Te Fakakikite ʼo ʼUhiga Mo Te Mēsia

ʼI TANATOU mahino ki te meʼa ʼaē neʼe tohi e Isaia pea mo ʼihi atu ʼu polofetā ʼo ʼuhiga mo te Mēsia, neʼe kua fualoa ia te fakaʼatalitali ʼa te puleʼaga Sutea ki tana haʼu. ʼI tona fakahagatonu, ʼi te temi ʼo Sesu, tokolahi te kau Sutea neʼe “fakatalitali” ki te hā mai ʼo te Mēsia. (Luka 3:15) Koia, ʼe maʼu ʼi te ʼu lea fakapolofetā Fakatohi-tapu ia te ʼu fakamahino maʼuhiga ʼo te maʼuli ʼo te Mēsia. ʼE mole feala ia ki he tagata ke ina fakakikite ia he ʼaluʼaga fēia peʼe ina fakatuʼutuʼu fakatomuʼa ia te ʼu faʼahi fuli ʼaē kā hoko anai lolotoga te maʼuli ʼo Sesu ʼi te kele.

Te ʼu Fakamahino ʼo ʼUhiga Mo Te Tupu ʼa Te Mēsia. Neʼe fakakikite e Isaia ko te Mēsia, peʼe ko Kilisito, ʼe tupu anai mai he fafine tāupoʼou. ʼI te hili ʼo tana fakamatala ia te ʼaluʼaga fakamilakulo ʼo ʼuhiga mo te tupu ʼa Sesu, neʼe ʼui fēnei e te ʼapositolo ko Mateo: “Neʼe hoko moʼoni te ʼu meʼa fuli ʼaia, koteʼuhi ke hoko ai te meʼa ʼaē neʼe folafola e Sehova ʼaki tana polofetā, ʼo ʼui māʼana: ‘Koʼenī ʼe faitama anai te tāupoʼou, pea ʼe ina faʼeleʼi anai he tama.’ ” (Mateo 1:22, 23; Isaia 7:14) Neʼe toe fakakikite e Isaia ʼe hifo mai anai ia Kilisito ʼi te hōloga ʼo Tavite, ʼo talanoa tāfito ai kiā Sese, te tamai ʼa Tavite. ʼI tona fakahagatonu, neʼe hifo mai ia Sesu ʼi te hōloga ʼo Tavite. (Mateo 1:6, 16; Luka 3:23, 31, 32) He koia lā ʼaē, ʼi muʼa ʼo te tupu ʼa Sesu, neʼe ʼui fēnei e te ʼāselo ko Kapeliele kiā Malia, te faʼē ʼa Sesu: “ ʼE foaki anai e . . . [te] ʼAtua kiā te ia te hekaʼaga fakahau ʼo Tavite tana tamai.”—Luka 1:32, 33; Isaia 11:1-5, 10; Loma 15:12.

Te ʼu Fakamahino ʼo ʼUhiga Mo Te Maʼuli ʼo Te Mēsia. ʼI te sinakoka ʼo Nasaleti, ʼi te kua lahi ʼa Sesu, neʼe ina lau leʼo lahi ia te lea fakapolofetā ʼa Isaia, ʼaē ʼe kau ai ia te ʼu palalau ʼaenī: “Ko te laumālie ʼo Sehova ʼe iā te au, koteʼuhi kua ina fakanofo au ke au fakahā te logo lelei ki te kau māsisiva.” ʼI tana fakaʼuhiga ia te lea fakapolofetā kiā ia totonu, neʼe tala fēnei e Sesu: “ ʼI te ʼaho nei, ko te folafola ʼaenī ʼo te Tohi ʼaē kua kotou logo kiai, kua hoko ia.” (Luka 4:17-21; Isaia 61:1, 2) Neʼe toe fakakikite e Isaia ia te agalelei, mo te agamalū ʼa Sesu pea mo tana fia mālalo ʼo tokaga kiā nātou ʼaē neʼe ʼaoga ki ai he fakamālōlō. Neʼe tohi fēnei e Mateo: “Pea neʼe tokolahi te hahaʼi neʼe mulimuli iā te ia, pea neʼe ina fakamālōlō ia nātou fuli, ka neʼe ina fakatotonu fakamālohi age kiā nātou ke ʼaua naʼa natou fakahā ia ia; koteʼuhi ke hoko te meʼa ʼaē neʼe fakahā ʼaki te polofetā ko Isaia. . . . ‘ ʼE mole ina fai anai he kē pe ko he kalaga. . . . ʼE mole ina malaki anai te kaho ʼaē kua volu.’ ”—Mateo 8:16, 17; 12:10-21; Isaia 42:1-4; 53:4, 5.

Te ʼu Fakamahino ʼo ʼUhiga Mo Te Mamahi ʼa Te Mēsia. Neʼe fakakikite e Isaia ʼe mole tali anai  ia te Mēsia e te tokolahi ʼo te kau Iselaele kae ʼe liliu anai ia “ko he maka fakatupu tūkia” kiā nātou. (1 Petelo 2:6-8; Isaia 8:14, 15) Pea ʼi tona fakahagatonu, logolā ia te ʼu tuʼuga milakulo ʼaē neʼe fai e Sesu, ko te hahaʼi “neʼe mole natou tui kiā te ia, ʼo hoko ai te folafola ʼa te polofetā ko Isaia, ʼaē neʼe ina ʼui fēnei: ‘Ê Sehova, ko ai ʼaē neʼe tui ki te ʼu meʼa ʼaē neʼe matou logo kiai?’ ” (Soane 12:37, 38; Isaia 53:1) Ko te tupuʼaga ʼo te mole tui ʼa te kau Sutea ko Sesu ia te Mēsia, neʼe ko te manatu hala ʼaē neʼe tui kiai ia te hahaʼi, ʼe fakagata anai e te Mēsia ia te pule ʼo te puleʼaga Loma, kae ina toe fakatuʼu ia te puleʼaga faʼitaliha ʼo Tavite ʼi te kele. ʼUhi ʼaē neʼe mamahi pea mo mate ia Sesu, tokolahi te kau Sutea neʼe mole natou tui ko ia te Mēsia. Kae ʼi tona fakahagatonu, neʼe fakakikite e Isaia ko te Mēsia ʼe tau anai mo te ʼu mamahi ʼi muʼa ʼo hana liliu ko he Hau.

ʼI te tohi ʼo Isaia, neʼe fakakikite fēnei ia te Mēsia: “Neʼe au tuku toku tuʼa kiā nātou ʼaē neʼe natou haha au. . . . Neʼe mole au fufū toku fofoga ki te fakalainoa pea mo te ʼu ʼanuʼanuhi.” Neʼe fai fakamatala ia Mateo ki te meʼa ʼaē neʼe hoko ʼi te temi ʼaē neʼe ʼahiʼahiʼi ai ia Sesu: “Neʼe natou ʼanuʼanuhi ai tona fofoga pea mo natou hoka ia ia. Ko ʼihi neʼe natou fepātaki ia ia.” (Isaia 50:6; Mateo 26:67) Neʼe tohi fēnei e Isaia: “Neʼe ina tuku ke fakamamahiʼi ia ia; ʼo mole ina ʼavahi pē lā tona gutu.” Koia lā ʼaē, ʼi te temi ʼaē neʼe fakafehuʼi ai e Pilato ia Sesu ʼo ʼuhiga mo te ʼu tukugākovi ʼa te kau Sutea, ko Sesu “neʼe mole ina tali age kiā te ia, kailoa, māʼiapē lā pe ko he kupu e tahi, ʼo punamaʼuli ʼaupitō ai ia te kōvanā.”—Isaia 53:7; Mateo 27:12-14; Gāue 8:28, 32-35.

Te ʼu Fakamahino ʼo ʼUhiga Mo Te Mate ʼa Te Mēsia. Neʼe toe hoko atu ia te fakahoko ʼo te lea fakapolofetā ʼa Isaia ʼi te mate ʼa Sesu pea mo tona hoko atu. Neʼe fakakikite fēnei e Isaia: “ ʼE ina fai anai ia tona falemaka iā tafa ʼo te kau agakovi, pea iā tafa ʼo te kalasi ʼo te kau maʼu koloa ia tona mate.” (Isaia 53:9) Neʼe fakahoko feafeaʼi koa ia te lea fakapolofetā ʼaia ʼaē ʼe hagē ʼe fefakafeagaiʼaki? ʼI te temi ʼaē neʼe mate ai ia Sesu, neʼe tutuki fakatahi mo te ʼu tagata kaihaʼa e toko lua ʼi ʼona tafaʼaki. (Mateo 27:38) Kae ki muli age, neʼe haʼu ia te tagata maʼu koloa ko Sosefo mai Alimatea ʼo ʼave ia te sino ʼo Sesu ki tona falemaka fakamanatu foʼou. (Mateo 27:57-60) Moʼo fakaʼosi, neʼe fakahoko e te mate ʼo Sesu ia te koga tāfito ʼo te lea fakapolofetā ʼa Isaia. ʼI tana palalau ʼo ʼuhiga mo te Mēsia, neʼe ʼui fēnei e Isaia: “Ko te tagata faitotonu, ia taku kaugana, ʼe ina faigaʼi anai ke faitotonu te tokolahi, pea ʼe ina fua anai e ia totonu ia tanatou ʼu hala.” ʼEī, ko te mate ʼo Sesu ʼe ko te totogi ke feala he toʼo ia te kavega ʼo te agahala mai te hahaʼi faitotonu fuli.—Isaia 53:8, 11; Loma 4:25.

Ko Te ʼu Lea Fakapolofetā ʼe Fakahoko Moʼoni

Moʼo fakamoʼoni ki te ʼuhiga totonu ʼo te Mēsia ʼi te Tohi-Tapu, neʼe tuʼa lahi age ia te talanoa ʼa te kau ʼapositolo pea mo Sesu totonu ki te lea fakapolofetā ʼa Isaia ʼi ʼihi age tohi ʼo te Tohi-Tapu. Kae, ʼe mole gata pē ki te tohi ʼo Isaia ʼe ina fakakikite ia te kā haʼu. ʼE lahi ia te tahi ʼu lea fakapolofetā ʼi te ʼu tohi Fakahepeleo neʼe toe hoko ʼo ʼuhiga mo Sesu, tona Puleʼaga, pea mo te ʼu fua lelei ʼaē kā foaki anai e te Puleʼaga ʼi te kā haʼu. a (Gāue 28:23; Fakahā 19:10) ʼE feafeaʼi hatatou tui papau ʼe fakahoko anai ia te ʼu lea fakapolofetā ʼaia? Neʼe ʼui fēnei e Sesu ki te kau Sutea ʼaē neʼe fakalogo age: “ ʼAua naʼa kotou mahalo kua au haʼu ko te maumauʼi ʼo te Lao  peʼe ko te kau Polofetā [ʼaē ko te ʼu Tohi Fakahepeleo]. Neʼe mole au haʼu ke maumauʼi, kae ke fakahoko ia; heʼe au tala moʼoni atu kiā koutou, ʼe feala ke mole ia te lagi pea mo te kele, ʼi he mole ia ʼo he kiʼi mataʼi tohi veliveli pē e tahi peʼe ko he kiʼi kogaʼi mataʼi tohi e tahi ʼo te Lao, ka heʼeki hoko ia te ʼu meʼa fuli ʼaia.”—Mateo 5:17, 18.

Neʼe toe fakamaʼuhigaʼi foki e Sesu ia te fakahoko ʼo te ʼu lea fakapolofetā ʼo te Tohi-Tapu ʼaki ia tana fakamatala ia te ʼu meʼa ʼaē neʼe hoko ʼi ʼona tafaʼaki pea mo te ʼu meʼa ʼaē kā hoko anai. (Taniela 9:27; Mateo 15:7-9; 24:15) Ki muli age, neʼe fakakikite e Sesu pea mo tana kau tisipulo ia te ʼu meʼa ʼaē kā hoko anai ʼi te hili ʼo tanatou mamate, ʼe lahi ia te ʼu meʼa ʼe hoko ʼi te temi nei. ʼI te ʼalatike ʼaē kā hoa mai, ʼe talanoa ai anai ki te ʼu agaaga ʼaia pea mo ʼihi atu agaaga ʼo te lea fakapolofetā ʼo te Tohi-Tapu ʼe hoko ʼi te temi kā haʼu.

[Nota]

[Paki ʼo te pasina 5]

“Neʼe mole au fufū toku fofoga ki te fakalainoa”