Lua Talatuku: ʼE Fakamamahiʼi Te Kau Agakovi ʼi Te ʼIfeli

ʼE haʼu maifea ia te talatuku ʼaia? “ ʼI te kau filosofia Keleka fuli ʼo te temi muʼa, ko ia ʼaē neʼe malave ʼaupitō tana ʼu akonaki ki te ʼu manatu fakatalatisio ʼo ʼuhiga mo te ʼIfeli, ʼe ko Platon.”—Histoire des enfers (Hisitolia ʼo te ʼu ʼifeli), neʼe tā e Georges Minois, pāsina 50.

“Talu mai te vaelua ʼo te lua sēkulō ʼo totatou  temi, ko te kau Kilisitiano ʼaē neʼe natou maʼu he faʼahiga mālama ki te filosofia Fakakeleka, neʼe natou logoʼi te ʼaoga ʼaē ke natou fakahā tanatou tui ʼo mulimuli pē ki te filosofia ʼaia . . . Ko te filosofia ʼaē neʼe natou leleiʼia age, neʼe ko ʼaē ʼa te tagata ko Platon [tana ʼu faiakonaki].”—The New Encyclopædia Britannica (1988), Tohi 25, pāsina 890.

“Ko te akonaki ʼa te ’Ēkelesia ʼe fakamoʼoni, ʼe ʼi ai te ʼifeli pea ʼe heʼegata ia. ʼI te ʼosi ʼo te mate, ko te laumālie ʼo nātou ʼaē kua mamate kae neʼe natou fai he ʼu agahala, ʼe tāu mo te mate ʼe natou hagatonu atu aipē ki te ʼifeli, ʼaē ʼe fakamamahiʼi ai nātou, ko ‘te ʼifeli heʼegata.’ Ko te tautea tāfito ʼo te ʼifeli ʼe ko te fakamavae mai ʼosi ʼo he tahi mai te ʼAtua.”—Catechism of the Catholic Church, neʼe tā ʼi te 1994, pāsina 270.

Koteā te manatu ʼi te Tohi-Tapu? “Ko te hahaʼi māʼuʼuli ʼe natou ʼiloʼi ʼe natou mamate anai; kae ki te hahaʼi mamate ʼe mole natou ʼiloʼi he meʼa . . . heʼe mole he gāue, he fakatuʼutuʼu, he ʼatamai, he poto ʼi te seole ʼaē ʼe ke ʼalu kiai.”—Tagata Tānaki 9:5, 10, Darby.

Ko te kupu Fakahepeleo Shéol, ʼaē ʼe fakaʼuhiga ki te “nofoʼaga ʼo te kau mate,” ʼe fakaliliu ʼaki te kupu “ ʼifeli” ʼi ʼihi Tohi-Tapu. Koteā ʼaē ʼe tou mahino ʼo ʼuhiga mo te kau mate ʼaki te vaega Fakatohi-tapu ʼaenī neʼe tou vakaʼi? ʼE fakamamahiʼi koa nātou ʼi te Seole ke tupu ʼaki ai he fakamolemole ʼo tanatou ʼu agahala? Kailoa ia, heʼe ‘mole kei natou ʼiloʼi he meʼa.’ Koia lā ʼaē ko te pāteliaka ko Sopo, ʼi te temi ʼaē neʼe mamahi ʼaupitō ai ʼuhi ko te mahaki kovi ʼaē neʼe tau mo ia, neʼe kolekole fēnei ki te ʼAtua: “Kanapau lā ʼe ke fakanono au ʼi te ʼifeli [Hepeleo, Shéol].” (Sopo 14:13, Bible TOB) Neʼe fakaʼuhiga feafeaʼi anai tana kole mo kanapau lā ko te Seole neʼe ko he koga meʼa ʼe fakamamahi heʼegata ai te hahaʼi? ʼI te Tohi-Tapu, ʼe fakaʼuhiga pē te ʼifeli ki te faitoka ʼaē ʼe ʼolo fuli kiai te mālamanei, pea ʼe mole kei maʼuli ai he meʼa.

ʼE mole koa lā ko he fakamahino ʼaia ʼo te ʼifeli ʼe lelei pea ʼe ʼalutahi mo te Tohi-Tapu? Koteā ʼapē ia he toe gāue kovi ʼaupitō ʼe feala ke tupu ai he fakamamahiʼi e he ʼAtua ʼofa ia he tahi ʼo talu ai? (1 Soane 4:8) Kae kapau ko te ʼifeli ʼe ko he talatuku, pea ʼe fakaʼuhiga koa te maʼuli ʼi selō ʼe ko he tahi talatuku ʼaia?

Vakaʼi ia te ʼu vaega Fakatohi-tapu ʼaenī: Pesalemo 146:3, 4; Gāue 2:25-27; Loma 6:7, 23

TE MANATU ʼAĒ ʼE MOʼONI:

ʼE mole tauteaʼi e te ʼAtua ia te hahaʼi ʼi he ʼifeli

[Haʼuʼaga ʼo te paki pasina 5]

Barrators​—Giampolo/The Doré Illustrations For Dante’s Divine Comedy/Dover Publications Inc.