ʼI Te Tule Leʼo ʼo te ʼaho 15 ʼo Sepetepeli 1950 (Fakapilitania), neʼe fakamahino ai ko he tahi, peʼe ko he aluʼaga peʼe ko he meʼa ʼi te Tohi-Tapu ʼe ina fakata he aluʼaga ʼe lahi age ʼi te ka haʼu.

ʼI te temi muʼa, neʼe talanoa ʼi ʼatatou tohi ki he ʼu tagata mo he ʼu fafine agatonu neʼe ko he ʼu fakata, ohage ko Tepola, mo Eliu, mo Sefete, mo Sopo, mo Laape, mo Lepeka pea mo ʼihi atu ʼae neʼe natou fakata ia te kau fakanofo peʼe ko “he hahai kaugamalie osi.” (Apokalipisi 7:9) Ohage la, neʼe ui ko Sefete, mo Sopo pea mo Lepeka neʼe natou fakata ia te kau fakanofo pea ko Tepola mo Laape neʼe nā fakata ia “he hahai kaugamalie osi.” Koia, ʼi te ʼu taʼu ʼaeni kua hili neʼe mole toe fai ia te faʼahi ʼaia. Kotea tona tupuʼaga?

ʼE akoʼi ʼi te Tohi-Tapu, ko te ʼu hahaʼi ʼae ʼe talanoa ki ai te Tohi-Tapu ʼe ko he ʼu fakata ʼae ʼe natou fakata he aluʼaga ʼe lahi age ʼi te ka haʼu. Ohage la, ia Kalate 4:21-31 ʼe talanoa ai te apositolo ko Paulo ki ‘te u fakata’ ʼae ʼe kau ai he ʼu fafine ʼe toko lua. Ko te ʼuluaki fafine e ko Akale, ia te fafine kaugana ʼa Apalahamo. ʼE fakamahino e Paulo ʼe ina fakata ia te puleʼaga ʼo Iselaele ʼae neʼe haʼi kia Sehova ʼaki ia te Lao ʼa Moisese. Ko te lua fafine, ʼe ko te “fafine ateaina,” ia te ʼohoana ʼo Apalahamo. ʼE ina fakata ia te ʼohoana ʼo te ʼAtua ʼae ko te koga ʼo te kautahi ʼa te ʼAtua ʼi selo. ʼE toe talanoa ia Paulo ki he ʼu faʼahi neʼe tatau ai ia te hau-pelepitelo ko Melekiseteke pea mo Sesu. (Hepeleo 6:20; 7:1-3) Pea tahi, neʼe fakatatau e Paulo ia te polofeta ko Esaia pea mo ʼona foha kia Sesu pea mo te kau Kilisitiano fakanofo. (Hepeleo 2:13, 14) Neʼe takitaki e Sehova ia te ʼu fakata ʼae neʼe fai e Paulo ke feala hatatou tui papau ʼe moʼoni ia te ʼu faʼahi ʼaia.

 Kaʼe, moka fakaha ʼi te Tohi-Tapu ko he tahi ʼe ko he fakata, ʼe mole tonu anai ke tou manatu ko te ʼu faʼahi fuli ʼo te maʼuli ʼo te kilisitiano ʼaia ʼe ina fakata ia he aluʼaga ʼe lahi age ʼi te ka haʼu. Ohage la, neʼe fakamahino e Paulo ʼe fakata e Melekiseteke ia Sesu. Kaʼe neʼe mole talanoa ia Paulo ki te temi ʼae neʼe alu ai ia Melekiseteke ʼo ʼave te pane mo te vino kia Apalahamo ʼi te ʼosi pe ʼo tana malo mai te ʼu hau ʼe fa. Koia neʼe mole ʼi ai he tupuʼaga Fakatohi-tapu ke kumi ai te fakaʼuhiga ʼo te aluʼaga fakafufu ʼaia.—Senesi 14:1, 18.

Hili ni lauʼi taʼu ki te mate ʼo Kilisito, neʼe fai e te kau faitohi ia he hala mamafa. Neʼe teitei pe ke natou fai he fakata ʼi te ʼu hisitolia Fakatohi-tapu takitahi. ʼE fakaha fenei ʼi te tikisionalio ia te ʼu akonaki ʼa te ʼu tagata faitohi ko Origène mo Ambroise pea mo Jérôme: “Neʼe natou kumi he ʼu fakata pea neʼe natou maʼu ia he aluʼaga ʼe mole hona ʼuhiga ʼi he fakamatala ʼi te Tohi-Tapu. Maʼia mo te ʼu aluʼaga ʼae ʼe mahino gafua ʼe natou manatu ʼe ʼi ai he tahi age fakamahino ki te faʼahi ʼaia . . . , ohage la, ʼi te po ʼae neʼe ha ai ia Sesu ki ʼana tisipulo, ko ʼihi neʼe natou ui neʼe maʼu e te kau tisipulo ia te ʼu ika ʼe 153.”

Neʼe fakamahino e te tahi tagata faitohi ko Augustin dʼHippone, neʼe ʼi ai he fakaʼuhiga fakata ʼo te hisitolia Fakatohi-tapu ʼae neʼe fafaga ai e Sesu ia te ʼu tagata ʼe toko 5 000 ʼaki te ʼu foʼi pane ʼe 5 pea mo kiʼi ika ʼe 2. Neʼe ina ui ʼe fakata e te ʼu foʼi pane ʼe 5 ia te ʼu ʼuluaki tohi ʼe 5 ʼo te Tohi-Tapu. Koteʼuhi neʼe mole maʼuhiga age te olose ʼi te fulumeto, ko tona fakaʼuhiga ʼae neʼe mole maʼuhiga age ia te “Tauhi ʼAfeā” ʼi te “Tauhi Foʼou.” ʼO toe feia pe, neʼe ina ui neʼe fakata e te ʼu kiʼi ika ʼe lua ia he hau pea mo he pelepitelo. Neʼe toe fakamahino e te tahi tagata faitohi, ko te totogi ʼae e Sakopo ia te tofiʼa ʼo te ʼuluaki tupu ʼa Esau ʼaki he pa lenitili neʼe ina fakata ia te totogi ʼae neʼe foaki e Sesu maʼa te malamanei ʼaki tona taʼataʼa.

Kapau ʼe faigataʼa tatatou mahino ki te ʼu fakamahino ʼaia pea ʼe feala ke tou iloʼi tona tupuʼaga. ʼE mole feala ke iloʼi e te tagata pe ʼe fakata e te ʼu hisitolia Fakatohi-tapu ia he aluʼaga ʼe lahi age peʼe kailoa. Koia, kotea ia te tonu lelei ʼae ʼe tonu ke fai? ʼE hoki tou tali ia te fakamahino ʼaia mo kapau ʼe akoʼi mai ʼi te Tohi-Tapu ʼe fakata e he tahi, peʼe ko he meʼa peʼe ko he faʼahi ia he aluʼaga ʼe lahi age ʼi te ka haʼu. Koia, ʼe mole tonu anai ke tou foaki ia he fakaʼuhiga fakata ki he hisitolia ʼi te Tohi-Tapu kaʼe ʼe mole ʼi ai hona tupuʼaga Fakatohi-tapu ke fai.

Kotea ia te ʼu lelei ʼe feala ke tou maʼu mai he ʼu fakamahinohino pea mo he ʼu hisitolia ʼe tou lau ʼi te Tohi-Tapu? Neʼe tohi fenei e te apositolo ko Paulo: “Ko meʼa fuli ʼae neʼe tohi ʼi te temi muʼa, neʼe tohi ia moʼo akoʼi ʼo tatou, koteʼuhi ke tou maʼu te ʼamanaki ʼaki tatatou faʼa kataki pea mo te fakalotofimalie ʼae ʼe haʼu mai te Tohi-Tapu.” (Loma 15:4, MN) Neʼe faitohi ia Paulo ki te kau Kilisitiano fakanofo ʼo tona temi pe ʼe natou lava maʼu feafeaʼi ia he ʼu lelei mai te ʼu hisitolia Fakatohi-tapu. Talu mai te temi ʼaia, neʼe maʼu ai e te kau Kilisitiano fuli ʼo kau ai mo “ni ihi ovi” ia he ʼu ako ʼi te Tohi-Tapu.—Soane 10:16; 2 Timoteo 3:1.

ʼE lahi te ʼu hisitolia ʼi te Tohi-Tapu ʼe mole fakaʼuhiga pe ki te kau fakanofo, peʼe ki “ni ihi ovi” peʼe ki te kau Kilisitiano lolotoga te temi tonu ʼo te hisitolia ʼo te tagata. Kaʼe ʼe lahi ia te ʼu hisitolia Fakatohi-tapu neʼe leleiʼia e te ʼu kaugana fuli ʼa te ʼAtua ʼi te temi muʼa ʼo toe feia pe ʼi te temi nei. Ohage la, ko te ʼu mamahi ʼo Sopo ʼe mole ina fakata pe ia te ʼu mamahi ʼo te kau fakanofo lolotoga ia te ʼUluaki Tau Fakamalamanei. Tokolahi te ʼu kaugana ʼa te ʼAtua, tagata mo fafine, tatau aipe pe ʼe natou kau ki te kau fakanofo peʼe ki “ni ihi ovi,” kaʼe neʼe natou mamahi ohage ko Sopo pea neʼe natou maʼu he ʼu lelei mai te hisitolia ʼaia. Neʼe natou “sisio ki te fakaosi ae nee tuku e [Sehova] kia ia, koteuhi e fonu [Sehova] i te manavaofa pea mo te lotoofa.”—Sakopo 5:11.

Ia ʼaho nei, ʼe tou maʼu he ʼu fafine agatonu kua matuʼatuʼa ʼi ʼatatou kokelekasio ohage ko Tepola, ʼo feia mo he ʼu tupulaga kua fakapotopoto ohage ko Eliu. ʼE tou toe maʼu mo he ʼu pionie faʼafai mo lototoʼa ohage ko Sefete pea mo he ʼu tagata mo he ʼu fafine agatonu ʼae ʼe natou maʼu ia te faʼa kataki ohage ko Sopo. ʼE tou lotofakafetaʼi kia Sehova ʼi tana foaki mai ia “meʼa fuli ʼae neʼe tohi ʼi te temi muʼa” ke tou maʼu ia ʼaho nei pea “ke tou maʼu te ʼamanaki ʼaki  . . . te fakalotofimalie ʼae ʼe haʼu mai te Tohi-Tapu.”

Koia, ʼe ko te ʼu tupuʼaga ʼaia ke mole tou faiga ʼo kumi ia he fakaʼuhiga fakata peʼe ko tona fakahoko ʼae ʼi te ka haʼu maʼa te ʼu hisitolia Fakatohi-tapu takitahi. ʼE tokaga tafitō ʼatatou tohi Fakatohi-tapu ki te akonaki ʼae ʼe feala ke tou taʼofi ai he ʼu ako maʼuhiga mai te Tohi-Tapu.