ʼE Kotou ʼIloʼi Koa Ia Takotou Tamai ʼAē ʼi Selō?

ʼE KOTOU ʼiloʼi lelei koa ia takotou tamai? ʼE lagi mata faikehe ia te fehuʼi ʼaia mo kapau neʼe kotou lahilahi ake ʼi he fāmili ʼe maʼu ai te ʼofa. ‘ ʼEī foki, ʼe au ʼiloʼi lelei ia ia!’ ʼE lagi kotou tali fēia anai. ʼEī, tokolahi ʼe natou ʼiloʼi ia te meʼa ʼaē ʼe fia fai kiai pea mo ʼaē ʼe fehiʼa kiai ia tanatou tamai, peʼe feafeaʼi tana aga ʼi he faʼahiga ʼaluʼaga, peʼe feafeaʼi ia tana tokaga ki te fāmili.

Kae, ʼi ʼihi temi ʼe lagi kotou punamaʼuli mokā kotou sisio ki he agaaga ʼo takotou tamai ko takotou hoki mālama ʼaia kiai. Ohagē lā, ko he tama ʼe lagi ina ʼiloʼi lelei ia tana tamai ohagē ko he tahi ʼe fakatokatoka pea mo agamalū—ʼo aʼu pē ki te hoko mai ʼo he fihifihia. Fokifā pē ʼe sio ki tana tamai ʼe lotomālohi ke ina puipui tona fāmili.

ʼE kotou ʼiloʼi lelei koa ia totatou Tupuʼaga? ʼO ʼuhiga mo ia, ʼe ʼui fēnei mai: “ ʼE tou maʼu te maʼuli mai iā te ia pea mai iā te ia ʼe tou gaugaue.” (Gāue 17:28) ʼE tou māʼuʼuli ʼuhi ko te ʼAtua; ko tona fakaʼuhiga ko ia te Tamai ʼo te ʼu meʼa maʼuli fuli. (Isaia 64:8) ʼE lagi kotou manatu fēia ʼo ʼuhiga mo te ʼAtua, pea ʼe lelei heʼe tonu ke tou manatuʼi fēia ia ia. Kae ʼe lahi te ʼu faʼahi ke tou ʼiloʼi pea mo tou ako ʼo ʼuhiga mo ia—ʼo fua lelei ai pea mo fakafiafia ai kiā tātou.

Ko te ʼu meʼa ʼaē ʼe tou logoʼi ʼo ʼuhiga mo tatatou tamai pea mo tatatou fakaʼapaʼapa ki ai ʼe fakalogo ki tatatou ʼiloʼi lelei ia ia. ʼO toe fēia aipē kapau ʼe tou ʼiloʼi lelei ia te ʼAtua, pea ʼe mālohi anai ia tatatou ʼu felōgoi takitokotahi pea mo ia. ʼE feala ki te ʼAtua ke tokoni mai ke tou kātakiʼi ia te ʼu faigataʼaʼia ʼo te maʼuli, mo kapau ʼe tou faigaʼi ke tou ʼiloʼi lelei ia ia pea mo tou ako ia te fai ʼo tona finegalo.

Koteā te ʼulugaaga ʼo te ʼAtua? ʼE tonu ke malave feafeaʼi ia tona ʼu kalitātē ki te ʼu meʼa ʼaē ʼe tou logoʼi ʼo ʼuhiga mo ia? Ko tatatou ʼiloʼi ia ia ʼe ʼi ai koa mo he ʼu fakamaʼua kiā tātou? ʼE tali anai ki te ʼu fehuʼi ʼaia ia te ʼalatike ʼaē kā hoa mai.

[Paki ʼo te pasina 3]

Ko te ʼu meʼa ʼaē ʼe kotou logoʼi ʼo ʼuhiga mo niʼihi ʼe fakalogo ki takotou ʼiloʼi lelei ia nātou