Te ʼu Fehuʼi ʼa Te Kau Lautohi

ʼE Haʼu Fuli Koa Te ʼu Fakamālōlō Fakamilakulo Mai Te ʼAtua?

ʼE mole tou lotolotolua ki te maʼu ʼaē e Sehova ʼAtua ia te mālohi moʼo fakamālōlō. Tahi ʼaē meʼa, ʼe mole tou lotolotolua ʼe feala ke ina foaki ia te mālohi ki tana kau ʼatolasio. Ohagē lā, lolotoga te temi ʼo te kau ʼapositolo, ko te fakamālōlō fakamilakulo ʼe ko he meʼa ʼofa makehe ʼo tona laumālie māʼoniʼoni. Neʼe tohi fēnei e te ʼapositolo ko Paulo: “Ko fakaʼiloga fuapē ʼo te laumālie ʼe tuku atu ki te kāiga, ʼe ʼaoga ia ki te lelei o te hahaʼi. Ki te tahi ʼe foaki e te laumālie he palalau ʼe poto, . . . ki te tahi te poto ʼo te fakamālōlō ʼaki te laumālie pē ʼaia e tahi, . . . ki te tahi [ia te poto ʼi] te ʼu lea fakapolofetā, . . . ki te tahi ia te palalau ʼi te ʼu faʼahiga lea kehekehe.”—1 Kolonito 12:4-11.

Kae, neʼe toe faitohi foki ia Paulo ʼi tana tohi pē ʼaia ki te kau Kolonito ʼo ʼuhiga mo te gata anai ʼo te ʼu meʼa ʼofa fakamilakulo ʼo te laumālie māʼoniʼoni ʼo te ʼAtua. Neʼe ina ʼui fēnei: “Peʼe ko he ʼu poto ʼi te lea fakapolofetā ʼe pulihi anai ia; peʼe ko te palalau ʼi te ʼu lea ʼe fakagata anai ia, peʼe ko he ʼatamai mālama ʼe pulihi anai ia.”—1 Kolonito 13:8.

Lolotoga te ʼuluaki sēkulō, neʼe fakahoko ia te ʼu fakamālōlō fakamilakulo e Sesu Kilisito pea mo tana kau ʼapositolo. Lolotoga te temi ʼo te kau ʼapositolo ʼaē neʼe foʼofoʼou tuʼu ai ia te ʼuluaki kōkelekāsio Fakakilisitiano, ko te ʼu meʼa ʼofa ʼo te laumālie, ʼo kau ai ia te fealagia ʼaē ko te fakahoko ʼo te ʼu fakamālōlō, neʼe ʼaoga ia moʼo fakakolōliaʼi ai ia te ʼAtua pea neʼe ko he fakaʼiloga ʼaia ʼo te ʼofa ʼo Sehova pea mo tana tapuakiʼi ia te kōkelekāsio Fakakilisitiano foʼou. Kae ʼi te temi leva ʼaē neʼe kua tuʼu lelei ai ia te kōkelekāsio Fakakilisitiano, neʼe mole fakamaʼuhigaʼi ia te ʼu meʼa ʼofa makehe, neʼe loto e te kōkelekāsio Fakakilisitiano ke natou fakahā ʼi tonatou maʼuli ia te tui mālohi, mo te ʼamanaki, pea mo te ʼofa ʼaē ʼe hā ai ia te ʼofa ʼo te ʼAtua. (Soane 13:35; 1 Kolonito 13:13) Koia lā ʼaē, ʼi te lagi taʼu 100 ʼo totatou temi, neʼe gata ai ia te ʼu fakamālōlō fakamilakulo ʼaē ko te fakaʼiloga ʼo te ʼofa ʼo te ʼAtua. a

Kae, ʼe lagi kotou feʼekeʼaki fēnei: ‘He koʼē ʼe kei tou logo ʼe kei fai pē ia te ʼu faitoʼo fakamilakulo?’ Ohagē lā, ʼi te sulunale neʼe fakamatala ai e te tagata neʼe ina ʼui neʼe ina maʼu ia te kōsea. Neʼe ina maʼu ia te mahaki ʼi tona ʼulu, mo tona ʼu ifiifi pea ʼo toe fēia aipē ʼi tona ʼu loto hui. Neʼe hagē ia neʼe mole kei ʼi ai he ʼamanaki ki tona kā haʼu, ʼo kaku pē ki te ʼaho ʼaē neʼe “palalau” ai mo te ʼAtua. Hili kiai te ʼu ʼaho, neʼe ina ʼui kua puli ia tona kōsea.

Kā kotou logo ki te taʼi fakamatala ʼaia, he koʼē ʼe mole kotou fai ia te ʼu fehuʼi ʼaenī: ‘ ʼE ko he fakamatala moʼoni koa ʼaenī? ʼI te fakamatala ʼaenī, ʼe ʼi ai koa he ʼu fakamoʼoni fakatōketā ʼe lagolago ki te ʼu meʼa ʼaē neʼe ʼui e te tagata? Tatau aipē mo kapau ʼe hagē ko he faitoʼo, kae ʼe akoʼi mai koa ʼi te Tohi-Tapu ʼe ko te ʼAtua ia te tupuʼaga ʼo te ʼu ʼaluʼaga fuli ʼaē ʼe hoko ʼe hagē mai ko he ʼu fakamālōlō fakamilakulo?’

Ko te tali ki te fehuʼi fakaʼosi ʼe maʼuhiga ʼaupitō. Neʼe fakatokaga fēnei e Sesu ki tana kau tisipulo: “Kotou nofo tokaga ki te kau polofetā loi. . . . Tokolahi ʼe natou ʼui mai anai kiā te au ʼi te ʼaho ʼaia: ‘ ʼAliki, ʼAliki, neʼe mole koa lā matou lea fakapolofetā ʼaki tou huafa, pea mo kapu te ʼu temonio ʼaki tou huafa, pea mo fai te ʼu gāue mālohi ʼaki tou huafa?’ Kae hoki au fakahā age anai leva kiā nātou: Neʼe heʼeki au ʼiloʼi au ia koutou! Kotou fakamamaʼo atu iā te au, ia koutou ʼaē ʼe gāue ohagē ko he ʼu tagata ʼe natou manuki ki te lao.”—Mateo 7:15, 21-23.

ʼE mahino mai, ko te fakamālōlō ʼaē ʼe ʼui ʼe fakamilakulo ʼe mole haʼu ia mai te ʼAtua. Ke ʼaua naʼa kākāʼi tātou e nātou ʼaē ʼe natou ʼui ʼe natou fai ia te ʼu milakulo ʼaki ia te huafa ʼo te ʼAtua, ʼe ʼaoga ke tou maʼu ia te ʼatamai mālama totonu ʼo ʼuhiga mo te ʼAtua, ke tou fakaʼaogaʼi ia totatou meʼa ʼofa mai te ʼAtua ʼaē ko te fealagia fakakaukau, pea mo tou ako peʼe feafeaʼi hatatou ʼiloʼi ia nātou ʼaē ʼe natou fai ia tona finegalo.—Mateo 7:16-19; Soane 17:3; Loma 12:1, 2.

[Nota]