Koteā ʼAē ʼe Hoko Moʼoni Mokā Mate He Tahi?

“Ko te ʼu nefesi fuli ʼe māʼuʼuli tuputupua, māʼia mo te ʼu nefesi ʼo te kau agakovi. . . . Ko te tauteaʼi ʼo nātou ʼi he afi kakaha ʼo talu ai, ʼe mole natou mamate, ʼe mole feala ke ʼi ai he gataʼaga ʼo tonatou maʼuli mamahi ʼaia.”—Ko Clément ʼo Alexandrie, ko he tagata faitohi ʼo te lua pea mo te tolu sēkulō ʼo totatou temi.

OHAGĒ ko Clément, ko nātou ʼaē ʼe natou tui ki te akonaki ʼaē ko te ʼifeli ʼe ko he koga meʼa ʼe fakamamahiʼi ai te hahaʼi, ʼe natou tui ko te nefesi ʼe maʼuli tuputupua. ʼE tuʼu koa ʼi te Tohi-Tapu ia te akonaki ʼaia? Kotou tokagaʼi pe koteā ʼaē ʼe ʼui ʼi te Folafola ʼa te ʼAtua moʼo tali ki te ʼu fehuʼi ʼaenī.

Ko Atama, ia te ʼuluaki tagata, neʼe maʼuli tuputupua koa? ʼI te ʼosi fakatupu pē ʼo Atama, neʼe tuku age e te ʼAtua ia te fakatotonu ʼaenī ki te tagata: “Ko te ʼu fuʼu ʼakau fuli ʼo te ʼōloto ʼe feala anai hau kai kiai ʼo aʼu ki tau mākona. Kae ki te fuʼu ʼakau ʼo te mālama ki te meʼa ʼaē ʼe lelei pea mo te meʼa ʼaē ʼe kovi, ʼe mole tonu anai ke ke kai kiai, heʼe ko te ʼaho ʼaē kā ke kai anai kiai, ʼe ke mate moʼoni ai anai.” (Senesi 2:16, 17) Ko Atama neʼe mole maʼuli tuputupua.

Koteā ʼaē neʼe hoko kiā Atama ki muli age ʼi tana ʼosi agahala? Ko te fakatūʼā ʼaē neʼe tala e te ʼAtua neʼe mole ko he fakamamahiʼi ʼo talu ai ʼi he ʼifeli. ʼI te Tohi-Tapu Katolika Crampon, ʼe ʼui fēnei ai ʼo ʼuhiga mo te fakatūʼā ʼaē neʼe tala e te ʼAtua: “ ʼE ke kai anai ki tau pane ʼi te kakava ʼo tou fofoga, ʼo aʼu ki tau toe liliu ki te kele he neʼe toʼo koe mai ai, heʼe ke efu pea ʼe ke toe liliu anai ʼo efu.” (Ko mātou ʼaē neʼe matou fakaʼiloga kehe; Senesi 3:19) ʼE mole fakahā ʼi te ʼu palalau ʼa te ʼAtua ʼe ʼi ai he koga ʼo Atama ʼe hoko atu tona maʼuli ʼi tana mate. ʼI te temi ʼaē neʼe mate ai Atama, ko te nefesi ʼaē ko Atama neʼe mate.

ʼE māʼuʼuli tuputupua koa ia te hahaʼi? ʼE mole he tahi ʼe maʼuli tuputupua. ʼE ʼui fēnei ʼi te Tohi-Tapu iā Tagata Tānaki 3:20: “ ʼE natou ʼolo fuli pē ki te potu e tahi. Neʼe natou ʼomai fuli mai te efu, pea ʼe natou toe liliu fuli ki te efu.” Neʼe tohi fēnei e te ʼapositolo ko Paulo: “Koia, ʼaki te tagata e tahi [ia Atama] neʼe hū ia te agahala ki te mālama, pea ʼaki te agahala ia te mate . . . pea neʼe tuku holo ai te mate ki te tagata fuli pē, he neʼe natou agahala fuli.” (Loma 5:12, Bible de Crampon) Ko te hahaʼi fuli ʼe natou agahala, pea koia ko te hahaʼi fuli ʼe natou mamate.

Ko nātou ʼaē kua mamate ʼe natou ʼiloʼi peʼe logoʼi koa he meʼa? ʼE ʼui fēnei ʼi te Folafola ʼa te ʼAtua: “Ko nātou ʼaē ʼe māʼuʼuli ʼe natou ʼiloʼi ʼe natou mamate anai; kae ko te kau mate ʼe mole kei natou ʼiloʼi he meʼa.” (Tagata Tānaki 9:5, La Sainte Bible Révisée) ʼO ʼuhiga mo te meʼa ʼe hoko ki he tahi mokā mate, ʼe ʼui fēnei ʼi te Tohi-Tapu: “ ʼE natou toe liliu ʼo efu, pea ʼi te ʼaho pē ʼaia ʼe puli tanatou ʼu fakatuʼutuʼu.”  (Pesalemo 146:4, TOB) Kapau ‘ ʼe mole kei ʼiloʼi e te kau mate he meʼa’ pea mo “puli tanatou ʼu fakatuʼutuʼu,” ʼe feafeaʼi hanatou logoʼi he mamahi ʼi te ʼifeli?

Neʼe fakatatau e Sesu Kilisito ia te mate ki te moe, kae neʼe mole ina ʼui ʼe kei maʼuli pē he tahi ʼi he tahi potu. (Soane 11:11-14) Kae ʼe feala ke fakafifihi ʼihi, ʼo natou ʼui ko Sesu neʼe ina akoʼi ko te ʼifeli ʼe kakaha pea ʼe lī ia te hahaʼi agahala ki te afi ʼo te ʼifeli. Tou vakaʼi pe koteā ʼaē neʼe ʼui moʼoni e Sesu ʼo ʼuhiga mo te ʼifeli.