Te Gāue ʼa Malia ʼi Te Fakatuʼutuʼu ʼa Te ʼAtua

LOLOTOGA te minisitelio ʼa Sesu, neʼe palalau leʼo lahi ia te fafine ʼi te lotolotoiga ʼo te hahaʼi pea mo pāui fēnei: “Manūʼia te ʼalo ʼaē neʼe ina fuafatuʼi koe, pea manūʼia te ʼu huhu ʼaē neʼe ke huhu ai!” Kanapau lā neʼe loto e Sesu ke ʼatolasioʼi ia tana faʼē, kanaʼaua lā neʼe ko he temi faigamālie ʼaia ke ina fakalotomālohiʼi te taʼi tauhi ʼaia. Kae neʼe ina tali fēnei: “Kailoa, kae manūʼia ia nātou ʼaē ʼe natou fagono ki te folafola ʼa te ʼAtua pea natou taupau!”—Luka 11:27, 28.

Neʼe mole fai e Sesu ia he ʼu fakavikiviki makehe ki tana faʼē; pea neʼe mole he temi neʼe ina ʼui age ai ki tana ʼu tisipulo ke natou fai ia te faʼahi ʼaia. ʼE feafeaʼi he ʼalutahi ʼo te faʼahi ʼaia mo te ʼatolasio ʼaē ʼe fai e te tokolahi kiā Malia? Tou vakaʼi age muʼa ʼaki te Tohi-Tapu ia he ʼu akonaki ʼiloa ʼo ʼuhiga mo te faʼē ʼa Sesu.

“Fonu o Te Kalasia,” “ ʼe Ke Manūʼia . . . ʼi Te Fafine Fuapē”

Neʼe fakahā e te ʼāselo ko Kapeliele kiā Malia ia tana gāue ʼaē kā ina fai anai ʼi te fakatuʼutuʼu ʼa te ʼAtua. ʼI te ʼaluʼaga ʼaia, neʼe fakamālo kiā ia, ʼo ʼui māʼana: “ ʼAlofa atu, kiā koe ʼaē ʼe ʼofainaʼi ʼaupitō, ʼe kau mo koe ia Sehova.” (Luka 1:28) Ko te tahi Tohi-Tapu ʼe ina fakaliliu fēnei ia te fakamālo ʼaia: “Alofa atu, Fonu o te kalasia, e fakatahi mo koe te Aliki.” (Luka 1:28, Tauhi Foou) Mole faʼa fualoa kiai, neʼe fakamālo ia Elisapeta kiā Malia ʼaki te ʼu palalau ʼaenī: “ ʼE ke manūʼia koe ʼi te fafine fuapē, pea ʼe manūʼia te fua ʼo tou ʼalo.” (Luka 1:42) ʼE hā koa ʼi te ʼu palalau ʼaenī ʼe tonu ke fai he fakaʼapaʼapa makehe kiā Malia?

ʼI tona fakahagatonu, kailoa ia. Logolā ko te ʼu palalau ʼaia ʼe ko te faikole ʼe fai e te kau Katolika kiā Malia, kae ko te Tohi-Tapu ʼe mole  ina fakamoʼoni mai ia he faikole fēia ke fai ki ai. Neʼe ʼiloʼi e Kapeliele pea mo Elisapeta ia te pilivilēsio makehe ʼaē neʼe foaki age kiā Malia, ke ina fuafatuʼi te Mēsia, kae ko te faikole ʼaē kiā ia ʼe mole tuʼu ia ʼi te Tohi-Tapu. ʼI te fehuʼi age e te ʼu tisipulo ʼa Sesu kiā te ia ke ina akoʼi age peʼe feafeaʼi ia te faikole, neʼe ina fakahā age ko te ʼu faikole ʼe tonu pē ke fai fakahagatonu ki tana Tamai. Koia ko te faikole faʼifaʼitaki ʼiloa ʼa Sesu ʼe kamata ʼaki te ʼu palalau ʼaenī: “Ko tamatou Tamai ʼe ʼi selō.”—Mateo 6:9.

ʼE Kau Ia Malia Iā Nātou ʼAē Kā Kaugā Hau Mo Sesu

Ko te tahi akonaki ʼiloa ʼo ʼuhiga mo Malia, ʼi te temi nei kua ʼui ko “te Fineʼaliki ʼi selō.” ʼE mole tou maʼu ʼi te Tohi-Tapu ia he higoa fakatuʼulaga fēia ʼe foaki kiā Malia. Kae ʼe fakahā mai ʼi te Tohi-Tapu, ʼe ina maʼu ia te gāue maʼuhiga ʼi te fakatuʼutuʼu ʼaē ʼa te ʼAtua ʼi selō. Koteā ia te tuʼulaga ʼaia?

Ko Sesu neʼe ina fakahā ko ʼihi ʼi tana ʼu tisipulo agatonu ʼe natou kaugā hau anai mo ia ʼi tona Puleʼaga. (Luka 22:28-30) ʼE foaki age anai e Sesu ia te pule kiā nātou ʼaē neʼe fili ke natou gāue ko “he ʼu pelepitelō maʼa totatou ʼAtua, pea ʼe natou pule fakahau . . . ki te kele.” (Fakahā 5:10) ʼE fakahā lelei ʼi te Tohi-Tapu ko Malia ʼe kau iā nātou ʼaē ʼe natou maʼu ia te pilivilēsio makehe ʼaia. He koʼē ʼe tou ʼui ia te faʼahi ʼaia?

ʼE lagi kotou manatuʼi ʼi te ʼosi mate ʼa Sesu, neʼe “haga faikole” ia Malia mo te ʼu tisipulo ʼa Sesu, pea mo te ʼu tehina ʼo Sesu. Ko te toko 120 neʼe natou fakatahitahi moʼo fai ia te faʼahi ʼaia, ʼo kau ai mo te “ ʼu fafine.” (Gāue 1:12-15) ʼE ʼui ʼi te Tohi-Tapu: “ ʼI te lolotoga ʼo te ʼaho ʼo te Penikositē, neʼe natou nonofo fakatahi fuli ʼi te koga meʼa pē e tahi” ʼi te temi ʼaē neʼe hifo mai ai te laumālie māʼoniʼoni ʼo te ʼAtua kiā nātou, ʼo fakafealagia ai kiā nātou ke natou palalau ʼi he ʼu lea kehekehe.—Gāue 2:1-4.

Ko te kau ʼaē ʼa Malia iā nātou ʼaia, ʼe hā mai ai ko ia mo ʼihi age fafine ʼaē neʼe hifo mai ki ai te laumālie māʼoniʼoni, neʼe fili nātou ke natou kau ki te Puleʼaga ʼo Sesu ʼaē ʼi selō. Koia ʼe ko he ʼu fakamoʼoni ke tou fakatui ko Malia ʼi te temi nei ʼe heka mo Sesu ʼi te kolōlia ʼi selō. (Loma 8:14-17) Tou vakaʼi age muʼa he ʼu pilivilēsio ʼe ina maʼu anai pea mo ʼihi kaugā gāue ʼo Sesu ʼi te ʼu fakatuʼutuʼu ʼa te ʼAtua.

Ko Te Tufaki ʼo He ʼu Tapuakina Taulekaleka

Ko te tohi ʼo Fakahā ʼe ina ʼui ko te toko 144 000 ʼe fakatuʼuake anai ke natou māʼuʼuli fakakolōlia ʼi selō moʼo gāue mo Sesu ko he ʼu pelepitelō, mo tuʼi fakamāu pea mo hau. (Fakahā 14:1, 4; 20:4, 6) ʼI tonatou ʼuhiga pelepitelō, ʼe natou kau anai ki te foaki ʼo te ʼu tapuakina ʼo te sākilifisio ʼo Sesu ki te hahaʼi fakalogo fuli ʼo te mālamanei, ʼo taki nātou ki te maʼuli haohaoa ʼi te faʼahi fakalaumālie, mo te faʼahi fakasino pea mo te ʼu aga ʼaē ke fai. (Fakahā 21:1-4) ʼE ko he pilivilēsio ʼe maʼu anai e te kau ʼatolasio agatonu fuli ʼa Sehova ʼi tanatou mamata ki te temi taulekaleka ʼaia! a

Neʼe maʼuhiga ia te gāue ʼaē neʼe foaki age kiā Malia ʼi te temi muʼa, pea tatau aipē mo te temi nei ʼe kei maʼuhiga aipē tana gāue ʼi te ʼu fakatuʼutuʼu taulekaleka ʼa Sehova. ʼE tāu ke tou faʼifaʼitakiʼi tana agavaivai, mo tana tui, mo tana fakalogo, pea mo tana fakahoko lelei tona maʼua ʼi tona ʼuhiga faʼē, ʼo tou toe manatuʼi mo tana faʼa kātaki ʼi te ʼu fihifihia ʼaē neʼe tau mo ia. ʼUhi ko tana gāue ʼaē ke ina fānauʼi ia te Mēsia pea mo kau ki te foaki ʼo te ʼu tapuakina ki te mālamanei, koia ʼaē ʼe tāu mo ia ke tou fakaʼapaʼapa lahi ki ai.

Kae ko te ako ʼaē ʼe maʼuhiga tāfito mai iā Malia, ʼo fēia mo te ʼu kaugana agatonu fuli ʼaē ʼa te ʼAtua, neʼe tauhi ia kiā Sehova kae neʼe mole tauhi ki he tahi age ʼatua. Ko Malia mo te ʼu kaugā hau ʼo Kilisito ʼi selō, ʼe natou kalaga fēnei: “Kiā Ia ʼaē ʼe heka ʼi te hekaʼaga fakahau [ia Sehova ʼAtua] pea mo te ʼAkeno [ia Sesu Kilisito], ke foaki kiā nāua ia te tapuakina, mo te fakaʼapaʼapa, mo te kolōlia pea mo te mālohi ʼo talu ai.”—Fakahā 5:13; 19:10.

[Nota]

[Paki ʼo te pasina 10]

ʼE tāu ke tou faʼifaʼitakiʼi ia te agavaivai ʼa Malia, tana tui pea mo tana fakalogo