ʼE Fakapapau Atu Koa e Te ʼAtua ʼe Kotou Maʼu Koloa Anai?

‘ ʼE loto e te ʼAtua ke kotou maʼu koloa, ke kotou maʼu hakotou ʼu tuʼuga motokā, hakotou gāue ʼe lelei. Kehe pē ke kotou tui ki ai, ʼo kotou ʼavahi takotou kiʼi kato falā, pea mo kotou foaki ki ai ia te falā fuli ʼaē ʼe kotou lavaʼi.’

KO TE taʼi logo ʼaia ʼe fakamafola e ʼihi kūtuga lotu ʼi Pelesile, ohagē ko tona tuʼu ʼi te sulunale neʼe tā pē ʼi te fenua ʼaia. ʼE ko he logo ʼe fakatui moʼoni kiai ʼihi. ʼI te sivi neʼe fai ʼi Amelika ki te hahaʼi ʼe natou ʼui e nātou Kilisitiano, ʼe ʼui fēnei ʼi te sulunale Time: “Ko te toko 61 ki te teau ʼo te hahaʼi ʼe natou tui, ko te ʼAtua ʼe loto ke maʼu koloa ia te hahaʼi. Pea ko te toko 31 ki te teau . . . ʼe natou fakamoʼoni, mo kapau ʼe kotou foaki takotou falā ki te ʼAtua, pea ʼe ina tapuakina anai koutou, ʼo foaki lahi atu hakotou falā.”

Ko te ʼu taʼi faʼahiga manatu ʼaia, ʼaē ʼi te agamāhani ʼe fakahigoaʼi ko te teolosia ʼo te maʼu koloa lahi, ʼe mafola vave ʼi te ʼu fenua Latina-Amelika, ohagē ko te fenua ko Pelesile, pea ko te hahaʼi tokolahi ʼe natou ʼolo ki te ʼu ʼēkelesia ʼaē ʼe fakapapau ai ki te hahaʼi ia he ʼu tapuakina fakakoloa mai te ʼAtua. Kae ʼe fakapapau moʼoni mai koa e te ʼAtua kiā nātou ʼaē ʼe natou tauhi age kiā te ia, ʼe natou maʼu koloa anai? Ko te ʼu kaugana fuli ʼa te ʼAtua ʼo te temi muʼa neʼe natou maʼu koloa koa?

ʼE moʼoni ʼi te ʼu Koga Tohi Fakahepeleo, ʼi te agamāhani ʼe tou lau ai ko nātou ʼaē neʼe tapuakinaʼi e te ʼAtua, neʼe natou maʼu koloa. Ohagē lā, iā Teutalonome 8:18, ʼe tou lau ai: “ ʼE tonu ke ke manatuʼi ia Sehova tou ʼAtua, heʼe ko ia ʼaē ʼe ina foaki atu ia te mālohi ke feala ai hau maʼu koloa.” Neʼe ko he ʼu palalau fakatupu loto falala ki te kau Iselaele, mo kapau neʼe natou fakalogo ki te ʼAtua, ʼe ina fakaliliu anai nātou ʼe ko he puleʼaga maʼu koloa.

Neʼe feafeaʼi ki te ʼu kaugana ʼa te ʼAtua? Ko te tagata agatonu ko Sopo neʼe maʼu koloa ʼaupitō, pea ʼi te kua ʼosi toʼo ʼaē ʼo tona ʼu koloa e Satana, neʼe toe foaki age e Sehova ia te ʼu koloa ʼo Sopo, “ ʼo liuga lua” age. (Sopo 1:3; 42:10) Neʼe toe maʼu koloa mo Apalahamo. ʼE ʼui iā Senesi 13:2, neʼe “lahi te ʼu koloa [ʼo Apalamo] ko te ʼu faga manu, mo te paʼaga pea mo te ʼaulo.” ʼI te temi ʼaē neʼe pilisoniʼi ai e te ʼu hau e fā ʼo te Potu ʼEsitē ia Lote, te fakafotu ʼo Apalahamo, neʼe “fakamāʼopoʼopo [e Apalahamo] tana ʼu tagata faiva ki te tau, ko te toko tolugeau hogofulu-mā-valu tagata kaugana neʼe tutupu ʼi tona loto fale.” (Senesi 14:14) ʼE hā mai ʼaki te toko 318 ‘tagata faiva’ ki te tau, neʼe lagi kaugamālie ʼaupitō ia te foʼi loto fale ʼaē ʼo Apalahamo. ʼAki tana lava taupau fakasino ia tona foʼi fāmili kaugamālie ʼaia, ʼe hā mai ai neʼe ko he tagata maʼu koloa, pea mo lahi ʼaupitō ia tana faga manu.

 ʼIo, tokolahi ʼi te ʼu kaugana agatonu ʼa te ʼAtua ʼo te temi muʼa, ohagē lā ko Apalahamo, mo Isaake, mo Sakopo, mo Tavite, mo Salomone, pea kei toe age mo ʼihi, neʼe natou maʼu koloa. Ko tona fakaʼuhiga koa ʼe fakaliliu anai e te ʼAtua ia nātou fuli ʼaē ʼe tauhi age kiā te ia ke natou maʼu koloa? Tahi ʼaē, ko he tahi ʼe masiva ʼe fakaʼuhiga koa ʼe mole tapuakinaʼi ia e te ʼAtua? ʼE tou vakaʼi anai ia te ʼu fehuʼi ʼaenī ʼi te ʼalatike ʼaē kā hoa mai.