Te ʼu Fehuʼi ʼa Te Kau Lautohi

Ko Te Fia ʼAē ʼe Tonu Ke Au Foaki?

“Ko te ʼAtua ʼe ʼofa kiā ia ʼaē ʼe ina foaki ʼaki te loto fiafia.” (2 Kolonito 9:7) ʼE ʼiloʼi ia te ʼu palalau ʼaia e te hahaʼi e toko lauʼi miliona ʼi te mālamanei. Kae ko ʼihi hahaʼi lotu ʼe lagi natou logoʼi ʼe tonu ke natou foaki he ʼu meʼa ʼofa ke lahi logolā tanatou mole maʼu ia te ʼu meʼa ʼaia. ʼI tona fakahagatonu, ko ʼihi lotu ʼe natou fakamaʼua ki tanatou hahaʼi ke natou foaki ia he foʼi falā ke lahi. ʼE fakahigoa ia te faʼahi ʼaia ko te time, ʼe tonu ke foaki e te hahaʼi ia te vahe 10 ʼo tonatou totogi ki te ʼēkelesia.

ʼE fakahā fakahagatonu koa ʼi te Tohi-Tapu ia te lahi ʼo te falā ʼaē ʼe tonu ke tou foaki fakaʼofa? ʼE feala ke tou fai kiā tātou takitokotahi ia te fehuʼi ʼaenī: “Ko te fia ʼaē ʼe tonu ke au foaki?”

Te ʼu Meʼa ʼOfa ʼAē Neʼe Fakamaʼua Ke Foaki Pea Mo ʼAē Neʼe Foaki ʼAki He Lotolelei ʼi Te Temi Muʼa

ʼE fakahā ʼi te Tohi-Tapu ia te ʼu fakatotonu neʼe fai ki te puleʼaga ʼo Iselaele ʼo ʼuhiga mo te lahi ʼo te ʼu meʼa ʼaē neʼe fakamaʼua e te ʼAtua ke natou foaki age. (Levitike 27:30-32; Faka au 18:21, 24; Teutalonome 12:4-7, 11, 17, 18; 14:22-27) Neʼe mole mamafa ia te ʼu fakamaʼua ʼaia. Neʼe fakapapau e Sehova kapau ʼe natou fakalogo ki tana ʼu lao, pea ʼe ina fakaliliu anai ia te fenua ke ‘mahu koloa.’—Teutalonome 28:1, 2, 11, 12.

ʼI te tahi age ʼu ʼaluʼaga, neʼe feala ki te kau Iselaele peʼe lahi peʼe veliveli, ke natou foaki ʼaki he lotolelei. Ohagē lā, ʼi te temi ʼaē neʼe fakatuʼutuʼu ai e te Hau ko Tavite ke laga ia he fale lotu maʼa Sehova, ko tana hahaʼi neʼe natou foaki fakaʼofa ia “te ʼaulo neʼe ko tona fakafuafua ko taleta e nima afe.” a (1 Fakamatala 29:7) Kotou fakatatau ia te ʼu meʼa ʼofa ʼaia pea mo te meʼa ʼaē neʼe tokagaʼi e Sesu ʼi tana ʼi te kele. Neʼe sio ki ‘te fafine vītua masiva neʼe ina ʼai ki te ʼu puha tānaki paʼaga ʼo te fale lotu te ʼu kiʼi foʼi piesi e lua ʼe mole faʼa maʼuhiga.’ Ko te fia ʼaē neʼe foaki e te fafine vītua ʼaia? Neʼe mole teitei pē lā ko te vahe lua ʼo te totogi ʼi te ʼaho kātoa. Kae neʼe ʼui e Sesu, neʼe tali lelei ia te kiʼi falā ʼaia.—Luka 21:1-4.

Kua Fakatuʼutuʼu Koa Te Lahi ʼo Te Falā ʼAē ʼe Tonu Ke Foaki e Te Kau Kilisitiano?

ʼE mole mulimuli ia te kau Kilisitiano ki te fuakava ʼo te Lao ʼaē neʼe fai mo Iselaele. Koia ʼe mole hinoʼi kiā nātou ia te lahi ʼo te falā ʼaē ke natou foaki ki te ʼAtua. Kae ʼi te kōkelekāsio Fakakilisitiano moʼoni, ko te foaki meʼa ʼofa ʼe ko he meʼa fakatupu fiafia ʼaupitō. Neʼe ʼui e Sesu Kilisito totonu: “ ʼE lahi age te fiafia ʼi takita foaki, ʼi takita tali.”—Gāue 20:35.

ʼE fakahoko ia te gāue fai fakamafola ʼa te kau Fakamoʼoni ʼa Sehova ʼi te mālamanei ʼaki te ʼu meʼa ʼofa. Ko te ʼu meʼa ʼofa ʼaia ʼe fakaʼaogaʼi moʼo tā ia te ʼu tohi, ohagē lā ko te nusipepa ʼaenī ʼe kotou lau, pea mo laga pea mo taupau ke lelei ia te ʼu potu ʼaē ʼe fakahoko ai te tauhi, ia te ʼu Fale ʼo Te Puleʼaga. ʼE mole fakaʼaogaʼi ia te falā ʼaē ʼe tānaki moʼo totogi he tahi. Ko ʼihi ʼaē ʼe natou gāue temi kātoa ʼi te gāue ʼaē ko te fai ʼo ni ʼu tisipulo, ʼe foaki kiā nātou he kiʼi tokoni paʼaga, moʼo totogi tanatou feʼoloʼaki pea mo te tahi age ʼu meʼa ʼe ʼaoga kiā nātou. Kae kiā nātou ʼaia, ʼe mole natou fakamaʼua ki niʼihi ke foaki age honatou totogi. ʼI tona fakahagatonu, tokolahi ʼi te kau Fakamoʼoni ʼa Sehova ʼe mole natou maʼu he totogi moʼo tokoni ki tanatou gāue fai fakamafola. Kae tokolahi ʼe ʼi ai tanatou gāue fakamālama moʼo tokoni ki tonatou maʼuli fakasino, ohagē pē ko Paulo ʼi tana laga ʼaē ʼo te ʼu falelā.—2 Kolonito 11:9; 1 Tesalonika 2:9.

Kapau ʼe fia foaki e he tahi he falā ki te gāue ʼaē ʼe fai e te kau Fakamoʼoni ʼa Sehova, ko te fia ʼaē ʼe tonu ke ina foaki? Neʼe tohi fēnei e te ʼapositolo ko Paulo: “Ke tahi fai pē ki te meʼa kua ina fakatotonu ʼi tona loto, ʼo mole fai ʼaki he lotomamahi peʼe ʼaki he fakamaʼua, heʼe ko te ʼAtua ʼe ʼofa kiā ia ʼaē ʼe ina foaki ʼaki te loto fiafia.”—2 Kolonito 8:12; 9:7.

[Nota]