Ko Ai ʼAē ʼe Feala Ke Ina ʼIloʼi Ia Te Kā Haʼu?

“ ʼE ko au ko te ʼAtua . . . , ia Ia ʼaē ʼe ina fakahā te fakaʼosi talu mai te kamataʼaga, pea talu mai te temi kua hili te ʼu meʼa ʼe mole heʼeki hoko.”—Isaia 46:9, 10.

ʼI TE ʼu temi faigataʼa ʼaenī, ko te kau sivi ʼi te faʼahi fakapolitike, ʼi te faʼahi fakapaʼaga, pea mo fakasōsiale, ʼe natou ako ia te hisitolia pea mo te agaaga ʼo te temi nei, ʼi tanatou faiga ʼaē ke natou fakakikite ia te kā haʼu. Ko ʼihi, ʼe natou lotomamahi ʼi tanatou fia ʼiloʼi peʼe feafeaʼi anai ia tonatou kā haʼu, ʼe natou kumi he ʼu tali ki te fai fakakikite ʼaki ia te lau ʼo te ʼu fetuʼu pea mo te fai fakalauʼakau. ʼI te agamāhani, tokolahi ʼe natou lotomamahi ʼi te ʼu tali ʼaē ʼe natou maʼu mai ai. ʼE faigataʼa moʼoni koa ia tatatou ʼiloʼi ia te faʼahi ʼaē kā hoko anai ki te mālamanei, ki totatou fāmili, ʼo toe fēia aipē mo tātou? Moʼo fakaʼosi, peʼe ʼi ai koa he tahi ʼe feala ke ina fakakikite moʼoni ia te kā haʼu?

ʼI tana palalau ki te polofetā ko Isaia, ʼaē ʼe tuʼu ʼi te kamataʼaga, neʼe fakahā totonu ai e te ʼAtua Māfimāfi ko Sehova, ia tana fealagia ʼaē ke ina fakakikite ia te kā haʼu. ʼAki ia Isaia, neʼe fakakikite e te ʼAtua ia te fakaʼāteaina ʼo te kau Iselaele mai tanatou nonofo pōpula ʼi Papiloni pea mo tanatou toe liliu ʼo laga ia Selusalemi pea mo te fale lotu. ʼE fakahā lelei feafeaʼi e te lea fakapolofetā ʼaia? ʼI te ʼu taʼu e 200 ki muʼa atu, neʼe fakahā lelei e Isaia ia te higoa ʼo te tagata ʼaē kā ina tauʼi anai ia Papiloni, ia Siliusi. Pea tahi, ʼe fakahā lelei e Isaia ia te puleʼaki ʼa Siliusi—ʼaē ko te ʼofeʼi kehe ʼo te tafeʼaga ʼo te ʼu vai ʼo te Vaitafe ʼo Eufalate, ʼaē neʼe ina puipui te kolo. Neʼe ina toe fakakikite ʼe maʼu atu anai e Siliusi ʼe tuʼu ava pē ia te ʼu foʼi matapā lalahi e lua ʼo te kolo, ʼo fakafaigafua ai kiā Siliusi ke ina maʼu ia te mālo.—Isaia 44:24–45:7.

ʼO fakatatau ki te ʼAtua, ʼe mole feala ki te tagata ke sio fakatomuʼa ki te kā haʼu. Neʼe ʼui fēnei e te Hau poto ko Salomone: “ ʼAua naʼa ke fakakolōliaʼi ia koe ʼo ʼuhiga mo te ʼapogipogi, heʼe mole ke ʼiloʼi pe koteā ʼaē kā hoko anai ʼi te ʼaho ʼaia.” (Tāʼaga Lea 27:1) ʼE kei moʼoni aipē ia te fakatokaga ʼaia. ʼE mole feala ki he tagata ke ina fakakikite ia tona kā haʼu ʼo ia totonu. Koteā tona kehekehe pea mo te ʼAtua? ʼE mahino kātoa ki te ʼu meʼa fuli ʼaē neʼe ina fakatupu, ʼo kau ai ia te agaaga pea mo te ʼuhiga ʼo te tagata. Kā ina filifili ke ina fai he meʼa, ʼe feala ki te ʼAtua ke ina fakakikite totonu peʼe koteā anai kā fai e te hahaʼi pea mo he ʼu puleʼaga kātoa. Tahi ʼaē meʼa, ʼe ina maʼu te fealagia heʼegata moʼo takitaki ia te ikuʼaga ʼo he ʼu meʼa ke hoko. Kā ina fakakikite ʼaki ia tana kau polofetā ia he meʼa ʼe hoko anai, ʼe liliu “[ko] Ia ʼaē ʼe ina fakahoko te folafola ʼo tana tagata faifekau, pea mo Ia ʼaē ʼe ina fakahoko kātoa te tokoni ʼo tona ʼu hahaʼi ʼave logo.” (Isaia 44:26) ʼE gata pē kiā Sehova ʼAtua ʼe ina lava fai moʼoni ia te ʼu palalau ʼaia.

Neʼe maʼuli ia Isaia ʼi te ʼu taʼu e 700 tupu ʼi muʼa ʼo te haʼu a Sesu, te Mēsia. Kae neʼe fakakikite e Isaia ia te haʼu ʼa te Mēsia. Kae tāfito talu mai te 18 sēkulō, ko te ʼu valoki ʼo te Tohi-Tapu neʼe natou tauʼi ia te moʼoni ʼo te tohi ʼo Isaia. ʼE natou lau, ko te lea fakapolofetā ʼa Isaia neʼe mole ko he lea fakapolofetā moʼoni kae neʼe hoki tohi ki muli age ia te ʼaluʼaga kae kua ʼosi hoko, e he tagata faitohi. Neʼe moʼoni koa? ʼI te taʼu 1947, ʼi te temi ʼaē neʼe maʼu ai ia te tohi neʼe hiki ʼo te tohi ʼa Isaia, pea mo te tahi age ʼu takaiga tohi ʼāfea, ʼi te ʼana ʼe tuʼu ovi ki te Tai Mate. Maʼa te kau fai  kumi ʼe natou ʼui ko te tohi ʼaē neʼe hiki neʼe fai iā taʼu e teau ʼi muʼa ʼo te tupu ʼa te Mēsia ʼaē neʼe fakapapauʼi mai, peʼe ko Kilisito. ʼEī, neʼe fakahā ʼi te Tohi-Tapu ia te kā haʼu!

Ko Isaia pea mo ʼihi kau faitohi ʼo te Tohi-Tapu neʼe mole feala ke natou fakakikite ia te ʼu meʼa ʼaē kā hoko anai ʼi te kā haʼu ʼo fakatafito pē ki tonatou poto ʼo nātou totonu. Kae, ‘neʼe natou palalau ʼaki te fakatotonu ʼa te ʼAtua, he neʼe uga nātou e te laumālie māʼoniʼoni.’ (2 Petelo 1:21) ʼI te ʼu ʼalatike ʼaē kā hoa mai, ʼe tou fakatokagaʼi anai ia te ʼu agaaga kehekehe ʼo te maʼuli ʼo Sesu ʼaē neʼe fakakikite e Isaia. Pea ʼe tou vakaʼi anai mo te ʼu meʼa ʼaē neʼe fakakikite e Sesu pea mo tana kau tisipulo ʼo ʼuhiga mo totatou temi pea mo te temi kā haʼu.