1, 2. (1) Ko te ʼu lea fakatata fea ʼae neʼe talanoa kiai ia Sesu mo ʼona kaumeʼa lelei? (Vakaʼi te ʼuluaki pāki.) (2) He koʼe ʼe tonu ke tou mahino ki te lea fakatata ʼo te ʼu ovi mo te ʼu tao?

NEʼE felogoʼi ia Sesu mo ʼona kaumeʼa lelei ko Petelo, mo Atelea, mo Sakopo pea mo Soane ʼo ʼuhiga mo he manatu maʼuhiga. ʼI te hili ʼo tana felogoʼi mo natou ʼo ʼuhiga mo te lea fakatata ʼo te tagata faifekau agatonu mo poto, mo te ʼu taupoʼou ʼe toko hogofulu, pea mo te ʼu foʼi taleta, neʼe palalau Sesu ki ʼona kaumeʼa ʼo ʼuhiga mo te tahi lea fakatata. ʼI te lea fakatata ʼaia, neʼe palalau ai ʼo ʼuhiga mo te temi ʼae ʼe haʼu ai anai te “Foha o te tagata” ʼo fakamauʼi “te atu puleaga fuli.” Neʼe ina ui ko te “Foha o te tagata” ʼe ina vaeluaʼi anai te hahaʼi kia kutuga ʼe lua, ʼo ina fakahigoaʼi ko te ʼu ovi pea mo te ʼu tao. Pea neʼe toe talanoa ki te tahi age kutuga ʼe maʼuhiga age ia, ʼe ko “te ʼu tehina” ʼo te Hau.—Lau ia Mateo 25:31-46.

² Ohage ko te kau apositolo, ko te ʼu kaugana ʼa Sehova ʼo  te temi nei ʼe natou fia mahino ki te lea fakatata ʼaia, koteʼuhi ʼe fakalogo ki ai te maʼuli ʼo te hahaʼi. Neʼe ui e Sesu ko ʼihi ʼe natou maʼu anai te maʼuli heʼe gata kaʼe ko ʼihi ʼe fakaʼauha anai natou. Koia ʼe maʼuhiga ai ke tou mahino ki te lea fakatata ʼaia pea mo iloʼi te meʼa ʼae ʼe tonu ke tou fai ke tou maʼu ai te maʼuli heʼe gata. Koia ʼi te alatike ʼaeni ʼe tou tali anai ki te ʼu fehuʼi ʼaeni: Neʼe tokoni feafeaʼi mai ia Sehova ke tou mahino ki te lea fakatata ʼaia? ʼE tou mahino feafeaʼi ki te fakamaʼuhigaʼi e te lea fakatata ʼaia ia te gaue faifakamafola? Ko ai neʼe fakatotonu kiai ke olo ʼo faifakamafola? Pea he koʼe ʼe maʼuhiga ki te hahaʼi ke natou agatonu ʼi te temi nei ki “te Hau” pea mo ʼona “tehina”?

3, 4. (1) Kotea ʼae ʼe tonu ke tou iloʼi ke tou mahino ki te lea fakatata ʼaia? (2) ʼI te taʼu 1881, kotea ʼae neʼe fakamahino ʼi Te Tule Leʼo ʼo ʼuhiga mo te lea fakatata ʼaia?

³ Ke tou mahino ki te lea fakatata ʼo te ʼu ovi mo te ʼu tao, ʼe ʼaoga ke tou iloʼi (1) pe ko ai “te Foha o te tagata,” peʼe ko “te Hau,” mo te ʼu ovi mo te ʼu tao, pea mo te ʼu “tehina” ʼo te Hau. (2) pe ko te temi fea ʼae ʼe vaeluaʼi ai, peʼe fakamauʼi ai e “te Foha o te tagata” ia te ʼu ovi mo te ʼu tao? pea (3) he koʼe ʼe fakahigoaʼi ʼihi ko te ʼu ovi kaʼe ko ʼihi ko te ʼu tao?

⁴ ʼI te taʼu 1881, neʼe ui ʼi Te Tule Leʼo ko “te Foha o te tagata” peʼe ko te Hau ʼe ko Sesu. Pea ʼe fakamahino ai ko te ʼu “tehina” ʼo te Hau ʼe mole ko natou pe ka hau fakatahi anai mo Sesu ʼi te lagi, kaʼe ʼe toe fakatahiʼi kiai mo natou ʼae ka maʼuʼuli haohaoa anai ʼi te kele. Neʼe toe ui ʼi Te Tule Leʼo ʼe vaheʼi te hahaʼi ʼi te temi ʼo te ʼAfio ʼa Kilisito Lolotoga Taʼu ʼe Afe pea ko natou ʼae neʼe natou faʼifaʼitakiʼi te ʼofa ʼo te ʼAtua ʼi te ʼu aluʼaga fuli neʼe fakahigoaʼi natou ko te ʼu ovi.

5. ʼI te taʼu 1923, neʼe mahino feafeaʼi te hahaʼi ʼa te ʼAtua ki te lea fakatata?

⁵ Ki muli age, neʼe tokoni Sehova ki tana hahaʼi ke natou mahino lelei age ki te lea fakatata ʼaia? ʼI te taʼu 1923, neʼe ui ʼi Te Tule Leʼo ko “te Foha o te tagata” ʼe ko Sesu, pea mo fakaʼaoga ni vaega Tohi-Tapu moʼo fakamahino ko te ʼu “tehina” ʼo te lea fakatata ʼe fakaʼuhiga pe ia kia natou ʼae ka hau fakatahi anai mo Sesu pea ʼe fakatahiʼi anai ia natou fuli ki selo lolotoga te ʼu Taʼu ʼe Afe. Neʼe toe ui ai ko te ʼu ovi ʼe ko natou ʼae ka maʼuʼuli anai ʼi te kele lolotoga te ʼafio ʼa Sesu mo ʼona tehina. Pea ʼe ko natou ʼaia ʼae ka tokoni anai ki te ʼu tehina ʼo te Hau, ki te vaheʼi peʼe ko te fakamau ʼae ka hoko anai lolotoga te kei maʼuʼuli ʼo te ʼu tehina fakanofo ʼo Sesu ʼi te kele, ʼi muʼa ʼo te kamata ʼo te ʼu Taʼu ʼe Afe. Neʼe toe ui ʼi te alatike, ko te ʼu ovi ʼe ko natou ʼae ʼe tui kia Sesu pea mo falala ʼe ko te Puleʼaga ʼae ka ina foaki mai anai he maʼuli ʼe lelei age.

6. ʼI te taʼu 1995, neʼe fetogi feafeaʼi tatatou mahino ki te lea fakatata?

⁶ Lolotoga ni taʼu, neʼe tou manatu neʼe fakamauʼi te hahaʼi ʼaki te gaue faifakamafola ʼi te temi ʼo te fakaʼosi. Kapau ʼe natou tali te logo neʼe ko te ʼu ovi ia, pea kapau neʼe natou fakafisi ki te logo neʼe ko te ʼu tao ia. Kaʼe neʼe fetogi leva tatatou mahino ʼi te taʼu 1995. ʼI Te Tule Leʼo, neʼe fakatatau ia Mateo 24:29-31 (lau) pea mo Mateo 25:31, 32 (lau), pea neʼe fakamahino ai ko Sesu ʼe ina fakamauʼi anai te hahaʼi lolotoga ia te mamahi lahi, ʼi te temi ʼae ka haʼu  ai anai te Foha o te tagata ʼi tona kololia. *—Vakaʼi te kiʼi nota.

7. Kotea te fakaʼuhiga ʼo te lea fakatata?

⁷ Ia ʼaho nei, kua tou mahino lelei age ki te lea fakatata ʼo te ʼu ovi mo te ʼu tao. ʼE tou iloʼi ko “te Foha o te tagata,” pe ko “te Hau” ʼe ko Sesu. Ko te ʼu “tehina” ʼo te Hau ʼe ko natou ʼae neʼe fakanofo e te laumalie maʼoniʼoni pea ʼe natou hau fakatahi anai mo Sesu ʼi te lagi. (Loma 8:16, 17) Ko te ʼu “ovi” mo te ʼu “tao” ʼe ko te hahaʼi mai te ʼu puleʼaga fuli. ʼE fakamauʼi anai natou ʼi te vave fakaʼosi ʼo te mamahi lahi ʼae kua vave hoko. Pea ʼe tou iloʼi ʼe fakamauʼi anai e Sesu ia te hahaʼi ʼo mulimuli ki tanatou aga ki te kau fakanofo ʼae ʼe kei maʼuʼuli ʼi te kele.ʼE tou fakafetaʼi lahi ki te tokoni mai ʼa Sehova ke tou mahino ki te lea fakatata ʼaia pea mo ʼihi atu lea fakatata ʼi te kapite 24 mo te 25 ʼo te tohi ʼo Mateo.

8, 9. He koʼe ʼe ui e Sesu ko te ʼu ovi ʼe natou “agatonu”?

⁸ Neʼe mole fakaʼaogaʼi e Sesu ia te kupu “faifakamafola” peʼe ko te “gaue faifakamafola” ʼi te lea fakatata ʼo te ʼu ovi mo te ʼu tao. ʼE tou iloʼi feafeaʼi ʼe akoʼi mai ʼi te lea fakatata ia te maʼuhiga ʼo te gaue faifakamafola?

⁹ Ke maʼu tona tali, ʼe tonu muʼa ke tou manatuʼi neʼe foaki mai e Sesu he ako mai te ʼu lea fakatata ʼaia. Neʼe mole talanoa ia ki he ʼu ovi mo he ʼu tao moʼoni. ʼO toe feia pe, neʼe mole ina ui ia ko he ovi ʼe maʼua ia ke ina foaki he meʼa kai mo he meʼa laofi ki te kau fakanofo, mo ʼaʼahi natou moka natou mahahaki peʼe ʼi te ʼu fale pilisoni. Kailoa, neʼe talanoa ia Sesu ki te ʼu ovi ʼe “agatonu” koteʼuhi ʼe natou fakamoʼoni ko te kau fakanofo ʼe ko te ʼu tehina ʼo Kilisito pea koteʼuhi ʼe natou agatonu kia natou lolotoga te ʼu ʼaho fakamuli faigataʼa ʼaeni.—Mateo 10:40-42; 25:40, 46; 2 Timoteo 3:1-5.

10. ʼE feala ke tokoni feafeaʼi te ʼu ovi ki te ʼu tehina ʼo Kilisito?

¹⁰ ʼI tana talanoa ki te lea fakatata ʼo te ʼu ovi mo te ʼu tao, neʼe toe palalau ia Sesu ki te meʼa ʼae ka hoko anai ʼi te temi fakaʼosi. (Mateo 24:3) Ohage la, neʼe ina ui fenei: “E fakamafola anai te logo lelei aeni o te puleaga i te malamanei katoa.” (Mateo 24:14) Pea ʼi te hili pe ʼo tana palalau ʼo ʼuhiga mo te ʼu ovi mo te ʼu tao, neʼe talanoa leva ia ki te lea fakatata ʼo te ʼu foʼi taleta. Neʼe ina foaki te lea fakatata ʼaia ko he ako ki te kau fakanofo ke natou faʼa fai ʼi te gaue faifakamafola. Kaʼe ʼe mole kei natou hahaʼi ʼi te kele pea ko te gaue ʼe lahi ʼaupito. Neʼe tonu ke fakamafola e te kau fakanofo “ki te u puleaga fuli” ʼi muʼa ʼo te hoko mai te fakaʼosi. Ohage ko te ako neʼe tou maʼu mai te lea fakatata ʼo te ʼu ovi mo te ʼu tao, ʼe tokoni te ʼu “ovi” ki te ʼu tehina  ʼo Sesu. Pea ko te faʼahi maʼuhiga ʼae ʼe feala ke natou fai ʼe ko te tokoni ki te ʼu tehina ʼo Sesu ʼi te gaue faifakamafola. Kaʼe ʼe gata pe anai koa ʼaki te fakapaʼaga ʼo te gaue peʼe ko te fakalotomalohiʼi ʼo natou ʼaia ke natou fakahoko te gaue faifakamafola?

11. Kotea te fehuʼi ʼe feala ke fai ʼe ʼihi? Pea kotea tona tupuʼaga?

¹¹ Ia ʼaho nei, ʼe ko te toko valu miliona ia te ʼu tisipulo ʼa Sesu pea tokolahi ia natou ʼe mole ko he kau fakanofo. Neʼe mole foaki Sesu he ʼu foʼi taleta kia natou. Neʼe ina foaki te ʼu foʼi taleta ki ʼona tehina fakanofo. (Mateo 25:14-18) Koia ʼe fai ai e ʼihi te fehuʼi ʼaeni, ‘Kapau la neʼe mole foaki e Sesu he ʼu foʼi taleta kia natou ʼaia, pea ʼe tonu koa ke natou olo ʼo faifakamafola?ʼ ʼEi. Tou vakaʼi tona tupuʼaga.

12. Kotea te ako ʼe tou maʼu mai te ʼu folafola ʼa Sesu ia Mateo 28:19, 20?

¹² Neʼe fakatotonu e Sesu ki ʼana tisipulo fuli ke natou faifakamafola. ʼI te hili ʼo te fakatuʼuake ʼo Sesu, neʼe ina ui ki ʼana tisipulo ke natou “fai ni tisipulo” pea mo akoʼi age “te u mea fuli” ʼae neʼe ina fakatotonu. Koia neʼe toe fakamaʼua ki te ʼu tisipulo ʼaia ke natou fakalogo ki te fakatotonu ʼa Sesu ke natou faifakamafola. (Lau ia Mateo 28:19, 20.) Kua mahino mai leva ʼe ko tatou fuli ʼae ʼe tonu ke faifakamafola, tatau aipe peʼe tou maʼu te ʼamanaki ki te maʼuli ʼi selo peʼe ʼi te kele.—Gaue 10:42.

13. Kotea te ako ʼe tou maʼu mai te meʼa ʼae neʼe sio kiai ia Soane?

¹³ ʼI te tohi ʼo Apokalipisi, ʼe tou ako ai ʼe fakahoko te gaue faifakamafola e te kau fakanofo pea mo ʼihi atu. Neʼe fakafealagia e Sesu kia Soane ke sio ki he “fafine ohoana” ʼe ina fakaafe te hahaʼi ke natou omai ʼo ʼiʼinu ʼi te vai ʼo te maʼuli. Ko te fafine ʼohoana ʼaia ʼe ko te toko 144 000 ʼae ka hau fakatahi anai mo Sesu ʼi te lagi. (Apokalipisi 14:1, 3; 22:17) Ko te vai ʼe fakaʼuhiga ki te sakilifisio faitotogi ʼo Sesu ʼae neʼe ina fakafealagia ki te hahaʼi ke natou maʼu ia he maʼuli ʼe puli ai te agahala mo te mate. (Mateo 20:28; Soane 3:16; 1 Soane 4:9, 10) ʼAki te faʼa fai, ʼe akoʼi e te kau fakanofo ia te hahaʼi ʼo ʼuhiga mo te totogi pea mo te faʼahi ʼae ʼe tonu ke natou fai ke natou maʼu tapuakina ai. (1 Kolinito 1:23) Neʼe sio ia Soane ki te tahi kiʼi kutuga ʼe mole ko he kau fakanofo kaʼe ʼe natou maʼu te ʼamanaki ki te maʼuli ʼi te kele. Neʼe toe fakatotonu age ke natou ui fenei ki te hahaʼi: “Hau.” Pea ʼe natou fakalogo ki te fakatotonu ʼae ke natou akoʼi ki te hahaʼi ia te logo lelei. Koia ʼe fakaha mai e te meʼa ʼae neʼe sio ki ai ia Soane ʼe ko natou fuli ʼae ʼe natou tali te logo lelei ʼae ʼe tonu ke faifakamafola.

14. ʼE tou fakalogo feafeaʼi ki te “lao a Kilisito”?

¹⁴ ʼE tonu ke faifakamafola ia natou fuli ʼae ʼe fakalogo ki “te lao a Kilisito.” (Kalate 6:2) ʼE fakaʼamu ia Sehova ke fakalogo tana kau atolasio fuli ki he lao ʼe tahi. ʼI te temi muʼa, neʼe loto ia ke fakalogo te  kau Iselaele pea mo te ʼu matapule ʼae ʼe maʼuʼuli mo natou ki tana lao. (Ekesote 12:49; Levitiko 24:22) ʼE moʼoni, ia ʼaho nei ʼe mole kei ʼaoga ke tou fakalogo ki te ʼu lao fuli ʼae neʼe foaki ki te kau Iselaele. Kaʼe tatau aipe peʼe tou kau ʼi te kau fakanofo peʼe kailoa, ʼe tonu ke tou fakalogo fuli ki “te lao a Kilisito.” Ko te faʼahi maʼuhiga tafitō ʼae neʼe akoʼi mai e Sesu kia tatou ʼe ko te ʼofa. (Soane 13:35; Sakopo 2:8) ʼE tonu ke tou ʼofa kia Sehova, mo Sesu pea mo te hahaʼi. Pea ko te aluʼaga lelei ʼae ʼe tou fakaha ai te ʼofa ʼaia ʼe ko te tala te logo lelei ʼo te Puleʼaga ki te hahaʼi.—Soane 15:10; Gaue 1:8.

15. He koʼe ʼe tou ui neʼe fakatotonu e Sesu ki tana kau tisipulo fuli ke natou faifakamafola?

¹⁵ ʼI ʼihi temi, ko he folafola neʼe fai e Sesu ki he toko siʼi ʼo tana kau tisipulo ʼe feala ke fakaʼuhiga ki ʼana tisipulo fuli. Ohage la, neʼe fakatuʼutuʼu e Sesu ia he fuakava mo te foʼi toko 11 pe ʼo tana kau tisipulo pea mo fakapapauʼi age ʼe natou hau anai ʼi tona Puleʼaga. Kaʼe ʼe ko te foʼi toko 144 000 ʼae ka hau anai mo ia. (Luka 22:29, 30; Apokalipisi 5:10; 7:4-8) ʼI te hili ʼo te fakatuʼuake ʼo Sesu, neʼe ko te toko siʼi ʼo tana kau tisipulo ʼae neʼe logo ki te fakatotonu ʼae ki te faifakamafola. (Gaue 10:40-42; 1 Kolinito 15:6) Kaʼe neʼe ko te ʼu tisipulo fuli ʼa Sesu ʼo te temi ʼo te kau apositolo ʼae neʼe fakalogo ki tana fakatotonu. (Gaue 8:4; 1 Petelo 1:8) Ia ʼaho nei, mo tatou foki ʼe tou iloʼi ʼe tonu ke tou faifakamafola, logola neʼe mole tou logo ki te leʼo ʼo Sesu ʼe ina ui mai ke tou fai te gaue ʼaia.  ʼI tona fakahaga tonu, ʼe ko te toko valu miliona ʼo tatou ʼae ʼe kau ki te gaue faifakamafola. ʼE tou iloʼi ʼaki tatatou fakahoko ia te faifakamafola, ʼe tou fakaha ai tatatou tui moʼoni kia Sesu.—Sakopo 2:18.

16-18. ʼE tou lava tokoni feafeaʼi ki te ʼu tehina ʼo Kilisito? He koʼe ʼe tonu ke tou fai te faʼahi ʼaia ʼi te temi nei?

¹⁶ ʼE ʼasilisili te tauʼi e Satana ia te ʼu tehina fakanofo ʼo Sesu ʼae ʼe kei ʼi te kele, pea ʼe ina iloʼi “kua nounou pe tona temi.” (Apokalipisi 12:9, 12, 17) Logola te ʼu fakafeagai ʼa Satana, kaʼe ʼe hoko atu aipe e te kau fakanofo ia tanatou takitaki te gaue faifakamafola, ʼo lahi age ʼi muʼa atu ia te hahaʼi ʼe natou tali te logo lelei. ʼE ha mai ai, ʼe nofo ia Sesu mo te kau fakanofo, pea mo ina takitaki ia natou.—Mateo 28:20.

¹⁷ Ko he toe pilivilesio, ia te tokoni ki te ʼu tehina ʼo Kilisito ʼi te faifakamafola. ʼE tou toe tokoni kia natou ʼaki ʼatatou meʼa ʼofa pea mo tatatou faʼa fai ʼi te laga ʼo ʼatatou Fale Fono, mo ʼatatou Fale Fakatahi Lalahi pea mo ʼatatou Filiale. Ka tou talagafua ki te ʼu tagata ʼafeā pea mo te ʼu tehina ʼae neʼe hinoʼi e te “tagata faifekau agatonu mo poto,” ʼe tou fakaha ai ʼe tou lagolago ki te ʼu tehina ʼo Kilisito.—Mateo 24:45-47; Hepeleo 13:17.

¹⁸ Kua vave pe anai te maʼu e te toega ʼo te kau fakanofo ia tonatou fakaʼiloga fakaʼosi. Pea ʼe tuku age anai e te ʼu ʼaselo “te u matagi e fa o te kele,” pea mo kamata ai leva ia te mamahi lahi. (Apokalipisi 7:1-3) ʼI muʼa ʼo te kamata ʼo Halamaketone, ʼe toʼo e Sesu ia te kau fakanofo ki selo. (Mateo 13:41-43) Koia kapau ʼe tou loto ke vaheʼi tatou ko ni ovi, pea ʼe ko te temi nei ʼae ʼe tonu ai ke tou agatonu ki te ʼu tehina ʼo Kilisito.