Tou Haʼele ʼi Te ʼu Ala ʼo Sehova

“Fiafia ia te tagata fuli pē ʼe manavasiʼi kiā Sehova, ʼaē ʼe haʼele ʼi tona ʼu ala.”—PES. 128:1.

1, 2. He koʼē ʼe feala ke tou tui papau ʼe feala ke tou maʼu ia te maʼuli fiafia?

 TE FIAFIA—ʼe loto e te hahaʼi fuli ke natou maʼuli fiafia. Kae ʼe mahino ia, ʼe kotou fakamoʼoni anai ki te faʼahi ʼaenī: ko te fakaʼamu ki he maʼuli fiafia pea mo faiga kiai, ʼe kehekehe ʼosi ia mo he tahi kua maʼuli fiafia.

² Kae ʼe feala ke tou maʼu ia te maʼuli fiafia. ʼE ʼui fēnei ia Pesalemo 128:1: “Fiafia ia te tagata fuli pē ʼe manavasiʼi kiā Sehova, ʼaē ʼe haʼele ʼi tona ʼu ala.” ʼE feala ke tou maʼuli fiafia mo kapau ʼe tou tauhi ki te ʼAtua pea mo haʼele ʼi tona ʼu ala, ʼo tou fakalogo kiā te ia. ʼE malave feafeaʼi ia te faʼahi ʼaia ki tatatou aga pea mo te ʼu kalitātē ʼaē ʼe tou fakahā?

Ke Kotou Tuha Mo Te Falala

 3. Koteā te pikipikiga ʼo tatatou tuha mo te falala pea mo tatatou foaki ia totatou maʼuli ki te ʼAtua?

³ Ohagē pē ko Sehova, ʼe tuha mo te falala ia nātou ʼaē ʼe manavasiʼi kiā te ia. Neʼe fakahoko e Sehova ia te ʼu fakapapau fuli ʼaē neʼe ina fai ki te kau Iselaele. (1 Hau 8:56) Ko tatatou foaki ʼaē ʼo totatou mauli ki te ʼAtua ʼe ko he fakapapau maʼuhiga ʼaia neʼe tou fai, pea ʼe tou haga mulimuli anai ki tatatou fakapapau ʼaia mo kapau ʼe tou faikole tuʼumaʼu. ʼE feala hatatou faikole ohagē ko te tagata fai pesalemo ko Tavite, ʼaē neʼe ina ʼui fēnei: “Ko koe, ê ʼAtua, neʼe ke fagono ki taku ʼu fakapapau. . . . ʼE au fai anai he ʼu hiva ki tou huafa ʼo talu ai, ke au fakahoko taku ʼu fakapapau ʼi te ʼaho mo te ʼaho.” (Pes. 61:5, 8; Tnk. 5:4-6) Ke feala hatatou kaumeʼa mo te ʼAtua, ʼe tonu ke tou tuha mo te falala.—Pes. 15:1, 4.

 4. Koteā ʼaē neʼe fai e Sefeteo pea mo tona ʼofafine ʼo ʼuhiga mo te fakapapau ʼaē neʼe ina fai kiā Sehova?

⁴ ʼI te temi ʼo te ʼu Tuʼi Fakamāu ʼo Iselaele, neʼe fakapapau e Sefeteo, kapau ʼe foaki age e Sehova ia te mālo kiā nātou ʼi tanatou tauʼi ʼaē ia te kau Amonite, pea ʼe ina momoli anai ohagē ko he “holokosetā,” ia ia ʼaē kā ʼuluaki haʼu anai ʼo fakafelāveʼi mo ia ʼi tana toe liliu mai te tau. Neʼe ko te ʼofafine ʼo Sefeteo ʼaē neʼe haʼu ʼo ʼuluaki fakafelāveʼi mo ia—tana fānau ʼulu tokotahi. Ko Sefeteo pea mo tona ʼofafine ʼaē neʼe kei ʼeva, ʼaki tanā tui ʼaē kiā Sehova neʼe nā mulimuli aipē ki te fakapapau ʼaē neʼe kua fai e Sefeteo. Logolā ko te ʼohoana pea mo te maʼu fānau neʼe maʼuhiga ʼaupitō ʼi Iselaele, kae neʼe lotolelei ia te ʼofafine ʼo Sefeteo ke nofo selipatea, pea mo maʼu ia te pilivilēsio ʼaē ke ina fakahoko ia te tauhi taputapu ʼi te sagatualio ʼo Sehova.—Ktf. 11:28-40.

 5. Ko te ʼaluʼaga fea ʼaē neʼe fakahā ai e Ana neʼe tuha mo ia te falala?

⁵ Ko Ana, te fafine neʼe manavasiʼi ki te ʼAtua, neʼe tuha mo te falala. Neʼe maʼuli ʼi te ʼu potu moʼugaʼia ʼo Efalaime mo tona ʼohoana ko Elekana neʼe ko te tagata Levite, pea mo te fafine ko Penina, ʼe ko te tahi ʼaia ʼohoana ʼo Elekana. Neʼe fānaunau ia Penina pea neʼe ina fakalainoaʼi ia Ana ʼi tana mole maʼu fānau, tāfito lā ʼi te temi ʼaē neʼe ʼalu ai te fāmili ki te tapenakulo. ʼI te tahi lakaga ʼo te fagona ʼaia, neʼe fai e Ana ia tana fakapapau, mo kapau ʼe maʼu hana tama, pea ʼe ina foaki anai kiā Sehova. Mole tuai pea neʼe faitama, ʼo ina fānauʼi te tamasiʼi tagata neʼe fakahigoa ko Samuele. ʼI te kua ʼosi vavae ia te tamasiʼi, neʼe momoli leva e Ana ia Samuele ki te ʼAtua, ʼi Silo, ʼo ina foaki ia ia kiā Sehova ‘ ʼi tona maʼuli kātoa.’ (1 Sam. 1:11) Neʼe ina fakahoko ai te fakapapau ʼaē neʼe ina fai ki te ʼAtua, logolā tana mole ʼiloʼi ʼaē pe toe maʼu anai hana tahi fānau.—1 Sam. 2:20, 21.

 6. Neʼe fakahā feafeaʼi e Tukiko tana tuha mo te falala?

⁶ Ko te Kilisitiano ko Tukiko ʼo te ʼuluaki sēkulō, neʼe tuha mo te falala pea neʼe ko he “tagata faifekau agatonu.” (Kol. 4:7) Ko Tukiko neʼe folau mo te ʼapositolo ko Paulo, mai Keleka ʼo fakalaka ʼi Masetonia ki Asia Veliveli pea lagi ki Selusalemi. (Gāue 20:2-4) Neʼe lagi ko ia “te tehina” ʼaē neʼe tokoni kiā Tito ke fai ia te tānaki meʼa ʼofa maʼa te ʼu tehina ʼi Sutea, ʼaē neʼe ʼi te faigataʼaʼia. (2 Ko. 8:18, 19;  12:18) ʼI te ʼuluaki pilisoniʼi ʼo Paulo ʼi Loma, ko Tukiko, tana tagata fakafofoga pea mo tuha mo te falala, neʼe ina ʼave te ʼu tohi ki te ʼu tehina ʼi Efesi pea mo Kolose. (Efe. 6:21, 22; Kol. 4:8, 9) ʼI tona pilisoniʼi tua lua ʼi Loma, neʼe fekauʼi e Paulo ia Tukiko ki Efesi. (2 Tim. 4:12) Kapau ʼe tou tuha mo te falala, pea ʼe tou toe maʼu anai mo tātou ia te ʼu tapuakina ʼi te tauhi ʼaē kiā Sehova.

7, 8. He koʼē ʼe feala ke tou ʼui ko Tavite pea mo Sonatane neʼe ko he ʼu kaumeʼa moʼoni?

⁷ ʼE fakaʼamu ia te ʼAtua ke tou liliu ko he ʼu kaumeʼa ʼe tuha mo te falala. (Taag. 17:17) Ko Sonatane, ia te foha ʼo te Hau ko Saulo, neʼe kaumeʼa mo Tavite. ʼI te logo ʼaē ʼa Sonatane neʼe matehi e Tavite ia Koliate, “neʼe kamata pipiki te nefesi ʼo Sonatane ki te nefesi ʼo Tavite, pea neʼe kamata ʼofa ia Sonatane kiā te ia ohagē ko tona nefesi totonu.” (2 Sam. 18:1, 3) Neʼe toe fakahā e Sonatane kiā Tavite ia te faiga ʼaē e Saulo ke ina matehi ia Tavite. ʼI te ʼosi hola ʼa Tavite, neʼe ʼalu ia Sonatane ki ai pea neʼe ina fai te fuakava mo ia. Neʼe feala pē ke matehi ia Sonatane ʼi tana palalau age kiā Saulo ʼo ʼuhiga mo Tavite, kae neʼe toe felāveʼi te ʼu kaumeʼa ʼaia e toko lua pea neʼe nā toe fakamālohiʼi ai ia tonā fakakaumeʼa. (1 Sam. 20:24-41) ʼI tanā felāveʼi fakamuli leva, neʼe fakalotomālohiʼi e Sonatane ia Tavite “ ʼo ʼuhiga mo te ʼAtua.”—1 Sam. 23:16-18.

⁸ Neʼe mate ia Sonatane ʼi tana tauʼi ia te kau Filisitine. (1 Sam. 31:6) ʼI he hiva mate, neʼe tagi fēnei ia Tavite: “ ʼE au lotomamahi ʼo ʼuhiga mo koe, Sonatane toku tehina, neʼe ke fakatupu iā te au te toe fiafia lahi. Neʼe taulekaleka age kiā te au ia tou ʼofa ʼi te ʼofa ʼaē ʼo te hahaʼi fafine.” (2 Sam. 1:26) Ko te ʼofa ʼaia neʼe ko he ʼofa fakakaumeʼa kae neʼe mole ko he ʼofa ʼe fakatafito ki he ʼu aga heʼe ʼaoga. Neʼe ko he ʼu kaumeʼa moʼoni ia Tavite pea mo Sonatane.

Kotou “Agavaivai” Tuʼumaʼu

 9. ʼE fakahā feafeaʼi ʼi te kāpite 9 ʼo te tohi ʼo Kau Tuʼi Fakamāu ia te maʼuhiga ʼaē ke tou agavaivai?

⁹ Ke feala hatatou kaumeʼa mo te ʼAtua, ʼe tonu ke tou “agavaivai.” (1 Pet. 3:8; Pes. 138:6) ʼI te kāpite 9 ʼo te tohi ʼo Kau Tuʼi Fakamāu, ʼe fakahā ai ia te maʼuhiga ʼaē ke tou agavaivai. Neʼe ʼui fēnei e Sotame, te foha ʼo Seteone: “ ʼI te tahi ʼaho, neʼe ʼolo te ʼu fuʼu ʼakau moʼo fakanofo he hau kiā nātou.” ʼE talanoa ʼi henī ki te fuʼu ʼoliveto, te fuʼu fiku, pea mo te vite. Neʼe natou fakatātā te ʼu hahaʼi neʼe tuha ke vikiʼi nātou, he neʼe mole natou kumi ke natou puleʼi tonatou ʼu kaumeʼa Iselaele. Kae ko te kiʼi fuʼu ʼakau talatala—ʼaē ʼi te agamāhani ʼe fakaʼaogaʼi moʼo fai fafie—neʼe ina fakatātā ia te hau fialahi ko Apimeleke, te tagata faifakapō ʼaē neʼe mānumānu ki te tuʼulaga pule. Logolā neʼe ‘pule ki Iselaele iā taʼu e tolu,’ kae neʼe mate tautonu ia. (Ktf. 9:8-15, 22, 50-54) Koia, ʼe lelei age hatatou “agavaivai”!

10. Koteā te ako ʼe tou tāʼofi mai iā Helote ʼi tana “mole . . . fakakolōliaʼi te ʼAtua”?

¹⁰ ʼI te ʼuluaki sēkulō ʼo totatou temi, neʼe hoko te fihi ʼi te Hau fialahi ko Helote Akelipa ʼo Suta pea mo te hahaʼi ʼo Tile pea mo Sitone, ʼaē neʼe natou fia maʼu ia te tokalelei mo ia. ʼI te temi ʼaē neʼe fai ai e Helote tana akonaki, neʼe natou kalaga fēnei: “ ʼE ko te leʼo ʼo he ʼatua, ʼe mole ko he leʼo ia ʼo he tagata!” Neʼe mole fakafisi ia Helote ki te taʼi laupisi ʼaia, pea neʼe tāʼi ia ia e te ʼāselo ʼa Sehova, ʼo hoko ai kiā ia he mate fakamataku “koteʼuhi neʼe mole ina fakakolōliaʼi te ʼAtua.” (Gāue 12:20-23) ʼE feafeaʼi mo kapau ʼe tou faiva ʼi te faiakonaki pea mo te akoʼi ki te hahaʼi ia te ʼu moʼoni ʼa te Tohi-Tapu? Tou foaki ia te fakakolōlia ki te ʼAtua ʼo ʼuhiga mo te ʼu gāue ʼaē ʼe ina fakagafua mai ke tou fai.—1 Ko. 4:6, 7; Sake 4:6.

Tou Lototoʼa Pea Mo Mālolohi

11, 12. ʼE fakahā feafeaʼi e te meʼa ʼaē neʼe hoko kiā Enoke, ko Sehova ʼe ina foaki ki tana ʼu kaugana ia te lototoʼa pea mo te mālohi?

¹¹ Kapau ʼe tou haʼele ʼaki he agavaivai ʼi te ʼu ala ʼo Sehova, ʼe ina foaki mai anai ia te lototoʼa pea mo te mālohi. (Teu. 31:6-8, 23) Ko Enoke, te fitu tagata ʼi te hōloga mai iā Atama, neʼe haʼele mo te ʼAtua ʼaki he lototoʼa, he neʼe nofo agatonu ʼi te lotolotoiga ʼo te ʼu hahaʼi agakovi. (Sen. 5:21-24) Pea neʼe fakalotomālohiʼi e Sehova ia Enoke ke ina tala ia te logo maʼuhiga kiā nātou, ʼuhi ko tanatou ʼu palalau pea mo tanatou aga heʼe lotu. (Lau ia Suta 14, 15.) ʼE kotou lototoʼa koa ki te tala ʼaē ʼo te ʼu fakamāu ʼa te ʼAtua?

¹² Neʼe fakahoko e Sehova tana fakamāu ki te hahaʼi aga heʼe lotu ʼi te temi ʼo Noe, ʼaki te Tulivio ʼaē neʼe tō ki te mālamanei kātoa. Kae ko te lea fakapolofetā ʼa Enoke ʼe ko he fakalotomālohi kiā tātou, heʼe ko te hahaʼi heʼe lotu ʼo totatou temi, ʼe ʼamanaki fakaʼauha anai e te ʼu toko lauʼi miliate ʼāselo māʼoniʼoni ʼa te ʼAtua. (Fakh. 16:14-16; 19: 11-16) ʼE tali e Sehova ia tatatou ʼu faikole, ʼo ina foaki mai ia te lototoʼa ke tou tala tana logo ʼo ʼuhiga mo tana ʼu fakamāu peʼe ko te tapuakina ʼaē kā foaki mai ʼi te takitaki ʼa te Puleʼaga.

13. He koʼē ʼe feala ke tou tui papau ko te ʼAtua ʼe ina foaki ia te lototoʼa pea mo te mālohi ʼaē ʼe ʼaoga mai kiā tātou moʼo kātakiʼi totatou ʼu fihifihia fakatupu lotomamahi?

¹³ Moʼo tauʼi ia te lotomamahi ʼaē ʼe tou maʼu ʼuhi ko totatou ʼu fihifihia, ʼe ʼaoga kiā tātou ia te lototoʼa pea mo te mālohi ʼaē ʼe foaki mai e te ʼAtua. ʼI te temi ʼaē neʼe ʼohoana ai ia Esau pea mo te ʼu fafine Itite ʼe toko lua, neʼe ‘fakatupu mamahi te ʼu fafine ʼaia ki te ʼatamai ʼo Isaake pea mo Lepeka [ia tana ʼu mātuʼa].’ Pea neʼe hahanu fēnei ia Lepeka: “Kua au fakalialia ki toku maʼuli ʼuhi ko te ʼu ʼofafine ʼo Eti. Kapau ʼe ʼohoana [tatā tama] ia Sakopo mo he fafine mai te ʼu ʼofafine ʼo Eti ohagē ko nāua ʼaenī mai te ʼu taʼahine ʼo te fenua, koteā te ʼuhiga ʼo te maʼuli kiā au?” (Sen. 26:34, 35; 27:46) Neʼe fai e Isaake te fakatuʼutuʼu ʼo ina fekauʼi ia Sakopo ke ʼalu ʼo kumi mai hona ʼohoana ʼi te hahaʼi ʼe ʼatolasio kiā Sehova. Logolā neʼe mole kei feala kiā Isaake pea mo Lepeka ke nā fetogi ia te meʼa ʼaē neʼe fai e Esau, kae neʼe foaki age e te ʼAtua kiā nāua ia te poto, mo te lototoʼa, pea mo te mālohi ke nā nonofo agatonu kiā te Ia. Kapau ʼe tou kole kiā Sehova ke tokoni mai, pea ʼe ina toe fai fēia pē anai maʼa tātou.—Pes. 118:5.

14. Neʼe fakahā feafeaʼi e te kiʼi taʼahine Iselaele ia tona lototoʼa?

¹⁴ ʼI ni ʼu sēkulō ki muli age, ko te kiʼi taʼahine Iselaele neʼe puke e te kūtuga kaihaʼa, pea neʼe liliu ʼo kaugana ʼi te loto fale ʼo te kamutoa ʼo te kautau ʼo Silia ko Naamane, ʼaē neʼe kilia. ʼI tana logo ki te ʼu milakulo ʼaē neʼe fakahoko e te ʼAtua ʼaki te polofetā ko Eliseo, neʼe lototoʼa te kiʼi taʼahine ʼo ina ʼui fēnei ki te ʼohoana ʼo Naamane: ‘Kanapau lā neʼe ʼalu toku pule ki Iselaele, pea ʼe faitoʼo anai tona kilia e te polofetā ʼa Sehova.’ Pea neʼe ʼalu ia Naamane ki Iselaele, pea neʼe fakamālōlō fakamilakulo ai tona mahaki. (2 Hau 5:1-3) ʼE ko he faʼifaʼitaki lelei ʼe tuku mai e te kiʼi taʼahine ʼaia maʼa te kau tūpulaga ʼaē ʼe natou falala kiā Sehova ʼo ʼuhiga mo te lototoʼa ʼaē ke natou maʼu moʼo fakamafola ki tonatou kau faiako, mo tanatou kaugā ako, pea mo ʼihi atu!

15. Koteā te gāue lototoʼa neʼe fai e Opatia, te tagata tauhi ʼapi ʼi te loto fale ʼo Akape?

¹⁵ Ko te lototoʼa ʼaē ʼe foaki e te ʼAtua, ʼe tokoni mai ke tou kātakiʼi ia te fakataga. Tou vakaʼi age muʼa ia Opatia, te tagata tauhi ʼapi ʼi te loto fale ʼo te Hau ko Akape, pea neʼe maʼuli ʼi te temi ʼo te polofetā ko Elia. ʼI te temi ʼaē neʼe fakatotonu ai e te Fineʼaliki ko Sesapele ke matehi ia te ʼu polofetā ʼa te ʼAtua, pea neʼe fufū e Opatia ia te toko 100 iā nātou ʼo “taki nimagofulu ʼi te ʼana.” (1 Hau 18:13; 19:18) ʼE kotou lototoʼa anai koa ʼo tokoni ki tokotou ʼu tehina Kilisitiano ʼaē ʼe fakatagaʼi, ohagē ko te tokoni ʼa Opatia ki te ʼu polofetā ʼa Sehova?

16, 17. Koteā ʼaē neʼe fai e Alisitala pea mo Kaiusi ʼi te temi ʼaē neʼe fakatagaʼi ai nāua?

¹⁶ Kapau ʼe fakatagaʼi tātou, ʼe feala ke tou falala ko Sehova ʼe nofo anai mo tātou. (Loma 8:35-39) ʼI te malaʼe faigaoʼi ʼi Efesi, neʼe fakafeagai ia te hahaʼi tokolahi e toko lauʼi afe ki te ʼu kaugā gāue ʼa Paulo, ʼaē ko Alisitala pea mo Kaiusi. Pea neʼe ko te tagata tufuga ʼukamea ko Temetelio ʼaē neʼe ina fakatupu ia te maveuveu ʼaia. Ko ia pea mo te tahi ʼu tagata tufuga neʼe natou faʼu te ʼu ʼaletale siliva ʼo te ʼatua fafine ko Aletemisi, pea neʼe feala ke pulinoa ia tanatou matani gāue ʼaia ʼuhi ko te fai fakamafola ʼa Paulo, he neʼe kua tokolahi ia te hahaʼi ʼo te kolo neʼe kua natou liʼaki ia te tauhi tamapua. Neʼe toho e te toe hahaʼi tokolahi ʼaia ia Alisitala pea mo Kaiusi ki te malaʼe, ʼo natou haga kalaga: “ ʼE lahi ia Aletemisi ʼo te kau Efesi!” Neʼe lagi manatu ia Alisitala pea mo Kaiusi ʼe matehi anai nāua, kae ko te sikalaipe ʼo te kolo neʼe ina fakamalu ifo ia te ʼita ʼo te toe hahaʼi tokolahi ʼaia.—Gāue 19:23-41.

¹⁷ Kanapaulā neʼe tonu ke hoko kiā koutou ia te taʼi meʼa ʼaia, ʼe kotou faiga anai koa ke kotou hao mai ai? ʼE mole fakahā mai ʼi te Tohi-Tapu pe neʼe fula ia Alisitala pea mo Kaiusi. ʼUhi he neʼe tupu ake ʼi te kolo ʼo Tesalonika, neʼe ʼiloʼi e Alisitala neʼe feala ke fakatagaʼi ʼuhi ko tana fakamafola ia te logo lelei. Ki muʼa atu, neʼe hoko te maveuveu ʼi te temi ʼaē neʼe fai fakamafola ai ia Paulo ʼi te kolo ʼaia. (Gāue 17:5; 20:4) ʼUhi ko Alisitala pea mo Kaiusi neʼe nā haʼele ʼi te ʼu ala ʼo Sehova, neʼe nā maʼu ia te mālohi pea mo te lototoʼa ʼaē ʼe foaki mai e te ʼAtua moʼo kātakiʼi ia te fakataga.

Kotou Tōkakaga Ki Te ʼu ʼAluʼaga ʼo ʼIhi Atu

18. Neʼe “tōkakaga” feafeaʼi ia Pilisika pea mo Akila ki te ʼu ʼaluʼaga ʼo ʼihi atu?

¹⁸ Peʼe fakatagaʼi tātou ʼi te temi nei peʼe kailoa, kae ʼe tonu ke tou tōkakaga ki te ʼaluʼaga ʼo totatou ʼu tehina Kilisitiano. Ko Pilisika pea mo Akila neʼe nā  “tōkakaga” ki te ʼu ʼaluʼaga ʼo ʼihi atu. (Lau ia Filipe 2:4.) Neʼe lagi ko te taumātuʼa faʼifaʼitaki lelei ʼaia ʼaē neʼe nā fakaʼapi ia Paulo ʼi Efesi, ʼo fakatupu ai e Temetelio, te tagata tufuga ukamea ia te maveuveu ʼo te toe hahaʼi tokolahi, ʼaē neʼe kua tou talanoa kiai ki muʼa atu. ʼE lagi neʼe ko te ʼaluʼaga ʼaia ʼaē neʼe “mei tuʼusi ai tonā ʼu kia” maʼa Paulo. (Loma 16:3, 4; 2 Ko. 1:8) Iā ʼaho nei, ko tatatou tōkakaga ki te ʼaluʼaga ʼo totatou ʼu tehina ʼaē ʼe fakatagaʼi, ʼe tou liliu ai ʼo “fakaʼeteʼete ohagē he ʼu gata.” (Mat. 10:16-18) ʼE tou fakaʼeteʼete ʼi tatatou fai fakamafola pea ʼe mole tou lavakiʼi anai ia totatou ʼu tehina, ʼo mole tou fakahā kiā nātou ʼaē ʼe natou fakatagaʼi tātou ia tonatou ʼu higoa pea mo te tahi atu ʼu naunau.

19. Koteā te ʼu meʼa lelei neʼe fai e Tolokasi maʼa ʼihi?

¹⁹ ʼE lahi te ʼu faʼahi kehekehe ʼe feala ai ke tou fakahā ia tatatou tōkakaga ki te ʼaluʼaga ʼo ʼihi atu. Ko ʼihi kau Kilisitiano ʼe natou māʼuʼuli fakaʼofaʼofa, pea ʼe lagi feala ke tou foaki age ia te ʼu meʼa ʼaē ʼe ʼaoga kiā nātou. (Efe. 4:28; Sake 2:14-17) ʼI te kōkelekāsio ʼi Sope ʼo te ʼuluaki sēkulō, neʼe ʼi ai te fafine loto foaki neʼe higoa ko Tolokasi. (Lau ia Gāue 9:36-42.) Ko Tolokasi “neʼe lahi te ʼu gāue lelei pea mo te ʼu meʼa ʼofa neʼe ina fai” pea ʼe ʼasi mai neʼe ina tui mo te ʼu kofu maʼa te ʼu fafine vītua ʼaē neʼe faigataʼaʼia. ʼI tana mate ʼaē ʼi te taʼu 36 ʼo totatou temi, neʼe lotomamahi ʼaupitō ai ia te ʼu fafine vītua. Neʼe fakaʼaogaʼi e te ʼAtua ia te ʼapositolo ko Petelo moʼo fakatuʼuake ia Tolokasi, pea ʼe mahino ia neʼe ina fakaʼaogaʼi tona maʼuli ʼaia ʼi te kele moʼo fakamafola fakafiafia ia te logo lelei pea mo fai he ʼu meʼa lelei maʼa te hahaʼi. ʼE tou fiafia ʼaupitō ʼi tatatou fakatokagaʼi iā ʼaho nei ʼe ʼi ai te ʼu tuagaʼane fēia iā tātou, ʼe mole natou manatu pē kiā nātou!

20, 21. (a) Koteā te pikipikiga ʼo te fakalotomālohi pea mo te tōkakaga ʼaē ki te ʼu ʼaluʼaga ʼo ʼihi atu? (b) Koteā ʼaē ʼe feala ke kotou fai moʼo fakalotomālohiʼi niʼihi?

²⁰ ʼE tou tōkakaga ki te ʼu ʼaluʼaga ʼo ʼihi atu, ʼo tou fakalotomālohiʼi nātou. (Loma 1:11, 12) Ko Silasi, ʼaē neʼe kaugā gāue mo Paulo, neʼe ko he matapuna ʼo te fakalotomālohi. ʼI te teitei taʼu 49 ʼo totatou temi, ʼi te ʼosi fai ʼo te tonu ʼo ʼuhiga mo te silikōsisio, neʼe hinoʼi leva e te kolesi pule ʼo Selusalemi ia he ʼu tehina fakafofoga ke natou ʼolo ʼo ʼave ia te tohi ki te ʼu Kilisitiano ʼo te tahi ʼu kolo. Ko Silasi, mo Suta, mo Palenapa, pea mo Paulo neʼe natou ʼave te tohi ki Atiokia. ʼI te tau atu ʼa Silasi pea mo Suta ki te kolo ʼaia, neʼe nā “tokoniʼi te ʼu tehina ʼaki te ʼu tuʼuga akonaki pea neʼe nā fakalotomālohiʼi nātou.”—Gāue 15:32.

²¹ Ki muli age, neʼe pilisoniʼi ia Paulo mo Silasi ʼi Filipe, kae neʼe hoko te mafuike ʼo nā ʼāteaina ai. Neʼe nā fiafia lahi ʼi tanā fai fakamafola ʼaē ki te tagata leʼo pilisoni pea mo sio kiā ia pea mo tona loto fale neʼe liliu ko he kau Kilisitiano! ʼI muʼa ʼo tanā mavae ʼi te kolo ʼaia, ko Silasi pea mo Paulo neʼe nā fakalotomālohiʼi te ʼu tehina. (Gāue 16:12, 40) Ohagē ko Paulo pea mo Silasi, kotou faigaʼi ʼaki takotou ʼu tali, mo takotou ʼu akonaki, pea mo takotou faʼafai ʼi te selevisi ke kotou fakalotomālohiʼi niʼihi atu. Pea kā kotou fia fai “he palalau fakalotomālohi, . . . kotou palalau.”—Gāue 13:15.

Tou Haga Haʼele ʼi Te ʼu Ala ʼo Sehova

22, 23. ʼE tou lava maʼu moʼoni feafeaʼi ia te ʼu lelei mai te ʼu fakamatala ʼi te Tohi-Tapu?

²² ʼE tonu ke tou loto fakafetaʼi ʼo ʼuhiga mo te ʼu hisitolia moʼoni ʼaē ʼe fakamatala ʼi te Folafola ʼa Sehova, te “ ʼAtua ʼo te fakalotomālohi kātoa”! (2 Ko. 1:3, Byington) Kapau ʼe tou fia maʼu ia te ʼu ako lelei ʼaē mai te ʼu fakamatala ʼaia, pea ʼe tonu ke tou maʼuliʼi te ʼu ako ʼaē neʼe tou tāʼofi mai te Tohi-Tapu, pea mo tou fakalogo ki te takitaki ʼa te laumālie māʼoniʼoni ʼo te ʼAtua.—Kal. 5:22-25.

²³ Ko te metitāsio ki te ʼu fakamatala ʼi te Tohi-Tapu, ʼe tokoni mai anai ke tou fakahā te ʼu kalitātē ʼaē ʼe leleiʼia e te ʼAtua. ʼE mālohi ai anai tatatou ʼu felōgoi mo Sehova, ʼaē ʼe ina foaki mai “te poto mo te ʼatamai mālama pea mo te fiafia.” (Tnk. 2:26) Pea ʼe tou lava fakafiafia ai ia te loto ʼofa ʼo te ʼAtua. (Taag. 27:11) ʼOfa pē ke tou fakatotonu ke tou haga fai te faʼahi ʼaia, ʼo tou haga haʼele ʼi te ʼu ala ʼo Sehova.

ʼE Kotou Tali Feafeaʼi Anai?

• ʼE kotou lava fakahā feafeaʼi ʼe kotou tuha mo te falala?

• He koʼē ʼe tonu ke tou “agavaivai”?

• ʼE lava tokoni feafeaʼi e te ʼu fakamatala ʼi te Tohi-Tapu ke tou lototoʼa?

• Ko te ʼu faʼahi fea ʼaē ʼe feala ai ke tou tōkakaga ki te ʼu ʼaluʼaga ʼo ʼihi atu?

[ʼU fehuʼi ʼo te ako]