1. Ko te kautahi fea ʼae neʼe ina fetogi te puleʼaga ʼo Iselaele? (Vakaʼi te ʼuluaki pakī.)

ʼE LELEIʼIA e Sehova ia te faʼahiga tauhi ʼo tana kau atolasio kia te ia ia ʼaho nei. ʼI te temi muʼa neʼe ko te puleʼaga ʼo Iselaele ʼae neʼe filifili e te ʼAtua. Kaʼe neʼe natou liliu leva ko ni kau aposeta. Neʼe fakatuʼu ai e Sehova ia he kautahi foʼou ʼe faʼufaʼu e te ʼu tisipulo ʼa Kilisito. Neʼe natou liliu leva ko he kautahi ʼe ina fakafofoga ia Sehova. Pea neʼe mole fakaʼauha te kautahi ʼaia logo ai te fakaʼauha ʼo Selusalemi ʼi te taʼu 70 H.T.S. (Luka 21:20, 21) ʼI te ʼu ʼaho fakamuli ʼaeni, ko te kautahi foʼou ʼaia ʼe fakatuʼutuʼu moʼo fakafofoga ia Sehova. Kaʼe ʼe mole fakaʼauha anai ia ʼi te temi ʼae ka pulihi ai te malama ʼa Satana ʼo talu ai. (2 Tim. 3:1) He ko ʼe ʼe tou tui papau ki te faʼahi ʼaia?

2. Kotea ʼae neʼe ui e Sesu ʼo ʼuhiga mo te “mamahi lahi”? Pea ʼe kamata feafeaʼi anai?

² Neʼe fakakikite fenei e Sesu ia te aluʼaga ka hoko anai ʼi te ʼu ʼaho fakamuli: “E hoko anai he mamahi lahi, ae e mole hona tatau talu mai te kamataaga o te malamanei o kaku mai ki te aho nei, pea e mole toe mau anai hona tatau i he aho.” (Mat. 24:3, 21) Ko te mamahi lahi ʼaia, ʼe kamata anai ʼi te temi  ʼae ʼe fakaʼauha ai e Sehova ia “Papilone lahi,” te kautahi fakamalamanei ʼo te lotu hala, ʼaki ia tana fakaʼaogaʼi te ʼu puleʼaga fakatagata. (Apk. 17:3-5, 16) ʼOsi ʼaia pea kotea anai ka hoko?

3. Kotea ʼae ka hoko anai ki te hahaʼi ʼa Sehova hili te fakaʼauha ʼo te ʼu lotu hala?

³ ʼE ko te kautahi fakalotu ʼa te kau Fakamoʼoni ʼa Sehova ʼae ka tuʼu pe anai ʼi te hili ʼo te fakaʼauha ʼo te ʼu lotu hala. Pea ʼe ʼohofi anai e Satana mo tana malama ia te ʼu kaugana a te ʼAtua. ʼE hage anai te hahaʼi tokalelei ʼa Sehova ʼe mole honatou puipuiʼaga. Pea ʼe ui fenei ʼi te Tohi-Tapu ʼo ʼuhiga mo “Koke, i te fenua o Makoke”: “E ke hake anai kia natou, e ke fakaovi anai o hage ko he afa, e ke hage anai ko he ao ae e ina uufi anai te fenua, ia koe, mo au kau solia, mo te hahai kaugamalie ae e kau mo koe.” Kaʼe ʼe ko he toe faihala anai ia.—Esk. 38:1, 2, 9-12.

4, 5. Kotea ʼae ka fai anai e Sehova moka ʼohofi ia tana hahaʼi?

⁴ ʼI te temi ʼae ʼe ʼohofi ai e Satana pea mo ʼana kaugana ia te hahaʼi ʼa Sehova, ʼe hage pe anai ʼe natou ʼohofi ia Sehova totonu. (Lau ia Sakalia 2:8.) Kotea ʼae ka fai anai e Sehova? ʼE foimo gaue atu aipe anai ia te Tuʼi ʼo te ʼAtulaulau moʼo haofaki tana hahaʼi. ʼE mole ina tuku anai ke fakaʼauha ia tana hahaʼi. ʼI te temi leva ʼaia, ʼe kamata anai e Sehova ia te tau ʼo Halamaketone pea mo fakaʼauha katoa te malama ʼa Satana.—Apk. 16:14, 16.

⁵ Neʼe fakakikite e Selemia ʼe tauʼi anai e Sehova totonu te ʼu puleʼaga ʼi Halamaketone, ʼo ina ui fenei: “Kua ke [ia Sehova] mo te atu puleaga, pea kua ina fakamaaui te tagata fuli, pea kua ina tuku te kau agakovi ki te heleta, e ui e [Sehova]. Koia e folafola ai [e Sehova] o te atu fua tau, o ui: Koeni, kua hoholo te malaia i te atu puleaga, pea kua malaga he afa lahi i te u potupotu o te kele. Ko natou ae e tamatei anai e [Sehova] i te aho aia e tanaki anai mai ae potu ki ae potu o te kele; e mole tagi anai kia natou, pea e mole too anai natou, pea e mole tanu anai natou. E natou hage anai ko he mea fakagako kele i oluga o te kele.” (Sel. 25:31-33) Ko te malama ʼa Satana ʼe fakaʼauha anai ʼi Halamaketone. Kaʼe ʼe tuʼu pe anai te kautahi ʼa Sehova.

6, 7. (1) ʼE ʼomai mai fea te toe hahaʼi tokolahi? (2) Kotea te ʼu tuputupu neʼe hoko ʼi te ʼu taʼu ʼaeni kua hili?

⁶ Ia ʼaho nei, ko te koga ʼo te kautahi ʼa te ʼAtua ʼi te kele ʼe tuputupu koteʼuhi kua fonu ai te ʼu hahaʼi agatonu ʼe natou maʼu te ʼofa ʼo te ʼAtua. ʼE ui fenei ʼi te Tohi-Tapu: “E tuku te u mata o [Sehova] ki te kau agatonu, pea e tokaga ona taliga ki tanatou kole.” (1 Pet. 3:12) ʼE kau ki te kau agatonu ʼaia, ia te toe hahaʼi tokolahi, ʼae ka natou hao anai ʼi “te mamahi lahi.” (Apk. 7:9, 14) Ke ke fakafuafua muʼa ia tou fiafia moka ke hao anai ʼi te mamahi lahi pea mo ke kau ʼi te toe hahaʼi tokolahi.

⁷ Ko te toe hahaʼi tokolahi ʼaia ʼe faʼufaʼu e te hahaʼi ʼo te ʼu puleʼaga fuli. Pea neʼe feala tonatou fakatahiʼi ʼuhi ko te gaue faifakamafola. Neʼe fakakikite fenei e Sesu: “E fakamafola anai te logo lelei aeni o te puleaga i te malamanei katoa, ke fakamooni ki te u puleaga fuli. Pea e hau anai te fakaosi.” (Mat. 24:14) Koia ko te gaue tafitō ʼa te hahaʼi ʼa te ʼAtua ʼe ko te fakamafola ʼo te logo lelei ʼo te Puleʼaga ʼo te ʼAtua. Pea ʼe ko te toko lau ʼi miliona hahaʼi ʼae ʼe natou atolasio  kia Sehova “i te laumalie mo te mooni.” (Soa. 4:23, 24) Ohage la, ʼi te vaha ʼo te taʼu 2003 pea mo te taʼu 2012, neʼe ko te toko 2 707 000 tupu hahaʼi neʼe natou foaki tonatou maʼuli kia Sehova pea mo papitema. Ia ʼaho nei, ko kau Fakamoʼoni ʼe toko 7 900 000 tupu pea ʼi te taʼu fuli ko te toko lau ʼi miliona hahaʼi ʼae ʼe kau ki te ʼAho Fakamanatu ʼo te mate ʼo Kilisito. ʼE tou fiafia ki te tuputupu vave ʼo te toe hahaʼi tokolahi pea ʼe tou iloʼi ʼe ko Sehova ʼae ʼe ina fakahomo.—1 Ko. 3:5-7.

8. He ko ʼe ʼe fakaofoofo te tuputupu ʼa te kautahi ʼa Sehova?

⁸ Neʼe filifili e Sehova ia he kautahi ʼi te kele moʼo fakafofoga ia te ia pea ʼe fakaofoofo ia te tuputupu ʼo tana kautahi ʼaia. (Lau ia Esaia 43:10-12.) Neʼe fakakikite fenei e Esaia ʼo ʼuhiga mo te ʼu ʼaho fakamuli: “E liliu anai ae e veliveli ko he toko afe, pea ko ae e gaegae ko he puleaga malohi. Ko au, [Sehova], e au fakavave anai te u mea aia i tona temi.” (Esa. 60:22) Ko te toe ʼo te kau fakanofo, ia “te Iselaele a te Atua,” neʼe hage ko “ae e veliveli,” kaʼe neʼe tapuakina e Sehova ia tanatou gaue faifakamafola. Neʼe natou liliu leva ʼo tokolahi ohage pe ko te kau fakanofo ʼae neʼe taki mai ki te kautahi ʼa te ʼAtua. (Kal. 6:16) ʼAki te alu ʼo te ʼu taʼu, ko te toko lau ʼi miliona hahaʼi ʼae ʼe natou ʼamanaki maʼuʼuli ʼi te kele, neʼe natou toe tali foki ia te moʼoni.

9. Kotea ʼae ʼe tonu ke tou fai ke tou maʼu te fakapapau ʼa te ʼAtua ʼo ʼuhiga mo he ka haʼu taulekaleka?

⁹ Neʼe fakapapau e Sehova ia he ka haʼu taulekaleka kia tatou fuli tatau aipe pe ʼe tou kau ki te kau fakanofo peʼe ki te toe hahaʼi tokolahi. Ke feala hatatou maʼu te fakapapau ʼaia, ʼe tonu ke tou fakalogo ki ʼana fakatotonu. (Esa. 48:17, 18) Ohage la neʼe fakamaʼua e Sehova ki te kau Iselaele ke natou fakalogo ki tana Lao. Koteʼuhi ʼaki te Lao ʼe puipui ai natou, pea mo natou iloʼi ai pe feafeaʼi te maʼu ʼo he maʼuli fakafamili fiafia mo ni kaumeʼa lelei. Pea ʼe natou toe iloʼi ai foki pe feafeaʼi hanatou agatonu ʼi te gaue pea mo te aga ʼae ʼe tonu ke fai ki te hahaʼi. (Eke. 20:14; Lev. 19:18, 35-37; Tet. 6:6-9) ʼE toe feia pe mo tatou ia ʼaho nei. Ko te ʼu fakatotonu ʼa te ʼAtua ʼe ina puipui tatou pea ʼe ʼaoga kia tatou. Pea ʼe mole faigataʼa fau tona maʼuliʼi. (Lau ia 1 Soane 5:3.) Moka tou mulimuli ki te ʼu fakatotonu, pea ʼe tou maʼuli fiafia ai kaʼe ko te faʼahi ʼae ʼe maʼuhiga tafitō ʼe toe malohi age ai tatatou tui kia Sehova.—Tito 1:13.

10. He ko ʼe ʼe tonu ke tou tokakaga ʼo ako tuʼumaʼu te Tohi-Tapu pea mo fai hatatou Ako Fakafamili?

¹⁰ Ko te koga ʼo te kautahi ʼa te ʼAtua ʼi te kele ʼe lakalaka ki muʼa ʼi te ʼu aluʼaga kehekehe. ʼE tokoni mai ke tou mahino lelei age ki te Tohi-Tapu. Pea ʼe ko te faʼahi pe ʼaia ʼae neʼe fakapapau fenei ʼi te Tohi-Tapu: “Ko te ala ʼo te kau faitotonu ʼe hage ko te malama gigila ʼae ʼe fakahaʼuhaʼu tona malama ʼo aʼu ki te mafoa lelei ʼo te ʼaho.” (Taag. 4:18, MN) Kaʼe ʼe tonu ke tou fai te ʼu fehuʼi ʼaeni: ‘ʼE au malama koa ki te ʼu fetogi neʼe fai ki tatatou faʼahiga mahino ki ʼihi vaega Tohi-Tapu? ʼE au lau koa ia te Tohi-Tapu ʼi te ʼaho fuli? ʼE au fakaʼamuʼamu koa ke au lau ʼatatou tohi foʼou? ʼE ʼi ai koa haku Ako Fakafamili ʼi te vahaʼa fuli?ʼ Ko te ʼu faʼahi ʼaia ʼe mole faigataʼa tona fai, kaʼe ʼe tonu ke tou fakatuʼutuʼu he temi ki ai. ʼE maʼuhiga ʼaupito ke tou haga ako te Folafola ʼa te ʼAtua, mo maʼuliʼi pea mo haʼele tahi mo te kautahi ʼa te ʼAtua. Pea ʼe tonu ke tou fai te faʼahi ʼaia tafitō ʼi te  temi nei koteʼuhi kua ponoi mai pe te mamahi lahi.

11. He ko ʼe ʼe olo te hahaʼi ʼa Sehova ki te ʼu fono pea mo te ʼu fakatahi lalahi?

¹¹ ʼE fakalotomalohiʼi tatou e te kautahi ʼa Sehova ke tou mulimuli ki te tokoni ʼaeni ʼa te apositolo ko Paulo: “Ke tou fetokagaaki ia tatou ke ekenaki tatou ki te ofa pea mo te u gaue lelei. Ke aua naa tou siaki tatatou fakatahi o hage ko te fai mahani a ni ihi, kae ke tou fetokoniaki ia tatou, pea tafito leva kua kotou sio kua ovi mai te aho.” (Hep. 10:24, 25) Ko te kau Iselaele ʼo te temi muʼa, neʼe natou fakatahitahi tuʼumaʼu moʼo atolasio kia Sehova pea ke ina akoʼi natou. Ko te fai ʼo te ʼAho Lahi ʼo Te ʼu Fale Pola ʼi te temi ʼo Neemia neʼe kau ki te ʼu aluʼaga fakafiafia ʼaia. (Eke. 23:15, 16; Nee. 8:9-18) Ia ʼaho nei, ʼe toe ʼi ai mo ʼatatou fono pea mo ʼatatou fakatahi lalahi. Pea ʼe tonu ke tou faiga ke tou kau ki te ʼu fakatahi fuli ʼaia koteʼuhi ʼe tokoniʼi ai tatou ke tou nofo ovi kia Sehova pea mo tou fiafia ʼi tatatou tauhi ʼae kia te ia.—Tito 2:2.

12. Kotea ʼae ʼe tonu ke tou logoʼi ʼo ʼuhiga mo te gaue faifakamafola?

¹² ʼUhi ko tatatou kau ʼae ki te kautahi ʼa Sehova, ʼe tonu ke tou fakamafola ia te logo lelei. ʼE ko he toe pilivilesio ia kia tatou. Pea tahi ʼe ui ʼi te Tohi-Tapu ʼe ko he “gaue taputapu.” (Loma 15:16) Moka tou faifakamafola, ʼe tou gaue fakatahi mo te Maʼoniʼoni ia Sehova. (1 Pet. 1:15; 1 Ko. 3:9) ʼE tou toe kau foki ki te fakatapuha ʼo te huafa maʼoniʼoni ʼo Sehova. Pea ʼe tou fiafia ai ʼi te tala ʼo “te Evaselio o te kololia o te Atua manuia.”—1 Tim. 1:11.

13. Kotea ʼae ʼe fakalogo ki ai totatou maʼuli pea mo tatatou fakakaumeʼa ʼae mo Sehova?

¹³ ʼE loto e Sehova ia te meʼa ʼae ʼe lelei kia tatou. Koia ʼae ʼe ina loto ai ke tou fakaovi kia te ia pea mo tana kautahi. ʼE tou toe felaveʼi pe mo te tonu ʼae neʼe maʼua ke fai e te kau Iselaele ʼi te ui fenei e Moisese kia natou: “E au tuku ki ou mua te mauli mo te mate, te tapuakina mo te malaia. Ke ke filifili te mauli, o tupu ke ke mauli, ia koe mo tou hakoga, o ofa [kia Sehova], tou Atua, pea mo fakalogo ki tona leo, pea mo pipiki kia ia: ko ia ae ko tou mauli.” (Tet. 30:19, 20) Koia tou filifili te maʼuli, mo tou ʼofa kia Sehova pea mo tou nofo agatonu tuʼumaʼu kia te ia mo tana kautahi.

14. Kotea te manatu ʼa te tehina ʼo ʼuhiga mo te kautahi ʼa te ʼAtua?

¹⁴ Ko te tehina ko Pryce Hughes, ʼae neʼe ina ako te moʼoni ʼi muʼa ʼo te taʼu 1914, neʼe nofo agatonu ia kia Sehova pea mo Tana kautahi ʼi tona maʼuli katoa. ʼI tana fakamatala ia tona maʼuli, neʼe ina ui ko te ako maʼuhiga ʼaupito ʼae neʼe ina taʼofi neʼe ko te fakatahi tuʼumaʼu ki te kautahi ʼa Sehova kaʼe mole ko te falala ki te manatu ʼa te tagata. Neʼe tokoni te faʼahi ʼaia kia ia ke ina lava ʼutakiʼi te ʼu ʼahiʼahi ʼo tana tui lolotoga tona maʼuli. Neʼe toe ui e te tehina, ʼe hoki tou maʼu pe te ʼofa ʼo Sehova moka ʼe tou mulimuli tuʼumaʼu ki te takitaki ʼo tana kautahi.

15. Tuku mai he faʼifaʼitaki ʼe tou iloʼi ai pe tonu ke feafeaʼi tatatou faʼahiga manatu moka fai ni fetogi ki tatatou faʼahiga mahino.

¹⁵ ʼE loto e Sehova ke tou lagolago ki tana kautahi mo tali te ʼu fetogi ki tatatou faʼahiga mahino ki te ʼu moʼoni Fakatohi-tapu pea mo tatatou faʼahiga faifakamafola. ʼI te temi muʼa, ko ʼihi Kilisitiano Sutea neʼe kei natou fia mulimuli pe ki te Lao. (Gaue 21:17-20) Kaʼe neʼe fakatonutonuʼi pea mo tokoniʼi natou e te apositolo ko Paulo ke natou mahino neʼe ko te sakilifisio ʼa Sesu ʼae neʼe  ina fakafealagia te fakamolemole ʼo ʼanatou agahala kaʼe mole ko te ʼu sakilifisio manu. (Hep. 10:5-10) Tokolahi ʼi te kau Kilisitiano Sutea ʼaia, neʼe natou tali te tokoni ʼa te apositolo ko Paulo pea mo natou fetogi ʼanatou manatu. ʼE feala ke tou taʼofi he ako maʼuhiga mai tanatou faʼifaʼitaki. ʼE tonu ke tou ako fakalelei te Tohi-Tapu mo ʼatatou tohi pea mo tali ʼaki he agavaivai te ʼu fetogi ʼae ʼe fai e te kautahi ʼa Sehova.

16. (1) He ko ʼe ʼe taulekaleka anai te maʼuli ʼi te Palatiso? (2) Kotea ʼae ʼe ke fakaʼamu ki ai ʼi te malama foʼou?

¹⁶ Ko natou fuli ʼae ʼe nonofo agatonu kia Sehova pea mo tana kautahi ʼe natou maʼu tapuakina anai. ʼE kauga hau anai te kau fakanofo mo Sesu Kilisito ʼi selo. (Loma 8:16, 17) Pea ko natou ʼae ʼe ʼamanaki maʼuʼuli ʼi te kele, ʼe natou fakaʼamu ki te maʼuli heʼe gata ʼi te Palatiso. ʼE ko te temi pe ʼaeni ʼae ʼe maʼu ai e te ʼu kaugana fuli ʼa Sehova ʼi te malamanei te faiga malie ʼae ke natou tala ki te hahaʼi ia te ʼamanaki ʼaia. (2 Pet. 3:13) ʼE maʼu anai e te kau agavaivai ia te kele pea ʼe natou fiafia anai ʼi te mahu ʼo te tokalelei. (Pes. 37:11) ʼE maʼu anai e te hahaʼi hanatou gaue lelei. Pea “e natou fakatuu anai ni fale, pea e natou nonofo anai i ai.” (Esa. 65:21, 22) ʼE mole kei ʼi ai anai he tahi ʼe ina gaohi koviʼi te hahaʼi. ʼE mole toe maʼu anai he masiva pea ʼe mole toe pakupaku anai he tahi. (Pes. 72:13-16) ʼE mole toe akoʼi anai e te ʼu lotu hala ni loi ʼo ʼuhiga mo te ʼAtua koteʼuhi ʼe fakaʼauha anai. (Apk. 18:8, 21) Pea ko te kau mate ʼe fakatuʼuake anai pea ʼe natou maʼu anai te fealagia ʼae ke natou maʼuʼuli ʼo talu ai ʼi te kele. (Esa. 25:8; Gaue 24:15) Koia kapau ʼe tou fakamalohi ʼatatou felogoʼi mo Sehova pea mo haga haʼele tahi mo tana kautahi, ʼe hoko moʼoni anai te ʼu fakapapau taulekaleka ʼaia kia tatou.

17. Kotea ʼae ʼe tonu ke tou logoʼi ʼo ʼuhiga mo Sehova pea mo tana kautahi?

¹⁷ Ko te tuʼu ʼaeni ʼa Satana kua vave fakaʼauha pe. Kaʼe ke feala hatatou hao ai, ʼe tonu ke malohi tuʼumaʼu tatatou tui pea mo tou tauhi agatonu kia Sehova mo tana kautahi. Pea ʼe tou logoʼi te faʼahi ʼae neʼe logoʼi e Tavite ʼi tana hiva fenei: “Ko te meʼa e tahi neʼe au kole kia Sehova, ko te meʼa ʼaia ʼae ʼe au kumi anai: ke au nofo ʼi te fale ʼo Sehova ʼi te ʼaho fuli ʼo toku maʼuli, ke au sio ki te taulekaleka ʼo Sehova pea mo au mamata ʼaki he fakavikiviki ki tona fale lotu.” (Pes. 27:4, MN) Koia ʼofa pe ke tou nofo ovi kia Sehova pea mo tou haga haʼele tahi mo tana kautahi.