Kotou Fakaovi Ki Te ʼAtua

Ko Te Fakamoʼoni Lahi Tokotahi ʼo Te ʼOfa ʼo Te ʼAtua

Senesi 22:1-18

NEʼE ʼofa ia Apalahamo ki te ʼAtua. Ko te pāteliaka agatonu ʼaia neʼe toe ʼofa pē foki kiā Isaake, tona foha ʼaē neʼe hoki ina maʼu ʼi tona temi matuʼa. Kae ʼi te lagi taʼu 25 ʼo Isaake, neʼe tau ia Apalahamo mo te ʼahiʼahi neʼe fakatupu ai ia he ʼaluʼaga ke fakafeagai ki tona ʼuhiga tamai—neʼe ʼui age e te ʼAtua ki ai ke ina sākilifisioʼi ia tona foha. Kae neʼe mole iku ia te fakamatala ki te mate ʼo Isaake. ʼI te temi ʼaē neʼe ʼamanaki ai ke ina matehi ia Isaake, neʼe fekauʼi e te ʼAtua ia te ʼāselo ke ina tāʼofi ia te koga ʼaia. Ko te hisitolia Fakatohi-tapu ʼaia, ʼaē ʼe fakamatala iā Senesi 22:1-18, ʼe ina foaki mai ia te ʼaluʼaga fakatātā ʼo te ʼofa lahi ʼaē ʼo te ʼAtua kiā tātou.

ʼE ʼui ʼi te vaega 1: “Neʼe ʼahiʼahiʼi ia Apalahamo e te ʼAtua.” Ko Apalahamo neʼe ko te tagata tui, kae ko te hoki ʼahiʼahiʼi ʼaē ʼo tana tui. Neʼe ʼui fēnei age e te ʼAtua: “Fakalelei, kae ke toʼo tou foha, tou foha ʼulu tokotahi ʼaē ʼe ke ʼofa mamahi ai, ia Isaake, pea . . . ke momoli . . . ko he holokosetā ʼi he moʼuga ʼe au hinoʼi atu anai kiā koe.” (Vaega 2) Tou manatuʼi, ʼe mole tuku anai e te ʼAtua ia tana ʼu kaugana ke ʼahiʼahiʼi, ʼo laka age ʼi te meʼa ʼaē ʼe natou lava kātakiʼi. Koia ʼaki te ʼahiʼahi ʼaia, neʼe fakahā ai e te ʼAtua ia tana falala ʼaē kiā Apalahamo.—1 Kolonito 10:13.

Neʼe foimo fakalogo atu aipē ia Apalahamo ki te fakatotonu. ʼE tou lau fēnei: “Neʼe tuʼu ake ia Apalahamo ʼi te pogipogi ʼuhu, ʼo teuteuʼi tana ʼāsino, pea neʼe ina ʼave ai tana ʼu tagata kaugana e toko lua ke nā ʼolo mo ia, mo tona foha; pea neʼe ina fahi te fafie ki te holokosetā. Pea neʼe tuʼu ai ʼo ʼalu.” (Vaega 3) ʼE mahino mai, neʼe nofo pē mo Apalahamo ia te ʼu agaaga fuli ʼo te ʼahiʼahi.

Neʼe fai ia te fagona iā ʼaho e tolu, pea neʼe ko he temi feʼauga ke fakakaukauʼi fakaleleiʼi ai ia te fakatuʼutuʼu ʼo te fagona. Kae neʼe mole fetogi e Apalahamo ia tana fakatuʼutuʼu. ʼE hā ʼi tana ʼu palalau ia tana tui. ʼI tana sio mamaʼo ki te moʼuga ʼaē neʼe kua hinoʼi age ki ai, neʼe ina ʼui fēnei ki ʼana tagata kaugana: “Kolua nonofo ʼi henī . . . ; ko au mo te tama, ʼe mā fia ʼolo ki ʼaluga ʼo ʼatolasio ai, pea hoki mā toe liliu mai anai kiā koulua.” ʼI te fehuʼi age e Isaake pe ʼifea ia te ovi ʼaē ʼe tonu ke mōlagaʼi, neʼe ʼui age e Apalahamo: “ ʼE hoki foaki totonu mai anai e te ʼAtua ia te ovi.” (Vaega 5, 8) ʼI te ʼamanaki ʼa Apalahamo, ʼe toe liliu mai pē anai mo tona foha. Koteā tona tupuʼaga? Koteʼuhi “neʼe ina fakafuafua ʼe feala ke fakatuʼuake ia [Isaake] e te ʼAtua mai te kau mate.”—Hepeleo 11:19.

ʼI tanā ʼi te fuga moʼuga, ʼi te temi ʼaē neʼe toʼo ai e Apalahamo ia te “hele ke ina matehi ʼaki ai tona foha,” neʼe tāʼofi ia tona nima e te ʼāselo. Neʼe foaki age ai e te ʼAtua ia te ovi tagata, neʼe efihia ʼona tala ʼi te ʼulu vao, pea neʼe feala ai kiā Apalahamo ke ina momoli, “ ʼo fetogi ʼaki ai tona foha.” (Vaega 10-13) Kiā mata ʼo te ʼAtua, neʼe hagē pē neʼe ko Isaake totonu ʼaē neʼe sākilifisioʼi. (Hepeleo 11:17) ʼE fakamahino e te tagata poto, “maʼa te ʼAtua, ko te tali lelei e Apalahamo ke ina sākilifisioʼi ia tona foha, neʼe kua hagē pē ia neʼe kua ina fakahoko.”

Neʼe tuha ia te falala ʼa Sehova ʼaē kiā Apalahamo. Pea neʼe fakapale ia te falala ʼa Apalahamo ʼaē kiā Sehova, heʼe ko te ʼAtua neʼe ina fakahāhā liuliuga pea mo ina toe fakamoʼoni ia tana fuakava ʼaē mo Apalahamo, ko he fuakava neʼe ina fakapapau ʼaki te ʼu tapuakina maʼa te hahaʼi ʼo te ʼu puleʼaga fuli.—Vaega 15-18.

Ki muli age, neʼe mole kei fakamaʼua age e te ʼAtua kiā Apalahamo ke ina sākilifisioʼi tona foha, kae ko Sehova totonu neʼe ina sākilifisioʼi ia tona ʼAlo. Ko te tali lelei ʼaē e Apalahamo ke ina momoli ia Isaake, neʼe ina fakakikite ai ia te momoli e te ʼAtua ia tona ʼAlo ʼulu tokotahi, ia Sesu, maʼa ʼatatou agahala. (Soane 3:16) Ko te sākilifisio ʼa Sesu ʼe ko te fakamoʼoni lahi tokotahi ʼaia ʼo te ʼofa ʼo Sehova kiā tātou. Mai tona ʼaluʼaga ʼaē neʼe fai e te ʼAtua te taʼi sākilifisio ʼaia maʼa tātou, ʼe lelei ke tou fai ia te fehuʼi ʼaenī: ‘Koteā lā he ʼu sākilifisio ʼe au tali lelei ke au fai moʼo fakafiafia ai te ʼAtua?’