1, 2. (1) Kotea ʼae ʼe kotou fakaʼamu ki ai ʼi te malama foʼou? (Vakaʼi te ʼuluaki pāki.) (2) Kotea ia te fiafia lahi ka tou maʼu anai ʼi te malama foʼou?

ʼE TOU fakaʼamu ke tou maʼu ia te “mauli heegata.” Neʼe fakaha e te apositolo ko Paulo ʼe ko te “mauli mooni” ʼaia. (Lau ia 1 Timoteo 6:12, 19.) Ki te manatu ʼa ʼihi, ʼe fakaʼuhiga ki te maʼuli heʼe gata ʼi te Palatiso ʼi te kele. ʼE faigataʼa hatatou fakakaukauʼi pe ʼe feafeaʼi anai tatatou ʼaʼalaake ʼi te uhu fuli mo he maʼuli malolō lelei pea mo fiafia. (Esaia 35:5, 6) Kotou fakakaukauʼi ia te temi ʼae ʼe kotou fiafia ai ʼi takotou fakatahi mo ʼokotou famili pea mo ʼokotou kaumeʼa, ʼo toe feia mo natou ʼae ka fakatuʼuake anai. (Soane 5:28, 29; Gaue 24:15) ʼE kotou maʼu anai he temi moʼo ako ai te ʼu fealagia foʼou pea mo kotou liliu ʼo faiva ʼi te u meʼa ʼae ʼe kotou leleiʼia. Ohage la, ʼe feala ke lahi age takotou ako ʼo ʼuhiga mo te sienesia. Peʼe ko te ʼu meʼa faimaholo peʼe ko te faʼu ʼo ʼokotou ʼapi.

² Tatau aipe pe ʼe tou fakatalitali ki te ʼu meʼa lelei fuli ʼaia, kaʼe ʼe ko te tauhi ʼae kia Sehova ka lahi age anai totatou fiafia. Kotou fakakaukauʼi age muʼa, pe ʼe feafeaʼi anai te maʼuli moka  ʼe fakamaʼuhigaʼi e te hahaʼi fuli ia te huafa maʼoniʼoni ʼo Sehova pea mo tali ia ia ko tonatou Pule. (Mateo 6:9, 10) ʼE tou fiafia anai ʼi tatatou sisio kua fakafonu te kele e te hahaʼi haohaoa ohage ko te fakatuʼutuʼu ʼa te ʼAtua ʼi te kamataʼaga. Pea ʼe faigafua anai tatatou maʼu ia he ʼu felogoʼi malohi mo Sehova ʼi tatatou liliu ʼae ʼo haohaoa.—Pesalemo 73:28; Sakopo 4:8.

3. Kotea ʼae ʼe tonu ke tou teuteu ki ai ʼi te temi nei?

³ ʼE tou falala ʼe fakahoko anai e Sehova ia te ʼu meʼa taulekaleka fuli ʼaia koteʼuhi “e feala te mea fuli” ki te ʼAtua. (Mateo 19:25, 26) Kapau ʼe tou fia maʼuʼuli ʼo heʼe gata ʼi te malama foʼou, ʼe ko te temi ʼaeni ke tou “puke” ai te maʼuli heʼe gata. ʼE tou iloʼi kua vave hoko mai te fakaʼosi, koia ʼae ʼe tonu ai ke tou fakaha ʼi totatou faʼahiga maʼuli ʼe tou fakatalitali ki te hoko fakafokifa mai ʼo te fakaʼosi. ʼE tonu ke tou fai ia meʼa fuli ʼe tou fealagia ʼi te temi nei moʼo teuteu ki te maʼuli ʼi te malama foʼou. ʼO feafeaʼi?

4. ʼE tou lava teuteu feafeaʼi ʼi te temi nei ki te maʼuli ʼi te malama foʼou? Kotou tuku mai he faʼifaʼitaki.

⁴ ʼE tou lava teuteu feafeaʼi ʼi te temi nei ki te maʼuli ʼi te malama foʼou? Kapau neʼe tou fakatuʼutuʼu ke tou olo ʼo maʼuʼuli ʼi he tahi fenua, ʼe feala ke tou teuteu ki te maʼuli ʼo te fenua ʼaia. Ohage la, ʼe feala ke tou kamata ako te lea pea mo te ʼu agaʼi fenua ʼo te hahaʼi ʼae ʼe maʼuʼuli ʼi te fenua ʼaia. ʼE lagi ʼe tou ʼahiʼahi anai ʼihi meʼa kai ʼa natou. Pea ʼe hage pe kua tou maʼuʼuli ʼi te fenua ʼaia. ʼO toe feia pe, ʼe feala ke tou teuteu ʼi te temi nei ki te maʼuli ʼi te malama foʼou ʼo tou fai ia meʼa fuli ʼe tou lavaʼi ohage pe kua tou maʼuʼuli ai. Tou vakaʼi ʼihi faʼahiga aluʼaga ʼe feala ke tou fai ai te faʼahi ʼaia.

5, 6. ʼE tokoni feafeaʼi mai anai tatatou ako ia te fakalogo ki te takitaki mai te kautahi ʼa Sehova ke tou teuteu ai ki te maʼuli ʼi te malama foʼou?

⁵ ʼI te malama ʼaeni, ʼe loto e Satana ke manatu te hahaʼi ʼe feala ke natou fai te ʼu meʼa ʼae ʼe natou loto ki ai. Tokolahi ʼe natou manatu ʼe maʼuhiga ke natou faʼifaʼitaliha pea ʼe mole ʼaoga ke natou fakalogo ki te ʼAtua. Neʼe kotea tona fua? Kua lahi te ʼu mamahi. (Selemia 10:23) Kaʼe ko Sehova ʼe ko te Pule ʼofa. ʼE lelei age anai te maʼuli ʼi te malama foʼou moka tou fakalogo fuli kia te ia.

⁶ ʼI te malama foʼou, ʼe tou fiafia anai ʼi te mulimuli ki te takitaki mai te kautahi ʼa Sehova, ʼo tou tokoni ki te fakaliliu ʼo te kele ʼaeni ko he palatiso taulekaleka pea mo tokoni ki te ako ʼo natou ʼae ka fakatuʼuake. ʼE lahi anai te ʼu gaue ʼe foaki mai e Sehova kia tatou. Kaʼe ʼe feafeaʼi mo kapau ʼe kole mai e natou ʼae ʼe takitaki ke tou fai he meʼa ʼe mole tou loto ki ai? ʼE tou fakalogo anai koa? ʼE tou fai anai koa te gaue ʼaia mo he lotofiafia? ʼE tonu ke tou fakalogo ki te takitaki ʼae ʼe haʼu mai te kautahi ʼa Sehova ʼi te temi nei ke tou teuteu ai ki te maʼuli heʼe gata ʼi te malama foʼou.

7, 8. (1) He koʼe ʼe tonu ke tou gaue fakatahi mo natou ʼae ʼe natou takitaki tatou? (2) Kotea te ʼu fetogi neʼe fai e ʼihi Kilisitiano? (3) Kotea ʼae ʼe tou tui papau ki ai ʼi te malama foʼou?

⁷ ʼE tou fia nofo teuteu ki te maʼuli ʼi te malama foʼou. Koia, ʼe tonu ke tou maʼu te fiafia ʼi te gaue fakatahi mo te kautahi ʼa Sehova pea mo tou fetokoniʼaki. Ohage la, ʼe tou lotolelei ʼo gaue fakatahi pea mo faiga ke tou fiafia moka ʼe foaki mai he gaue. Kapau ʼe tou ako ke tou gaue fakatahi mo natou ʼae ʼe takitaki ʼi te temi nei, ʼe tou toe fai feia anai ʼi te malama foʼou. (Lau ia Hepeleo 13:17.) ʼI te temi ʼae neʼe hu ai te  kau Iselaele ki te Kele ʼo Te Fakapapau, neʼe foaki kia natou ia te koga meʼa ʼae ke natou maʼuʼuli ai. (Numelo 26:52-56; Sosue 14:1, 2) ʼE mole tou iloʼi pe ʼe tou tahi maʼuʼuli anai ʼi fea ʼi te malama foʼou. Kaʼe kapau neʼe tou ako ke tou gaue fakatahi, ʼe tou fiafia anai ʼi te fai ʼo te finegalo ʼo Sehova ʼi he koga meʼa pe ʼe tou maʼuʼuli ai.

⁸ Kotou fakakaukauʼi age muʼa ia te pilivilesio ka tou maʼu anai ʼi tatatou tauhi ki te ʼAtua ʼi te malama foʼou ʼi te takitaki ʼo te Puleʼaga. Ko te tupuʼaga la ʼaia ʼo tatatou fiafia ʼi te gaue fakatahi mo te kautahi ʼa Sehova ʼi te temi nei pea mo fai he gaue pe ʼe hinoʼi mai ke tou fai. ʼI ʼihi temi, ʼe feala ke fetogi ia te gaue ʼae ʼe tou fai. Ohage la, ko ʼihi kau Petelite ʼi Amelika ʼe mole kei natou gaue ʼi te Petele kaʼe kua hinoʼi natou ke natou gaue ʼi te minisitelio. Pea ko ʼihi Taupau Feʼoloʼaki kua natou liliu ko te ʼu pionie makehe ʼuhi ko ʼonatou taʼu peʼe ko ʼihi atu aluʼaga. Neʼe natou fiafia ʼi ʼanatou gaue ʼaia pea neʼe tapuakinaʼi natou e Sehova. Kapau ʼe tou kole tokoni kia Sehova, mo fai ia meʼa fuli ʼe tou lavaʼi moʼo tauhi kia te ia pea mo fiafia ʼi te fai ʼo he gaue pe ʼe foaki mai, ʼe tou fiafia anai pea ʼe tapuakinaʼi anai tatou e Sehova. (Lau ia Taaga Lea 10:22.) ʼE feafeaʼi anai mo kapau ʼe tou leleiʼia he koga meʼa ʼi te malama foʼou kaʼe ʼe kole mai e te kautahi ʼa Sehova ke tou olo ki he tahi koga meʼa? ʼI te temi ʼaia, ʼe mole maʼuhiga anai ia te koga meʼa ʼae ka tou maʼuʼuli ai anai peʼe ko te gaue ʼae ka tou fai. ʼE tou lotofakafetaʼi pe anai ʼi tatatou maʼuʼuli ʼi te malama foʼou.—Neemia 8:10.

9, 10. (1) Ko te ʼu aluʼaga fea ʼae ʼe ʼaoga ai ke tou kataki ʼi te malama foʼou? (2) ʼE tou lava fakaha feafeaʼi ʼe tou kataki ʼi te temi nei?

⁹ ʼI te malama foʼou, ʼe ʼaoga anai ʼi ʼihi temi ke tou kataki. Ohage la, ʼe feala ke tou logo ʼe fiafia ʼihi hahaʼi koteʼuhi neʼe fakatuʼuake ʼonatou famili peʼe ko ʼonatou kaumeʼa. Kaʼe, ʼe tonu ke tou fakatalitali ke fakatuʼuake ia natou ʼae ʼe tou ʼoʼofa mamahi ai. Kapau ʼe hoko te faʼahi ʼaia, ʼe tou fakafiafia fakatahi anai koa mo natou ʼaia pea mo maʼu ia te kataki? (Loma 12:15) Kapau ʼe tou ako ke tou fakatalitali mo he kataki fualoa ʼi te temi nei ki te fakahoko e Sehova ʼana fakapapau, ʼe toe tokoni mai anai ke tou kataki ʼi te ka haʼu.—Ekelesiasi 7:8.

¹⁰ ʼE feala ke tou toe teuteu ki te malama foʼou kapau ʼe tou tali te ʼu fetogi ki tatatou faʼahiga mahino ki te ʼu moʼoni Fakatohi-tapu. ʼE tou ako koa ia te ʼu fakamahino foʼou ʼaia? Kapau ʼe mole tou mahino fuli ki ai, ʼe tou kataki koa? Kapau koia, ʼe faigafua anai tatatou kataki moka foaki mai anai e Sehova he ʼu fakatuʼutuʼu foʼou ʼi te malama foʼou.—Taaga Lea 4:18; Soane 16:12.

11. He koʼe ʼe tonu ke tou ako ke tou fakamolemole ki ʼihi ʼi te temi nei? Pea ʼe tokoni feafeaʼi mai ia te faʼahi ʼaia ʼi te malama foʼou?

¹¹ Ko te tahi faʼahi ʼe feala ke tou teuteu ai ki te maʼuli ʼi te malama foʼou, ʼe ko te ako ʼo te lotofakamolemole. Lolotoga te ʼAfio ʼa Kilisito ia Taʼu e Afe, ʼe tonu anai ke ʼi ai he temi loaloaga ke tou liliu ai ʼo  haohaoa. (Gaue 24:15) ʼE tou maʼu anai koa te ʼofa pea mo te fefakamolemoleʼaki? Kapau ʼe tou fakamolemole ki ʼihi pea mo maʼu ia he ʼu felogoʼi lelei mo natou ʼi te temi nei, ʼe faigafua anai tatatou fai ia te faʼahi ʼaia ʼi te malama foʼou.—Lau ia Kolose 3:12-14.

12. He koʼe ʼe tonu ke tou teuteu ʼi te temi nei ki te maʼuli ʼi te malama foʼou?

¹² ʼI te malama foʼou, ʼe lagi mole feala ke tou maʼu tuʼumaʼu ia te ʼu meʼa ʼae ʼe tou loto ki ai, peʼe ko ʼae neʼe tou fakaʼamu ki ai. ʼE tonu anai ke tou lotofakafetaʼi pea mo fiafia tatau aipe pe ʼe kotea ia totatou aluʼaga. ʼE tonu ke tou maʼu ia te ʼu kalitate ʼae neʼe akoʼi mai e Sehova ke tou fakaha ʼi te temi nei. ʼI tatatou ako te ʼu kalitate ʼaia ʼi te temi nei, ʼe tou fakaha ai ʼe moʼoni kia tatou te malama foʼou pea ʼe tou teuteu ki te maʼuli heʼe gata. (Hepeleo 2:5; 11:1) Pea tahi, ʼe tou fakaha anai ʼe tou fia maʼuʼuli moʼoni ʼi he malama ʼe tou fakalogo fuli anai kia Sehova.

13. Kotea ʼae ka tou fakamuʼamuʼa anai ʼi totatou maʼuli ʼi te malama foʼou?

¹³ ʼI te malama foʼou, ʼe tou maʼu anai ia meʼa fuli ʼe ʼaoga kia tatou ke tou fiafia ai. Kaʼe ʼe tou fiafia lahi anai ʼi ʼatatou felogoʼi lelei ʼae mo Sehova. (Mateo 5:3) ʼE tou maʼumaʼua anai ʼi te tauhi ʼae kia Sehova pea ʼe tou fiafia anai ʼi te tauhi kia te ia. (Pesalemo 37:4) Koia ʼae kapau ʼe tou fakamuʼamuʼa ia Sehova ʼi totatou maʼuli ʼi te temi nei, ʼe tou teuteu ai ki te maʼuli ʼi te malama foʼou.—Lau ia Mateo 6:19-21.

14. Kotea ia te ʼu fakatuʼutuʼu ʼe feala ke fai e te kau tupulaga ʼi te tauhi ʼae kia Sehova?

¹⁴ ʼE tou lava tauhi feafeaʼi kia Sehova mo he fiafia lahi? ʼAki tatatou fai he ʼu fakatuʼutuʼu. Kapau ko koutou ko he tupulaga, kotou fakakaukauʼi fakalelei pe ʼe kotou fakaʼaogaʼi feafeaʼi tokotou maʼuli ki te tauhi ʼae kia Sehova. He koʼe ʼe mole kotou fai he ʼu fekumi ʼi ʼatatou tohi ʼo ʼuhiga mo  te ʼu faʼahiga selevisi temi katoa kehekehe? ʼE feala ke koutou fai he fakatuʼutuʼu ʼi te ʼu selevisi temi katoa ʼaia. * (Vakaʼi te kiʼi nota.) Kotou faipalalau mo he tahi kua fualoa tana tauhi kia Sehova ʼi te selevisi temi katoa. Kapau ʼe kotou fakaʼaogaʼi tokotou maʼuli ki te tauhi ʼae kia Sehova, ʼe kotou tali anai ia he ako maʼuhiga. ʼE tokoni atu anai ia te fealagia ʼaia ke kotou tauhi kia Sehova ʼi te malama foʼou.

15. Kotea te tahi ʼu fakatuʼutuʼu ʼe feala ke tou fai ʼi te tauhi ʼae kia Sehova?

¹⁵ ʼE lahi te ʼu fakatuʼutuʼu ʼe feala ke tou fai ki tatatou tauhi ʼae kia Sehova. Ohage la, ʼe feala ke tou fakatuʼutuʼu ke tou ako ia he faʼahiga fai foʼou ʼi te minisitelio. Peʼe tou faiga ke tou mahino lelei ki te ʼu pelesepeto Fakatohi-tapu pea mo ako pe ʼe tou lava maʼuliʼi feafeaʼi ʼi totatou maʼuli. ʼE feala ke tou faiga ke tou hikihiki tatatou lautohi ʼi muʼa ʼo te kaugā malie peʼe ko ʼatatou faiakonaki pea mo ʼatatou faitali ʼi te ʼu fono. Kaʼe koʼeni te ako ʼe tou taʼofi mai ai: Kapau ʼe kotou fai he ʼu fakatuʼutuʼu ʼi takotou tauhi ʼae kia Sehova, ʼe tokoni atu anai ke lahi age takotou faʼafai pea mo takotou teuteu ki te maʼuli ʼi te malama foʼou.

16. He koʼe ko te tauhi ʼae kia Sehova ʼe ko te faʼahiga maʼuli ʼaia ʼe lelei tokotahi?

¹⁶ Moka tou fakaʼaogaʼi totatou temi moʼo teuteu ki te malama foʼou ʼa te ʼAtua, ko tona fakaʼuhiga koa ʼe pulinoa totatou temi ia ʼaho nei? Kailoa. Ko te tauhi ʼae kia Sehova ʼe ko te faʼahiga maʼuli ʼaia ʼe lelei tokotahi. ʼE mole tou tauhi kia te ia heʼe neʼe fakakinauʼi tatou e he tahi peʼe tou fia hao pe tatou ʼi te mamahi lahi. Ka tou maʼu ia he ʼu felogoʼi lelei mo Sehova ʼe tou maʼuli fiafia anai. ʼE ko te faʼahiga maʼuli ʼaia ʼe loto ki ai ia Sehova. Ko tatatou maʼu te ʼofa ʼo te ʼAtua pea mo tali tana takitaki ʼi  totatou maʼuli ʼe lelei tokotahi age ia meʼa fuli. (Lau ia Pesalemo 63:2-4.) ʼE feala ke tou logoʼi fuli ia te fiafia ʼi tatatou tauhi ʼae kia Sehova ʼaki totatou loto katoa. Ko ʼihi ʼae neʼe tauhi kia te ia talu mai fualoa, ʼe natou ui ʼe ko te faʼahiga maʼuli ʼaia ʼe lelei tokotahi.—Pesalemo 1:1-3; Esaia 58:13, 14.

17. ʼE maʼuhiga feafeaʼi anai ia te ʼu meʼa ʼae ʼe tou leleiʼia pea mo te ʼu fakafiafia ʼi te Palatiso?

¹⁷ ʼI te Palatiso, ʼe tou fiafia anai ʼi te fakaʼaogaʼi ʼo totatou temi ki te ʼu meʼa ʼae ʼe tou leleiʼia pea mo tou fakafiafia. Pea tahi, neʼe fakatupu tatou e Sehova ke tou maʼuli fiafia. ʼE ina fakapapauʼi ʼe ina “fafaga [anai] o makokona te u mea fuli ae e natou mau te mauli.” (Pesalemo 145:16; Ekelesiasi 2:24) ʼE moʼoni ia, ʼe ʼaoga ke tou fakafiafia pea mo malolō kaʼe ʼe lahi age tatatou fiafia ʼi te ʼu faʼahi ʼaia mo kapau ʼe tou fakamuʼamuʼa ʼatatou felogoʼi mo Sehova. ʼE toe feia pe anai ʼi te malama foʼou. Koia ʼe ko he aga fakapotopoto anai hatatou haga “kumi mua te puleaga” pea mo tokakaga tafitō ki te ʼu tapuakina ʼe tou maʼu ʼi tatatou tauhi ʼae kia Sehova.—Mateo 6:33.

18. ʼE tou lava fakaha feafeaʼi ʼe tou teuteu ke tou maʼuʼuli ʼo heʼe gata ʼi te Palatiso?

¹⁸ ʼI te malama foʼou, ʼe tou maʼuli fiafia anai ʼo laka age ʼi te ʼu aluʼaga ʼae neʼe tou manatu ki ai. ʼE feala ke tou fakaha ʼe tou fia maʼu ia te “mauli mooni” ʼaki tatatou teuteu ki ai ʼi te temi nei. Tou gaueʼi te ʼu kalitate ʼae ʼe akoʼi mai e Sehova pea mo tou faʼafai ʼi te fakamafola ʼo te logo lelei. ʼE feala ke tou iloʼi ia te fiafia moka tou fakamuʼamuʼa ʼi totatou maʼuli ia tatatou tauhi ʼae kia Sehova. ʼE tou falala katoa ʼe fakahoko anai e Sehova ia meʼa fuli neʼe ina fakapapauʼi ʼi te malama foʼou. Koia tou maʼuli ohage pe kua tou maʼuʼuli ʼi te malama foʼou.