Ko Ai Te ʼAtua?

KOTEĀ anai takotou tali ki te fehuʼi ʼaia? ʼI te manatu ʼa ʼihi, ʼe natou ʼiloʼi lelei ia te ʼAtua, ʼe natou kaumeʼa lelei mo ia. Ki ʼihi, ko te ʼAtua ʼe ko he tahi ʼe nofo mamaʼo ia. ʼE natou tui ʼe maʼuli kae ʼe mole lahi ia te ʼu meʼa ʼaē ʼe natou ʼiloʼi ʼo ʼuhiga mo ia. Kapau ʼe kotou tui ki te ʼAtua, koteā anai takotou tali ki te ʼu fehuʼi ʼaenī:

1. Ko te ʼAtua ʼe ko he tahi moʼoni koa?

2. ʼE ʼi ai koa he huafa ʼo te ʼAtua?

3. Ko Sesu ʼe ko te ʼAtua Māfimāfi koa?

4. ʼE tokaga mai koa te ʼAtua kiā au?

5. ʼE tali koa e te ʼAtua te ʼu faʼahiga tauhi fuli pē?

Kapau ʼe kotou kole ki niʼihi ke natou tali ki te ʼu fehuʼi ʼaia, ʼe mahino ia ʼe fai atu anai ni ʼu tuʼuga tali ʼe kehekehe. ʼE mole tou punamaʼuli ki te faʼahi ʼaia, heʼe kua lahi ia te ʼu fakamatala pea mo te ʼu manatu ʼo ʼuhiga mo te ʼAtua.

He Koʼē ʼe Maʼuhiga Ia Te ʼu Tali?

ʼI te fai palalau ʼa Sesu Kilisito mo te fafine lotu ʼi te vai keli, neʼe ina fakahā lelei age ki ai ia te ʼaoga ʼaē ke ʼiloʼi ia te moʼoni ʼo ʼuhiga mo te ʼAtua. Ko te fafine ʼaia, te Samalitana, neʼe ina fakamoʼoni ko Sesu neʼe ko he polofetā. Kae neʼe ʼi ai te faʼahi neʼe hoha kiai te fafine. Ko te lotu ʼa Sesu neʼe mole tatau mo tana lotu. ʼI tana fakahā age ia tana hoha ʼaia, neʼe ʼui fakahagatonu age fēnei e Sesu: “ ʼE kotou ʼatolasio koutou ki te meʼa ʼaē ʼe mole kotou  ʼiloʼi.” (Soane 4:19-22) ʼE hā lelei mai, ko Sesu neʼe ina akoʼi ʼe mole ko te hahaʼi lotu fuli ʼaē ʼe natou ʼiloʼi lelei ia te ʼAtua.

Ko te ʼu palalau ʼa Sesu ʼe fakaʼuhiga koa ʼe mole he tahi ʼe feala ke ina ʼiloʼi lelei ia te ʼAtua? Kailoa. Neʼe toe ʼui fēnei e Sesu ki te fafine: “[ʼE] ʼatolasio . . . anai te kau ʼatolasio moʼoni ki te Tamai ʼaki te laumālie pea mo te moʼoni, heʼe ko te Tamai ʼe ina kumi te taʼi kau ʼatolasio ʼaia.” (Soane 4:23) ʼE kotou kau koa iā nātou ʼaē ʼe natou ʼatolasio ki te ʼAtua “ ʼaki te laumālie pea mo te moʼoni”?

ʼE maʼuhiga ʼaupitō kiā koutou ke kotou ʼiloʼi lelei ia te tali ki te fehuʼi ʼaia. Koteā tona tupuʼaga? Neʼe fakahā lelei e Sesu ia te ʼaoga ʼaē ʼo te ʼatamai mālama totonu, ʼi tana faikole fēnei: “Ko te fakaʼuhiga ʼaenī ʼo te maʼuli heʼegata, ke natou ako ke natou ʼiloʼi ia koe, te ʼAtua moʼoni e tahi, pea mo ia ʼaē neʼe ke fekauʼi mai, ia Sesu Kilisito.” (Soane 17:3) ʼEī, ko takotou ʼamanaki ki te maʼuli ʼi te temi kā haʼu ʼe pipiki lelei ki takotou ʼiloʼi ʼaē ia te moʼoni ʼo ʼuhiga mo te ʼAtua!

ʼE feala moʼoni koa ke tou ʼiloʼi ia te moʼoni ʼo ʼuhiga mo te ʼAtua? ʼEī, ʼe feala ia! Kae ʼe feafeaʼi hakotou lava maʼu ia te moʼoni ʼaia? Neʼe ʼui fēnei e Sesu ʼo ʼuhiga mo ia totonu: “Ko au ko te ala pea mo te moʼoni pea mo te maʼuli. ʼE mole he tahi ʼe haʼu ki te Tamai ʼi tuʼa atu iā te au.” (Soane 14:6) Neʼe ina toe ʼui fēnei: “ ʼE mole ʼi ai he tahi ʼe ina ʼiloʼi pe ko ai te Tamai, gata pē ki te ʼAlo, pea mo ia ʼaē ʼe lotolelei te ʼAlo ke ina fakahā ki ai.”—Luka 10:22.

Koia ʼe feala ke tou ʼiloʼi ia te ʼAtua ʼi te ʼu akonaki ʼaē neʼe fai e Sesu Kilisito, ia te ʼAlo ʼo te ʼAtua. ʼI tona fakahagatonu, ʼe fakapapau fēnei mai e Sesu kiā tātou: “Kapau ʼe kotou nonofo ʼi taku folafola, pea ko koutou ko ʼaku tisipulo moʼoni, pea ʼe kotou ʼiloʼi ai anai te moʼoni, pea ko te moʼoni ʼe ina fakaʼāteaina anai koutou.”—Soane 8:31, 32.

Koteā lā te ʼu tali neʼe fai e Sesu ki te ʼu fehuʼi e nima ʼaē neʼe lagaʼi ʼi te kamata?

[Paki ʼo te pasina 4]

ʼE kotou ʼatolasio koa ki he ʼAtua ʼe mole kotou faʼa ʼiloʼi lelei?