ʼE ʼOlo Fuli Koa Te Hahaʼi Agalelei Ki Selō?

HILI ki te kai fakamuli ʼa Sesu ʼi te pō ʼaē ʼi muʼa ʼo tona matehi, neʼe fakapapau age e Sesu ʼe ina fakapale anai nātou ʼaki honatou nofoʼaga ʼi selō. Neʼe ina ʼui fēnei: “ ʼI te ʼapi ʼo taku Tamai, ʼe lahi ai te ʼu nofoʼaga. Kanaʼaua lā, neʼe mole au tala atu kiā koutou, koteʼuhi heʼe au ʼalu ʼo teuteuʼi he nofoʼaga maʼa koutou.” (Soane 14:2) He koʼē ʼe foaki anai e Sesu honatou nofoʼaga ʼi selō? Koteā ʼaē kā natou fai anai ʼi selō?

Neʼe manatu ia Sesu ki te gāue makehe ʼaē kā fai anai e tana ʼu tisipulo. Lolotoga ia te pō ʼaia, neʼe ina ʼui fēnei: “Ko koutou ia ʼaē neʼe nonofo fakatahi tuʼumaʼu mo au ʼi toku ʼu ʼahiʼahiʼi; pea ʼe au fai he fuakava mo koutou, ohagē ko taku Tamai neʼe ina fai te fuakava mo au, ki he puleʼaga.” (Luka 22:28, 29) Neʼe fakapapau e te ʼAtua kiā Sesu ʼe liliu anai ko te Hau ʼaē kā ina foaki anai ki te mālamanei ia he puleʼaga lelei, ko te meʼa lahi tokotahi ʼaē ʼe ʼaoga ki te hahaʼi. ʼE haofaki anai e Sesu ia te hahaʼi mai te mamahi pea mo ina fakaʼauha anai ia nātou ʼaē ʼe natou gaohi koviʼi ia nātou. Logolā ko Sesu ʼe ina maʼu anai ia tana hahaʼi fakalogo ʼo aʼu “ki te ʼu potu taupotu ʼo te kele,” kae ko tona hekaʼaga fakahau ʼe tuʼu pē anai ia ʼi selō.—Pesalemo 72:4, 8; Taniela 7:13, 14.

Kae ʼe mole hau tokotahi anai Sesu. Koia neʼe ina fakapapau ai ki tana kau ʼapositolo ia honatou nofoʼaga ʼi selō. Neʼe ko nātou ʼuluaki ʼaē neʼe fili ke natou “pule fakahau . . . ki te kele.”—Fakahā 5:10.

Ko te tokofia ʼaē kā ʼolo ki selō? Ohagē pē ko he puleʼaga, ʼe tokosiʼi ia te kau takitaki ʼaē ʼi te Puleʼaga ʼo te ʼAtua ʼi selō mokā fakatatau ki te hahaʼi fuli ʼaē kā fakalogo ki tanatou pule. Kiā nātou ʼaē kā kaugā hau anai mo ia, neʼe ʼui fēnei e Sesu: “ ʼAua naʼa ke manavasiʼi, kiʼi faga ovi, heʼe ko takotou Tamai neʼe ina leleiʼia ia te foaki atu ʼo te puleʼaga.” (Luka 12:32) Ko te “kiʼi faga ovi” ʼaia ʼe natou toko 144 000. (Fakahā 14:1) ʼE natou tokosiʼi mokā fakatatau mo te ʼu lauʼi miliona hahaʼi ʼaē kā māʼuʼuli anai ʼo heʼegata ʼi te kele, ʼo natou fakalogo agatonu ki te Puleʼaga.—Fakahā 21:4.

Koia, ʼe mole ʼolo fuli ia te hahaʼi agalelei ki selō. ʼO ʼuhiga mo te Hau agalelei ko Tavite, neʼe ʼui fakalelei fēnei e te ʼapositolo ko Petelo: “Ko Tavite neʼe mole hake ia ki selō.” (Gāue 2:34) Ko Soane Patita neʼe ko he tagata agalelei. Kae neʼe fakahā e Sesu ʼe mole fakakolōliaʼi anai ia Soane Patita ke hau ʼi selō. Neʼe ʼui fēnei e Sesu: “Ia nātou ʼaē neʼe tupu ʼi he ʼu fafine, neʼe heʼeki he tahi kua fakatupu ʼe lahi ake ia Soane Patita; kae ko ʼaē ʼe veliveli ʼi te puleʼaga ʼo selō ʼe lahi ake ia te ia.”—Mateo 11:11.

ʼE Kotou Maʼu Anai Koa Ia Te Fakapale ʼo Te Hahaʼi Agalelei?

Koteā ʼaē ʼe tonu ke fai e he tahi mokā ʼe ina fia maʼu ia te fakapale ʼaē ko te maʼuli heʼegata ʼi te kele? Neʼe ʼui fēnei e Sesu: “Ko te ʼAtua, ʼi tona ʼofa lahi ki te mālamanei, neʼe ina foaki mai tona ʼAlo ʼulu tokotahi, koteʼuhi ko ʼaē ʼe tui kiā te ia, ke ʼaua naʼa fakaʼauha kae ke ina maʼu ia te maʼuli heʼegata.” (Soane 3:16) Kotou tokagaʼi, ʼi te ʼofa ʼo te ʼAtua ki te mālamanei, neʼe ina foaki ai ki te hahaʼi fuli ia te fealagia ʼaē ke natou māʼuʼuli ʼo heʼegata, kae ʼe gata pē kiā nātou ʼe “tui” ʼaē kā natou maʼu moʼoni ia te fakapale.

ʼE tonu ke fakatafito ia te tui ki te ʼatamai mālama totonu. (Soane 17:3) ʼE feala ke kotou fakahā ko koutou ko he tahi ʼe agalelei ʼaki takotou ako lahi age ʼo ʼuhiga mo te fakatuʼutuʼu ʼa Sehova maʼa te tagata. Kotou tui ki te ʼu meʼa ʼaē ʼe kotou ako ke ina uga ai koutou ke kotou fai he ʼu gāue. Pea ʼe fakapapau atu, ʼe feala ke kotou maʼu moʼoni anai ia te maʼuli heʼegata.

 [Talanoa ʼo te pasina 7]

Koteā ʼAē ʼe ʼUi ʼi Te Tohi-Tapu?

Fehuʼi:

Koteā ʼaē ʼe hoko ki te hahaʼi agalelei ʼi tanatou mate?

Te tali:

“Ko te kau mate, ʼe mole kei natou ʼiloʼi he meʼa.”​—TAGATA TĀNAKI 9:5.

Fehuʼi:

Koteā te ʼamanaki ʼa te hahaʼi agalelei ʼo ʼuhiga mo te kā haʼu?

Te tali:

“ ʼE hoko mai te hola ʼaē ko nātou fuli ʼaē ʼe nonofo ʼi te ʼu falemaka fakamanatu ʼe natou logo anai ki [te] leʼo [ʼo Sesu] pea ʼe natou hū mai anai ki tuʼa.”​—SOANE 5:28, 29.

Fehuʼi:

ʼE māʼuʼuli anai ʼifea ia te hahaʼi tokolahi ʼaē ʼe agalelei?

Te tali:

“ ʼE maʼu anai te kele e te kau faitotonu, pea ʼe natou nonofo ai anai ʼo talu ai.”​—PESALEMO 37:29.