1. Kotea te ʼu tapuakina ʼae ʼe haʼu mai ia Sehova ʼe tokoni mai ke tou maʼuli fiafia?

ʼE LOTO e Sehova ke tou fiafia, pea ʼe ina foaki mai te atu tapuakina ke tou maʼuli fiafia. Kaʼe tafitō, neʼe ina foaki mai ia te maʼuli. ʼE tou lava fakaʼaogaʼi totatou maʼuli moʼo fakavikiviki kia te ia, koteʼuhi neʼe taki tatou e te ʼAtua ki te tauhi moʼoni. (Pes. 144:15; Soa. 6:44) ʼE fakaha lelei mai e Sehova tona ʼofa, ʼaki tana tokoni mai ke tou lotomalohi ʼi tatatou tauhi ʼae kia te ia. (Sel. 31:3; 2 Ko. 4:16) ʼE tou fiafia ʼi tatatou maʼuli ʼi he palatiso fakalaumalie ʼae ʼe maʼu ai te tokalelei mo te faifaitahi moʼoni, te ʼofa fakatautehina, pea mo te ʼu fakamanatu ʼe fai tuʼumaʼu ʼo ʼuhiga mo te ʼofa ʼo Sehova kia tatou. Pea ʼe tou toe maʼu ia he ʼamanaki taulekaleka ki te ka haʼu.

2. Kotea ʼae ʼe tonu ke tauʼi e ʼihi kaugana agatonu ʼa te ʼAtua?

² Logo la te ʼu tupuʼaga ʼaia ʼae ʼe tou maʼu ke tou maʼuli fiafia ai, kaʼe ko ʼihi kaugana agatonu ʼa te ʼAtua ʼe natou tauʼi ni manatu fakalotovaivai ʼo ʼuhiga mo natou totonu. ʼE lagi natou logoʼi ʼe mole fakamaʼuhigaʼi natou e Sehova peʼe ko tanatou tauhi ʼae kia te ia. Ko natou ʼae ʼe natou logoʼi tuʼumaʼu te ʼu faʼahi ʼaia, ʼe hage pe kia natou ko he moemisi te fiafia ʼae ‘i te ʼaho fuli ʼo tonatou maʼuli.’ ʼE hage pe kia natou te maʼuli ko he ʼaho mamahi ʼi te ʼaho fuli.—Ekl. 11:8.

3. Kotea ʼae ʼe feala ai ke tou maʼu te ʼu manatu fakalotovaivai?

 ³ ʼE feala ke tou maʼu te ʼu manatu ʼaia ʼae ʼe fakalotovaivai ʼuhi ko te lotomamahi, te mahaki, peʼe ko te vaivai matuʼa. (Pes. 71:9; Taag. 13:12; Ekl. 7:7) Pea ʼe tonu ke tou toe mahino ko totatou loto ʼe kakā, pea ʼe feala ke ina tukugakoviʼi tatou logo la ʼe leleiʼia tatou e te ʼAtua. (Sel. 17:9; 1 Soa. 3:20) ʼE fai e te Tevolo ni loi ʼo ʼuhiga mo te ʼu kaugana ʼa te ʼAtua. Pea ko natou ʼae ʼe natou maʼu te manatu ʼa Satana, ʼe lagi natou faiga ke tou tui ki te ʼu palalau heʼe tui ʼa Elifasi, ʼae ʼe mole hotatou ʼaoga ki te ʼAtua. Neʼe ko he loi ʼi te temi ʼo Sopo, pea ʼe toe feia pe ʼi te temi nei.—Sopo 4:18, 19.

4. Kotea ʼae ka tou vakaʼi anai ʼi te alatike ʼaeni?

⁴ ʼI te Tohi-Tapu, ʼe fakaha lelei mai e Sehova ʼe nofo anai mo natou ʼae ʼe natou tauʼi ia te ʼu manatu fakalotovaivai. (Pes. 23:4) ʼE ina fakaha te faʼahi ʼaia ʼaki tana Folafola. Ko te Tohi-Tapu ʼe “malohi lahi . . . [ʼuhi ko] te Atua, ke holoi ai ki lalo ni kolo tau.” Ko tona fakaʼuhiga, ʼe feala ke fetogi e te Tohi-Tapu ʼatatou manatu ʼae ʼe mole lelei pea mo hala ʼo ʼuhiga mo tatou totonu. (2 Ko. 10:4, 5) Koia, ʼe tou vakaʼi anai pe ʼe tou lava fakaʼaogaʼi feafeaʼi te Tohi-Tapu ke tou maʼu pea mo taupau he manatu ʼe lelei. ʼE fua lelei ai anai kia koutou pea ʼe kotou toe maʼu ai he ʼu puleʼaki moʼo fakalotomalohi ʼo ʼihi.

5. Kotea ʼae ʼe feala ke tokoni mai ke tou maʼu he manatu ʼe lelei?

⁵ ʼE talanoa te apositolo ko Paulo ki te ʼu faʼahi ʼe feala ke tokoni mai ke tou maʼu he manatu ʼe lelei. Neʼe ina tokoniʼi fenei te kokelekasio ʼo Kolinito: “Ke kotou [haga] fakasiosio kia koutou totonu, ke iloi pe e koutou nofo i te tui.” (2 Ko. 13:5) ʼE fakaʼuhiga “te tui” ki te ʼu akonaki Fakakilisitiano fuli ʼae ʼe maʼu ʼi te Tohi-Tapu. Kapau ʼe alu tahi totatou maʼuli mo te ʼu akonaki Fakatohi-tapu, ko tona ʼuhiga neʼe lelei tatatou sivisivi ia tatou totonu, pea ʼe fakaha ai ʼe tou nonofo “i te tui.” ʼE mahino ia, ʼe mole tou filifili pe anai ia te ʼu akonaki ʼae ʼe tou fia maʼuliʼi. Kaʼe ʼe tonu ke tou maʼuliʼi te ʼu akonaki Fakakilisitiano fuli ʼo te Tohi-Tapu.—Sakp. 2:10, 11.

6. He ko ʼe ʼe tonu ke tou vakaʼi pe ʼe tou nofo “i te tui”? (Vakaʼi te ʼuluaki pakī.)

⁶ Lagi ʼe mole kotou fia sivisivi ia koutou totonu, tafitō la mo kapau ʼe kotou manatu ʼe mole kotou lavaʼi anai. Kaʼe, ko te manatu ʼa Sehova ʼo ʼuhiga mo tatou ʼe maʼuhiga age ia ʼi ʼae ʼa tatou, he ʼe lahi age tona poto ia tatou. (Esa. 55:8, 9) ʼE ina sivisivi ʼana kaugana, moʼo vakaʼi ʼonatou kalitate pea mo tokoni kia natou kaʼe mole ina tauteaʼi natou. Kapau ʼe kotou fakaʼaogaʼi te Folafola ʼa te ʼAtua moʼo vakaʼi “pe e koutou nofo i te tui,” pea ʼe kotou mahino ai anai ki te manatu ʼa te ʼAtua ʼo ʼuhiga mo koutou. ʼE tokoni te faʼahi ʼaia ke kotou tekeʼi te ʼu manatu fuli ʼae ʼe mole hokotou ʼaoga pea mo kotou taupau te manatu ʼaeni ʼa te ʼAtua: ʼE kotou maʼuhiga kia te ia. Ko tatatou manatuʼi te faʼahi ʼaia, ʼe hage pe ko hatatou tohoʼi te lito ke ulu te laʼa ki he koga fale ʼe fakapoʼuli.

7. ʼE tokoni feafeaʼi mai te faʼifaʼitaki ʼo te hahaʼi agatonu ʼae ʼi te Tohi-Tapu?

⁷ Moʼo fakahoko te sivi ʼaia, ʼe lelei ke tou metitasio ki te faʼifaʼitaki ʼo te hahaʼi agatonu ʼae ʼi te Tohi-Tapu. Kotou fakatatau ʼonatou aluʼaga mo ʼanatou manatu pea mo ʼae ʼa koutou ke kotou iloʼi ai pe kotea ʼae ʼe lagi kotou fai anai mo kapau neʼe ko koutou. Tou vakaʼi te ʼu faʼifaʼitaki ʼe tolu ʼe fakaha mai ai pe ʼe tou lava fakaʼaogaʼi feafeaʼi te Tohi-Tapu ke tou iloʼi pau ʼe tou nofo “i te tui.” ʼE toe tokoni atu anai te faʼahi ʼaia ke kotou maʼu he manatu ʼe lelei ʼo ʼuhiga mo koutou.

8, 9. (1) Kotea te ʼu aluʼaga ʼae neʼe hoko ki te fafine vitua masiva? (2) Kotea te ʼu manatu fakalotovaivai neʼe lava maʼu e te fafine vitua?

⁸ Neʼe sioʼi e Sesu ia he fafine vitua ʼi te fale lotu ʼo Selusalemi. ʼE feala ke tokoni mai tana  faʼifaʼitaki ke tou taupau ia he manatu ʼe lelei logo la ʼe mole tou lava fai ia meʼa fuli ʼae ʼe tou fakaʼamu ki ai. (Lau ia Luka 21:1-4.) Kotou fakakaukauʼi muʼa te ʼu aluʼaga ʼo tona maʼuli. Neʼe tonu ke ina katakiʼi te kafo kona ʼo te mate ʼo tona ʼohoana. Pea tahi neʼe mole tokoni te kau takitaki lotu ki te ʼu fafine vitua kaʼe neʼe natou manumanū pea mo kaihaʼa ʼonatou koloa. (Luka 20:47) ʼI te lahi fau ʼo tona masiva, ko te meʼa ʼofa pe ʼae neʼe ina lava foaki ki te fale lotu, neʼe hage pe ko te totogi ʼa he tagata neʼe gaue lolotoga ni kiʼi minuta pe.

⁹ Kotou fakafuafua muʼa te faʼahi ʼae neʼe lagi logoʼi e te fafine vitua ʼi tana hu ki te malaʼe ʼo te fale lotu mo ʼana kiʼi foʼi piesi ʼe lua. Neʼe manatu koa ʼe veliveli age tana meʼa ʼofa ʼi ʼae neʼe feala ke ina foaki mo kapau neʼe kei maʼuli tona ʼohoana? ʼI tana sio ki te ʼu meʼa ʼofa maʼuhiga ʼa ʼihi, neʼe ufiufi ai koa ʼo manatu ʼe mole faʼa maʼuhiga tana meʼa ʼofa? Tatau aipe pe neʼe ina maʼu te ʼu faʼahiga manatu ʼaia, kaʼe neʼe ina foaki pe te meʼa ʼae neʼe ina lavaʼi moʼo lagolago ki te tauhi moʼoni.

10. Neʼe fakaha feafeaʼi e Sesu neʼe maʼuhiga ia te fafine vitua ki te ʼAtua?

¹⁰ Neʼe fakaha e Sesu neʼe maʼuhiga kia Sehova ia te fafine vitua pea mo tana meʼa ʼofa. Pea neʼe ina ui neʼe lahi age tana meʼa ʼofa ia natou fuli ʼae ʼe koloaʼia. Neʼe tuku tahi tana meʼa ʼofa mo ʼae ʼa ʼihi, kaʼe neʼe tokagaʼi tafitō e Sesu tana tauhi ʼae kia Sehova. Koia neʼe mole feala ki te kau tanaki meʼa ʼofa ʼo te fale lotu ke natou iloʼi ia te maʼuhiga ʼae kia Sehova ʼo te ʼu kiʼi foʼi piesi ʼaia ʼe lua pea mo te fafine vitua. Ko te manatu ʼa te ʼAtua ʼae neʼe maʼuhiga tafitō, kaʼe mole ko te manatu ʼa te hahaʼi, peʼe ko te manatu ʼae neʼe feala ke maʼu e te fafine vitua kia ia totonu. ʼE kotou lava fakaʼaogaʼi koa te fakamatala ʼaeni ke kotou vakaʼi pe ʼe kotou nofo ʼi te tui?

11. Kotea te ako ʼe kotou maʼu mai te fakamatala ʼa te fafine vitua?

¹¹ ʼE feala ke malave te ʼu aluʼaga ʼo tokotou maʼuli ki te ʼu faʼahi ʼae ʼe kotou lava foaki kia Sehova. Ohage la, ko ʼihi ʼe mole kei lahi tonatou temi ʼae ʼe natou foaki ki te faifakamafola, ʼuhi pe ko ʼonatou taʼu, peʼe ko te mahaki. ʼE natou manatu koa ʼe mole he ʼaoga ʼo  te tohi ʼonatou hola gaue? Pe ʼe kotou tupulaga, peʼe mole kotou mahamahaki, ʼe lagi kotou manatu ko ʼakotou hola ʼe ko he kiʼi koga pe ʼi te atu hola ʼae ʼe fai e te hahaʼi ʼa te ʼAtua moʼo tauhi kia te ia. Koia, ko te ako ʼe tou maʼu mai te fakamatala ʼa te fafine vitua, ko Sehova ʼe tokaga pea ʼe ina fakamaʼuhigaʼi te ʼu faʼahi fuli ʼae ʼe tou lava fai maʼa te ia, tafitō la mo kapau ʼe faigataʼa te ʼu aluʼaga ʼo totatou maʼuli. Kotou fakakaukauʼi muʼa ia takotou tauhi ʼae kia Sehova lolotoga te taʼu ʼaeni kua hili. Neʼe fakamaʼua koa ʼi he hola pe neʼe kotou fai maʼa Sehova ia he toe sakilifisio? Kapau ko ia, ʼe feala takotou tui papau, ʼe maʼuhiga kia Sehova te hola ʼaia ʼae neʼe kotou fai. Pea ʼe kotou fakamoʼoni ai ʼe kotou nofo “i te tui” ʼi takotou faʼifaʼitakiʼi te fafine vitua ʼo fai ia meʼa fuli ʼe kotou lavaʼi maʼa Sehova.

12-14. (1) Kotea te ʼu manatu fakalotovaivai neʼe maʼu e Elia? (2) He ko ʼe neʼe lagi manatu feia ia Elia?

¹² Neʼe nofo agatonu te polofeta ko Elia kia Sehova pea neʼe malohi tana tui. Kaʼe ʼi te tahi temi, ʼi tana lotovaivai ʼaupito neʼe ina kole kia Sehova ke mate, ʼo ina ui fenei: “Kua feauga! [Sehova], too atu nei toku mauli.” (1 Hau 19:4) Ko natou ʼae neʼe mole heʼeki lotovaivai feia, ʼe lagi natou manatu neʼe ‘palalau vale’ ia Elia ʼi tana faikole. (Sopo 6:3) Kaʼe neʼe loto moʼoni ia Elia ki te faʼahi ʼaia. Kotou tokagaʼi neʼe mole ita ia Sehova kia Elia, kaʼe neʼe tokoni ia ki ai.

¹³ He ko ʼe neʼe maʼu e Elia te manatu ʼaia? ʼI muʼa ʼo tana maʼu te manatu ʼaia, neʼe fakahoko e Elia he milakulo neʼe ha lelei ai ʼe ko Sehova te ʼAtua moʼoni. Pea hili te milakulo ʼaia, neʼe mamate leva te toko 450 polofeta ʼa Paale. (1 Hau 18:37-40) Neʼe lagi ko te ʼamanaki ʼa Elia ʼe toe liliu anai te hahaʼi ʼa te ʼAtua ki te tauhi maʼa, kaʼe neʼe mole hoko te faʼahi ʼaia. Neʼe poapoaki e te Fineʼaliki agakovi ko Sesapele ʼe ina matehi anai ia Elia. ʼI te mataku ʼa Elia, neʼe mavae leva ʼi Iselaele ʼo fakalaka ʼi te fenua ʼo Suta ke hola ki te toafa.—1 Hau 19:2-4.

¹⁴ ʼI te nofo tokotahi ʼa Elia ʼi te toafa, neʼe kamata manatu ai ʼe mole he ʼuhiga ʼo tana gaue fakapolofeta. Neʼe ina ui fenei kia Sehova: “E mole au lelei age i aku tamai.” ʼE ha mai ʼi heni tana manatu ʼae ʼe mole hona ʼuhiga. Pea kia ia, neʼe mole maʼuhiga ia kia Sehova peʼe ki he tahi age.

15. Neʼe fakaha feafeaʼi e te ʼAtua neʼe kei maʼuhiga pe ia Elia kia te ia?

¹⁵ Kaʼe neʼe mole manatu tahi te Mafimafi mo Elia. Koteʼuhi neʼe maʼuhiga tuʼumaʼu pe ia Elia kia Sehova, pea neʼe ina loto ke mahino lelei ia Elia ki te faʼahi ʼaia. Koia, neʼe fekauʼi ai e te ʼAtua ia he ʼaselo moʼo fakalotomalohiʼi ia Elia. ʼO hilifaki ki ai, neʼe foaki age e Sehova te meʼa kai mo te meʼa inu moʼo tokoni ki tana alu ʼae lolotoga ʼaho ʼe 40 ki te Moʼuga ʼo Olepe. Neʼe fakatonutonuʼi e te ʼAtua ʼaki he loto ʼofa ia te manatu hala ʼa Elia ʼae neʼe mole ʼi ai he kau Iselaele ʼe nofo agatonu kia Sehova. Pea kotou toe fakatokagaʼi neʼe foaki e Sehova kia Elia te tahi ʼu gaue pea neʼe ina tali. Neʼe tokoni Sehova kia Elia pea neʼe toe malohi ai ia Elia ʼo ina toe fakahoko ai tana gaue fakapolofeta.—1 Hau 19:5-8, 15-19.

16. Neʼe fakalotomalohiʼi feafeaʼi koutou e Sehova?

¹⁶ ʼE lava tokoni atu te maʼuli ʼo Elia ke kotou iloʼi pe ʼe kotou nofo “i te tui” pea mo kotou maʼu he manatu ʼe lelei. ʼUluaki, kotou fakakaukauʼi te ʼu aluʼaga ʼae neʼe kua tokoni atu ai ia Sehova. Neʼe tokoni atu koa he tagata ʼafeā peʼe ko he Kilisitiano kua fotufotuʼa ʼi te faʼahi fakalaumalie ʼi tona temi totonu? (Kal. 6:2) Neʼe kua kotou logoʼi koa ʼe tokaga Sehova kia koutou ʼaki te Tohi-Tapu, mo ʼatatou tohi Fakatohi-tapu, pea mo te ʼu fono? ʼI te temi ʼae ʼe kotou maʼu ai he tokoni ʼi te ʼu aluʼaga ʼaeni, pea kotou manatuʼi ia te Matapuna moʼoni ʼo te tokoni ʼaia pea mo kotou fakafetaʼi kia Sehova ʼi te faikole.—Pes. 121:1, 2.

17. Kotea ʼae ʼe fakamaʼuhigaʼi e Sehova ʼi ʼana kaugana?

¹⁷ Pea lua, kotou manatuʼi ko he manatu  fakalotovaivai ʼe ina lava kakā ʼi pe ia tatou. Kaʼe ko te manatu ʼa te ʼAtua ʼo ʼuhiga mo tatou ʼae ʼe maʼuhiga tafitō. (Lau ia Loma 14:4.) ʼE fakamaʼuhigaʼi e Sehova tatatou tauhi fakamalotoloto pea mo tatatou nofo agatonu kia te ia. Kaʼe mole ko te lahi ʼo ʼatatou gaue ʼae ʼe maʼuhiga kia Sehova. Ohage ko Elia, ʼe lagi kotou manatu neʼe mole faʼa maʼuhiga te ʼu gaue ʼae neʼe kotou fai maʼa Sehova. Neʼe lagi lave lelei ki ʼihi ʼi te kokelekasio he tokoni neʼe kotou fai kia natou, kaʼe neʼe mole kotou iloʼi. Pea lagi neʼe logo te hahaʼi ʼo tokotou telituale ki te moʼoni ʼuhi ko ʼakotou faiga.

18. Kotea ʼe fakamoʼoni ki ai ʼakotou gaue ʼae ʼe haʼu mai ia Sehova?

¹⁸ Pea tolu leva, kotou fakakaukauʼi te ʼu gaue kehekehe ʼe haʼu mai ia Sehova, ʼe ko he fakamoʼoni ʼaia ʼe ina leleiʼia koutou. (Sel. 20:11) Ohage ko Elia ʼe lagi kotou lotovaivai he ʼe hage ia ʼe mole he fua ʼo takotou gaue peʼe hage ia ʼe mole kakusia ʼakotou fakatuʼutuʼu ʼae ki te tauhi kia Sehova. Kaʼe logo la te ʼu manatu ʼaia, ʼe kei kotou maʼu pe te toe pilivilesio maʼuhiga ʼae ʼe tou maʼu fuli. Ko te pilivilesio ʼaia, ʼe ko te tala ʼo te logo lelei pea mo te fakahigoaʼi ʼo tatou ko te kau Fakamoʼoni ʼa Sehova. Koia kotou nofo agatonu kia Sehova. Pea ohage ko te ʼu palalau ʼa Sesu, ʼe feala anai ke kotou ‘ulu ki te fiafia ʼo tokotou pule.’—Mat. 25:23.

19. Kotea te aluʼaga ʼae neʼe tau mo te tagata faitohi ʼo te Pesalemo 102?

¹⁹ Neʼe lotovaivai te tagata faitohi ʼo te Pesalemo 102. Neʼe “mamahi” ʼaupito ʼuhi ko tona sino peʼe ko tona loto. Pea neʼe mole kei ina maʼu te malohi moʼo katakiʼi ʼona fihifihia. (Pes. 102:1) Ko te faʼahi pe ʼae neʼe manatu ki ai, neʼe ko tona mamahi, mo tana nofo tokotahi, pea mo te ʼu faʼahi ʼae neʼe ina logoʼi ʼi tona loto. (Pes. 102:4, 5, 7, 12) Neʼe manatu ai neʼe kua fia tuku keheʼi e Sehova ia ia.—Pes. 102:11.

20. ʼE lava tokoni feafeaʼi te faikole kia ia ʼae ʼe ina tauʼi te ʼu manatu fakalotovaivai?

²⁰ Kaʼe neʼe lava fakaʼaogaʼi pe e te tagata faipesalemo tona maʼuli moʼo fakavikiviki kia Sehova. (Lau ia Pesalemo 102:20-22.) ʼE fakaha mai ʼi te Pesalemo 102, maʼia mo natou ʼae ʼe nofo “i te tui” ʼe feala pe ke natou tau mo te mamahi pea mo natou manatu pe ki te faʼahi ʼaia. Neʼe hage pe te tagata faipesalemo “ko te lulu o te u potu lavaki,” he neʼe ina logoʼi tana nofo tokotahi, ohage neʼe maʼuli pe ia mo te ʼu fihifihia. (Pes. 102:8) Kapau ʼe kotou logoʼi te faʼahi ʼaia, kotou fakaha ia meʼa fuli ʼi tokotou loto kia Sehova, ohage ko tona fai e te tagata faipesalemo. ʼE feala ke tokoni atu ʼakotou faikole ke kotou tauʼi te ʼu manatu fakalotovaivai. ʼE fakapapau atu e Sehova “e tokaga ia ia ki te kole a te tagata e mamahi, e mole ina siaki tana kole.” (Pes. 102:18) Kotou falala ki tana fakapapau ʼaia.

21. ʼE tou lava tauʼi feafeaʼi ia te ʼu manatu fakalotovaivai ke tou maʼu he manatu ʼe lelei age?

²¹ ʼE toe fakaha mai ʼi te Pesalemo 102 pe ʼe tou lava maʼu feafeaʼi he manatu ʼe lelei age. Neʼe fili e te tagata faipesalemo ke ina fakakaukauʼi tana felogoʼi mo Sehova. (Pes. 102:13, 28) Neʼe fimalie tona loto ʼi tana iloʼi ʼae ʼe tokoni tuʼumaʼu ia Sehova ki Tana hahaʼi ke natou katakiʼi te ʼu faigataʼa. Koia kapau ʼe taʼofi fakatemi koutou e ni manatu fakalotovaivai ke mole kotou fai ia meʼa fuli ki te tauhi ʼae ki te ʼAtua, pea kotou faikole ki te faʼahi ʼaia. ʼAua naʼa kotou kole pe ki te ʼAtua ke kotou fimalie mai ʼokotou fihifihia, kaʼe ke toe ‘tapuha foki mo te huafa ʼo Sehova’.—Pes. 102:21, 22.

22. ʼE tou lava fakafiafiaʼi feafeaʼi ia Sehova?

²² ʼE mahino ia, ʼe tou lava fakaʼaogaʼi te Tohi-Tapu ke tou iloʼi papau ai ʼe tou nofo “i te tui” pea mo maʼuhiga kia Sehova. ʼE moʼoni ʼe mole feala ke tou ʼateaina mai te ʼu manatu fakalotovaivai. Kaʼe kapau ʼe tou nofo agatonu mo faʼa kataki ʼi tana tauhi, pea ʼe feala ai ke tou fakafiafiaʼi fuli ia Sehova pea mo tou maʼu ia te maʼuli heʼe gata.—Mat. 24:13.