ʼE ʼi Ai Koa He Huafa ʼo Te ʼAtua?

Te ʼu tali ʼaē ʼe fai māhani:

▪ “Ko tona huafa ko ʼAliki.”

▪ “ ʼE mole ʼi ai hona huafa.” Koteā ʼaē neʼe ʼui e Sesu?

▪ “Koia ʼe tonu ke kotou faikole fēnei: ‘Ko tamatou Tamai ʼe ʼi selō, ke tapuhā tou huafa.’ ” (Mateo 6:9) Neʼe tui ia Sesu ʼe ʼi ai te huafa ʼo te ʼAtua.

▪ “Neʼe au fakaʼilo age kiā nātou tou huafa, pea ʼe au fakaʼilo anai, koteʼuhi ke iā nātou te ʼofa ʼaē neʼe ke ʼofa ʼaki kiā te au, pea ke au logo tahi mo nātou.” (Soane 17:26) Neʼe fakaʼilo e Sesu ia te huafa ʼo te ʼAtua.

▪ “ ʼE mole kotou toe sisio anai kiā te au, ʼo kaku ki takotou ʼui, ‘manūʼia ia ia ʼaē ʼe haʼu ʼi te huafa ʼo Sehova.’ ” (Luka 13:35; Pesalemo 118:26) Neʼe fakaʼaogaʼi e Sesu ia te huafa ʼo te ʼAtua.

ʼE TALA mai e te ʼAtua totonu ia tona huafa. Neʼe tohi ia tana ʼu folafola ʼaenī: “Ko au ia Sehova. Ko toku huafa ʼaia.” a (Isaia 42:8) Ko te huafa ʼaē ko Sehova, ʼe ko te fakaliliu ʼaē ʼe ʼiloʼi lelei age ʼi te Fakaʼuvea ʼo te huafa Fakahepeleo ʼaē neʼe fakahā e te ʼAtua totonu. ʼE lagi fakapunamaʼuli kiā koutou te hā ʼo te huafa Fakahepeleo makehe ʼaia ʼo tuʼa lauʼi afe ʼi te ʼu tohi ʼāfea ʼo te Tohi-Tapu. ʼI tona fakahagatonu, ʼe lahi age tana hā ʼi he tahi age higoa ʼe tuʼu ʼi te Tohi-Tapu.

ʼE lagi tali e ʼihi ki te fehuʼi ʼaē “Koteā te huafa ʼo te ʼAtua?” ʼo natou ʼui ko “ ʼAliki.” Kae ʼe mole lahi age tatatou mahino kiai ohagē pē ko hatatou fai ia te fehuʼi ʼaē “Ko ai ʼaē neʼe mālo ʼi te vote?” pea tali fēnei mai: “ ʼE ko te tagata ʼaē neʼe tohi tona higoa ʼi te lisi.” ʼE mole ko he ʼu tali ʼaia, heʼe ko “ ʼAliki” pea mo te ʼui ʼaē “te tagata ʼaē neʼe tohi tona higoa ʼi te lisi” ʼe mole ko he ʼu higoa ia.

Koteā te tupuʼaga ʼo te fakahā mai e te ʼAtua ia tona huafa kiā tātou? Neʼe ina fai ke feala hatatou ʼiloʼi lelei age ai ia ia. Tou toʼo te faʼifaʼitaki ʼaenī: Ko he tahi ʼe feala pē ke pāui ko Tagata, peʼe ko Pātolō, peʼe ko Papa, ʼo mulimuli ki te ʼu ʼaluʼaga. ʼAki te ʼu kupu fakatuʼulaga ʼaia, ʼe tou ʼiloʼi ai he ʼu faʼahi ʼo ʼuhiga mo te tagata ʼaia. Kae ko te higoa ʼo he tahi ʼe ina fakamanatuʼi mai kiā tātou ia meʼa fuli pē ʼaē ʼe tou ʼiloʼi ʼo ʼuhiga mo ia. ʼO toe fēia, ko te ʼu kupu fakatuʼulaga ohagē ko ʼAliki, Māfimāfi, Tamai, pea mo Tupuʼaga ʼe tou manatuʼi ai he ʼu agaaga kehekehe ʼo te ʼu gāue ʼaē neʼe fai e te ʼAtua. Kae ʼe gata pē ki tona huafa totonu, ʼaē ko Sehova, ʼe ina fakamanatuʼi mai kiā tātou ia meʼa fuli pē ʼe tou ʼiloʼi ʼo ʼuhiga mo ia. ʼE lava feafeaʼi hatatou ʼiloʼi moʼoni ia te ʼAtua mo kapau ʼe mole tou ʼiloʼi ia tona huafa?

ʼE maʼuhiga ke tou ʼiloʼi pea mo fakaʼaogaʼi ia te huafa ʼaia. Koteā tona tupuʼaga? Heʼe ʼui fēnei mai ʼi te Tohi-Tapu: “Ko te tagata fuapē ʼaē ʼe fetapa ki te huafa ʼo Sehova ʼe hao anai ia.”—Loma 10:13; Soele 2:32.

[Nota]

[Paki ʼo te pasina 6]

Ko he tahi ʼe feala pē ke pāui ko Tagata, peʼe ko Pātolō, peʼe ko Papa, ʼo mulimuli ki te ʼu ʼaluʼaga. Kae ko tona higoa totonu ʼe ina fakamanatuʼi mai kiā tātou ia meʼa fuli pē ʼaē ʼe tou ʼiloʼi ʼo ʼuhiga mo ia