Ko Ai Moʼoni Koa Ia Tatatou Tamai ʼAē ʼi Selō?

TOKOLAHI ʼe feala ke natou lau fakaʼatamai ia te faikole ʼaē ko Tamatou Tamai ʼAē ʼi Selō, peʼe ko te Faikole ʼa Te ʼAliki, ia te faikole faʼifaʼitaki ʼaē neʼe akoʼi e Sesu ki tana kau tisipulo. (Mateo 6:9-13) ʼI te temi fuli ʼe natou lau ai ia te faikole ʼaia, ʼe natou pāui ki te ʼAtua “Tamatou Tamai ʼAē ʼi Selō.” Ko te toko fia ʼe feala ke natou ʼui ʼe natou ʼiloʼi lelei ia ia?

ʼE feafeaʼi ʼo ʼuhiga mo koutou? ʼE kotou ʼiloʼi lelei koa ia te ʼAtua? ʼE kotou felōgoi lelei koa mo ia, ʼe kotou palalau koa ki ai, pea ʼe kotou vaevae koa ia tokotou fiafia pea mo tokotou lotomamahi pea mo ia? ʼI tona fakahagatonu, koteā ia te fakaʼuhiga ʼo tatatou ʼiloʼi ia te ʼAtua?

“Ko Tona Huafa Ko Sehova”

Ko te meʼa pē ʼe lagi ʼiloʼi e he tamasiʼi ʼo ʼuhiga mo tana tamai ʼe higoa ko Papa. Kae ʼaki tana lahilahi ake, ʼe ina ʼiloʼi te higoa totonu ʼo tana tamai, ʼe lagi fiameʼameʼa ʼo ʼuhiga mo tana tamai. Kae ʼe feafeaʼi ʼo ʼuhiga mo ia ʼaē ʼe ʼi selō, ʼaē ko te Matapuna ʼo Te Maʼuli? ʼE kotou ʼiloʼi koa ia tona huafa pea koteā tona fakaʼuhiga?

Tatau aipē pe tokolahi ʼe natou lau ia te ʼu kupusiga palalau ʼaenī: “Ke tapuhā tou huafa” mokā natou lau ia te Faikole ʼa Te ʼAliki, ʼe lagi mole natou ʼiloʼi ia te tali mokā fehuʼi age: “Ko ai tona huafa?” (King James Version) Ko te ʼu fetuʼu ʼi te lagi, te ʼu moʼuga matalelei, te lanu kehekehe ʼo te ʼu feo ʼo te lauhakau ʼaē ʼe lahi ai te ʼu ika kehekehe ʼe māʼuʼuli ai—ʼe natou fakamoʼoni ʼe maʼuli moʼoni ia te ʼAtua. Kae ʼe mole natou fakahā mai tona huafa. Ke tou ʼiloʼi tona huafa, ʼe ʼaoga ke tou vakaʼi ia te Tohi-Tapu. ʼE ʼui fakanounou mai ai: “Ko tona huafa ko Sehova.”—Ekesote 15:3.

ʼE loto e te ʼAtua ke tou ʼiloʼi ia ia ʼi tona huafa, ʼaē ko Sehova. Koteā tona tupuʼaga? Koteʼuhi ko tona huafa ʼe ina fakahā ia tona ʼulugaaga. Ko te fakaʼuhiga ʼo tona huafa “ ʼE Ina Fakahoko.” Ko tona tahi fakaliliu, ʼe liliu pē ia ʼo mulimuli ki he meʼa ʼe tonu ke fai moʼo fakahoko tana fakatuʼutuʼu. Tou fakakaukauʼi age muʼa ia te faʼahi ʼaenī: Ke feala hana tokaga ki tona fāmili, ko he tamai ʼe tonu ke liliu ko ia ʼaē ʼe ina taupau te maʼuli fakasino ʼo tona fāmili, ko he tagata fai tokoni, ko he tuʼi fakamāu, ko he fakafelōgoi, ko he puipuiʼaga, pea mo he faiako, ʼe fakalogo ki ai ia te ʼu meʼa ʼaē ʼe ʼaoga pea mo te ʼaluʼaga ʼo te fāmili. ʼE toe fēia aipē ko te huafa ʼo Sehova ʼe ina fakamoʼoni mai kiā tātou ʼe feala ki te ʼAtua ke ina fakahoko kātoa ia tona finegalo ʼaē ko te tapuakinaʼi ʼo nātou fuli ʼe tauhi kiā te ia, ʼo mole tou tuʼania ia te meʼa ʼaē kā hoko anai ʼi te kā haʼu.

Tou vakaʼi age muʼa ia te ʼu gāue kehekehe ʼaē ʼe fai e totatou ʼAtua ʼofa, ʼaē ʼe ʼalutahi mo te fakaʼuhiga ʼo tona huafa. ʼE tokoni atu anai kiā koutou ke kotou leleiʼia te ʼulugaaga ʼo te ʼAtua ko Sehova, ʼo toe fēia mo te ako peʼe koteā ʼaē ʼe tonu ke tou fai ke tou fakaovi ki ai.

“Te ʼAtua ʼo Te ʼOfa Pea Mo Te Tokalelei”

Neʼe fakahigoaʼi e te ʼapositolo ko Paulo ia totatou Tupuʼaga ko “te ʼAtua ʼo te ʼofa pea mo te tokalelei.” (2 Kolonito 13:11) Koteā tona tupuʼaga? Ki muʼa atu, neʼe ʼui fēnei e Sesu Kilisito: “Ko te ʼAtua, ʼi tona ʼofa lahi ki te mālamanei, neʼe ina foaki mai tona ʼAlo ʼulutokotahi, koteʼuhi ko ʼaē ʼe tui kiā te ia, ke ʼaua naʼa fakaʼauha kae ke ina maʼu ia te maʼuli heʼegata.” (Soane 3:16) ʼUhi ko tona ʼofa lahi ki te mālamanei, neʼe foaki e te ʼAtua ia tona ʼAlo ʼofaina ko he totogi,  ke feala kiā nātou fuli ʼaē ʼe tui kiā te ia ke natou maʼu ia te maʼuli heʼegata, ʼo natou ʼāteaina mai te lotomamahi pea mo te mamahi ʼuhi ko te agahala. Ko te tupuʼaga lā ʼaia ʼo te toe ʼui fēnei ai e te ʼapositolo ko Paulo: “Ko te totogi ʼaē ʼe foaki e te agahala, ko te mate, kae ko te meʼa ʼofa ʼaē ʼe foaki mai e te ʼAtua, ko te maʼuli heʼegata ʼaki ia Kilisito Sesu totatou ʼAliki.” (Loma 6:23) ʼE mole tonu koa lā ke ina uga tātou ke tou ʼofa ki te ʼAtua pea mo tou fakaovi ki ai?

ʼE mole fakahā pē e te ʼAtua ia tona ʼofa ki te hahaʼi fuli ʼo te mālamanei kae ʼe ina toe fakahā pē ki tana kau agatonu ʼaē ʼe fai totonu. Neʼe ʼui fēnei e Moisese ki te kau Iselaele ʼo te temi muʼa ʼaē neʼe natou tautau talagataʼa: “Ê hahaʼi vavale pea mo hala mo ʼatamai, ʼe fēia koa hakotou haga liufaki kiā Sehova? ʼE mole ko ia koa lā tau Tamai, ʼaē neʼe ina fakatupu koe, ia ia ʼaē neʼe ina faʼu koe pea mo ina fai ke ke tuʼu maʼu?” (Teutalonome 32:6) ʼE kotou mahino koa ki te maʼuhiga ʼo te ʼu palalau ʼaia? Ohagē ko te Tamai ʼofa, ko Sehova ʼe tokaga ki tana hahaʼi, logolā ʼe mahino ki tonatou ʼuhiga agahala. Pea ʼe ina foaki kiā nātou ia te ʼu meʼa fuli ʼaē ʼe ʼaoga kiā nātou—ʼi te faʼahi fakasino, ʼi te faʼahi ʼo te loto, pea mo te faʼahi fakalaumālie.

ʼE tou felāveʼi fuli mo te ʼu temi fiafia pea mo te ʼu temi mamahi, pea ʼi ʼihi temi ʼe tou logoʼi ai ia te lotomamahi, peʼe tou lotovaivai ai. ʼE ʼaoga ke tokoni mai he tahi ke tou fakatonutonuʼi ia tatatou faʼahiga sio ki totatou ʼaluʼaga pea mo totatou ʼu fihifihia. Ko ai ʼaē ʼe feala ke tokoni mai? ʼAki ia tana Folafola, ia te Tohi-Tapu, ʼe fakahā ai e Sehova ia tona ʼuhiga Tagata Fai Tokoni pea mo Loto Tokaga. ʼE fakamahino ʼi te Tohi Taputapu ʼaia ia te tupuʼaga ʼo tatatou tau mo te ʼu toe mamahi lahi pea ʼe ina toe fakahā ai foki peʼe feafeaʼi hatatou lava tauʼi. Ohagē pē ko he tamai ʼofa ʼe tokoni ki tona foha neʼe toka pea lavea ai, ko Sehova ʼi tona ʼofa lahi ʼe fakamālalo ifo ke ina foaki mai ia te tokoni ʼaē ʼe ʼaoga kiā tātou. ʼEī, ʼe fealagia pea ʼe lotolelei ia Sehova ke tokoni kiā nātou ʼaē ʼe tui kiā te ia.—Isaia 59:1.

Ko te ʼofa ʼo te ʼAtua kiā tātou ʼe toe ʼiloga foki ʼi tana “Fagono ki te faikole.” (Pesalemo 65:2) ʼO feafeaʼi? ʼE fakamahino fēnei e te ʼapositolo ko Paulo: “ ʼAua naʼa kotou tuʼania ki he meʼa, kae ʼi te faʼahi fuli, ʼaki te faikole pea mo te ʼu kole mamahi ʼaki te fakafetaʼi, kotou fakahā ki te ʼAtua takotou ʼu kole; pea ko te tokalelei ʼa te ʼAtua, ʼaē ʼe māʼoluga ake ʼi te ʼu manatu fuli, ʼe ina taupau anai tokotou ʼu loto pea mo tokotou ʼu ʼatamai ʼaki ia Kilisito Sesu.” (Filipe 4:6, 7) ʼAki hakotou faikole fakamālotoloto ki te ʼAtua pea mo kotou mulimuli ki te ʼu tokoni ʼaē ʼe foaki mai ʼi tana Folafola, ʼe feala ai mo koutou ke kotou ʼiloʼi ia “te tokalelei ʼa te ʼAtua, ʼaē ʼe māʼoluga ake ʼi te ʼu manatu fuli.”

“Ko Te ʼAtua ʼo Te ʼAtamai Mālama”

ʼI te Tohi-Tapu ʼe fakahā ai ko Sehova ʼe “haohaoa ʼi te ʼatamai mālama.” ʼUhi “ko te ʼAtua ʼo te ʼatamai mālama,” ʼe mahino ia ki te tagata pea mo ina ʼiloʼi lelei age ia te ʼu meʼa ʼaē ʼe ʼaoga ki ai. (Sopo 36:4; 1 Samuele 2:3) Neʼe ina fakahā ki tana kaugana ko Moisese “ko te tagata ʼe mole maʼuli ʼaki pē te pane, kae ʼe maʼuli te tagata ʼaki te folafola fuli pē ʼaē ʼe haʼu mai te gutu ʼo Sehova.” (Teutalonome 8:3; Mateo 4:4) Ko tona fakaʼuhiga, ke tou maʼuli fiafia moʼoni, ʼe mole tou maʼu pē ʼi te ʼu koloa fakamālama.

ʼE foaki mai e totatou Tupuʼaga ia he takitaki pea mo he ʼu tokoni ʼe maʼuhiga kiā tātou ʼaki ia tana Folafola, ia te Tohi-Tapu. Kā tou akoʼi ia te Tohi-Tapu pea mo tou maʼuliʼi ia tana tokoni, ʼe fua lelei anai kiā tātou ia “te folafola fuli pē ʼe haʼu mai te gutu ʼo Sehova.” Ohagē lā ko te tuagaʼane ko Susana, neʼe ina ʼui fēnei ʼo ʼuhiga mo tona maʼuli fakafāmili: “Ko tamā ʼohoana neʼe liliu ʼo mālohi ʼi tamā lau fakatahi ia te Tohi-Tapu, mo tamā kau fakatahi ki te ʼu fono  Fakakilisitiano, pea mo tamā fakahā ki ʼihi ia tamā tui ki te Tohi-Tapu. ʼUhi ko te takitaki ʼa te ʼAtua, ʼe mā maʼu te fakatuʼutuʼu e tahi ʼi te maʼuli pea ʼe toe mālohi age mo tamā ʼu felōgoi.”

ʼE kotou loto koa lā ke fua lelei kiā koutou ia te tokoni pea mo te takitaki fakalaumālie ʼaē ʼe foaki mai e te ʼAtua? ʼAki hakotou akoʼi tuʼumaʼu ia te Tohi-Tapu pea mo maʼuliʼi ia te ʼu tokoni ʼa te Tohi-Tapu, ʼe feala ke kotou maʼu ai he ʼu tuʼuga tapuakina mai iā te ia.—Hepeleo 12:9.

“Te ʼAtua ʼo Te Haofaki”

ʼI totatou temi, ʼe lahi te ʼu fihi ʼi te mālamanei. ʼE mole ʼiloʼi e te hahaʼi peʼe koteā ʼaē kā hoko anai ʼi te kā haʼu. Kapau ʼe kotou māʼuʼuli ʼi he fenua ʼe hoko ai te tau, ʼe lagi kotou fakaʼamu ki te tokalelei. ʼI te tahi ʼu potu ʼo te mālamanei, tokolahi ʼe natou māʼuʼuli ʼi te tuʼania ki te fai fakapō pea mo te agamālohi, ki te ʼu faigataʼaʼia fakaekonomika, pea mo te hoko ʼo he agamālohi. Ko ai anai ʼaē kā ina haofaki tātou mai te ʼu faʼahi fuli ʼaia? Kua maʼuhiga tāfito age ʼi te temi nei ke puipui pea mo haofaki ia te mālamanei.

ʼE ʼui fēnei ʼi te Tohi-Tapu: “Ko te huafa ʼo Sehova ʼe ko he tule mālohi. ʼE lele kiai te tagata agatonu pea ʼe haofaki ai.” (Tāʼaga Lea 18:10) Ko te ʼiloʼi pea mo te falala ki te huafa ʼo te ʼAtua ʼe feala ke ina uga tātou ke tou manatuʼi ia te meʼa ʼaē neʼe ina fai pea mo ʼaē kā ina fai anai moʼo haofaki ʼo nātou ʼaē ʼe tui kiā te ia. Neʼe fakahā lelei e Sehova ʼAtua ʼe feala ke ina haofaki ia tana hahaʼi. Ohagē lā, neʼe ina haofaki ia te kau Iselaele ʼaki ia tana maumauʼi ia te ʼu sāliote tau ʼa Falaone pea mo tana kau sōlia. Neʼe fakahā ai e Sehova ʼe ko ia ʼe ko te ʼAtua faitotonu, ko te ʼAtua ʼe ina manatuʼi ia nātou ʼaē ʼe lotomamahi pea mo ina loto ke tokoni age kiā nātou.—Ekesote 15:1-4.

ʼE toe fakalogo totatou kā haʼu heʼegata ki tatatou tui ko Sehova ʼAtua ʼe ko te Haofakiʼaga. Ko te hau ko Tavite ʼo te Iselaele ʼo te temi muʼa, ʼaē neʼe ina tauʼi ia te ʼu tuʼuga mamahi, ʼe hā mai neʼe ina fakaʼuhiga ia te ʼAtua ohagē ko hona Haofakiʼaga ʼi te temi ʼaē neʼe ina tohi fēnei ai ʼo ʼuhiga mo Sehova: “Ko koe ko toku ʼAtua ʼo te haofaki.” (Pesalemo 25:5) ʼAki he loto falala neʼe tala fēnei e te ʼapositolo ko Petelo: “ ʼE ʼiloʼi e Sehova peʼe feafeaʼi te fakahao mai te ʼahiʼahi te hahaʼi ʼaē ʼe pipiki ki te ʼAtua.”—2 Petelo 2:9.

ʼO ʼuhiga mo he tahi ʼe falala, ʼe tokoni anai te ʼAtua ki ai, ʼe fakapapau fēnei e te ʼAtua: “ ʼE au puipui anai ia ia, koteʼuhi kua ina ako te ʼiloʼi ʼo toku huafa.” (Pesalemo 91:14) Ko te ʼu kaugana ʼa te ʼAtua iā ʼaho nei ʼe natou ʼiloʼi ia te moʼoni ʼo tana fakapapau ʼaia. Ko Henryk ʼi Polonia neʼe tauhi agatonu ʼaē kiā Sehova iā taʼu e 70, logopē lā ia te fakafeagai pea mo te fakataga. ʼI te temi ʼaē neʼe kei taʼu 16 ai ia Henryk, neʼe ʼave ai tana tamai ki te lotoʼā fakamamahi ʼo Auschwitz. Neʼe ʼave ai ia Henryk pea mo tona taʼokete ki te fale pilisoni Nasi maʼa te kau tūpulaga. Hili ʼaia, neʼe mavae mai te tahi lotoʼā fakamamahi ki te tahi age. ʼO ʼuhiga mo te ʼu meʼa ʼaē neʼe hoko ʼi te temi ʼaia, neʼe manatuʼi fēnei e Henryk: “ ʼI te ʼu ʼaluʼaga faigataʼa fuli ʼaia ʼaē  neʼe hoko kiā au, neʼe mole liʼakina au e Sehova ʼi he temi. Neʼe tokoni tuʼumaʼu mai ke au nofo agatonu, logo aipē te tuʼa lahi ʼaē neʼe tuʼutāmakiʼia ai toku maʼuli.” ʼEī, ʼe foaki e Sehova ki tana ʼu kaugana ia te tui pea mo te mālohi ʼaē ke natou faʼa kātaki.

Kua vave ia te haofaki anai e te ʼAtua ia nātou fuli ʼe tui kiā te ia pea mo falala ki ai ʼo ʼuhiga mo te haofaki. Neʼe ina ʼui fēnei: “Ko au ia Sehova, pea ʼe mole ʼi ai he tahi age haofakiʼaga.” (Isaia 43:11) ʼI “te tau ʼo te ʼaho lahi ʼo te ʼAtua te Māfimāfi,” ʼe ina molehi anai te kau agakovi ʼi te fuga ʼo te kele pea ʼe ina haofaki anai ia te hahaʼi faitotonu. (Fakahā 16:14, 16; Tāʼaga Lea 2:21, 22) ʼE fakapapau fēnei mai e Sehova kiā tātou: “Ko te kau agavaivai ʼe natou maʼu anai te kele, pea ʼe natou fiafia moʼoni anai ʼi te mahu ʼo te tokalelei.”—Pesalemo 37:11.

Kotou Liliu Ko “Te Fānau ʼa Te ʼAtua”

ʼI te temi ʼo te polofetā ko Malakia, neʼe felauʼaki e te kau Iselaele ko Sehova ʼe ko tanatou Tamai. Kae ʼi te temi ʼaē neʼe natou ʼiloʼi ai neʼe tonu ke natou fakaʼapaʼapa pea mo pipiki kiā te ia, neʼe natou foaki fakasākilifisio he ʼu pane heʼe maʼa pea mo he ʼu manu neʼe kivi pea mo ketu. Ko te tupuʼaga lā ʼaia ʼo te fehuʼi age e Sehova kiā nātou: “Kapau foki ko au ko he tamai, pea ʼe kofea te fakaʼapaʼapa ʼaē ʼe tonu ke fai mai kiā te au?”—Malakia 1:6.

ʼAua naʼa kotou fai ia te hala ʼaē neʼe fai e te kau Iselaele heʼe agatonu ʼaia. Koia, ʼe matou fakalotomālohiʼi koutou ke kotou ako ʼo ʼuhiga mo Sehova ʼAtua pea mo fakaovi ki ai. ʼE fakalotomālohiʼi fēnei tātou e te tisipulo ko Sake: “Kotou fakaovi ki te ʼAtua, pea ʼe fakaovi atu anai kiā koutou.”—Sake 4:8.

ʼUhi ko Sehova ko tatatou Tamai ʼe ina foaki ni ʼu fakamaʼua. Kapau ʼe kotou faiga fakamālotoloto ke kotou fakaʼapaʼapa ki te ʼAtua ʼaki hakotou lagolago agatonu ki tana ʼu lēkula ʼi te ʼu ʼaluʼaga fuli ʼo tokotou maʼuli, ʼe mole feala anai ke ina galoʼi takotou ʼu faiga. Kae, ʼe tokoni atu anai ke kotou haʼele fakahagatonu ʼi te ala ʼaē ʼe ina taki ki te mālama foʼou ʼaē neʼe ina fakapapauʼi mai, ʼaia “ko te mate ʼe puli anai ia; ʼe mole toe ʼi ai anai he putu, he lāuga, he mamahi.” (Fakahā 21:4) ʼI te temi ʼaia, ko te hahaʼi kātoa ʼaē ʼe talagafua ʼe “fakaʼāteaina anai nātou mai te pōpula ki te meʼa ʼaē ʼe popo pea ʼe natou maʼu anai te ʼāteaina fakakolōlia ʼo te fānau ʼa te ʼAtua.”—Loma 8:21.

[Fakamatala ʼo te pasina 6]

“ ʼI te ʼu ʼaluʼaga faigataʼa fuli ʼaia ʼaē neʼe hoko kiā au, neʼe mole liʼakina au e Sehova ʼi he temi.”—HENRYK

[Fakamatala ʼo te pasina 7]

“Ko tamā ʼohoana neʼe liliu ʼo mālohi ʼi tamā lau fakatahi ia te Tohi-Tapu, mo tamā kau fakatahi ki te ʼu fono Fakakilisitiano, pea mo tamā fakahā ki ʼihi ia tamā tui ki te Tohi-Tapu.”—ZUZANNA

[Paki ʼo te pasina 5]

ʼE loto e te ʼAtua ke tou ʼiloʼi ia ia ʼi tona huafa, ʼaē ko Sehova, ʼaē ko tona fakaʼuhiga “ ʼE Ina Fakahoko”