Ko Sesu—Ko He Faʼifaʼitaki Lelei Ke Tou Muliʼi

ʼE KOTOU fia liliu koa ko he tahi ʼe lelei age pea mo fiafia age? ʼE fakamahino e te ʼapositolo ko Petelo peʼe feafeaʼi hatatou maʼu ia te ʼu faʼahi ʼaia. ʼE ina tohi fēnei: “Neʼe mamahi . . . ia Kilisito maʼa koutou, ʼo ina tuku atu kiā koutou he faʼifaʼitaki ke kotou mulimuli lelei ki tona ʼu tapugā vaʼe.” (1 Petelo 2:21) ʼE mahino ia, ʼi te makehe ʼaē ʼo te maʼuli ʼo Sesu Kilisito, ʼe lahi ia te ʼu ako ʼe tou maʼu mai ai. Kā tou ako ia te maʼuli ʼo Sesu pea mo tou faʼifaʼitakiʼi, pea ʼe feala anai ke tou liliu ko ni hahaʼi ʼe lelei age pea mo fiafia age. Tou vakaʼi age muʼa ia he ʼu kalitātē ʼaē neʼe maʼu e te tagata lahi ʼaia pea mo tou fakakaukauʼi age peʼe feafeaʼi hona ʼaoga kiā tātou ia tana faʼifaʼitaki.

Neʼe aga fakapotopoto ia Sesu. Logolā neʼe ʼui e Sesu ʼe “mole he potu . . . ke ʼuluga ai tona ʼulu,” kae neʼe mole maʼuli ia ohagē ko he monike. (Mateo 8:20) Neʼe kau ia ki te ʼu fakafiafia. (Luka 5:29) Ko te ʼuluaki milakulo ʼaē neʼe ina fai ʼi te fai ʼohoana, ko te fetogi ʼo te vai ko he vino huʼa lelei, ʼe fakahā ai neʼe felōgoi ia mo te hahaʼi. (Soane 2:1-11) Kae neʼe fakahā lelei e Sesu ia te meʼa ʼaē neʼe maʼuhiga tāfito kiā te ia. Neʼe ina ʼui fēnei: “Ko taku meʼa kai ko te fai ʼo te finegalo ʼo ia ʼaē neʼe ina fekauʼi mai au, pea mo au fakaʼosi tana gāue.”—Soane 4:34.

□ Kua kotou sivisivi koa ia tokotou maʼuli peʼe feafeaʼi hakotou aga fakapotopoto ʼi tokotou maʼuli fakasino pea mo tokotou maʼuli fakalaumālie?

Neʼe faigafua ia te fakaovi kiā Sesu. ʼE ʼui ʼi te Tohi-Tapu ʼo ʼuhiga mo Sesu neʼe ko he tagata neʼe agaʼofa pea mo aga fakakaumeʼa. Neʼe mole piko ia mokā ʼolo age ia te hahaʼi ʼo palalau ki ʼonatou fihifihia peʼe mo kumi he ʼu tali ki he ʼu fehuʼi faigataʼa. ʼI te tahi ʼaluʼaga, ʼi tana kua ʼi te lotolotoiga ʼo te hahaʼi kaugamālie, neʼe kapa age ki tona kofu tuʼa ia te fafine neʼe mahaki iā taʼu e 12, ʼi tana falala ʼaē ʼe maʼu ai hona fīmālie. Neʼe mole sītuʼa ia ki te fafine ʼuhi ko tana aga ʼaē neʼe feala ke fakaʼuhiga e te hahaʼi ko hana agapauʼu, kae neʼe agalelei ia ʼo ʼui fēnei: “ ʼOfafine, kua fakamālōlō koe e tau tui.” (Maleko 5:25-34) Neʼe toe leleiʼia e te tamaliki ia tanatou fakaovi ʼaē kiā te ia, neʼe mole natou tuʼania naʼa mole ina tokagaʼi nātou. (Maleko 10:13-16) Ko tona ʼu felōgoi mo tana ʼu tisipulo neʼe fai ʼaki te ʼu fai palalau fakahagatonu pea mo fakakaumeʼa. Neʼe mole natou mātataku ʼi te fakaovi age kiā te ia.—Maleko 6:30-32.

□ ʼE faigafua koa ki ʼihi hanatou fakaovi atu kiā koutou?

Neʼe lotomahino ia pea mo manavaʼofa. Neʼe ʼi ai te vilitūtē lahi ʼo Sesu neʼe ko tana maʼu ia te lotomahino ki ʼihi, neʼe ina logoʼi ia te ʼu meʼa ʼaē ʼi ʼonatou loto, pea mo tokoni kiā nātou. Neʼe fakahā e te ʼapositolo ko Soane ʼi te temi ʼaē neʼe sio ai Sesu ki te tagi ʼa Malia ʼi te mate ʼo tona tokolua ko Lasalo, neʼe “hoi [ia Sesu] ʼi te laumālie pea neʼe hoha ia” pea neʼe “tagi ai.” Neʼe feala pē ki te hahaʼi ke natou sisio ki te ʼofa mamahi ʼaē neʼe maʼu e Sesu ki te fāmili ʼaia, pea neʼe mole ufiufi ia ʼi te fakahā ia tona ʼofa mamahi ʼaia kiā nātou. Pea ʼe ko he toe manavaʼofa neʼe ina fakahā ʼi te temi ʼaē neʼe ina fakatuʼuake ai ia tona kaumeʼa!—Soane 11:33-44.

 ʼI te tahi ʼaluʼaga, ko te tagata kilia—ko he mahaki fakalialia ʼaē neʼe tupu ai tana nofo mamaʼo ʼi te hahaʼi—neʼe ina kolekole fēnei kiā Sesu: “ ʼAliki, kapau ʼe ke loto kiai, pea ʼe feala ke ke fakaliliu au ke au maʼa.” Ko te tali ʼaē neʼe fai age e Sesu ʼe fakamalave loto: “Neʼe faoʼi atu tona nima pea ala atu ki ai mo ʼui māʼana: ‘ ʼE au loto kiai. ‘Ke ke liliu ʼo maʼa.’ ” (Mateo 8:2, 3) Neʼe mole fakamālōlō e Sesu ia te hahaʼi ʼuhi pē moʼo fakahoko ia he lea fakapolofetā. Neʼe ina fia holoholoʼi ʼonatou ʼu loʼimata. Ia meʼa fuli ʼaē neʼe ina fai, neʼe ina maʼuliʼi ai tana ʼu folafola ʼaē ʼe fakamanatuʼi tuʼumaʼu: “Ohagē pē ko te meʼa fuli pē ʼe kotou loto ke fai e te hahaʼi maʼa koutou, ke kotou toe fai fēia maʼa nātou.”—Luka 6:31.

□ ʼE hā koa ʼi takotou aga ia tokotou manavaʼofa kiā nātou ʼaē ʼe felāveʼi mo he ʼu faigataʼaʼia?

Neʼe lotomahino ia Sesu pea mo fakasiosio tonu. Logolā neʼe ko te tagata haohaoa, kae neʼe mole fakamaʼua e Sesu ki niʼihi ke natou haohaoa pea neʼe mole fiatuʼu ia; neʼe mole ina fai he meʼa ʼe hā ai hana mole lotomahino. ʼI te tahi ʼaho, ko te fafine neʼe “ ʼiloʼi ʼi te kolo ko te fafine agahala” neʼe ina fakahā tana tui pea neʼe fiafia ʼi te fufulu ia te ʼu vaʼe ʼo Sesu ʼaki ʼona loʼimata. Neʼe fakagafua e Sesu ke ina fai ia te aga ʼaia, ʼo punamaʼuli ai ia te tagata ʼaē neʼe ina fakaafe ia ia, ʼaē neʼe fefeka fau ia tana fakamāuʼi te fafine. ʼI tana lotomahino ki te faiga fakamālotoloto ʼaē ʼa te fafine, neʼe mole tauteaʼi e Sesu ia te fafine ʼuhi ko tana ʼu agahala. Kae neʼe ina ʼui fēnei age: “Kua fakamaʼuli koe e tau tui; ʼalu ʼi te tokalelei.” ʼUhi ko te ʼofa ʼaē neʼe fakahā e Sesu ki te fafine, neʼe lagi tupu ai ia tana fetogi tona maʼuli.—Luka 7:37-50.

□ ʼE ʼiloa koa ia koutou ko he tahi ʼe foimo fakavikivikiʼi niʼihi pea mo fai tuʼumaʼu he ʼu valoki ʼo ʼihi?

Neʼe mole fakapalatahi pea neʼe aga fakaʼapaʼapa ia. Neʼe lagi ko he ʼu kalitātē ʼo Soane neʼe tatau mo ia pea neʼe lagi nā kāiga, ʼaē neʼe tupu ai ia te ʼofa makehe ʼaē ʼa Sesu ki tana tisipulo ʼaia. a Kae neʼe ina gaohi fakatatau pē ia ia mo tana ʼu tisipulo ʼaē. (Soane 13:23) ʼI te temi ʼaē neʼe kole age e Soane pea mo tona tehina ko Sake ke nā maʼu ia te ʼu tuʼulaga lelei ʼi te Puleʼaga ʼo te ʼAtua, neʼe tali fēnei age e Sesu: “Ki te heka ʼaē ʼi toku toʼomataʼu peʼe ʼi toku toʼohema, ʼe mole ʼaʼaku ia tona foaki.”—Maleko 10:35-40.

Neʼe fakaʼapaʼapa tuʼumaʼu ia Sesu ki ʼihi. Neʼe mole kau ia ki te ʼu fakapalatahi ʼa te hahaʼi ʼaē ʼo tona temi. Ohagē lā, ʼi te temi ʼaia neʼe maʼuhiga age ia te hahaʼi tagata ʼi te hahaʼi fafine. Kae neʼe fakamaʼuhigaʼi e Sesu ia te hahaʼi fafine. Neʼe ko te fafine neʼe mole Sutea kae Samalitana ʼaē neʼe ʼuluaki fakahā ki ai e  Sesu ko ia ko te Mēsia, pea ʼi te agamāhani neʼe meʼa noaʼi nātou e te kau Sutea, ʼo mole natou fakamālo ki ai. (Soane 4:7-26) Pea ko te ʼu fafine ʼaē neʼe foaki ki ai e Sesu ia te pilivilēsio ʼaē ke natou sisio ki tona fakatuʼuake.—Mateo 28:9, 10.

□ ʼE kotou fakapalatahi koa ʼi takotou ʼu felōgoi ʼaē mo ʼihi ʼo he tahi lanu, mo te hahaʼi fafine mo tagata, mo te hahaʼi ʼo he tahi lea, peʼe ko he tahi puleʼaga?

Neʼe ina fakahoko lelei ia tona tuʼulaga foha pea mo tehina. ʼE mahino ia, ko Sosefo ia te tamai vavae ʼa Sesu, neʼe mate ia ʼi te temi ʼaē neʼe kei tūpulaga ai ia Sesu. Neʼe lagi tokoni Sesu ki tana faʼē, ʼo toe fēia mo tona ʼu tehina mo tuagaʼane ʼaē neʼe kei veliveli, ʼo gāue ko he tagata tufuga ʼakau. (Maleko 6:3) ʼI te fakaʼosi ʼo tona maʼuli, neʼe ina tuku tana faʼē ke taupau e tana tisipulo ko Soane.—Soane 19:26, 27.

□ ʼE feala koa ke kotou faʼifaʼitakiʼi ia Sesu ʼi takotou fakahoko ia tokotou ʼu maʼua fakafāmili ohagē ko tana fai?

Ko Sesu neʼe ko he kaumeʼa moʼoni. Neʼe makehe Sesu ʼi tona ʼuhiga kaumeʼa. ʼO feafeaʼi? Neʼe mole ina liʼakina tona ʼu kaumeʼa ʼuhi ko te ʼu hala ʼaē neʼe natou fai, logolā neʼe tuʼa lahi ia tanatou fai ʼo te ʼu hala pē ʼaia. Neʼe mole fai tuʼumaʼu e tana ʼu tisipulo ia te ʼu meʼa ʼaē neʼe loto kiai. Kae neʼe ina fakahā ko ia tonatou kaumeʼa ʼi tana tokagaʼi tāfito tonatou ʼu kalitātē kae neʼe mole ko ʼonatou vaivaiʼaga. (Maleko 9:33-35; Luka 22:24-27) Neʼe mole ina fakakinauʼi age ke natou tali tana ʼu manatu, kae neʼe ina fakaafe nātou ke natou fakahā faʼifaʼitaliha ia tanatou ʼu manatu.—Mateo 16:13-15.

Iā meʼa fuli, neʼe ʼofa Sesu ki tona ʼu kaumeʼa. (Soane 13:1) Neʼe lahi feafeaʼi tona ʼofa? Neʼe ina ʼui fēnei: “ ʼE mole he tahi ʼe ina maʼu he ʼofa ʼe lahi age ʼi te meʼa ʼaenī: ke foaki e he tahi tona nefesi maʼa tona ʼu kaumeʼa.” (Soane 15:13) ʼE feala koa ki he tahi ke ina foaki maʼa tona ʼu kaumeʼa he meʼa ʼe maʼuhiga age ʼi tona maʼuli?

□ ʼE kotou haga fakakaumeʼa koa mo he tahi logolā neʼe kotou lotomamahi ai?

Neʼe lototoʼa pea neʼe ina fakahoko ia tona ʼu maʼua. ʼE kehekehe ʼosi Sesu ia, mo te tagata vaivai pea mo nofo noa ʼaē ʼe pāki e te hahaʼi fai pāki. ʼE talanoa ia te ʼu Evaselio ʼo ʼuhiga mo ia, ʼe ko he tagata ʼe mālohi pea mo faʼa gāue. Tuʼa lua, neʼe kapu e Sesu mai te fale lotu ia te hahaʼi fakatau koloa. (Maleko 11:15-17; Soane 2:14-17) ʼI te temi ʼaē neʼe ʼomai ai te hahaʼi tokolahi ʼo puke ia “Sesu te tagata Nasalea,” neʼe lototoʼa ia ʼo tuʼu ki muʼa, ʼo ina fakahā ia ia pea ke ina puipui ai tana ʼu tisipulo, ʼo ina ʼui fakahagatonu fēnei: “ ʼE ko au ia ia. Kapau ʼe ko au ʼaē ʼe kotou kumi, kotou tuku age ia nātou ʼaenī ke ʼolo.” (Soane 18:4-9) Koia ʼe mole tou punamaʼuli ai ʼi te temi ʼaē neʼe sio ai Posio Pilato ki te lototoʼa ʼa Sesu ʼi tona puke pea mo tona gaohi koviʼi, neʼe ina ʼui fēnei ai: “Koʼenī te tagata!”—Soane 19:4, 5.

□ ʼI te temi ʼaē ʼe kotou sio ai ʼe tonu ke kotou fai he meʼa, ʼe kotou fakahoko koa ʼaki he lotomālohi pea mo he lototoʼa?

Ko te ʼu kalitātē ʼaia pea mo ʼihi atu kalitātē ʼo Sesu ʼaē ʼe tupu ai tana liliu ko he faʼifaʼitaki lelei kiā tātou. Kapau ʼe tou mulimuli ki tana aga, ʼe tou liliu anai ko ni hahaʼi ʼe lelei age pea mo fiafia age. Ko te tupuʼaga lā ʼaia ʼo te fakalotomālohiʼi ai e te ʼapositolo ko Petelo ia te kau Kilisitiano ke natou muliʼi fakalelei ia te ʼu tapugā vaʼe ʼo Sesu. ʼE kotou faiga koa ke kotou muliʼi fakalelei ia te ʼu tapugā vaʼe ʼo Sesu?

ʼE Mole Gata Pē Ko Ia Ko He Faʼifaʼitaki Ke Muliʼi

Kae ko Sesu neʼe mole gata pē ia ko he faʼifaʼitaki ke muliʼi. Neʼe ina ʼui fēnei: “Ko au ko te ala pea mo te moʼoni pea mo te maʼuli. ʼE mole he tahi ʼe haʼu ki te Tamai ʼi tuʼa atu iā te au.” (Soane 14:6) ʼO mole gata pē ʼi tana fakahā ʼaē ia te moʼoni ʼo ʼuhiga mo te ʼAtua, ʼo ina ʼavahi ai te ala ʼaē ke fakaovi age kiā te Ia, neʼe fakafealagia e Sesu ki te kau agatonu ke natou maʼu ia te maʼuli.—Soane 3:16.

 ʼO ʼuhiga mo te tupuʼaga ʼo tana haʼu ʼaē ki te kele, neʼe ʼui fēnei e Sesu: “Ko te Foha ʼo te tagata, neʼe mole haʼu ke tauhi ia ia, kae ke ina tauhi pea mo ina foaki tona nefesi moʼo totogi ʼaki ʼo te tokolahi.” (Mateo 20:28) ʼI tana momoli ia tona maʼuli fakasākilifisio, neʼe fakatuʼu e Sesu ia te fakatafito maʼa te hahaʼi ke natou maʼu ia ia te maʼuli heʼegata. Koteā ʼaē ʼe tonu ke tou fai takitokotahi ke tou maʼu ai ia te fakatuʼutuʼu ʼaia? Neʼe fakamahino fēnei e Sesu: “Ko te fakaʼuhiga ʼaenī ʼo te maʼuli heʼegata, ke natou ako ke natou ʼiloʼi ia koe, te ʼAtua moʼoni e tahi, pea mo ia ʼaē neʼe ke fekauʼi mai, ia Sesu Kilisito.”—Soane 17:3.

ʼEī, ʼe tonu ke tou ʼiloʼi ia Sesu, mo faʼifaʼitakiʼi tona faʼahiga maʼuli, pea mo tui ki tana mate fakasākilifisio ke tou maʼu ai te maʼuli heʼegata. ʼE matou fakaafe atu koutou, ke kotou toʼo he temi moʼo ako ia te tohi ʼaē ʼe kotou maʼu ai ia te ʼatamai mālama ʼaia, ia te Tohi-Tapu, pea kotou faigaʼi ke kotou maʼuliʼi ia tana ʼu manatu, ohagē ko tona fai e Sesu. b

Ko te faʼifaʼitaki ʼa Sesu ʼe ina akoʼi mai kiā tātou ia te faʼahiga tagata ʼaē ʼe tonu ke tou liliu ʼo hoko ki ai. Ko tana mate fakasākilifisio ʼe feala ke ina fakaʼāteaina tātou mai te agahala pea mo tona ikuʼaga, ia te mate. (Loma 6:23) ʼI meʼa fakaʼofaʼofa mo kanapau lā neʼe mole malave mālohi ia te maʼuli ʼo Sesu Kilisito kiā tātou! ʼAua naʼa kotou tuku ʼi he temi ia te ʼu tuʼania ʼo te maʼuli ke natou faʼao ia te faigamālie ʼaē ke kotou ako pea mo muliʼi fakalelei ia te faʼifaʼitaki ʼo te tagata lahi tokotahi ʼo te ʼu temi fuli ʼaē neʼe maʼuli ʼi te kele—ia Sesu Kilisito.

[ʼU nota]

[Talanoa ʼo te pasina 7]

◼ Neʼe mole fakapalatahi ia Sesu pea neʼe aga fakaʼapaʼapa ki te hahaʼi fuli

◼ Neʼe ko he kaumeʼa moʼoni māʼiapē lā ʼi te temi fakaʼosi

◼ Neʼe lototoʼa ia

ʼE kotou faiga koa ke kotou muliʼi lelei ia te ʼu tapugā vae ʼo Sesu?

[Paki ʼo te pasina 5]

Neʼe aga fakapotopoto ia Sesu . . .

mo faigafua ia te fakaovi ki ai . . .

mo manavaʼofa