1, 2. (1) ʼI te temi muʼa, neʼe kofea ʼae neʼe tauhi ai te ʼu kaugana ʼa Sehova? (2) Neʼe kotea te manatu ʼa Sesu ʼo ʼuhiga mo te fale lotu ʼo Sehova ʼi Selusalemi? (3) Kotea ʼae ka tou talanoa anai ki ai ʼi te alatike ʼaeni?

KO TE ʼu kaugana ʼa te ʼAtua ʼo te temi muʼa neʼe ʼi ai ʼonatou koga meʼa neʼe natou tauhi ai ki te ʼAtua pea ʼe toe feia pe mo te temi nei. Ohage la, ʼi te temi ʼae neʼe momoli ai e Apele he ʼu sakilifisio kia Sehova, neʼe lagi ina laga he ʼaletale. (Senesi 4:3, 4) Neʼe toe laga te ʼu ʼaletale e Noe, mo Apalahamo, mo Isaake, mo Sakopo pea mo Moisese. (Senesi 8:20; 12:7; 26:25; 35:1; Ekesote 17:15) Pea neʼe fakatotonu e Sehova ki te kau Iselaele ke natou faʼu he tapenakulo. (Ekesote 25:8) Ki muli age, neʼe ina akoʼi natou ki te laga ʼo he fale lotu. (1 Hau 8:27, 29) ʼI te toe liliu mai ʼa te hahaʼi ʼa te ʼAtua mai tanatou ʼaunofo ʼi Papilone, neʼe natou fakatahitahi tuʼumaʼu ʼi te ʼu sinakoka. (Maleko 6:2; Soane 18:20; Gaue 15:21) Pea ko te kau ʼuluaki Kilisitiano neʼe natou fakatahitahi ʼi te ʼu loto fale. (Gaue 12:12; 1 Kolinito 16:19) Ia ʼaho nei, ʼe fakatahitahi te hahaʼi ʼa Sehova ʼi te malamanei katoa ʼi ni lauʼi hogofulu afe Fale Fono, ʼo natou ako ai pe ko ai ia Sehova pea mo tauhi kia te ia.

² Neʼe fakaʼapaʼapa ʼaupito ia Sesu ki te fale lotu ʼo Sehova ʼae ʼi Selusalemi. Pea ʼuhi ko te ʼofa ʼae ʼa Sesu ki te fale lotu, neʼe manatuʼi ai e ʼana tisipulo ia te ʼu palalau ʼaeni ʼa te tagata faipesalemo:  “Kua tutu au e te faa [“faʼafai,” MN] ki tou fale.” (Pesalemo 69:10; Soane 2:17) Ko te Fale Fono ʼe mole ko ‘te fale nofo ʼo Sehova’ ohage ko te fale lotu ʼae neʼe tuʼu ʼi Selusalemi. (2 Koloniko 5:13; 33:4) Kaʼe ʼe tonu ke tou fakaʼapaʼapa ki te ʼu fale ʼo tatatou tauhi. ʼI te alatike ʼaeni, ʼe tou talanoa anai ki te ʼu pelesepeto Fakatohi-tapu ʼe akoʼi ai tatou pe ʼe tonu ke feafeaʼi tatatou aga ʼi ʼotatou Fale Fono, mo tatatou tokakaga ki ai pea mo tatatou lagolago ki ai ʼi te faʼahi fakapaʼaga. *—Vakaʼi te kiʼi nota.

3-5. Kotea ia te Fale Fono, pea kotea ʼe tonu ke tou logoʼi ʼo ʼuhiga mo ʼatatou fono?

³ Ko te Fale Fono, ʼe ko te koga meʼa tafitō ʼae ʼe feala ke fakatahitahi ai te hahaʼi moʼo tauhi kia Sehova. Ko te ʼu fono, ʼe ko he meʼa ʼofa ia mai te ʼAtua pea ʼe tou fakamalohiʼi ai ʼatatou felogoʼi ʼae mo ia. ʼI ʼatatou fono, ʼe foaki mai e tana kautahi ia te fakalotomalohi pea mo te takitaki ʼae ʼe ʼaoga kia tatou. Pea ʼe ko he pilivilesio ia totatou fakaafe e Sehova mo tona ʼAlo ke tou kakai ʼi “te laupapa o [Sehova]” ʼi te vahaʼa fuli. (1 Kolinito 10:21) ʼAua naʼa galo kia tatou ia te fakaafe makehe ʼaeni.

⁴ ʼE fakaha lelei mai e Sehova ʼe ina loto ke tou kau ʼi te ʼu fono ke tou tauhi age kia te ia pea mo tou fefakalotomalohiʼaki. (Lau ia Hepeleo 10:24, 25.) ʼE tou fakaʼapaʼapa kia Sehova, koia ʼae ʼe mole tou hoko to fono anai kaʼe gata pe mo kapau ʼe ʼi ai hona tupuʼaga tafitō. Ka tou teuteuʼi ʼatatou fono pea mo tou fakaʼamu ke tou fai hatatou ʼu tali, ʼe tou fakaha ai ia tatatou lotofakafetaʼi ki ʼatatou fono.—Pesalemo 22:23.

⁵ ʼE tou fakaha ia tatatou fakaʼapaʼapa kia Sehova ʼi tatatou aga pea mo tatatou tokakaga lelei ki ʼotatou Fale Fono. ʼE tou fia fakavikiviki ʼaki tatatou aga ki te huafa ʼo Sehova, ʼae ʼe tohi mahani ʼi te ʼu huʼaga ʼo te Fale Fono.—Vakaʼi mo 1 Hau 8:17.

6. Kotea ʼae neʼe ui e te hahaʼi ʼo ʼuhiga mo ʼotatou Fale Fono pea mo natou ʼae ʼe kau ʼi te ʼu fono? (Vakaʼi te ʼuluaki pāki.)

⁶ ʼE tokagaʼi e te hahaʼi tatatou fakaʼapaʼapa ki ʼotatou Fale Fono. Ohage la, neʼe ui fenei e te tagata mai Turquie: “Ko te faʼahi ʼae neʼe au tokagaʼi ʼi taku alu ki te Fale Fono, neʼe ko te maʼa pea mo tona tokalelei. Neʼe teu lelei te hahaʼi, mo mata malimali pea mo natou fakamalō mai. Pea neʼe malave ʼaupito kia au.” Neʼe kamata kau ia te tagata ʼaia ki te ʼu fono fuli pea mole faʼa fualoa ki ai neʼe papitema. ʼI te kolo ʼo Indonésie, neʼe fakaafe e te ʼu tehina ʼonatou vahaʼa fale, ia te pule kolo pea mo ʼihi atu hahaʼi ʼo te puleʼaga ke natou olo ʼo mamata ki tonatou Fale Fono foʼou. Neʼe punamaʼuli ia te pule kolo ki te taulekaleka ʼo te fale, ki te lelei ʼo tona faʼu pea mo ʼona ʼoloto matalelei. Neʼe ina ui fenei: “ʼE ha ʼi te maʼa ʼo te fale ʼaeni ia takotou tui moʼoni.”

7, 8. ʼE feafeaʼi hatatou fakaha ʼe tou fakaʼapaʼapa kia Sehova ʼi te Fale Fono?

⁷ Ko Sehova ʼae ʼe ina fakaafe tatou ki te ʼu fono, pea ʼe loto ke tou tokakaga ki tatatou faʼahiga teuteu pea mo tatatou aga. Koia, ʼe tou tekeʼi anai te ʼu faʼahiga teuteu peʼe ko te ʼu aga ʼae ʼe mole alu tahi mo te finegalo ʼo te ʼAtua. ʼE mahino ia, ʼe loto e Sehova ke lelei mo fimalie tatatou nonofo ʼi te Fale Fono pea mo natou ʼae ʼe tou fakaafe. Pea ʼe tou fia fakaʼapaʼapa ki ʼatatou fono ʼi te ʼu aluʼaga fuli. Koia la ʼae ʼe mole tou tui mai anai he ʼu teu ʼe mole fakaʼapaʼapa, pea ʼe mole tou fakaʼaogaʼi anai tatatou telefoni toʼotoʼo, mo faipalalau, pea mo faikakai lolotoga te ʼu  fono. Pea ʼe tonu ki te ʼu matuʼā ke natou akoʼi ki ʼanatou fanau ke mole natou feleleʼaki peʼe gaoʼi ʼi te Fale Fono.—Ekelesiasi 3:1.

⁸ ʼI te sio ʼae ʼa Sesu ki te faifakatau ʼa te hahaʼi ʼi te fale lotu ʼo te ʼAtua, neʼe ita pea mo ina kapu natou ki tuʼa. (Soane 2:13-17) ʼI ʼotatou Fale Fono, ʼe tou tauhi ai kia Sehova pea mo tou ako ai pe ko ai ia ia. Koia ʼi te loto Fale Fono, ʼe mole lelei anai ke tou logologo ʼo ʼuhiga mo he ʼu meʼa ʼe tou fakatau.—Vakaʼi mo Neemia 13:7, 8.

9, 10. (1) ʼE laga feafeaʼi ia te ʼu Fale Fono e te hahaʼi ʼa Sehova? Pea neʼe kotea ʼona fua? (2) ʼE tokoni feafeaʼi ia te kautahi ʼa Sehova ki te ʼu kokelekasio ʼae ʼe mole feala hanatou laga honatou Fale Fono?

⁹ ʼE gaue kinakina ia te hahaʼi ʼa Sehova ʼi te malamanei katoa moʼo laga ia te ʼu Fale Fono. Pea ko te kau gaue ʼae ʼe natou fai te ʼu pāki, mo laga pea mo fakafoʼou te ʼu Fale Fono, ʼe mole totogi. Koia, lolotoga te ʼu taʼu ʼe 15 kua hili atu, neʼe matou laga ia te ʼu Fale Fono matalelei ʼi te malamanei katoa ʼe 28 000 tupu peʼe ko teitei Fale Fono ʼe nima ʼae ʼe laga ʼi te ʼaho fuli.

¹⁰ ʼE hinoʼi e te kautahi ʼa Sehova ia he kau gaue pea mo fakaʼaogaʼi ia te ʼu meʼa ʼofa moʼo laga ia te ʼu Fale Fono ʼi te ʼu koga meʼa ʼae ʼe ʼaoga ki ai he Fale Fono. ʼE tou mulimuli ki te pelesepeto Fakatohi-tapu ʼae ʼe ui ai, ʼe feala kia natou ʼae ʼe fealagia ke tokoni kia natou ʼae ʼe mole maʼu feʼauga. (Lau ia 2 Kolinito 8:13-15.) Kotea ʼona fua? Neʼe lahi te ʼu Fale Fono matalelei neʼe laga maʼa te ʼu kokelekasio ʼae neʼe mole natou lavaʼi tona totogi.

11. Kotea ʼae neʼe ui e ʼihi tehina ʼo ʼuhiga mo tonatou Fale Fono foʼou? Pea kotea ʼae ʼe kotou logoʼi ʼo ʼuhiga mo te faʼahi ʼaia?

¹¹ Neʼe tohi fenei e te ʼu tehina ʼo te kokelekasio ʼi Costa Rica: “ʼI tamatou tutuʼu ʼi te muʼa Fale Fono, ʼe hage pe ko hamatou moemisi! Neʼe fakapunamaʼuli kia matou. He neʼe ʼosi katoa ia te laga ʼo tamatou Fale Fono matalelei ia ʼaho pe ʼe valu! Neʼe fealagia ia te faʼahi ʼaia ʼaki te tapuakina ʼa Sehova, mo te ʼu fakatuʼutuʼu ʼae neʼe fai e tana kautahi pea mo te lagolago ʼo ʼomatou tehina mo tuagaʼane ʼofaina. Ko te fale tauhi ʼaia, ʼe ko he meʼa ʼofa maʼuhiga neʼe foaki mai e Sehova maʼa matou. Neʼe matou fiafia ʼaupito.” ʼE ko he meʼa fakafiafia moʼoni tatatou logo ki te fakafetaʼi ʼa te ʼu tehina mo tuagaʼane kia Sehova ʼo ʼuhiga mo te ʼu meʼa ʼae neʼe ina fai maʼa natou. Pea ʼe matou toe fiafia ki te maʼu ʼae e ʼomatou tehina mo tuagaʼane ʼi te malamanei katoa ia tonatou Fale Fono. ʼE ha lelei mai, ʼe tapuakiʼi e Sehova ia te gaue ʼae ko te laga ʼo te ʼu Fale Fono. Koteʼuhi hili pe tonatou laga, ʼe kaugā malie natou ʼae ʼe kamata kau ki te ʼu fono ke natou ako ai pe ko ai ia Sehova.—Pesalemo 127:1.

12. ʼE kotou lava tokoni feafeaʼi ki te laga ʼo te ʼu Fale Fono?

 ¹² ʼE kotou lava tokoni feafeaʼi ki te laga ʼo te ʼu Fale Fono? ʼE feala hakotou kau ki te gaue ʼaia. Pea ʼe feala kia tatou fuli ke tou foaki he foʼi falā moʼo lagolago ki te laga ʼo te ʼu Fale Fono. Kapau ʼe tou faiga malohi ʼo lagolago ki te gaue ʼaia, ʼe tou fiafia ʼi te foaki, kaʼe ko te faʼahi ʼae ʼe maʼuhiga, ko tatatou fakavikiviki ʼae kia Sehova. ʼE tou faʼifaʼitakiʼi te hahaʼi ʼa te ʼAtua ʼo te temi muʼa ʼae neʼe loto lelei ke natou foaki ʼonatou koloa ki te laga ʼo ʼonatou fale tauhi.—Ekesote 25:2; 2 Kolinito 9:7.

13, 14. Kotea te ako ʼe tou maʼu ʼi te Tohi-Tapu ʼo ʼuhiga mo te taupau maʼa mo tokalelei ʼo totatou Fale Fono?

¹³ Ko Sehova ʼe ko he ʼAtua maʼa mo maʼoniʼoni. Pea ʼe ko te ʼAtua ʼo te tokalelei. Koia ʼae ʼe tonu ai ke maʼa pea mo tokalelei tuʼumaʼu ia totatou Fale Fono. (Lau ia 1 Kolinito 14:33, 40.) ʼE mole tonu pe ke tou maʼa ʼi tatatou tauhi, mo tatatou fakakaukau pea mo tatatou aga ke feala hatatou maʼa pea mo maʼoniʼoni ohage ko Sehova, kaʼe ʼe tonu foki ke tou toe maʼa ʼi te faʼahi fakasino.—Apokalipisi 19:8.

¹⁴ Kapau ʼe maʼa mo tokalelei tuʼumaʼu totatou Fale Fono, pea ʼe tou fiameʼameʼa ai ʼi te fakaafe ʼo te hahaʼi ki ʼatatou fono. Pea ʼe fakamoʼoni ai anai te hahaʼi ki te ʼu faʼahi ʼae ʼe tou fakamafola ʼo ʼuhiga mo he malama foʼou ʼe maʼa. ʼE natou toe mahino ai anai, ʼe tou tauhi ki he ʼAtua ʼe maʼoniʼoni mo maʼa pea ʼe ina fakaliliu anai te kele ko he palatiso taulekaleka.—Esaia 6:1-3; Apokalipisi 11:18.

15, 16. (1) He koʼe ʼe mole faigafua tuʼumaʼu hatatou taupau ke maʼa totatou Fale Fono? He koʼe ʼe tonu ke fakamaʼa? (2) ʼE fakatuʼutuʼu feafeaʼi te fakamaʼa ʼo tokotou Fale Fono, pea kotea te pilivilesio ʼae ʼe tou maʼu fuli?

¹⁵ ʼE kehekehe te ʼu manatu ʼae ʼe maʼu e te hahaʼi ʼo ʼuhiga mo te maʼa. Kotea tona tupuʼaga? Koteʼuhi ʼe lagi ko tonatou faʼahiga akoʼi. Ko ʼihi ʼe maʼuʼuli ʼi he ʼu koga meʼa efuʼia peʼe ko he ʼu koga meʼa ʼe ʼuli mo pela te ʼu ala. Pea ko ʼihi, ʼe mole feʼauga tanatou moʼi vai peʼe ko te ʼu meʼa fakamaʼa. Koia tatau aipe pe ko te potu fea ʼe tou nonofo ai  peʼe ko te ʼu faʼahiga manatu fea ʼa te hahaʼi ʼo ʼuhiga mo te maʼa, kaʼe ʼe tonu ke tou taupau ke maʼa mo tokalelei totatou Fale Fono. Koteʼuhi ko te koga meʼa ʼaia ʼe tou tauhi ai kia Sehova.—Tetelonome 23:14.

¹⁶ Kapau ʼe tou loto ke maʼa tuʼumaʼu totatou Fale Fono, ʼe ʼaoga ke lelei te ʼu fakatuʼutuʼu ʼo ʼatatou gaue. ʼE fakatuʼutuʼu e te kau tagata ʼafeā ia he polokalama fakamaʼa ki te kokelekasio pea ʼe natou tokakaga ke ʼi ai tuʼumaʼu he ʼu meʼa fakamaʼa. Pea ʼe toe tokakaga ia te kau tagata ʼafeā ke fakahoko te ʼu gaue ʼae neʼe natou fakatuʼutuʼu. ʼI te hili ʼo te ʼu fono, ʼe ʼi ai te ʼu faʼahi ʼe ʼaoga ke fakamaʼa. Pea ʼe tou maʼu fuli te pilivilesio ʼae ke tou kau ki te fakamaʼa ʼo totatou Fale Fono.

17, 18. (1) Kotea te ako ʼe tou taʼofi mai te taupau lelei ʼo te fale lotu e te hahaʼi ʼa Sehova ʼo te temi muʼa? (2) He koʼe ʼe tonu ke tou taupau lelei totatou Fale Fono?

¹⁷ ʼE tou toe taupau lelei totatou Fale Fono ʼaki hona toe fakafoʼou. Neʼe toe fai feia pe e te ʼu kaugana ʼa Sehova ʼo te temi muʼa. Ohage la, ʼi te temi Hau ʼo Soasi ʼi Suta, neʼe foaki foʼi falā te hahaʼi ki te fale lotu. Neʼe fakatotonu e te ʼu pelepitelo ke fakaʼaogaʼi te foʼi falā ʼaia moʼo toe faʼu te fale lotu. (2 Hau 12:4, 5) Ia taʼu ʼe 200 tupu ki muli age, neʼe toe fakaʼaogaʼi e te Hau ko Sosiasi ia te ʼu meʼa ʼofa ʼo te fale lotu moʼo totogi ia tona toe faʼu.—Lau ia 2 Koloniko 34:9-11.

¹⁸ Neʼe tokagaʼi e ʼihi Komite ʼo te ʼu Filiale ko te hahaʼi ʼo tonatou fenua ʼe mole ko hanatou agamahani te taupau lelei te ʼu fale lalahi peʼe ko te ʼu meʼa gaue. Koteʼuhi ʼe lagi tokosiʼi ia natou ʼe popoto ʼi te gaue. Peʼe lagi mole feʼauga tanatou foʼi falā moʼo toe fakafoʼou ia te ʼu fale. Kaʼe kapau ʼe mole tou fakafoʼou totatou Fale Fono ʼi te temi ʼae ʼe ʼaoga ai, pea ʼe fakatokagaʼi anai e te hahaʼi kua kamata popo. Pea ʼe mole ko he fakamoʼoni lelei ʼaia kia natou. Kaʼe kapau ʼe tou faiga malohi ke tou taupau lelei totatou Fale Fono, ʼe tou fakavikiviki ai kia Sehova pea ʼe mole tou maumauʼi ai te foʼi falā ʼae neʼe foaki e te ʼu tehina mo tuagaʼane.

19. Kotea ʼae ka kotou fai anai moʼo fakaha ia takotou fakaʼapaʼapa ki te koga meʼa ʼae ʼe kotou tauhi ai kia Sehova?

¹⁹ Ko te Fale Fono ʼe ko he fale ia neʼe foaki kia Sehova. ʼE mole ʼa he tahi peʼe ʼa te kokelekasio. Ohage pe ko te ʼu faʼahi neʼe tou talanoa ki ai ʼi te alatike ʼaeni, ʼe tokoni mai anai te ʼu pelesepeto Fakatohi-tapu ke tou maʼu te manatu ʼae ʼe lelei ʼo ʼuhiga mo te koga meʼa ʼae ʼe tou tauhi ai ki te ʼAtua. ʼE tou fakaʼapaʼapa kia Sehova, koia ʼae ʼe tou fakaʼapaʼapa ai ki ʼatatou fono pea mo ʼotatou Fale Fono. Pea ʼe tou fiafia ʼi te foaki foʼi falā ki te laga ʼo he ʼu Fale Fono, mo tou faiga malohi ke tou tokakaga ke maʼa tuʼumaʼu. Koia ohage pe ko Sesu, tou fakaha ia tatatou faʼafai mo fakaʼapaʼapa ki te koga meʼa ʼae ʼe tou tauhi ai kia Sehova.—Soane 2:17.