lelei ʼaē kā ina maʼu mai te fai ʼohoana ʼaia. Kapau ʼe mole kau ki te fai ʼohoana kae ʼalu pē ki te fakaafe ʼo te kaitahi, pea ʼe ina fakatotonu anai ke ina “fai te ʼu meʼa fuli moʼo faka kolōliaʼi ʼo te ʼAtua.” (1 Kolonito 10:31) ʼI tana fai te taʼi tonu ʼaia, ‘ ʼe ina ʼamo pē tana ʼāmoga’ ʼo ʼuhiga mo te ʼu meʼa kā hoko. (Kalate 6:5) Pe koteā pē te tonu ʼaē kā kotou fai, kotou manatuʼi ʼe maʼuhiga ia hakotou taupau ʼo he leʼo ʼo loto ʼe lelei iā muʼa ʼo Sehova ʼAtua.