1. Kotea ʼae neʼe tuputupu ai te feʼofaʼofani ʼa Sesu pea mo tana Tamai?

NEʼE talanoa ia Sesu ki ʼana felogoʼi lelei ʼae mo tana Tamai ʼi tana ui fenei: “E au ofa i te Tamai” pea “e ofa te Tamai ki te Alo.” (Soa. 5:20; 14:31) ʼI muʼa ʼo te haʼu ʼa Sesu ki te kele, neʼe nā gaue fakatahi lolotoga ni lau ʼi miliona taʼu. (Taag. 8:30) Neʼe lahi ai te ako e Sesu ia te ʼu kalitate ʼo tana Tamai pea mo tuputupu ai tanā feʼofaʼofani.

2. (1) Kapau ʼe tou loto ke ʼofa mai te ʼAtua, pea kotea ʼae ʼe tonu ke tou fai? (2) Ko te ʼu fehuʼi fea ʼae ka tou vakaʼi anai?

² Neʼe hiva fenei ia Tavite: “E au ofa kia koe, [Sehova], toku malohi.” (Pes. 18:2) ʼE tonu mo tatou ke tou toe ʼofa feia ki te ʼAtua. ʼE ina fakapapau mai mo kapau ʼe tou fakalogo kia te Ia pea ʼe ina fakaha mai anai tona ʼofa kia tatou. (Lau ia Tetelonome 7:12, 13.) Kaʼe ʼe feafeaʼi hatatou ʼofa ki te ʼAtua logo la ʼe mole tou lava sisio kia te ia? Kotea te fakaʼuhiga ʼo te ʼofa kia Sehova? He ko ʼe ʼe tonu ke tou ʼofa kia te ia? Pea ʼe tou lava fakaha feafeaʼi ʼe tou ʼoʼofa ki te ʼAtua?

3, 4. He ko ʼe ʼe feala hatatou ʼoʼofa kia Sehova?

³ Ko “te Atua e Laumalie” koia ʼae ʼe mole feala ai hatatou sisio kia te ia. (Soa. 4:24) Kaʼe ʼe feala pe tatatou ʼofa kia Sehova. Koteʼuhi ʼi te Tohi-Tapu ʼe fakatotonu mai ai ke tou ʼoʼofa kia te ia. Ohage la, neʼe fakatotonu fenei e Moisese ki te kau Iselaele: “ʼE tonu ke ke ʼofa kia Sehova, tou ʼAtua, ʼaki tou loto katoa, pea mo tou maʼuli katoa, pea mo tou malohi katoa.”—Tet. 6:5, MN.

⁴ He ko ʼe ʼe feala hatatou ʼoʼofa ki te ʼAtua? Neʼe ina fakatupu tatou mo te loto ʼae ke tou atolasio age kia te ia. Pea neʼe ina toe foaki mai foki te fealagia ʼae ke tou fakaha te ʼofa. Moka tou ako pe ko ai ia Sehova, ʼe tuputupu ai totatou ʼofa ʼae kia te ia pea mo tou fiafia ai. Koia neʼe fakamahino ai e Sesu ʼe fiafia ia natou ʼae ʼe natou mahihino ki te ʼaoga ʼae kia natou te ʼu meʼa fakalaumalie ʼi tana ui fenei: “Manuia natou ae e masiva i te loto, koteuhi e fakalogo kia natou te puleaga o te atu lagi.” (Mat. 5:3) ʼI te tohi Man Does Not Stand Alone (ʼE Mole Feala Ke Nofo Tokotahi Te Tagata), neʼe talanoa ai te tagata ko A. C. Morrison ki te kumi tuʼumaʼu e te tagata ia te ʼAtua pea mo tana loto ʼae ke tui kia te ia. Ohage pe ko te tagata faitohi ʼaeni, ʼe iloʼi e te tokolahi neʼe tupu ake te tagata mo te loto ʼae ke ina iloʼi te ʼAtua.

5. ʼE tou iloʼi feafeaʼi ʼe tou lava maʼu ia te ʼAtua?

⁵ ʼE feala koa ke lava lelei hakita kumi te ʼAtua? ʼEi, koteʼuhi ʼe ina loto ke tou maʼu he ʼu felogoʼi lelei mo ia. Neʼe fakaha lelei te faʼahi ʼaia e te apositolo ko Paulo ʼi tana palalau ʼae ki te hahaʼi ʼo te kolo ʼafeā ko Atena. Maʼa te tokolahi ia natou ʼaia neʼe tonu ke natou atolasio ki te ʼatua fafine ko Atena ʼi he fale lotu. Kaʼe neʼe ui e te apositolo ko Paulo kia natou ʼe feala tanatou maʼu te ʼAtua moʼoni “ae nee ina fakatupu te malamanei mo mea fuli i ai.” Neʼe ina fakamahino ʼe mole nofo te ʼAtua ʼi ni fale lotu. ʼE feala ki te hahaʼi ʼae ʼe natou kumi ia te ʼAtua ke natou maʼu ia te ia ʼi he potu pe ʼe natou maʼuʼuli ai. Pea neʼe ina ui ko te ʼAtua “e mole mamao ia maia tatou takitahi.” (Gaue 17:24-27) ʼEi, ʼe feala ke maʼu e te hahaʼi ia te ʼAtua. Koteʼuhi ko te toko fitu miliona nima geau afe tupu kau Fakamoʼoni ʼa Sehova kua natou maʼu ia te ʼAtua pea ʼe natou ʼoʼofa moʼoni ia te ia.

6. Kotea ia “te ʼuluaki folafola pea mo lahi tokotahi”?

⁶ ʼE tonu ke feafeaʼi te malohi ʼo tatatou ʼofa ʼae kia Sehova? Neʼe fehuʼi fenei e te tagata Faliseo kia Sesu: “Faiako, ko te folafola fea ʼae ʼe lahi tokotahi ʼi te Lao?” Pea neʼe tali fenei leva ia Sesu ki ai: “ʼE tonu ke ke ʼofa kia Sehova, tou ʼAtua, ʼaki tou loto katoa, mo tou maʼuli katoa pea mo tou ʼatamai katoa. Koʼena te ʼuluaki folafola pea mo lahi tokotahi.”—Mat. 22:34-38, MN.

7. Kotea te fakaʼuhiga ʼo te ʼofa ʼae ki te ʼAtua ʼaki totatou (1) “loto katoa”? (2) “maʼuli katoa”? (3) “ʼatamai katoa”?

⁷ Kotea te fakaʼuhiga ʼo te ui ʼae e Sesu ʼe tonu ke tou ʼofa ki te ʼAtua ʼaki totatou “loto katoa,” mo totatou “maʼuli katoa” pea mo totatou “ʼatamai katoa”? ʼE fakaʼuhiga totatou “loto katoa” ki te ʼu meʼa ʼae ʼe tou logoʼi moʼoni pea mo te ʼu meʼa ʼe tou loto ki ai. Ko totatou “maʼuli katoa” ʼe fakaʼuhiga ia kia tatou totonu ʼo kau ai ia meʼa fuli ʼe tou fai. Pea ko tatatou “ʼatamai katoa” leva ʼe fakaʼuhiga ki ʼatatou faʼahiga manatu pea mo te ʼu meʼa ʼae ʼe tou fakakaukauʼi. Koia neʼe fakaha lelei ai e Sesu ʼe tonu ke katoa totatou ʼofa ʼae kia Sehova.

8. ʼE feafeaʼi hatatou fakaha ki te ʼAtua ʼe tou ʼoʼofa ia te ia?

⁸ Moka tou ako tuʼumaʼu ia te Tohi-Tapu, mo fai ia meʼa fuli ae ʼe kole mai e te ʼAtua, mo tala ʼaki he faʼafai ia te logo lelei ʼo te Puleʼaga, pea ʼe tou fakaha ai ki te ʼAtua ʼe tou ʼofa kia te ia ʼaki totatou loto katoa, mo totatou maʼuli katoa pea mo totatou ʼatamai katoa. (Mat. 24:14; Loma 12:1, 2) ʼAki tatatou fai te ʼu faʼahi ʼaia, ʼe liliu anai ʼatatou felogoʼi mo Sehova ʼo malohi age. (Sakp. 4:8) ʼE moʼoni ʼe mole feala hatatou talanoa ki te ʼu tupuʼaga fuli ʼae ke tou ʼoʼofa ai ki te ʼAtua kaʼe tou vakaʼi age muʼa ʼihi tupuʼaga.

9. He ko ʼe ʼe ke ʼofa ia Sehova?

⁹ Ko Sehova ʼe ko totatou Tupuʼaga pea ʼe  Ina Foaki mai ia meʼa fuli ʼe ʼaoga kia tatou. Neʼe ui fenei e te apositolo ko Paulo: “Ia te ia e tou mau ai te mauli, mo te gaugaue.” (Gaue 17:28) Neʼe foaki mai e Sehova ia he kele matalelei ke tou maʼuʼuli ai. (Pes. 115:16) Neʼe ina toe foaki mai foki mo te meʼa kai pea mo ʼihi atu meʼa ke feala ai hatatou maʼuʼuli. Koia neʼe feala ai ke ui e te apositolo ko Paulo ki te hahaʼi ʼo Lisitia ʼe tonu ke natou atolasio kia Sehova, ia “te Atua mauli,” kaʼe mole ki te ʼu fakatata. Neʼe ui e Paulo ko te ʼAtua neʼe ina “fai te u mea lelei, i tana foaki kia koutou mai te lagi te u ua mo te u temi mahu, i tana foaki atu kia koutou te meakai o lahi aupito, pea mo tana fakafonu koutou aki te fiafia.” (Gaue 14:15-17) ʼE ʼofa ia Sehova ia tatou ʼi tana foaki mai ia meʼa fuli ʼe ʼaoga kia tatou. Pea ʼe ko he tupuʼaga lelei ʼaia ke tou ʼoʼofa ai ki totatou Tupuʼaga Lahi.—Ekl. 12:3.

10. Kotea ʼae ʼe ke logoʼi ʼo ʼuhiga mo te sakilifisio faitotogi?

¹⁰ ʼE pulihi anai e te ʼAtua ia te agahala pea mo te mate ʼae neʼe tuku holo mai e Atama. (Loma 5:12) ʼE ui fenei ʼi te Tohi-Tapu: “E fakamooni mai e te Atua tona ofa kia tatou, o fenei, i te temi nee kei tou agahala ai, nee mate ia Kilisito o uhiga mo tatou.” (Loma 5:8) Kapau ʼe tou fakahemala moʼoni pea mo tui ki te sakilifisio faitotogi, pea ʼe fakamolemole anai e te ʼAtua ʼatatou agahala. Koia ʼe tou loto fakafetaʼi ai kia Sehova ʼi tana fekauʼi mai ia tona ʼAlo ke haʼu ʼo mate maʼa tatou ʼuhi ko te lahi ʼo tona ʼofa kia tatou.—Soa. 3:16.

11, 12. Ko te ʼu ʼamanaki fea ʼae ʼe foaki mai e Sehova?

¹¹ ʼE foaki mai e Sehova te ʼamanaki ʼo te maʼuli heʼe gata. (Loma 15:13) ʼE tokoni mai te ʼamanaki ʼaia ke tou ʼutakiʼi te ʼahiʼahiʼi ʼo tatatou tui. Ko te kau fakanofo agatonu ʼe natou ʼamanaki maʼuʼuli anai ʼo talu ai ʼi selo. (Apk. 2:10) Pea ko ʼihi atu kau agatonu ʼe natou ʼamanaki maʼuʼuli anai ʼo talu ai ʼi te Palatiso ʼi te kele. (Luka 23:43) Kotea ʼae ʼe tou logoʼi ʼo ʼuhiga mo tatatou ʼamanaki? ʼE tou fiafia lahi ai mo tou maʼu te tokalelei pea mo tou ʼofa ki te ʼAtua ʼae ʼe ina foaki mai “te u kalasia lelei fuli pea mo te u meaofa lelei tukupau fuli.”—Sakp. 1:17.

¹² ʼE foaki mai e Sehova ia te ʼamanaki ʼo te fakatuʼuake. (Gaue 24:15) ʼE tou lotomamahi ʼaupito moka mate he tahi ʼe tou ʼoʼofa ai. Kaʼe ʼe mole tou lotomamahi anai ohage ko natou “ae e mole natou mau he falala,” koteʼuhi ʼe fakapapau mai e Sehova ʼe ina fakatuʼuake anai te kau mate. (1 Tes. 4:13) Pea ʼe fakaʼamu ia Sehova ʼAtua ke hoko mai la te ʼaho ʼaia. Koteʼuhi ʼe loto ia ke ina fakatuʼuake te toko lau ʼi miliona hahaʼi kaʼe tafitō te kau agatonu. (Sopo 14:15) Tou fakakaukauʼi age muʼa te faʼahi ʼae ka tou logoʼi moka tou mamata anai ki te toe felaveʼi ʼa te ʼu fanau mo ʼanatou matuʼā pea mo te toe felaveʼi ʼo ni kaumeʼa lelei. Neʼe fakakaukauʼi e Sehova ia te fakatuʼuake mo ina fakapapauʼi pea ʼe ina fakahoko anai. Pea ʼuhi ko te fakapapau taulekaleka ʼaia ʼa Sehova koia ʼae ʼe lahi ai totatou ʼofa ʼae kia te ia.

13. ʼE feafeaʼi hatatou iloʼi ʼe tokaga moʼoni te ʼAtua kia tatou?

¹³ ʼE tokaga moʼoni ia Sehova kia tatou. (Lau ia Pesalemo 34:7, 19, 20; 1 Petelo 5:6, 7.) Ia ʼaho nei ʼe feala hatatou maʼuʼuli fimalie koteʼuhi ʼe tou iloʼi ʼe fia tokoni tuʼumaʼu ia Sehova kia natou ʼae ʼe nonofo agatonu kia te ia. (Pes. 79:13) Kaʼe fakafuafua age muʼa te ʼu faʼahi ʼae ka fai anai e te ʼAtua maʼa tatou ʼi te ka haʼu. Ko te Hau ʼo te Puleʼaga ʼo te ʼAtua, ia Sesu, ʼe ina pulihi anai te agamalohi pea mo te agakovi ʼi te kele. Pea ʼe foaki anai e te ʼAtua ki te tagata talagafua fuli ia te tokalelei pea mo meʼa fuli ʼe ʼaoga ke natou maʼuʼuli fiafia ai. (Pes. 72:7, 12-14, 16) Koia moka tou metitasio ki te ʼu fakapapau ʼaia, pea ʼe uga ai tatou ke tou ʼofa ki totatou ʼAtua ʼaki totatou loto katoa, mo totatou maʼuli katoa, mo totatou malohi katoa pea mo totatou ʼatamai katoa.—Luka 10:27.

14. Kotea te pilivilesio lahi ʼae ʼe foaki mai e te ʼAtua?

¹⁴ ʼE foaki mai e Sehova te pilivilesio lahi ʼae ke tou liliu ko ʼana Fakamoʼoni. (Esa. 43: 10-12) ʼE tou ʼoʼofa ki te ʼAtua koteʼuhi ʼe ina foaki mai te fealagia ʼae ke tou lagolago ki tona Puleʼaga pea mo fakaha tatatou ʼamanaki ki te hahaʼi fuli ʼae ʼe lotomamahi. Pea ʼe tou maʼu te tui mo te falala ʼae ʼe ʼaoga moʼo fakamafola te logo lelei ki te hahaʼi. He ko ʼe koa ʼe tou maʼu te falala ʼaia? Koteʼuhi ko te logo lelei ʼae ʼe tou tala ʼe haʼu mai te Folafola ʼa te ʼAtua, ia te Tohi-Tapu pea ʼe hoko tuʼumaʼu ʼana fakapapau. (Lau ia Sosue 21:45; 23:14.) Koia ʼe lahi te ʼu tupuʼaga ke tou ʼofa ai kia Sehova. Kaʼe ʼe tou fakaha feafeaʼi tatatou ʼofa ki te ʼAtua?

15. ʼE tokoni feafeaʼi mai ia te ako pea mo te maʼuliʼi ʼo te Folafola ʼa te ʼAtua?

¹⁵ Tou ako tuʼumaʼu pea mo maʼuliʼi ia te Folafola ʼa te ʼAtua. ʼI tatatou fai te ʼu faʼahi ʼaia, ʼe tou fakaha ai ʼe tou ʼofa ia Sehova pea mo tou loto moʼoni ke takitaki tatou e tana Folafola. (Pes. 119:105) Moka tou lotomamahi, pea ʼe feala ke tou fimalie ʼaki te ʼu fakapapau ʼofa ʼaeni: “Oi Atua! E mole ke siaki he loto fasifasi mo fakahemala.” Pea “ko tou agalelei, oi [Sehova], e ina taofi au. Kapau e lahi te u tuania ia au o hage e hahai kaugamalie, ko au fakapelepele e natou fakafiafiai toku laumalie.” (Pes. 51:19; 94:18, 19) Pea ko Sehova mo Sesu ʼe nā lotomanavaʼofa kia natou fuli ʼae ʼe lotomamahi. (Esa. 49:13; Mat. 15:32) Kapau ʼe tou ako ia te Tohi-Tapu, pea ʼe feala ai ke tou mahino ki te ʼofa ʼa Sehova kia tatou. Pea ʼe malohi ai totatou ʼofa ʼae kia te ia.

16. Ko te faikole tuʼumaʼu ki te ʼAtua ʼe ina lava fakamalohiʼi feafeaʼi tatatou ʼofa ʼae kia te ia?

¹⁶ Tou faikole tuʼumaʼu ki te ʼAtua. Moka tou faikole ki te ʼAtua mo tou tokagaʼi ʼe ina tali mai, ʼe tuputupu ai tatatou ʼofa ʼae kia te ia. (Pes. 65:3) Ohage la, neʼe lagi hoko ni fihifihia kaʼe neʼe tou sisio ai ʼe mole fakagafua e te ʼAtua ke fakahalaʼi tatou ʼo laka age ʼi te meʼa ʼae ʼe tou lava tali. (1 Ko. 10:13) Kapau ʼe tou faikole mamahi ki te ʼAtua ʼi te ʼu temi ʼae ʼe tou lotohoha ai, pea ʼe tou maʼu ai anai “te tokalelei o te Atua.” Ko Sehova pe ʼae ʼe ina lava foaki mai te fimalie ʼaia. (Filp. 4:6, 7) ʼI ʼihi temi ʼe tou fai anai he kole fakalogologo ohage ko Neemia pea ʼe tou mahino anai ki ʼamuli neʼe tali e Sehova tatatou kole. (Nee. 2:1-6) Kapau ʼe tou faikole tuʼumaʼu pea mo tou sio ʼe tali ia Sehova ki ʼatatatou kole, pea ʼe tuputupu ai anai tatatou ʼofa ʼae kia te ia. Pea moka  ʼahiʼahiʼi tatatou tui, ʼe tou iloʼi papau anai ʼe tokoni mai anai ia Sehova ke tou ʼutakiʼi.—Loma 12:12.

17. Kapau ʼe tou ʼofa ki te ʼAtua, ʼe tonu ke feafeaʼi tatatou faʼahiga manatu ki te ʼu fono?

¹⁷ Tou kau tuʼumaʼu ki te ʼu fono pea mo te ʼu fakatahi lalahi. (Hep. 10:24, 25) Neʼe fakatahiʼi te kau Iselaele ke natou fagono ki te Lao pea ke natou iloʼi ai ia Sehova. Pea neʼe feala leva hanatou atolasio mo fakaʼapaʼapa kia te ia pea mo mulimuli ki tana Lao. (Tet. 31:12) Kapau ʼe tou ʼofa moʼoni kia Sehova, ʼe tou kau tuʼumaʼu anai ki te ʼu fono. (Lau ia 1 Soane 5:3.) Koia tou faiga malohi ke tou kau ki te ʼu fono fuli. ʼE mole tou loto anai ke puli tatatou ʼofa kia Sehova ʼae neʼe tou maʼu mai te kamataʼaga.—Apk. 2:4.

18. Kotea ʼae ʼe uga e totatou ʼofa ki te ʼAtua ke tou fai?

¹⁸ Tou fakamafola te moʼoni ʼaki he faʼafai. (Kal. 2:5) ʼUhi ko tatatou ʼofa ki te ʼAtua, ʼe tou fia palalau ʼo ʼuhiga mo tona Puleʼaga. ʼI Halamaketone ko Sesu, te Hau ʼae neʼe fakanofo e te ʼAtua, ʼe ina fakalakatonuʼi anai te ʼuhiga pule ʼo Sehova. (Pes. 45:5; Apk. 16:14, 16) Ko he meʼa fakafiafia hatatou tokoni ki te hahaʼi ke natou mahino ki te ʼofa ʼo te ʼAtua pea mo tana fakapapau ʼo ʼuhiga mo te malama foʼou.—Mat. 28:19, 20.

19. He ko ʼe ʼe tonu ke tou loto fakafetaʼi ʼo ʼuhiga mo te kau tagata ʼafeā?

¹⁹ Tou fakaha tatatou loto fakafetaʼi ʼo ʼuhiga mo te kau tagata ʼafeā. (Gaue 20:28) ʼE fua lelei te ʼu fakatuʼutuʼu fuli ʼa Sehova maʼa tatou koia ʼae neʼe ina foaki mai ai te ʼu tagata ʼafeā. Koteʼuhi ʼe natou hage “ko he nonoaga i te matagi, ko he holaaga i te afa, ko ni vaitafe i he fenua moamoa, ko te malu i he utu lahi i he kolo kele magemage.” (Esa. 32:1, 2) Tou fakakaukauʼi age muʼa tatatou fimalie ʼi tatatou maʼu he nonoʼaga moka lalahi te matagi peʼe ko te ʼua peʼe moka vevela fau. ʼE toe feia pe mo te kau tagata ʼafeā, he ʼe natou foaki mai te ʼu tokoni mo te ʼu fakalotomalohi ʼae ʼe ʼaoga kia tatou ke tou haga tauhi kia Sehova logo la te ʼu fihifihia ʼae ʼe tou tau mo ia. He ko ʼe ʼe tou fakalogo ki te kau tagata ʼafeā? Koteʼuhi ʼe tou loto fakafetaʼi ki te ʼu “meaofa” ʼaia ko ni tagata pea ʼe tou ʼoʼofa kia Sehova pea mo Kilisito, te Pule ʼo te kokelekasio.—Efe. 4:8; 5:23; Hep. 13:17.

20. Kotea ʼae ka ke fai anai moka ʼe ke ʼofa ki te ʼAtua?

²⁰ Neʼe foaki mai e Sehova te “lao haohaoa” ʼae ʼe tou maʼu ai te ʼu faʼahi fuli ʼae ʼe fakamaʼua mai e te ʼAtua. (Lau ia Sakopo 1:22-25.) Kapau ʼe tou loto ke malohi ʼatatou felogoʼi mo Sehova, pea ʼe mole gata pe ki tatatou fagono kia te ia. (Pes. 19:8-12) Kaʼe ʼe tonu ke tou maʼuliʼi te ʼu faʼahi ʼae ʼe tou ako. Ohage la, ʼuhi ko tatatou ʼofa ki te ʼAtua, ʼe tou faifakamafola anai ʼaki he faʼafai pea ʼe tou faiga anai ke tou fai hatatou ʼu tali ʼi te ʼu fono.

21. Kotea ʼae ʼe feala ke ke fakatatau ki ai ʼau faikole fakamalotoloto?

²¹ ʼE tou faikole tuʼumaʼu kia Sehova ʼuhi ko tatatou ʼofa ʼae kia te ia. ʼI Iselaele ko te kau pelepitelo neʼe natou tutu te iseso maʼa Sehova ʼi te ʼaho fuli. Ko te Hau ko Tavite neʼe ina fakatatau ʼana faikole ki te iseso ʼi tana hiva fenei: “Ke hage taku kole i ou mua [Sehova] ko te iseso, pea ke hage oku nima ae e falo atu kia koe ko te molaga o te afiafi!” (Pes. 141:2; Eke. 30:7, 8) Pea neʼe fagono ia Sehova ki te ʼu faikole ʼa Tavite. Koia kapau ʼe tou agavaivai, mo fakamalotoloto pea mo loto fakafetaʼi moka tou faikole, pea ʼe toe hage anai ʼatatou faikole ko te iseso pea mo leleiʼia anai e Sehova.—Apk. 5:8.

22. Kotea ka tou vakaʼi anai ʼi te alatike ka hoa mai?

²² Neʼe ui e Sesu ʼe tonu ke tou ʼofa ki te ʼAtua pea mo ʼotatou tatau. (Mat. 22:37-39, MN) Moka tou ʼoʼofa kia Sehova pea mo ʼana pelesepeto, pea ʼe feala ai anai ke tou ʼofa ki ʼotatou tatau. ʼE tou vakaʼi anai ia te fakaʼuhiga ʼo te ʼofa ʼae ki ʼotatou tatau ʼi te alatike ka hoa mai.