Tou Taupau Totatou Fiafia ʼi Te ʼu Temi Faigataʼa

“Ko nātou fuli ʼaē ʼe natou fenonoʼi iā [Sehova] ʼe natou fiafia anai; ʼo aʼu ki he ʼu temi ʼe mole ʼiloʼi hona gataʼaga ʼe natou kalaga fakafiafia anai.”—PES. 5:11.

1, 2. (a) Koteā he ʼu meʼa ʼe hoko nei ʼe fakalotomamahi ki te hahaʼi fuli? (b) ʼO mole gata pē ʼi te ʼu malaʼia ʼaē ʼe hoko ki te hahaʼi fuli, koteā ʼaē ʼe tonu ke kātakiʼi e te kau Kilisitiano moʼoni?

 KO TE kau Fakamoʼoni ʼa Sehova ʼe mole natou hao mai te ʼu malaʼia ʼaē ʼe hoko ki te hahaʼi fuli ʼi te mālamanei. Tokolahi ʼi te hahaʼi ʼa te ʼAtua neʼe natou mamate ʼi te ʼu fai fakapō, mo te tau, pea mo te tahi atu ʼu aga heʼe faitotonu. ʼE fakalotomamahi ia te ʼu tuʼutāmaki fakanātulā, mo te masiva, mo te mahaki pea mo te mate. Neʼe ʼui tonu fēnei ai e te ʼapositolo ko Paulo: “[ʼE] tou ʼiloʼi, ʼo aʼu mai ki te temi ʼaenī, ko te ʼu meʼa fuli ʼaē neʼe fakatupu, ʼe natou haga lāuga fakatahi pea mo mamahi fakatahi.” (Loma 8:22) ʼE tou toe mamahi ʼuhi ko totatou ʼuhiga agahala. Ohagē ko te Hau ko Tavite ʼo te temi muʼa, ʼe lagi tou ʼui fēnei: “Kua fakalaka taku ʼu hala ʼi toku fuga ʼulu; ohagē ko he ʼāmoga mamafa kua mamafa fau kiā te au.”—Pes. 38:4.

² ʼO mole gata pē ʼi te ʼu malaʼia ʼaē ʼe hoko ki te hahaʼi fuli, kae ko te kau Kilisitiano moʼoni ʼe natou toe fua ia te pou fakamamahi fakatā. (Luka 14:27) ʼEī, ohagē pē ko Sesu, ko tana ʼu tisipulo ʼe fehiʼaʼinaʼi pea mo fakatagaʼi. (Mat. 10:22, 23; Soa. 15:20; 16:2) Koia, ko te mulimuli iā Kilisito ʼe fakamaʼua ai ke tou faiga lahi pea mo faʼa kātaki, ʼo tou fakatalitali ki te ʼu tapuakina ʼo te mālama foʼou.—Mat. 7:13, 14; Luka 13:24.

 3. ʼE tou ʼiloʼi feafeaʼi ʼe mole hoki maʼuli mamahi te kau Kilisitiano pea hoki ʼofainaʼi ai nātou e te ʼAtua?

³ Ko tona fakaʼuhiga koa ko te maʼuli ʼo te kau Kilisitiano moʼoni ʼe mole ʼi ai te fiafia pea mo te fīmālie? ʼE tonu pē koa ke tou maʼuli mamahi pea mo faigataʼaʼia ʼo aʼu ki te temi ʼaē kā hoko mai ai te fakaʼosi? ʼE mahino ia, ʼe loto e Sehova ke tou maʼuli fiafia ʼi tatatou lolotoga fakatalitali ʼaē ki te fakahoko ʼo tana ʼu fakapapau. ʼE tohi tuʼa lahi ʼi te Tohi-Tapu ʼo ʼuhiga mo te kau ʼatolasio  moʼoni, ʼe ko te hahaʼi fiafia. (Lau ia Isaia 65:13, 14.) ʼE ʼui fēnei iā Pesalemo 5:11: “Ko nātou fuli ʼaē ʼe natou fenonoʼi iā [Sehova] ʼe natou fiafia anai; ʼo aʼu ki he ʼu temi ʼe mole ʼiloʼi hona gataʼaga ʼe natou kalaga fakafiafia anai.” ʼEī, ʼe feala ke tou maʼu ia he toe fiafia lahi, mo he loto tokalelei, pea mo he maʼuli fakafeʼauga, tatau aipē peʼe tou tau mo he ʼu faigataʼaʼia. Tou vakaʼi age muʼa, peʼe lava tokoni feafeaʼi mai ia te Tohi-Tapu ke tou tauʼi totatou ʼu faigataʼaʼia pea ke tou nonofo fiafia aipē.

Ko Sehova—“Te ʼAtua Fiafia”

 4. Neʼe feafeaʼi ia te loto ʼo Sehova ʼi te temi ʼaē neʼe meʼa noaʼi ai tona finegalo?

⁴ Tou vakaʼi muʼa ia te faʼahi ʼo Sehova. Mai tona ʼaluʼaga ʼaē ko ia te ʼAtua Māfimāfi, ʼe ina puleʼi ia te ʼatulaulau kātoa. ʼE ina maʼu ia meʼa fuli pea ʼe mole ʼaoga age he tahi kiā te ia. Kae logolā ia tona toe mālohi ʼaupitō ʼaia, kae lagi neʼe lotomamahi Sehova ʼi te temi ʼaē neʼe agatuʼu ai tona tahi foha fakalaumālie pea mo liliu ko Satana. Neʼe lagi lotomamahi te ʼAtua ki muli age, ʼi te temi ʼaē neʼe muliʼi ai e ʼihi ʼāselo te agatuʼu ʼa te ʼāselo ʼaia. Pea kotou toe fakakaukauʼi age muʼa ia te lotomamahi ʼa te ʼAtua ʼi te temi ʼaē neʼe lītuʼa ai Atama mo Eva kiā te ia, ia nāua ʼaē ko tana faʼu taulekaleka ʼi te kele. Talu mai ai, ko te ʼu toko lauʼi miliale hahaʼi ʼo tonā hōloga neʼe mole natou tali ia te pule ʼa Sehova.—Loma 3:23.

 5. Koteā ʼaē neʼe lotomamahi tāfito ai Sehova?

⁵ ʼE kei hoholo pē ia te agatuʼu ʼaē ʼa Satana ki te ʼAtua. Lolotoga taʼu e 6 000, neʼe sio Sehova ki te tauhi tamapua, mo te agamālohi, mo te fai fakapō, pea mo te ʼu felāveʼi fakasino heʼeʼaoga. (Sen. 6:5, 6, 11, 12) Tahi ʼaē meʼa, neʼe logo ki te ʼu loi fakamataku pea mo te ʼu fasituʼu. Māʼiapē lā mo te kau ʼatolasio moʼoni ʼa te ʼAtua, ʼi ʼihi temi neʼe natou fakalotomamahiʼi ia ia. ʼE fakamatala fēnei te taʼi aga ʼaia ʼi te Tohi-Tapu: “Tuʼa lahi neʼe natou agatuʼu kiā te ia ʼi te toafa, neʼe natou fakalotomamahi ia ia ʼi te ʼu potu lauʼātea! Pea tuʼumaʼu pē neʼe natou ʼahiʼahiʼi te ʼAtua, pea neʼe natou fakalotomamahi ia te Māʼoniʼoni ʼo Iselaele.” (Pes. 78:40, 41) Ko te lotomamahi ʼaē ʼe logoʼi e Sehova mokā lītuʼa tana hahaʼi kiā ia, ʼe mahino papau ia ʼe lahi ʼaupitō. (Sel. 3:1-10) ʼE hā lelei mai, ko te ʼu meʼa kovi ʼaē ʼe hoko, ʼe lotomamahi ʼaupitō Sehova mokā ʼe natou fai te ʼu meʼa ʼaia.—Lau ia Isaia 63:9, 10.

 6. ʼE feafeaʼi ia Sehova ʼi te ʼu temi ʼaē ʼe hoko ai ia te ʼu ʼaluʼaga fakalotomamahi?

⁶ Logolā ia te lotomamahi ʼaē ʼo Sehova ʼi te ʼu meʼa ʼaē ʼe hoko, kae ʼe mole ina tuku tona lotomamahi ʼaia ke ina tāʼofi te fakahoko ʼo tana ʼu gāue. ʼI te ʼu temi ʼaē neʼe hoko ai te ʼu faigataʼaʼia, neʼe foimo fai e Sehova he ʼu fakatuʼutuʼu moʼo fakasiʼisiʼi ia te ʼu fua kovi ʼo te meʼa ʼaē neʼe  hoko. Neʼe ina toe fai mo he ʼu fakatuʼutuʼu ʼe fua anai ki muli age, ke feala ai ki tona finegalo ke hoko anai. ʼAki te ikuʼaga ʼo tana ʼu fakatuʼutuʼu ʼaia, ʼe fakatalitali fakafiafia ai Sehova ki te fakatonuhia ʼo tana pule faʼitaliha pea mo te ʼu tapuakina ʼaē kā maʼu e tana hahaʼi ʼatolasio agatonu. (Pes. 104:31) ʼEī, logolā te ʼu loi ʼaē neʼe fai ʼo ʼuhiga mo ia, kae ko Sehova ʼe ko “te ʼAtua fiafia.”—1 Tim. 1:11; Pes. 16:11.

7, 8. Kā hoko he ʼu fihifihia, ʼe tou lava faʼifaʼitakiʼi feafeaʼi ia Sehova?

⁷ ʼE moʼoni, ʼe mole feala hatatou fakatatau ia tātou kiā Sehova ʼo ʼuhiga mo te fealagia ʼaē ke tou lava fakatokatoka ia he ʼu fihifihia. Kae ʼe feala ke tou faʼifaʼitakiʼi ia Sehova mokā ʼe tou felāveʼi mo he ʼu faigataʼaʼia. ʼE mole kovi takita lotomamahi mokā hoko he ʼu mamahi, kae ʼe mole tonu ke tou haga taupau totatou lotomamahi he neʼe faʼu tātou ki te pāki ʼo Sehova, pea ʼe tou maʼu ia te fealagia fakakaukau pea mo te poto, ʼaē ʼe feala ke tou fakaʼaogaʼi moʼo fakatokatoka totatou ʼu fihifihia pea mo fai he puleʼaki kiai mokā ko he meʼa ʼe feala.

⁸ Ko te faʼahi ʼe maʼuhiga moʼo tauʼi ia te ʼu fihifihia ʼo te maʼuli, ʼe ko hatatou mahino ʼe ʼi ai te ʼu ʼaluʼaga ʼe mole feala anai ke tou fetogi. Kapau ʼe tou lotomamahi fau ki he ʼu ʼaluʼaga fēia, pea ʼe feala anai ke fakaʼāsili age ia tatatou lotovaivai ai pea mo pulihi ai iā tātou ia te ʼu meʼa fakafiafia ʼaē ʼe pipiki ki te tauhi moʼoni. Kā kua tou ʼosi fai he ʼu fakatuʼutuʼu fakapotopoto moʼo fakatokatoka ia te fihifihia, pea ʼe lelei anai ke ʼaua naʼa tou hoha fau kiai, kae ke tou tōkakaga tāfito ʼo fai he ʼu gāue ʼe ʼaoga age. ʼE tou mahino ki te faʼahi ʼaia ʼaki ia te faʼifaʼitaki Fakatohi-tapu ʼaenī kā tou vakaʼi.

ʼE Maʼuhiga Ke Tou Aga Fakapotopoto

 9. Neʼe fakahā feafeaʼi e Ana tana aga fakapotopoto?

⁹ Tou vakaʼi ia te faʼifaʼitaki ʼa Ana, ʼaē neʼe liliu ko te faʼē ʼa te polofetā ko Samuele. Neʼe lotomamahi ʼaupitō ia Ana he neʼe mole fānaunau. Neʼe vāʼi pea mo fakalainoaʼi he neʼe paʼa. ʼI ʼihi temi, ʼi te lahi fau ʼo te lotomamahi ʼa Ana, neʼe tagi pea neʼe mole kei kai. (1 Sam. 1:2-7) ʼI tana tahi ʼalu ki te sagatualio ʼa Sehova, neʼe ‘mamahi ʼaupitō te loto ʼo Ana, pea neʼe faikole kiā Sehova pea mo tagi lahi.’ (1 Sam. 1:10) ʼI te kua ʼosi fakahā e Ana ia tona loto kiā Sehova, neʼe fakaovi age leva ia te pelepitelō lahi ko Elia kiā te ia pea mo ʼui fēnei age ki ai: “ ʼAlu ʼi te fīmālie, pea ke tali e te ʼAtua ʼo Iselaele te meʼa ʼaē neʼe ke kole age ki ai.” (1 Sam. 1:17) ʼI te temi leva ʼaia, neʼe lagi kua mahino ai leva kiā Ana neʼe kua ina fai ia meʼa fuli neʼe feala ke ina fai. Neʼe mole ina lava pulihi tona ʼuhiga paʼa. Neʼe aga fakapotopoto ia Ana. Koia neʼe ‘toe liliu ai ʼi tona ala pea neʼe kai, pea neʼe mole kei mata tuʼania tona fofoga.’—1 Sam. 1:18.

10. Koteā ʼaē neʼe mahino kiai ia Paulo ʼi te temi ʼaē neʼe tau ai mo te fihifihia neʼe mole feala ke ina fetogi?

¹⁰ Ko te ʼapositolo ko Paulo neʼe ina maʼu mo ia ia te taʼi fakasiosio poto ʼaia ʼi te temi ʼaē neʼe felāveʼi ai mo tona ʼu fihifihia. Neʼe ʼi ai tona fihifihia neʼe fakatupu lotomamahi kiā te ia. Neʼe ina ʼui neʼe ko “he tala ʼi te kakano.” (2 Ko. 12:7) Logolā ia te fihifihia ʼaē neʼe tau mo Paulo, kae neʼe ina fai ia meʼa fuli neʼe ina lavaʼi moʼo toʼo ia te fihifihia ʼaia, ʼo faikole kiā Sehova ke ina fakafīmālie ia ia. Neʼe tuʼa fia te faikole ʼa Paulo kiā Sehova ʼo ʼuhiga mo te faʼahi ʼaia? Tuʼa tolu. ʼI tana ʼosi kole tuʼa tolu ʼaia, neʼe fakahā age e te ʼAtua kiā Paulo ko te ‘tala ʼaē ʼi tona kakano’ ʼe mole toʼo fakamilakulo anai. Neʼe tali e Paulo ia tona ʼaluʼaga ʼaia pea neʼe tokaga tāfito ʼo tauhi kātoa kiā Sehova.—Lau ia 2 Kolonito 12:8-10.

11. Koteā te ʼaoga ʼo te faikole pea mo te kole mamahi ki te tauʼi ʼo he ʼu fihifihia?

¹¹ Ko te ʼu faʼifaʼitaki ʼaenī neʼe tou vakaʼi ʼe mole fakaʼuhiga leva ʼe mole tonu ke fakahā kiā Sehova totatou ʼu fihifihia. (Pes. 86:7) ʼE fakalotomālohiʼi fēnei tātou ʼi te Folafola ʼa te ʼAtua: “ ʼAua naʼa kotou tuʼania ki he meʼa, kae ʼi te faʼahi fuli, ʼaki te faikole pea mo te ʼu kole mamahi ʼaki te fakafetaʼi, kotou fakahā ki te ʼAtua takotou ʼu kole.” ʼE tali feafeaʼi mai anai ia Sehova ki te ʼu taʼi faʼahiga kole mamahi ʼaia pea mo kolekole ʼaia? ʼE toe ʼui fēnei ʼi te Tohi-Tapu: “Pea ko te tokalelei ʼa te ʼAtua, ʼaē ʼe māʼoluga ake ʼi te ʼu manatu fuli, ʼe ina taupau anai tokotou ʼu loto pea mo tokotou ʼu ʼatamai ʼaki ia Kilisito Sesu.” (Filp. 4:6, 7) ʼEī, ko Sehova ʼe lagi mole ina pulihi anai ia totatou fihifihia, kae ʼe feala hana tali mai ki tatatou ʼu faikole ʼaki hana fakafīmālieʼi ia totatou ʼatamai. Kā kua tou ʼosi faikole ʼo ʼuhiga mo  he fihifihia, pea ʼe lagi tou mahino ai ki te kovi ʼaē ʼo hatatou tuʼaniaʼi fau te faʼahi ʼaia.

Tou Fiafia ʼi Te Fai ʼo Te Finegalo ʼo Te ʼAtua

12. He koʼē ko he lotomamahi fualoa ʼe fakatupu kovi ki he tahi?

¹² ʼE ʼui fēnei iā Tāʼaga Lea 24:10: “Neʼe kua ke lotovaivai koa ʼi te ʼaho ʼo te mamahi? Ko tou mālohi ʼe siʼisiʼi anai.” ʼE ʼui fēnei e te tahi tāʼaga lea: “ ʼUhi ko te mamahi ʼo te loto ʼe tupu ai te vaivai ʼo te laumālie.” (Taag. 15:13) Ko ʼihi Kilisitiano, ʼi te lahi fau ʼaē ʼo tonatou lotomamahi, neʼe mole kei natou lau te Tohi-Tapu pea mo metitāsioʼi ia te Folafola ʼa te ʼAtua. Neʼe mole kei natou faikole mo tonatou loto kātoa, pea neʼe mole kei natou fakatahitahi mo tonatou ʼu tehina mo tuagaʼane fakalaumālie. ʼE mahino ia, ko te lotomamahi ʼe fakatupu kovi ki he tahi.—Taag. 18:1, 14.

13. Ko te ʼu gāue fea ʼaē kā tokoni mai ke tou tauʼi te lotovaivai pea mo foaki mai te fiafia?

¹³ Kae kapau ʼe tou maʼu ia he ʼu manatu ʼe lelei, pea ʼe tokoni mai anai ke tou tōkakaga tāfito ki te ʼu faʼahi ʼo totatou maʼuli ʼaē ʼe tou fiafia ai. Neʼe tohi fēnei e Tavite: “Neʼe au fiafia, Ê toku ʼAtua, ʼi te fai ʼo tou finegalo.” (Pes. 40:8) Kā hoko he ʼu fihifihia ʼi totatou maʼuli, ʼe mole tonu ke tou tuku tatatou ʼu gāue māhani ʼaē ʼe tou fai ʼi tatatou tauhi ʼaē kiā Sehova. ʼI tona fakahagatonu, ko te puleʼaki lelei moʼo tauʼi ia totatou lotomamahi, ʼe ko tatatou kau ki te ʼu gāue ʼaē ʼe tou maʼu ai ia te fiafia. ʼE ʼui mai e Sehova ʼe tou lava maʼu te fiafia pea mo te fīmālie, ʼi tatatou lau tana Folafola pea mo vakaʼi tuʼumaʼu. (Pes. 1:1, 2; Sake 1:25) ʼI te Tohi-Tapu pea mo te ʼu fono Fakakilisitiano, ʼe tou maʼu ai “he ʼu palalau ʼe lelei” ʼe lava fakalotomālohiʼi tātou pea mo fakafiafia totatou loto.—Taag. 12:25; 16:24.

14. Koteā te fakapapau ʼe fai mai e Sehova ʼe fakafiafia ai kiā tātou ʼi te temi nei?

¹⁴ ʼE fakahā mai e te ʼAtua ia te ʼu tuʼuga tupuʼaga ke tou fiafia ai. Ko tana fakapapau ʼaē kā ina haofaki anai tātou, ʼe ko he tupuʼaga tāfito ʼaia ke tou fiafia ai. (Pes. 13:5) Logolā ia te ʼu meʼa ʼaē ʼe feala ke hoko mai kiā tātou ʼi te temi nei, kae ʼe tou ʼiloʼi ko te ʼAtua ʼe ina fakapale anai ia nātou ʼaē ʼe natou kumi fakamālotoloto ia ia. (Lau ia Tagata Tānaki 8:12.) ʼAki he ʼu palalau fakatuketuke, neʼe fakahā e te polofetā ko Hapakuke ia te taʼi tui ʼaia, ʼi tana tohi fēnei: “Tatau aipē peʼe mole fisi te fuʼu fiku, peʼe mole fua te ʼu fuʼu vite;  ʼe lagi ko te gāue ʼa te fuʼu oliveto ʼe mole aʼu ki tona ikuʼaga, peʼe mole he meʼa kai ʼi te ʼu gāueʼaga; ʼe lagi tō kehe te kiʼi faga manu mai te lotoʼā, pea ʼe mole he faga pipi ʼi te ʼu lotoʼā; kae kiā te au, ʼe au fiafia anai iā Sehova totonu; ʼe au fiafia anai ʼi te ʼAtua ʼo toku fakamaʼuli.”—Hap. 3:17, 18.

“Fiafia Te Hahaʼi ʼAē Ko Tonatou ʼAtua Ko Sehova!”

15, 16. Fakamatala he ʼu meʼa ʼofa ʼo te ʼAtua ʼe feala ke tou fiafia ai ʼi tatatou lolotoga fakatalitali nei ki te ʼu tapuakina ʼo te kā haʼu.

¹⁵ ʼI tatatou lolotoga fakatalitali nei ki te kā haʼu taulekaleka ʼaē kā tou maʼu anai, ʼe loto e Sehova ke tou fiafia ʼi te ʼu meʼa lelei ʼaē ʼe ina foaki mai. ʼE ʼui fēnei ʼi te Tohi-Tapu: “Kua au ʼiloʼi ʼe mole ʼi ai he meʼa ʼe lelei age maʼa [te mālamanei] ʼi hanatou fakafiafia pea mo hanatou fai te meʼa ʼaē ʼe lelei lolotoga tonatou maʼuli; pea ke kai foki te tagata fuli pē, ʼio ke ʼinu, pea mo mamata ki te lelei ʼo tana gāue kinakina kātoa. ʼE ko te meʼa ʼofa ia ʼo te ʼAtua.” (Tnk. 3:12, 13) Ko te ‘fai ʼo te meʼa ʼaē ʼe lelei’ ʼe fakaʼuhiga ke tou fai he ʼu gāue ʼe lelei maʼa niʼihi. Neʼe ʼui e Sesu ʼe lahi age te fiafia mokā kita foaki ʼi hata fakatalitali ke foaki mai hakita meʼa. ʼE tou maʼu ia he fiafia lahi mokā tou fai he ʼu gāue ʼe tou fakahā ai tatatou agaʼofa ki tota ʼohoana, mo tata fānau, mo tata ʼu mātuʼa, pea mo te tahi atu ʼu kāiga. (Taag. 3:27) Kapau ʼe tou agalelei, mo tali kāiga pea mo loto fakamolemole ki totatou ʼu tehina mo tuagaʼane fakalaumālie, pea ʼe tou toe maʼu ai mo he fiafia lahi, pea ʼe fiafia ai mo te loto ʼo Sehova. (Kal. 6:10; Kol. 3:12-14; 1 Pet. 4:8, 9) Pea kā tou fakahoko tatatou minisitelio ʼaki tatatou manatu ʼaē ke tou fakamuʼamuʼa ia te ʼu meʼa ʼaē ʼe ʼaoga tāfito ki te hahaʼi, pea ʼe tou fiafia moʼoni ai.

¹⁶ Ko te ʼu palalau ʼa te Tagata Tānaki ʼaē ki muʼa atu, ʼe talanoa pē ki te ʼu fiafia ʼo te maʼuli, ohagē lā ko te kai pea mo te ʼinu. ʼEī, tatau aipē peʼe tou tau mo ni ʼu fihifihia, kae ʼe feala ke tou fiafia ʼaki pē te ʼu koloa ʼofa ʼaē ʼe foaki mai e Sehova. Tahi ʼaē meʼa, ko te tō ʼo te laʼā, ko te matalelei ʼo he fenua, ko te gaoʼi ʼa he ʼu kiʼi manu, pea mo ʼihi age mātaga ʼo te kele, ʼe ko he ʼu meʼa ʼe mole tou totogi, kae ʼe fakatupu iā tātou he toe fakaʼapaʼapa pea mo he fiafia. Kā tou metitāsio ki te ʼu taʼi meʼa ʼaia neʼe faʼu, pea ʼe lahi ai totatou ʼofa ʼaē kiā Sehova, heʼe ko ia ʼaē ʼe ina Foaki mai ia meʼa lelei fuli pē.

17. Koteā te ʼu meʼa ʼaē kā feala anai ke tou maʼu ai he fakaʼāteaina kātoa mai te ʼu malaʼia, kae ʼi te temi nei, he koʼē ʼe feala ke tou lotofīmālie?

¹⁷ Kapau ʼe tou ʼofa ki te ʼAtua, mo tou fakalogo ki tana ʼu fakatotonu, pea mo tou tui ki te sākilifisio faitotogi, pea ʼe tou maʼu ai anai totatou fakaʼāteaina kātoa mai te ʼu malaʼia ʼo te agahala pea mo iku ai ki te fiafia heʼegata. (1 Soa. 5:3) Kae ʼi te temi nei, ʼe tou lotofīmālie ʼi tatatou mahino ʼaē ʼe ʼiloʼi lelei e Sehova ia te ʼu mamahi fuli ʼaē ʼe tou tau nei mo tātou. Neʼe tohi fēnei e Tavite: “ ʼE au fiafia anai pea mo fakafiafia ʼi tou loto manavaʼofa, he neʼe ke sio ki toku mamahi; neʼe ke ʼiloʼi ia te lotomamahi ʼo toku nefesi.” (Pes. 31:7) ʼI tona ʼofa ʼaē kiā tātou, ʼe haofaki anai tātou e Sehova mai te malaʼia.—Pes. 34:19.

18. He koʼē ʼi te hahaʼi ʼa te ʼAtua, ʼe tonu tāfito ke maʼu ai ia te fiafia?

¹⁸ ʼI tatatou lolotoga fakatalitali nei ki te temi ʼaē kā fakahoko ai tana ʼu fakapapau, ʼofa pē ke tou faʼifaʼitakiʼi ia Sehova, te ʼAtua fiafia. ʼOfa pē ke ʼaua naʼa tou tuku he ʼu manatu ʼe mole lelei ke ina tāʼofi ai tatatou ʼu gāue fakalaumālie. Kā hoko mai he ʼu faigataʼaʼia, ʼofa pē ke tou maʼu ia he poto feʼauga moʼo takitaki ia totatou maʼuli. ʼE tokoni mai anai Sehova ke tou lolomi te ʼu meʼa ʼaē ʼi totatou loto pea ke tou fai he ʼu fakatuʼutuʼu ʼe tou lavaʼi moʼo fakasiʼisiʼi ia te ʼu fua kovi ʼo te ʼu fihifihia. Tou fakafiafia ʼi te ʼu meʼa lelei ʼaē ʼe haʼu mai te ʼAtua, te ʼu meʼa fakasino pea mo fakalaumālie. Kā tou nonofo ovi ki te ʼAtua, pea ʼe feala anai ke tou fiafia heʼe “fiafia te hahaʼi ʼaē ko tonatou ʼAtua ko Sehova!”—Pes. 144:15.

Koteā ʼAē Neʼe Kotou Lava Tāʼofi?

• Kā tou tau mo he ʼu faigataʼaʼia, ʼe tou lava faʼifaʼitakiʼi feafeaʼi ia Sehova?

• ʼE lava tokoni feafeaʼi mai te aga fakapotopoto ki te tauʼi ʼo te ʼu faigataʼaʼia?

• ʼI te ʼu temi ʼaē ʼe tou lotomamahi ai, ʼe feafeaʼi hatatou lava maʼu te fiafia ʼi tata fai ia te finegalo ʼo te ʼAtua?

[ʼU fehuʼi ʼo te ako]

[Paki ʼo te pasina 16]

ʼE lotomamahi ia Sehova ʼi te ʼu agakovi ʼaē ʼe hoko

[Paki]

© G.M.B. Akash/Panos Pictures

[Paki ʼo te pasina 18]

Neʼe foaki mai e Sehova ia te ʼu meʼa ʼofa ke tou fiafia ai