Te ʼu Fehuʼi ʼa Te Kau Lautohi

ʼE Hoko ʼIfea Ia Te Tau ʼo Halamaketone?

Ko te tau ʼo Halamaketone ʼe mole hoko anai ʼi he koga meʼa ʼi te kele. Kae ʼe hoko anai ia te tau ʼaia ʼi te kele kātoa. Koteā tona tupuʼaga? Heʼe ko te ʼu faʼahi e lua ʼaē kā fehōkosi, ʼe nā kaugamālie, ʼo mole feala ke hoko te tau ʼaia ʼi he faʼahi pē ʼo te kele.

ʼE toe fakaʼuhiga ia Halamaketone ki “te tau ʼo te ʼaho lahi ʼo te ʼAtua te Māfimāfi.” ʼE fakaʼaogaʼi anai e Sehova ʼAtua ia tona ʼAlo, ia Kilisito Sesu, ke ina fakamāʼopoʼopo ia te kautau ʼāselo moʼo tauʼi ia te ʼu mālohi ʼo te ʼu pule agakovi fuli pē ʼo te kele ʼaē ʼe natou fakatahi anai.—Fakahā 16:14; 19:11-16.

Kua hagē pē neʼe uga e he ʼu mālohi fakatemonio ia te ʼu puleʼaga ke natou kau ki te tau. ʼE talanoa ʼi te Tohi-Tapu ʼo ʼuhiga mo “te ʼu palalau ʼe haʼu mai te kau temonio” ʼe ʼolo “ki te ʼu [pule] hau ʼo te kele kātoa [ʼaē ʼe nofoʼi], ke natou fakatahiʼi ia nātou . . . ki te koga meʼa ʼaē ʼe higoa ʼi te Fakahepeleo ko Hala-Maketone.”—Fakahā 16:14-16.

ʼE mole ʼi ai he tahi age tohi ʼi te Tohi-Tapu, gata pē ki te tohi ʼo Fakahā neʼe ina fakatupu ʼi te fakakaukau ʼa te kau lautohi e tokolahi ia he fia mahino ki te ʼu palalau ʼo te tohi ʼaia. Tokolahi te hahaʼi ʼe natou lau te tohi ʼaia, ʼe natou fakaʼuhiga ia te ʼu palalau ki he ʼu meʼa ʼe hoko moʼoni, ʼo natou mahino ʼe kamata anai te tau ʼi he potu ʼo te kele, pea ʼe natou sivisivi tāfito ia te ʼu meʼa ʼaē ʼe hoko ʼi te koga meʼa ʼaia. ʼE feala ke tou maʼu ʼi te ʼu tohi ʼāfea Fakakeleka ia te fakamatala ʼo ʼuhiga mo te Fakahā, neʼe tohi e Oecumenius ʼi te ono sēkulō ʼo totatou temi, ia te fakaʼuhiga ʼo Halamaketone ki he koga meʼa ʼo te kele.

ʼI tana toe hoko atu ia te manatu neʼe maʼu e te tokolahi ʼi te keletiate Fondamentaliste, ko John F. Walvoord, te pelesitā ʼafea ʼo te Seminalio Fakateolosia ʼo Dallas, ʼe ina ʼui ko Halamaketone ʼe ko “te tau fakaʼosi fakamālamanei ʼe kaugamālie ai anai te kau mātea pea mole toe ʼi ai hona haofakiʼaga ʼi te Moyen Orient.” Pea ʼe ʼui e Walvoord ʼe hoko anai te tau lahi ʼaia ʼi “ ‘te Moʼuga ʼo Mekito,’ ko te kiʼi moʼuga ʼe tuʼu ʼi te potu noleto ʼo Palesitina ʼi te tuʼakoi ʼo te malaʼe.”

Kae ko te tohi ʼo Fakahā ʼe mole ko he mape ʼe ina hinoʼi mai he koga meʼa ʼo te kele ʼe higoa ko Halamaketone. Ko te ʼuluaki vaega ʼe ʼui ai ko te fakamatala ʼe fai “ ʼaki he ʼu fakaʼiloga.” (Fakahā 1:1) Talu mai fualoa, neʼe ʼui e te kau Fakamoʼoni ʼa Sehova ʼi tanatou tohi Études des Écritures, Tohi 4: “ ʼE mole matou fakatalitali ki he fakatātānaki ʼo he hahaʼi moʼoni ʼi te Moʼuga ʼo Mekito.”

Ko te ʼu meʼa ʼaē neʼe hoko ʼi Mekito ʼe natou fakatā te meʼa kā hoko anai pea ʼe mole toe feala ai anai ki te ʼu fili ʼo te ʼAtua ke natou hao ai. Koia, ʼi Halamaketone, ʼe tokaga tāfito anai te ʼAtua ke fakaʼauha ia te agakovi fuli, ʼi te ʼu potu fuli pē ʼo te kele ʼaē ʼe fakahoko ai te agakovi.—Fakahā 21:8.

Ko nātou ʼaē ʼe ʼofa kiā Sehova ʼAtua pea mo tona ʼAlo, ia Sesu Kilisito, ʼe mole tonu ke natou mātataku ʼi Halamaketone. ʼE fakahaga pē anai ia te tau ʼa te ʼAtua ki te hahaʼi ʼaē kua ina fakamāu ʼe ko ni hahaʼi agakovi pea ʼe mole natou fia fetogi. Ko tana tau ʼe faitotonu heʼe mole ko te hahaʼi fuli pē ʼaē kā ina fakaʼauha anai. ʼE ʼui fēnei ʼi te Tohi-Tapu: “ ʼE ʼiloʼi e Sehova peʼe feafeaʼi te fakahao . . . [ʼo] te hahaʼi ʼaē ʼe pipiki ki te ʼAtua.” (2 Petelo 2:9) ʼE tuʼu iā Pesalemo 37:34 ia te fakapapau fakalotofīmālie ʼaenī: “Falala kiā Sehova pea taupau tona ala, pea ʼe ina hikihiki anai koe ke ke maʼu te kele. Kā toʼo kehe anai te hahaʼi agakovi, ʼe ke sio anai kiai.”