Ko Te Liliu ʼAē Ko He Tahi ʼe ʼa Sehova ʼe Ko He ʼOfa Makehe Ia

“Ko tātou ʼe ʼa Sehova.”—LOMA 14:8.

1, 2. (a) Ko te pilivilēsio fea ʼaē ʼe tou maʼu? (b) Ko te ʼu fehuʼi fea ʼaē kā tou vakaʼi anai?

 NEʼE ko he pilivilēsio maʼuhiga neʼe foaki ki te puleʼaga ʼo Iselaele ʼi te temi ʼaē neʼe ʼui fēnei age e Sehova kiā nātou: “ ʼE kotou liliu moʼoni anai ko taku koloa makehe ʼi te lotolotoiga ʼo te ʼu hahaʼi fuli.” (Eke. 19:5) Iā ʼaho nei, ʼe toe maʼu e te hahaʼi ʼo te kōkelekāsio Fakakilisitiano ia te pilivilēsio ʼaē ke natou liliu ko he hahaʼi ʼe ʼa Sehova. (1 Pet. 2:9; Fakh. 7:9, 14, 15) E ko he pilivilēsio ʼe feala ke fua lelei kiā tātou ʼo talu ai.

² Logolā ʼe ko he pilivilēsio, kae ko te liliu ʼaē ko he tahi ʼe ʼa Sehova, ʼe toe ʼi ai mo tona ʼu maʼua. Ko ʼihi e feala ke natou ʼui fēnei: ‘ ʼE au lava fai anai koa ia te ʼu meʼa ʼaē ʼe fakamaʼua mai e Sehova? Pea kapau lā ʼe au tō ki te agahala, ʼe situʼa anai koa ia kiā te au? ʼE puli anai koa toku maʼuli ʼāteaina mokā ʼe au liliu ko he tahi ʼe ʼa Sehova?’ ʼE mole kovi ia te ʼu taʼi tuʼania ʼaia. Kae ʼe ʼi ai te tahi age fehuʼi maʼuhiga ʼe tonu ke tou fai: Koteā te ʼu fua lelei ʼo tatatou liliu ʼaē ko he tahi ʼe ʼa Sehova?

Ko Tatatou Liliu Ko He Tahi ʼe ʼa Sehova, ʼe Tou Maʼu Ai Ia Te Maʼuli Fiafia

 3. Neʼe fua lelei feafeaʼi kiā Laape tana filifili ʼaē ke tauhi kiā Sehova?

³ Ko te hahaʼi ʼaē ʼe ʼa Sehova, ʼe natou maʼu koa he ʼu fua lelei mai tonatou maʼuli ʼaia? Tou vakaʼi age muʼa te faʼifaʼitaki ʼa Laape, te fafine paomutu neʼe maʼuli ʼi te kolo ʼo Seliko. ʼE lagi neʼe lahilahi ake ia ʼi te tauhi hala ʼo te ʼu ʼatua o Kanaane. Kae ʼi te temi ʼaē neʼe logo ai ki te ʼu mālo ʼaē neʼe foaki e Sehova ki Iselaele, neʼe mahino ai leva kiā Laape, ko Sehova ʼe ko te ʼAtua moʼoni. Koia neʼe ina tali ke tuʼutāmakiʼia tona maʼuli, kae ke ina haofaki te hahaʼi a te ʼAtua  pea mo tuku kātoa ia tana falala ki te hahaʼi ʼaia ʼo ʼuhiga mo tona kā haʼu. ʼE ʼui fēnei ʼi te Tohi-Tapu: “Ko te fafine paomutu ko Laape, neʼe mole tala koa lā mo ia neʼe agatonu ʼaki tana ʼu gāue, ʼi tana tali kāiga ia te hahaʼi fekau pea neʼe ina fakaliliu nātou ʼi te tahi ala?” (Sake 2:25) Kotou fakakaukauʼi age muʼa ia te ʼu fua lelei ʼaē neʼe ina maʼu ʼi tana kau ki te hahaʼi maʼa ʼa te ʼAtua, ko te hahaʼi neʼe akoʼi ʼaki te Lao ʼa te ʼAtua ʼi te ʼu ala ʼo te ʼofa pea mo te faitotonu. Neʼe lagi fiafia lahi ʼaupitō ʼi tana fetogi ia tona maʼuli! Neʼe ʼohoana mo te tagata Iselaele pea neʼe ina pusiaki tana tama ko Poase, ke liliu ko he tagata makehe ʼa te ʼAtua.—Sos. 6:25; Lute 2:4-12; Mat. 1:5, 6.

 4. Neʼe fua lelei feafeaʼi kiā Lute tana filifili ʼaē ke tauhi kiā Sehova?

⁴ Neʼe toe filifili mo te fafine Moapite ʼaē ko Lute ke tauhi kiā Sehova. ʼI tana kei finemui, neʼe lagi ʼatolasio kiā Kemosi pea mo ihi age ʼatua ʼo Moape, kae neʼe ina ʼiloʼi leva ia te ʼAtua moʼoni ko Sehova, pea neʼe ʼohoana mo te tagata Iselaele neʼe haʼu ʼo maʼuli ʼi tona fenua. (Lau ia Lute 1:1-6.) Ki muli age, ko Lute mo Olipa neʼe nā ʼolo fakatahi mo Naomi ia te faʼē ʼo tonā ʼu ʼohoana ki Petelehemi, kae neʼe kolekole age e Naomi ki te ʼu fafine ʼaia e toko lua ke nā liliu ki tonā fenua. E mole faigafua anai kiā nāua hanā māʼuʼuli ʼi Iselaele. Pea ‘neʼe toe liliu ai leva ia Olipa ki tana hahaʼi pea mo tona ʼu ʼatua,’ kae neʼe mole fia liliu Lute ia. Neʼe mulimuli ia ki tana tui pea neʼe ina ʼiloʼi lelei pe ko te ʼAtua fea ʼaē neʼe fia tauhi ki ai. Neʼe ina ʼui fēnei age kiā Naomi: “ ʼAua tau kolekole mai ʼaē ke au liʼaki koe, ke au maliu kehe mai iā koe; heʼe ko te faʼahi ʼaē ʼe ke ʼalu anai kiai ʼe au ʼalu anai mo au kiai, pea ko te faʼahi ʼaē kā ke moe ai ʼe au moe ai anai mo au. Ko tau hahaʼi ʼe liliu anai ko taku hahaʼi, pea ko tou ʼAtua ʼe liliu anai ko toku ʼAtua.” (Lute 1:15, 16) ʼI tana fili ʼaē ke tauhi kiā Sehova, neʼe maʼu ai e Lute ia te ʼu fua lelei ʼo te Lao ʼa te ʼAtua, ʼaē neʼe i ai te fakatuʼutuʼu makehe maʼa te ʼu fafine vītua pea mo te hahaʼi māsisiva pea mo nātou ʼaē ʼe mole honatou ʼapi. ʼI te ʼu nima ʼo Sehova, neʼe ina maʼu ai te fiafia, te puipui pea mo te fīmālie.

 5. Koteā ʼaē neʼe kotou fakatokagaʼi ʼi te hahaʼi ʼaē ʼe tauhi agatonu kiā Sehova?

⁵ ʼE lagi kotou ʼiloʼi niʼihi ʼi tanatou kua ʼosi foaki tonatou maʼuli kiā Sehova, ʼe natou tauhi agatonu kiā te ia, talu mai fualoa. Kotou fehuʼi age kiā nātou pe neʼe fua lelei feafeaʼi kiā nātou tanatou tauhi ʼaē ki te ʼAtua. Logolā ʼe mole he tahi iā tātou ʼe hao mo fihifihia, kae ʼe tou sio ki te moʼoni ʼo te ʼu palalau ʼaenī ʼa te tagata fai pesalemo: “Fiafia te hahaʼi ʼaē ko tonatou ʼAtua ko Sehova!”—Pes. 144:15.

ʼE Fakapotopoto Ia Te ʼu Meʼa ʼAē ʼe Fakamaʼua Mai e Sehova

 6. He koʼē ʼe mole tonu ke tou tuʼaniaʼi naʼa mole tou lava fai te ʼu gāue ʼaē ʼe fakamaʼua mai e Sehova kiā tātou?

⁶ ʼE lagi kotou feʼekeʼaki peʼe kotou lava fai anai ia te ʼu meʼa ʼaē ʼe fakamaʼua atu e Sehova. ʼE faigafua hatatou tuʼania fau ia te liliu ʼaē ko he kaugana ʼa te ʼAtua, te maʼuliʼi ʼo tana ʼu lao, pea mo te palalau ki tona huafa. Ohagē lā ko Moisese, ʼi tana manatu neʼe mole tuha mo ia ke ʼalu ʼo palalau ki te kau Iselaele pea mo te hau ʼo Esipito ʼi te temi ʼaē neʼe fekauʼi ai ia ia. Kae neʼe mole faigataʼa fau ia te meʼa ʼaē neʼe fakamaʼua age e te ʼAtua kiā Moisese. Ko Sehova neʼe ina ‘akoʼi age ki ai ia te ʼu meʼa ʼaē neʼe tonu ke ina fai.’ (Lau ia Ekesote 3:11; 4:1, 10, 13-15.) ʼI te tali ʼaē e Moisese te tokoni ʼaē neʼe foaki age, neʼe ina maʼu ai te fiafia ʼi te fakahoko ʼo te finegalo ʼo te ʼAtua. ʼO toe fēia mo tātou, ʼe fakapotopoto ia te ʼu meʼa ʼaē ʼe fakamaʼua mai e Sehova kiā tātou. ʼE mahino ki totatou ʼuhiga heʼe haohaoa, pea ʼe fia tokoni kiā tātou. (Pes. 103:14) Ko te tauhi ki te ʼAtua ʼi totatou ʼuhiga tisipulo ʼa Sesu, ʼe ko he meʼa fakafiafia, kae mole ko he maʼua mamafa ia, heʼe ko te taʼi maʼuli ʼaia ʼe fua lelei ki ʼihi pea mo fakafiafia te loto ʼo Sehova. Neʼe ʼui fēnei e Sesu: “Kotou ʼomai kiā te au, . . . pea ʼe au fakafīmālie anai koutou. Kotou toʼo kiā koutou taku ʼakau ʼamo pea ke kotou ako iā te au, heʼe au agamalū pea mo loto agavaivai.”—Mat. 11:28, 29.

 7. He koʼē ʼe kotou lava falala ko Sehova ʼe tokoni atu anai ke kotou fai ia te meʼa ʼaē ʼe ina kole atu?

⁷ ʼE foaki tuʼumaʼu mai anai e Sehova te fakalotomālohi ʼaē ʼe ʼaoga kiā tātou, mo kapau ʼe tou falala kiā te ia ke ina fakamālohiʼi tātou. Ohagē lā, ko Selemia neʼe mole poto palalau ia. Pea ʼi te temi ʼaē neʼe fakanofo ai ia ia e Sehova ke liliu ko Tana polofetā, neʼe ʼui fēnei e Selemia: “Oi! Ê Tuʼi  ʼAliki ko Sehova! Sio mai ʼe mole au poto ʼi te palalau, heʼe kei au tamasiʼi.” Ki muli age, neʼe ina toe ʼui fēnei: “ ʼE mole au toe palalau anai ʼo ʼuhiga mo tona huafa.” (Sel. 1:6; 20:9) Kae ʼaki te fakalotomālohi ʼa Sehova, neʼe feala leva kiā Selemia ke ina fakamafola lolotoga taʼu e 40 ia te logo neʼe mole leleiʼia e te hahaʼi. Neʼe tuʼa lahi tona fakalotomālohiʼi e Sehova, ʼaki te ʼu palalau ʼaenī: “ ʼE au nofo mo koe moʼou haofaki pea mo fakaʼāteaina koe.”—Sel. 1:8, 19; 15:20.

 8. ʼE tou fakahā feafeaʼi tatatou falala ʼaē kiā Sehova?

⁸ Ohagē pē ko te fakalotomālohiʼi ʼaē e Sehova ia Moisese, mo Selemia, ʼe lava tokoni mai ke tou fai ia te meʼa ʼaē ʼe ina fakamaʼua mai ki te kau Kilisitiano ʼi te temi nei. Ko te manatu tāfito ʼaenī ʼe tonu ke tou mulimuli kiai: ke tou falala kātoa ki te ʼAtua. ʼE ʼui fēnei ʼi te Tohi-Tapu: “Falala kiā Sehova ʼaki tou loto kātoa pea ʼaua naʼa ke falala ki tou ʼatamai totonu. ʼI tou ʼu ala fuli tokagaʼi ia ia, pea ko ia, ʼe ina fakatonutonuʼi anai tou ʼu ala foufou.” (Taag. 3:5, 6) ʼE tou fakahā tatatou falala ʼaē kiā Sehova mokā ʼe tou fakaʼaogaʼi te tokoni ʼaē ʼe ina foaki mai ʼaki tana Folafola pea mo te kōkelekāsio. Kapau ʼe tou tuku ia Sehova ke ina takitaki totatou maʼuli, pea ʼe mole ʼi ai anai he meʼa ʼe ina tāʼofi tātou ke tou nofo agatonu kiā te ia.

ʼE Tokaga Sehova Ki Tana Hahaʼi Takitokotahi

9, 10. Ko te puipui feafeaʼi ʼaē ʼe fakapapau mai ʼi te Pesalemo 91?

⁹ ʼI te fakakaukauʼi ʼaē e ʼihi peʼe tonu ke natou foaki tonatou maʼuli kiā Sehova, ʼe lagi natou feʼekeʼaki ʼo ʼuhiga mo te feala ʼaē ke natou agahala, ʼo mole kei tāu ai mo nātou ia te ʼofa ʼo te ʼAtua, pea mo situʼa Sehova kiā nātou. Kae meʼa lelei, heʼe foaki mai e Sehova te puipui kātoa ʼaē ʼe ʼaoga kiā tātou moʼo taupau tuʼumaʼu pē tatatou ʼu felōgoi maʼuhiga ʼaē mo ia. Tou vakaʼi age muʼa peʼe talanoa feafeaʼi i te Pesalemo 91 ki te faʼahi ʼaia.

¹⁰ ʼE kamata fēnei ia te pesalemo ʼaia: “Ko ia ʼaē ʼe nofo ʼi te potu fakalilo ʼo te Māʼoluga, ʼe nofo anai ʼi te malumalu ʼa te Māfimāfi. ʼE au fia ʼui kiā Sehova: ‘Ko koe toku holaʼaga pea mo toku tule mālohi, toku ʼAtua, ʼaē ʼe au falala anai ki ai.’ Ko ia ʼaē ʼe ina fakaʼāteaina anai koe mai te hele ʼa te tagata puke manulele.” (Pes. 91:1-3) ʼE fakahā mai ʼi te ʼu vaega ʼaenī, ʼe fakapapau e te ʼAtua ʼe ina haofaki ia nātou ʼaē ʼe ʼofa kiā te ia pea mo falala kiā te ia. (Lau ia Pesalemo 91:9, 14.) ʼE fakaʼuhiga feafeaʼi tana haofaki ʼaia? ʼI te temi muʼa neʼe haofaki e Sehova ʼihi ʼo tana ʼu kaugana ʼi te faʼahi fakasino, pea ʼi te tahi ʼu ʼaluʼaga moʼo puipui te hōloga ʼaē kā tupu mai ai te Mēsia ʼaē neʼe fakapapauʼi mai. Kae ko tana tahi ʼu tagata agatonu e tokolahi neʼe pilisoniʼi, mo fakamamahiʼi, pea mo mamate ʼi te ʼu kākā ʼa Satana, ʼi tana faiga ʼaē ke ina fakasituʼa nātou mai tanatou nofo agatonu ki te ʼAtua. (Hep. 11:34-39) Neʼe natou maʼu te lototoʼa lahi ʼaē moʼo faʼa kātakiʼi, koteʼuhi neʼe puipui nātou e Sehova ʼi te faʼahi fakalaumālie naʼa puli tanatou agatonu. Tahi ʼaē, ʼe feala ke tou mahino ki te Pesalemo 91 ʼe ko he fakapapau ʼo ʼuhiga mo he puipui ʼi te faʼahi fakalaumālie.

11. Koteā “te potu fakalilo ʼa te Māʼoluga” pea ko ai ʼi ai ʼaē ʼe puipui e te ʼAtua?

¹¹ Ko “te potu fakalilo ʼo te Māʼoluga” ʼaē ʼe talanoa kiai te tagata fai pesalemo, ʼe ko he puipuiʼaga fakalaumālie. ʼI te nofoʼaga ʼaia, ko  nātou ʼaē ʼe nonofo mo te ʼAtua, ʼaē ko tana kau fakaafe, ʼe natou hao mai te meʼa fuli pea mai iā nātou fuli ʼaē ʼe feala ke tuʼutāmakiʼia ai tanatou tui pea mo tonatou ʼofa ki te ʼAtua. (Pes. 15:1, 2; 121:5) ʼE ko te nofoʼaga fakalilo heʼe mole ʼiloʼi te nofoʼaga ʼaia e te hahaʼi ʼaē ʼe mole tui. ʼI te koga meʼa ʼaia, ʼe puipui e Sehova ia te hahaʼi ʼaē ʼe natou ʼui fēnei: ‘Ko koe toku ʼAtua ʼaē ʼe au falala anai ki ai.’ Kapau ʼe tou nonofo ʼi te nonoʼaga ʼaia, ʼe mole tou tuʼaniaʼi fau anai naʼa mole kei ʼofa te ʼAtua kiā tātou ʼi hatatou tō ki he hele ʼa Satana, “te tagata puke manulele.”

12. Koteā te ʼu tuʼutāmaki ʼaē ʼe fakatupu kovi ki tatatou ʼu felōgoi ʼaē mo te ʼAtua?

¹² Ko te ʼu fihifihia fea ʼaē ʼe fakatupu tuʼutāmaki ki tatatou ʼu felōgoi lelei ʼaē mo te ʼAtua? ʼE talanoa te tagata fai pesalemo ki te ʼu tuʼutāmaki, ohagē lā ko “he mahaki ʼe haʼele ʼi te fakapōʼuli [pea mo] te fakaʼauha ʼaē ʼe hoko ʼi te lolotoga ʼo te fetapa.” (Pes. 91:5, 6) Tokolahi neʼe kākāʼi e “te tagata puke manulele” ʼaki te holi ʼaē ke natou loto faʼifaʼitaliha. (2 Ko. 11:3) ʼE ina puke ʼihi ʼaki te loto mānumānu, te fiatuʼu pea mo te fia maʼu koloa. Pea ʼe ina fakahalaʼi ʼihi, ʼaki te ʼu akonaki fakafilosofia ohagē ko te tauhi fakavale ki te fenua, ke natou tui ki te evolisio, pea mo te lotu hala. (Kol. 2:8) Pea tokolahi neʼe tō ki te hele ʼo te ʼu felāveʼi fakasino heʼeʼaoga. Ko te ʼu agaaga fuli ʼaia ʼaē ʼe hagē ko he mahaki, neʼe tupu ʼaki ai ia te mole kei ʼoʼofa ʼa te toko lauʼi miliona hahaʼi ki te ʼAtua.—Lau ia Pesalemo 91:7-10; Mat. 24:12.

Puipui Tokotou ʼOfa ʼAē Ki Te ʼAtua

13. ʼE puipui feafeaʼi tātou e Sehova mai te ʼu tuʼutāmaki ʼaē ʼe fakatupu kovi ki totatou fīmālie fakalaumālie?

¹³ ʼE puipui feafeaʼi e Sehova tana hahaʼi mai te ʼu tuʼutāmaki fakalaumālie ʼaia? ʼE ʼui fēnei e te tagata fai pesalemo: “ [ʼE] ina foaki anai ia te fakatotonu ki tana kau ʼāselo ʼo ʼuhiga mo koe, ke natou taupau koe ʼi tou ʼu ala fuli pē.” (Pes. 91:11) Ko te kau ʼāselo ʼe natou takitaki pea mo puipui tātou ke feala hatatou fakamafola ia te logo lelei. (Fakh. 14:6) ʼO mole gata pē ʼi te kau ʼāselo, ko te kau tagata ʼāfea ʼaē ʼe natou fakatafito tuʼumaʼu tanatou ʼu akonaki ki te Tohi-tapu, ʼe natou puipui tātou naʼa kākāʼi tātou e ni ʼu fakakaukau hala. ʼE natou lava tokoni kiā nātou takitokotahi ʼaē ʼe natou faiga fakamālotoloto ke natou tekeʼi ia te ʼu aga ʼo te mālamanei. (Tito 1:9; 1 Pet. 5:2) ʼE toe foaki mai e “te tagata kaugana agatonu mo poto” ia te meʼa kai fakalaumālie moʼo puipui tātou mai te ʼu akonaki ʼo te evolisio, te ʼu holi heʼeʼaoga, te fia maʼu koloa pea mo te fia maʼu tuʼulaga, pea mo ʼihi atu holi ʼe kovi pea mo kākā. (Mat. 24:45) Koteā ʼaē neʼe tokoni atu ke kotou tekeʼi te ʼu tuʼutāmaki ʼaia?

14. ʼE feafeaʼi hatatou maʼu ia te ʼu fua lelei ʼo te puipui ʼa te ʼAtua ʼaē ʼe ina foaki mai?

¹⁴ Koteā ʼaē ʼe tonu ke tou fai ke tou haga nonofo ai ʼi te “potu fakalilo” ʼa te ʼAtua ʼaē ʼe puipui ai tātou? Ohagē pē ko tatatou tōkakaga tuʼumaʼu ʼo puipui tātou mai te ʼu tuʼutāmaki fakasino, ohagē ko te ʼu fakaʼī, te ʼu fai fakapō, peʼe ko te ʼu mahaki, pea ʼe tonu ke tou tōkakaga tuʼumaʼu pē ʼo puipui tātou mai te ʼu tuʼutāmaki fakalaumālie. Koia, ʼe tonu tuʼumaʼu ai ke tou mulimuli ki te takitaki ʼa Sehova ʼaē ʼe ina foaki mai ʼi tatatou ʼu tohi pea mo te ʼu fono pea mo te ʼu fakatahi lalahi. ʼE tou kumi te tokoni ʼa te kau tagata ʼāfea. Pea  ʼe tou toe maʼu ia te ʼu fua lelei mai te ʼu kalitātē kehekehe ʼaē ʼe fakahā e totatou ʼu tehina mo tuagaʼane. ʼIo, ko tatatou fakatahi ʼaē mo te kōkelekāsio ʼe tokoni mai ke tou aga fakapotopoto.—Taag. 13:20; lau ia 1 Petelo 4:10.

15. He koʼē koa ʼe kotou lava falala ko Sehova ʼe ina lava puipui koutou mai te ʼu faʼahi fuli ʼaē ʼe feala ke tupu ai hana mole kei ʼofa kiā koutou?

¹⁵ ʼE mole tonu ke tou lotolotolua ki te lava puipui ʼo tātou e Sehova mai te ʼu faʼahi fuli ʼaē ʼe feala ke tupu ai hana mole kei ʼofa kiā tātou. (Loma 8:38, 39) Neʼe ina puipui te kōkelekāsio mai te kau takitaki lotu mālohi pea mo te ʼu fili fakapolitike ʼaē ʼi te agamāhani ko tanatou fakatuʼutuʼu tāfito, mole ke natou matehi tātou, kae ke natou fakamavae tātou mai totatou ʼAtua māʼoniʼoni. Kua hoko moʼoni ia te fakapapau ʼaenī ʼa Sehova: “Ko te mahafu fuapē ʼe faʼu anai moʼo fakafeagai kiā te koe ʼe iku noa anai.”—Isa. 54:17.

Ko Ai ʼAē ʼe Ina Foaki Mai Te ʼĀteaina?

16. He koʼē ʼe mole feala ki te mālamanei ke ina foaki mai he ʼāteaina?

¹⁶ Mai tona ʼaluʼaga ʼaē ʼe tou tauhi kiā Sehova, ʼe mole kei tou ʼāteaina ai koa? Kailoa ia, ʼe mole kei tou ʼāteaina mokā tou tauhi ki te mālamanei. Ko te mālamanei ʼe mamaʼo mai iā Sehova pea ʼe puleʼi e te ʼatua agakovi ʼaē ʼe ina fakapōpulaʼi te hahaʼi. (Soa. 14:30) Ohagē lā, ko te tuʼu ʼo te ʼu faʼahiga meʼa ʼaenī ʼa Satana, ʼe ina fakaʼaogaʼi te faigataʼa fakaekonomika ke mole kei ʼāteaina ai te hahaʼi. (Vakaʼi ia Fakahā. 13:16, 17.) Ko te agahala ʼe ina toe maʼu mo te mālohi fakakākā moʼo fakapōpulaʼi ia te hahaʼi. (Soa. 8:34; Hep. 3:13) Koia logolā te ʼu fakaʼāteaina ʼaē ʼe fakapapau mai e te hahaʼi heʼe tui mokā natou fakalotomālohi ia he faʼahiga maʼuli ʼe fakafeagai ki te ʼu akonaki ʼa Sehova, ko nātou fuli ʼaē ʼe fakalogo kiā nātou, ʼe faifai pē pea natou pōpula anai ki te agahala pea mo he faʼahiga maʼuli heʼeʼaoga.—Loma 1:24-32.

17. ʼE feafeaʼi ia te ʼāteaina ʼaē ʼe foaki mai e Sehova?

¹⁷ Tahi ʼaē, ʼe fakaʼāteaina anai tātou e Sehova mai te ʼu meʼa ʼaē ʼe feala ke tou tuʼutāmaki ai, mo kapau ʼe tou falala kiā te ia. ʼI ʼihi ʼaluʼaga, ʼe tou hagē ko he tahi ʼe ina tuku tona maʼuli ki te ʼu nima ʼo he tagata faitafa faiva, ʼaē ʼe feala ke ina fakafīmālieʼi he tahi mai hona mahaki ʼe kovi. ʼE tou nonofo fuli nei ʼi te ʼaluʼaga ʼe kovi: te tofiʼa ʼo te agahala. Hoki tou falala pē kiā Sehova, ʼaki te sākilifisio ʼo Kilisito, pea hoki feala ai ke tou ʼamanaki ʼe tou ʼāteaina mai te ʼu fua ʼo te agahala pea mo tou maʼu ia te maʼuli heʼegata. (Soa. 3:36) Ohagē pē ko te lahi ʼo tatatou falala ʼaē ki te tōketā faitafa heʼe tou ʼiloʼi tana gāue lelei, ʼe toe lahi ai mo tatatou falala kiā Sehova, mo kapau ʼe tou haga ako ke tou ʼiloʼi ia ia. Koia, tou haga ako fakalelei te Folafola ʼa te ʼAtua, heʼe tokoni mai anai ke tou ʼoʼofa kiā te ia, ʼo feala ai ke mole tou toe tuʼaniaʼi tatatou liliu ʼaē ko he tahi ʼe ʼa Sehova.—1 Soa. 4:18.

18. Koteā anai te fua kiā nātou ʼaē ʼe liliu ko he tahi ʼe ʼa Sehova?

¹⁸ ʼE foaki e Sehova ki te hahaʼi fuli ia te fealagia ʼaē ke natou fili te ʼu meʼa ʼaē ʼe natou loto kiai. ʼE ʼui fēnei ʼi tana Folafola: “ ʼE tonu ke ke fili te maʼuli ke feala ai hau maʼuli, ia koe pea mo tou hōloga, ʼo ke ʼofa kiā Sehova, tou ʼAtua.” (Teu. 30:19, 20) ʼE loto ia ke tou fakahā age totatou ʼofa ʼaē kiā te ia ʼaki hatatou fili e tātou totonu ke tou tauhi age kiā te ia. Ko tatatou liliu ko he tahi ʼe ʼa te ʼAtua ʼaē ʼe tou ʼofa ki ai, ʼe mahino ia ʼe tou fiafia tuʼumaʼu ai anai, kae ʼe mole puli ai totatou ʼāteaina.

19. He koʼē ʼe ko he ʼofa makehe tatatou liliu ʼaē ko he tahi ʼe ʼa Sehova?

¹⁹ ʼI totatou ʼuhiga agahala, ʼe mole tuha mo tātou ke tou tauhi ki te ʼAtua haohaoa. Neʼe hoki fakafealagia te faʼahi ʼaia, ʼaki te ʼofa makehe ʼo te ʼAtua. (2 Tim. 1:9) Koia, neʼe tohi fēnei ai e Paulo: “Kapau ʼe tou māʼuʼuli, ʼe tou māʼuʼuli maʼa Sehova, peʼe tou mamate, ʼe tou mamate maʼa Sehova. Koia, peʼe tou māʼuʼuli peʼe tou mamate, ko tātou ʼe ʼa Sehova.” (Loma 14:8) ʼE mole tou fakahemala anai ʼi he temi ʼi tatatou fili ʼaē ke tou liliu ko he tahi ʼe ʼa Sehova.

ʼE Kotou Tali Feafeaʼi Anai?

• Koteā te ʼu fua lelei ʼo tatatou liliu ko he tahi ʼe ʼa Sehova?

• He koʼē ʼe tou lava fai te ʼu gāue ʼaē ʼe fakamaʼua mai e te ʼAtua?

• ʼE foaki feafeaʼi e Sehova te puipui ki tana ʼu kaugana?

[ʼU fehuʼi ʼo te ako]

[Paki ʼo te pasina 15]

Kotou fehuʼi ki niʼihi pe neʼe fua lelei feafeaʼi kiā nātou tanatou liliu ʼaē ko he tahi ʼe ʼa Sehova

[Paki ʼo te pasina 16]

Ko te ʼu ʼaluʼaga fea ʼaē ʼe foaki mai ai e Sehova te puipui?