1, 2. (1) Kotea te aluʼaga ʼae ʼe ha ai te maʼuhiga ʼo te fai ni fehuʼi ʼe lelei? (Vakaʼi te ʼuluaki pakī.) (2) He ko ʼe ʼe mole tonu ke tou tuʼania ʼi te palalau ki ni manatu faigataʼa?

KUA hili ki ai ni taʼu, neʼe faipalalau te tuagaʼane mo tona ʼohoana ʼae neʼe mole ko he Fakamoʼoni ʼa Sehova ki te Tohi-Tapu. Neʼe tui ia ki te Tahitolutapu. Kaʼe neʼe iloʼi ai e te tuagaʼane neʼe mole iloʼi e tona ʼohoana pe kotea ʼae ʼe akoʼi ʼi tana lotu ki te faʼahi ʼaia. Koia neʼe ina fehuʼi age ʼaki he agafakaʼeteʼete, “ʼE ke tui koa la ko te ʼAtua ʼe ko te ʼAtua, ko Sesu ʼe ko te ʼAtua pea ko te laumalie maʼoniʼoni ʼe ko te ʼAtua, pea ʼe mole ko ni ʼAtua ʼe tolu kaʼe ko te ʼAtua pe ʼe tahi?” Neʼe punamaʼuli ai tona ʼohoana ʼo ina ui “Kailoa, ʼe mole au tui ki he meʼa feia!” ʼOsi ʼaia pea neʼe lelei tanā faipalalau ʼo ʼuhiga pe ko ai moʼoni te ʼAtua.

² Kotea ʼae ʼe tou ako mai te aluʼaga ʼaia? ʼE feala ke fua lelei moka tou fai ni fehuʼi ʼe lelei ʼaki he agafakaʼeteʼete. ʼE tou toe ako mai ai ke ʼaua tatatou tuʼania ʼi te palalau ki ni manatu faigataʼa ohage la pe ʼe ʼi ai he Tupuʼaga, mo te Tahitolutapu, pea mo te ʼifeli kakaha. Kapau ʼe tou falala kia Sehova mo tana akoʼi tatou, pea ʼe feala ia ke malave tatatou faʼahiga faiako ki te loto ʼo te hahaʼi. (Kol. 4:6, MN) ʼE talanoa ʼi te alatike ʼaeni pe tou liliu  feafeaʼi anai ʼo faiva (1) ʼaki tatatou fai ni fehuʼi ʼe feala ai ke tou iloʼi te manatu ʼa te hahaʼi, mo (2) tatatou lau ni vaega Tohi-Tapu pea mo tokoni ke natou fakakaukauʼi pea (3) tatatou fakaʼaogaʼi ni lea fakata ke tasilo te ʼu manatu.

3, 4. He ko ʼe ʼe maʼuhiga ke tou fakaʼaogaʼi ni fehuʼi ke tou iloʼi ai pe kotea ʼae ʼe tui ki ai he tahi? Tuku mai he faʼifaʼitaki.

³ ʼE feala ʼaki te ʼu fehuʼi ke tou iloʼi pe kotea ʼae ʼe tui ki ai he tahi. He ko ʼe koa ʼe maʼuhiga? ʼE ui fenei ia Taaga Lea 18:13: “Ko ia ae e tali palalau kae nee mole fakalogo mua e ina fakaha tona vale.” Koia ʼe tonu muʼa ke tou iloʼi pe kotea ʼae ʼe tui moʼoni ki ai he tahi. Koteʼuhi kapau ʼe mole tou fai te faʼahi ʼaia, pea ʼe feala ia ke lahi te temi ʼae ʼe tou faigaʼi ai ke tou fakaha ki ai ʼe hala ia he manatu kaʼe neʼe mole tui ia ki ai.—1 Ko. 9:26.

⁴ Ohage la ʼe feala ke tou faipalalau mo he tahi ki te ʼifeli. Kaʼe ʼe mole ko te hahaʼi fuli ʼae ʼe natou ui ko he koga meʼa ʼe fakamamahiʼi ai te hahaʼi agakovi ʼaki te afi. Koia ʼe feala ke tou ui fenei age: “ʼE kehekehe te ʼu manatu ʼa te hahaʼi ʼo ʼuhiga mo te ʼifeli, kaʼe kotea koa la tau ia manatu?” Hili tatatou fagono ki tana tali, pea hoki feala leva ke tou tokoni ki ai ke mahino pe kotea ʼae ʼe akoʼi ʼi te Tohi-Tapu.

5. ʼE lava tokoni feafeaʼi mai te ʼu fehuʼi ke tou iloʼi pe ko ʼe ʼe tui he tahi ki he faʼahi?

⁵ Ko tatatou fai ni fehuʼi ʼaki he agafakaʼeteʼete ʼe feala ai ke tou iloʼi pe ko ʼe ʼe tui he tahi ki he faʼahi. Ohage la, ʼe feafeaʼi mo kapau ʼe tou felaveʼi mo he tahi ʼi te minisitelio ʼe ina ui ʼe mole tui ki te ʼAtua? ʼE feala ke tou manatu ʼe mole tui ia neʼe fakatupu tatou e he ʼAtua. (Pes. 10:4) Kaʼe ʼe mole kei tui ʼihi ki te ʼAtua koteʼuhi neʼe natou sisio ki te maʼuli mamahi ʼa ʼihi ʼo toe feia pe la mo natou. ʼE mole feala hanatou tui ki he Tupuʼaga ʼofa ʼe ina fakagafua ke maʼuli mamahi te hahaʼi. Koia, kapau ʼe ui e he tahi, “ʼE mole au tui ki te ʼAtua,” pea ʼe feala ke tou fehuʼi age “ʼE ko tau manatu pe koa ʼaia talu mai?” Kapau ʼe fakafisi, pea ʼe feala ke tou fehuʼi age pe kotea ʼae neʼe tupu ai tana mole kei tui ki te ʼAtua. ʼE feala ai anai ʼaki tana tali ke tou lava tokoni ki ai.—Lau ia Taaga Lea 20:5.

6. Kotea ʼae ʼe tonu ke tou fai hili tatatou fai he fehuʼi?

⁶ ʼI te hili ʼo tatatou fai he fehuʼi ki he tahi, ʼe tonu ke tou fagono ki tana tali pea mo ui age ʼe tou fakaʼapaʼapa ki ʼana manatu. Ohage la, ʼe feala ke ina ui ʼe mole kei tui ki he Tupuʼaga ʼofa ʼuhi ko he tuʼutamaki neʼe hoko. ʼE tonu muʼa ke tou ui age ʼe mole kovi tana feʼekeʼaki ʼae pe ko ʼe ʼe tou maʼuli mamahi. Pea ʼe feala leva ke tou fakamahino age pe ʼe feafeaʼi tatatou iloʼi ʼe maʼuli moʼoni te ʼAtua. (Hap. 1:2, 3) Kapau ʼe tou maʼu te kataki fualoa mo te ʼofa, pea ʼe lagi ina fia iloʼi anai ʼihi atu manatu. *

7. Kotea ʼae ʼe tonu ke tou fai ke tou faiva ai ʼi te minisitelio?

⁷ Ko te Tohi-Tapu ʼe ko tatatou meʼa gaue maʼuhiga tafitō ʼi te minisitelio. ʼE tokoni mai ke tou ‘katoa pea ke lelei totatou teuteuʼi ʼo ʼuhiga mo te ʼu gaue lelei fuli.’ (2 Tim. 3:16, 17) Ke tou faiva ʼi te minisitelio, ʼe mole gata pe ki te lau ʼo ni vaega Tohi-Tapu. Kaʼe ʼe tonu ke tou popoto ʼi te tokoni ki te hahaʼi ke natou fakakaukauʼi ni vaega Tohi-Tapu pea mo fakamahino lelei age te ʼu manatu ʼaia. (Gaue 17:2, 3, MN) Tou vakaʼi ia faʼifaʼitaki ʼe tolu.

8, 9. (1) ʼE feafeaʼi hatatou tokoni ki he tahi ʼe tui ko Sesu ʼe tatau mo te ʼAtua? (2) Kotea ʼihi atu faʼahiga fai neʼe ke fakaʼaogaʼi moʼo tokoni ki te hahaʼi ke natou fakakaukauʼi te manatu ʼaia?

 ⁸ ʼUluaki faʼifaʼitaki: ʼI tatatou minisitelio, ʼe tou felaveʼi mo he tahi ʼe tui ko Sesu ʼe tatau mo te ʼAtua. Kotea ni vaega ʼe feala ke tou fakaʼaogaʼi moʼo tokoni ki he tahi ke ina fakakaukauʼi? ʼE feala ke tou kole age ke ina lau te ʼu folafola ʼaeni ʼa Sesu ʼae ia Soane 6:38: “Nee mole au hifo mai te lagi o fai toku finegalo, kae te finegalo o ae nee ina fekaui mai au.” ʼI tana ʼosi lau te vaega ʼaia, ʼe feala ke tou fehuʼi fenei age: “Kapau la ko Sesu ʼe ko te ʼAtua, pea ko ai ʼae neʼe ina fekauʼi mai ia ia mai te lagi? ʼE mole koa la ko he Tahi ʼe lahi age ia Sesu? ʼE mahino ia, ko he tahi ʼe ina fekauʼi he tahi age, ʼe maʼoluga age ia ia ʼae neʼe ina fekauʼi.”

⁹ ʼE feala foki hatatou toe lau ia 1 Kolinito 15:28 ʼae ʼe ui fenei ai e te apositolo ko Paulo: “Ka osi anai te fakamalaloi o te u mea fuli kia Kilisito, e fakamalalo anai te Alo totonu ki ae nee ina tuku te u mea fuli kia ia, koteuhi ke katoa te Atua i te u mea fuli.” Moʼo tokoni kia ia ʼae ʼe tou faipalalau mo ia ke ina fakakaukauʼi te vaega ʼaia, ʼe feala ke tou fehuʼi fenei age: “Kapau la ʼe tatau ia Sesu mo te ʼAtua pea he ko ʼe koa ʼe fakamalalo anai ia kia te ia? ʼE mole koa la fakalogo he tahi ʼe ina maʼu he tuʼulaga malalo ki he tahi ʼe maʼoluga age?” Ko te faʼahiga fai ʼaia, ʼe tokoni anai ki te hahaʼi fakamalotoloto ʼae ʼe natou fakaʼapaʼapa ki te Folafola ʼa te ʼAtua ke natou fia ako ni ʼihi atu manatu.—Gaue 17:11.

10. (1) ʼE feafeaʼi hatatou lava tokoni ki he tahi ʼe tui ki te ʼifeli? (2) Kotea ʼihi atu faʼahiga fai neʼe ke fakaʼaogaʼi moʼo tokoni ki te hahaʼi ke natou fakakaukauʼi te manatu ʼaia?

¹⁰ Lua faʼifaʼitaki: ʼE faigataʼa ki he tahi hana tui ʼe mole fakamamahiʼi anai ʼo heʼe gata te hahaʼi agakovi ʼi te ʼifeli. ʼE lagi tui ki te ʼifeli koteʼuhi ʼe ina loto ke tauteaʼi te hahaʼi agakovi. ʼE feafeaʼi anai hatatou tokoni ki he tahi ʼe manatu feia ʼaki ni vaega ke ina fakakaukauʼi? Tou fakafimalieʼi muʼa ia ia ʼo tou fakaha age ʼe tauteaʼi anai te kau agakovi. (2 Tes. 1:9) ʼOsi ʼaia pea tou kole age ke ina lau ia Senesi 2:16, 17, ʼae ʼe ui ai ko te tuʼā ʼo te agahala ʼe ko te mate. ʼE feala ke tou fakamahino age ʼe tou agahala fuli ʼuhi ko te agahala ʼa Atama. (Loma 5:12) Pea tahi ʼe feala ke tou fakaha age neʼe mole talanoa te ʼAtua ʼi he temi ki he tuʼā ʼi he ʼifeli. Pea tou lau age leva ia Senesi 3:19. ʼE ui e te ʼAtua ʼi te vaega ʼaia kia Atama ko te tuʼā ʼo tana agahala ko tana toe liliu ki te efu. ʼE feala ke tou fehuʼi age “Neʼe matatonu koa te ui ʼae kia Atama ʼe toe liliu anai ki te efu mo kapau neʼe tonu ia ke alu ki he  ʼifeli kakaha?” Ko te taʼi fehuʼi ʼaia ʼe feala ke tokoni ki he tahi ʼe fakamalotoloto ke ina fakakaukauʼi te manatu ʼaia.

11. (1) ʼE feafeaʼi hatatou lava tokoni ki he tahi ʼe tui ko te hahaʼi agalelei fuli ʼe hake ki selo? (2) Kotea ʼihi atu faʼahiga fai neʼe ke fakaʼaogaʼi moʼo tokoni ki te hahaʼi ke natou fakakaukauʼi te manatu ʼaia?

¹¹ Tolu faʼifaʼitaki: ʼI tatatou minisitelio, ʼe tou felaveʼi mo he tahi ʼe tui ko te hahaʼi agalelei fuli ʼe hake ki selo. Ko te manatu ʼaia ʼe ina fetogi anai tana faʼahiga mahino ki te Tohi-Tapu. Ohage la kapau neʼe tou vakaʼi mo ia te koga tohi ʼo Apokalipisi 21:4, pea ʼe feala ia ke manatu ʼe talanoa te vaega ki te maʼuli ʼi te lagi. (Lau.) Pea ʼe feafeaʼi leva hau tokoni ki ai ke ina fakakaukauʼi te vaega ʼaia? ʼE mole tou lau age anai ʼihi vaega, kaʼe ʼe feala pe hatatou lagaʼi he manatu ʼe tuʼu ia Apokalipisi 21:4. Ohage la ko te ui ʼae “e mole toe mau anai te mate.” ʼE feala leva hatatou fehuʼi fenei age: “ʼI tau manatu la, kapau ʼe mole toe maʼu anai he meʼa ʼi he potu, he neʼe mole koa la neʼe maʼu ʼuluaki ʼi ai?” ʼE mahino ia ʼe ʼio atu anai. Pea ʼe feala leva hatatou ui age ʼe mole mate he tahi ʼi te lagi gata pe ʼi te kele. Koia ko te vaega ʼo Apokalipisi 21:4 ʼe ina fakamatalatala te ʼu tapuakina ka tou maʼu anai ʼi te kele.—Pes. 37:29.

12. He ko ʼe neʼe fakaʼaogaʼi e Sesu ni lea fakata?

¹² Neʼe fakaʼaogaʼi e Sesu ni lea fakata ʼi tana faifakamafola. (Lau ia Mateo 13:34, 35.) ʼAki te ʼu lea fakata ʼaia, neʼe feala ke iloʼi e Sesu pe neʼe fakamalotoloto ia natou ʼae neʼe fagono age pea mo fia tauhi moʼoni kia Sehova. (Mat. 13:10-15) Neʼe toe fakaʼaogaʼi e Sesu ni lea fakata ke feala ki te hahaʼi hanatou manatuʼi te ʼu faʼahi neʼe ina akoʼi age pea ke natou fia fagono kia ia. Koia ʼe feafeaʼi hatatou lava fakaʼaogaʼi te ʼu lea fakata moka tou faiako?

13. Kotea te faʼifaʼitaki ʼe ke lava fakaʼaogaʼi moʼo akoʼi ki he tahi ko te ʼAtua ʼe maʼoluga age ia Sesu?

¹³ ʼE lelei age te fakaʼaogaʼi ʼo ni lea fakata ʼe mahino gafua. Ohage la moka tou fia akoʼi ki he tahi ko te ʼAtua ʼe maʼoluga age ia Sesu, pea ʼe feala hatatou ʼahiʼahi fai te faʼifaʼitaki ʼaeni: ʼUluaki, ʼe feala ke tou ui age neʼe fakatatau e te ʼAtua pea mo Sesu ʼanā felogoʼi ki he Tamai mo tona Foha. (Luka 3:21, 22; Soa. 14:28) Hili ʼaia, ʼe feala ke tou fehuʼi fenei age: “Ko te vahaʼa fakafamili fea ʼe ke fakaʼaogaʼi anai moʼo fakaha ia te tatau ʼo he foʼi tokolua?” ʼE lagi talanoa anai ia ki he tau tehina peʼe ko he ʼu mahaga. Pea ʼe feala leva hatatou ui fenei age: “ʼE ko he faʼifaʼitaki lelei ʼaia. Koia kapau neʼe ta maʼu gafua te faʼifaʼitaki ʼaia, pea he ko ʼe koa neʼe mole fakaʼaogaʼi e Sesu, ia ia ʼae ko te Tagata Faiako Lahi? Kaʼe neʼe ina ui ko te ʼAtua ʼe ko tana Tamai. ʼAki tana fai te faʼahi ʼaia, neʼe tokoni mai ai Sesu kia tatou ke tou mahino ʼe ko te ʼAtua ʼae ʼe matuʼa age pea mo lahi age tona ʼuhiga pule.”

14. Kotea te faʼifaʼitaki ʼae ʼe ha ai ʼe mole matatonu te manatu ʼae ʼe fakaʼaogaʼi e te ʼAtua ia te Tevolo moʼo fakamamahiʼi te hahaʼi ʼi te ʼifeli?

¹⁴ Tou vakaʼi te tahi faʼifaʼitaki. Ko ʼihi ʼe natou tui neʼe fakanofo e te ʼAtua ke tokaga ia Satana ki te ʼifeli. ʼE tou lava tokoni feafeaʼi ki he tamai peʼe faʼe ke mahino ʼe mole matatonu te manatu ʼae ʼe fakaʼaogaʼi e te ʼAtua ia te Tevolo moʼo fakamamahiʼi te hahaʼi ʼi te ʼifeli? ʼE feala hatatou fehuʼi age, “Kotea anai ka ke fai moka liliu ʼo agatuʼu hau tamasiʼi pea mo ina fai ni meʼa ʼe kovi?” ʼE lagi ina ui atu anai ʼe ina fakatonutonuʼi anai tana tamasiʼi pea mo liuliuga anai ʼana faiga moʼo tokoni ki ai ke ina tuku tana aga ʼaia. (Taag. 22:15) Pea ʼe tou lava fehuʼi age, “Kaʼe kotea anai ka ke fai mo kapau ʼe mole ina fia fetogi  ia tana aga?” Tokolahi te ʼu matuʼā neʼe natou ui neʼe natou fakatuʼā leva tanatou tamasiʼi ki muli age. Pea ʼe feala ke tou fehuʼi age “ʼE feafeaʼi mo kapau ʼe ke iloʼi neʼe ko he tagata agakovi ʼae neʼe ina fakaneke tau tamasiʼi ke ina fai ni meʼa kovi?” ʼE mahino ia, ʼe ita anai te tamai peʼe ko te faʼe ki te tagata ʼaia. Pea ke feala ke mahino lelei te manatu ʼo te faʼifaʼitaki, tou fehuʼi age “ʼI tau iloʼi ʼae neʼe ko te tagata agakovi ʼae neʼe ina fakaneke tau tamasiʼi, ʼe ke kole anai koa ki te tagata ʼaia ke ina fakatuʼā tau tamasiʼi?” ʼE mahino ia ʼe fakafisi atu anai. Koia ʼe ha lelei mai ai ʼe mole fakaʼaogaʼi anai e te ʼAtua ia Satana ke ina fakatuʼā te hahaʼi koteʼuhi ʼe ko Satana ʼae ʼe ina fakaneke te hahaʼi ke natou fai ni meʼa ʼe kovi.

15, 16. (1) He ko ʼe ʼe mole tonu ke tou manatu ʼe tali anai e te hahaʼi fuli te logo ʼo te Puleʼaga? (2) ʼE fakamaʼua koa ke tou popoto ke feala hatatou faiva ʼi te faiako? Fakamahino. (Vakaʼi mo te fakamatala ʼae ʼi te ʼa takai “Ko He Meʼa Gaue ʼe Tokoni Mai Ki Te Minisitelio.”)

¹⁵ Tatau aipe pe lelei te ʼu fehuʼi ʼae ʼe tou fai, mo tatatou faʼahiga tokoni ki te hahaʼi ke natou fakakaukauʼi he manatu pea mo tatatou fakaʼaogaʼi ni lea fakata lelei, kaʼe ʼe mole tali anai e te hahaʼi fuli ia te logo ʼo te Puleʼaga. (Mat. 10:11-14) Ohage pe ko Sesu, logo la neʼe ko ia te Tagata Faiako lahi tokotahi kaʼe neʼe tokosiʼi natou ʼae neʼe natou tali ʼana akonaki.—Soa. 6:66; 7:45-48.

¹⁶ Kaʼe ʼe feafeaʼi mo kapau kia tatou ʼe mole tou popoto ʼi te faiako? Logo la te faʼahi ʼaia, kaʼe ʼe feala pe hatatou faiva ʼi te faifakamafola. (Lau ia Gaue 4:13.) ʼE fakapapau mai ʼi te Tohi-Tapu ʼe tali anai te logo lelei e natou fuli neʼe lotolelei ki te maʼuli heʼe gata. (Gaue 13:48) Koia ʼae ʼe ʼaoga ai ke tou agafakapotopoto. ʼE tonu ke tou faiga ke tou hikihiki tatatou faʼahiga faiako kaʼe ʼe mole tonu ke tou lotovaivai moka ʼe mole tali ia te logo lelei e te hahaʼi ʼae ʼe tou faipalalau mo natou. Kapau ʼe tou falala kia Sehova pea mo tana akoʼi tatou, pea ʼe tou liliu anai ko he kau faiako faiva pea ʼe fua lelei anai kia tatou mo natou ʼae ʼe fagono mai. (1 Tim. 4:16) ʼE lava tokoni mai ia Sehova ke tou iloʼi te tali ʼae ʼe tonu ke tou fai ki te tagata takitokotahi. Pea ʼi te alatike ka hoa mai, ʼe tou ako ai anai pe fua lelei feafeaʼi tatatou minisitelio moka tou mulimuli ki te lekula iloa ʼa Sesu ʼae ia Mateo 7:12.