Kotou Haʼele ʼAki Te Laumālie Pea ʼe Tokoni Atu Anai Ke Kotou Agatonu Ki Takotou Foaki Tokotou Maʼuli Ki Te ʼAtua

“Kotou haga haʼele ʼaki te laumālie pea ʼe mole kotou fakahoko ai anai he holi ʼo te kakano.”—KAL. 5:16.

 1. Koteā te ʼu papitema ʼaē neʼe fai ʼi te ʼaho ʼo te Penikositē?

 ʼI TE temi ʼaē neʼe palalau ai te ʼu tisipulo ʼa Sesu ʼi te ʼu lea kehekehe ʼi te ʼaho ʼo te Penikositē ʼo te taʼu 33 ʼo totatou temi, neʼe hoko ʼi tanatou kua ʼosi papitemaʼi ʼaki ia te laumālie māʼoniʼoni. Neʼe natou fakahā ia te meʼa ʼofa fakamilakulo ʼo te laumālie. (1 Ko. 12:4-10) Neʼe koteā te fua ʼo te meʼa ʼofa ʼaia pea mo te akonaki ʼaē neʼe fai e te ʼapositolo ko Petelo? ‘Neʼe mamahi ʼaupitō ia te loto’ ʼo te hahaʼi tokolahi. ʼAki te fakalotomālohiʼi ʼa Petelo, neʼe natou fakahemala ai pea mo papitemaʼi ai nātou. ʼE ʼui fēnei ʼi te fakamatala: “Ko nātou ʼaē neʼe natou tali ʼaki tonatou loto kātoa tana folafola neʼe papitemaʼi pea, ʼi te ʼaho ʼaia, ko te teitei toko tolu afe nefesi neʼe hilifaki.” (Gāue 2: 22, 36-41) Ohagē ko tona fakatotonu e Sesu, neʼe papitemaʼi nātou ʼi te vai, ʼi te huafa ʼo te Tamai, mo te ʼAlo, pea mo te laumālie māʼoniʼoni.—Mat. 28:19.

2, 3. (a) Kotou fakamahino ia te kehekehe ʼo te papitema ʼaki ia te laumālie māʼoniʼoni pea mo te papitema ʼi te huafa ʼo te laumālie māʼoniʼoni. (b) He koʼē ʼe fakamaʼua ki te kau Kilisitiano moʼoni fuli iā ʼaho nei ke natou papitema ʼi te vai?

² Kae ʼe ʼi ai koa he kehekehe ʼo te papitema ʼaki ia te laumālie māʼoniʼoni pea mo te papitema ʼi te huafa ʼo te laumālie māʼoniʼoni? ʼEī. Ko nātou ʼaē ʼe papitemaʼi ʼaki ia te laumālie māʼoniʼoni ʼe toe tutupu ake ohagē ko he ʼu foha ʼo te ʼAtua neʼe fakanofo ʼaki te laumālie. (Soa. 3:3) ʼE fakanofo nātou ke natou kaugā hau pea mo kaugā pelepitelō mo Sesu ʼi te temi kā haʼu, ʼi te Puleʼaga ʼo te ʼAtua ʼi selō, pea ʼe natou kau ki te sino fakalaumālie ʼo Kilisito. (1 Ko. 12:13; Kal. 3:27; Fakh. 20:6) Koia ko te papitema ʼaia, te papitema ʼaki ia te laumālie māʼoniʼoni, neʼe fai e Sehova ʼi te ʼaho ʼo te Penikositē pea ki muli age, neʼe ina fili ia te hahaʼi ke natou kaugā maʼu tofiʼa mo Kilisito. (Loma 8:15-17) Kae koteā te fakaʼuhiga ʼo te papitema ʼi te huafa ʼo te laumālie māʼoniʼoni, ʼe ko he meʼa ʼe fai tuʼumaʼu ʼi te ʼu fakatahi ʼa te hahaʼi ʼa Sehova ʼi totatou temi?

³ Ko te kau Kilisitiano moʼoni ʼe natou papitema ʼi te vai ko te fakatā ʼaia ʼo tanatou foaki kātoa ia tonatou maʼuli kiā Sehova ʼAtua. ʼE toe fēia mo nātou ʼaē ʼe natou maʼu ia te ʼamanaki ke natou ʼolo ki selō. Kae ko te papitema ʼi te vai ʼe ko he fakamaʼua ʼe tonu ke toe fai mo te ʼu lauʼi miliona tagata mo fafine ʼi totatou temi, ʼaē ʼe natou maʼu ia te ʼamanaki ke natou māʼuʼuli ʼo heʼegata ʼi te kele. Tatau aipē ia te ʼamanaki ʼaē ʼe maʼu e he tahi, ko te papitema ʼi te vai ʼi te huafa ʼo te Tamai pea mo te ʼAlo pea mo te laumālie māʼoniʼoni ʼe ko he fakatuʼutuʼu ʼe maʼua ke fai e he tahi ke tali ia ia e te ʼAtua. Ko te kau Kilisitiano fuli ʼaē kua papitema ʼe fakamaʼua ke natou “haga haʼele ʼaki te laumālie.” (Lau ia Kalate 5:16.) ʼE kotou haʼele koa ʼaki te laumālie ke tokoni atu kiā koutou ke kotou agatonu ki takotou foaki tokotou maʼuli ki te ʼAtua?

Koteā Te Fakaʼuhiga ʼo Te “Haʼele ʼAki Te Laumālie”?

 4. Koteā te fakaʼuhiga tāfito ʼo te “haʼele ʼaki te laumālie”?

⁴ Ko te “haʼele ʼaki te laumālie” ʼe fakaʼuhiga ki tatatou tali ke gāue ia te laumālie māʼoniʼoni iā tātou, ke tou tuku ke malave kiā tātou ia te laumālie māʼoniʼoni. ʼE feala ke tou ʼui, ʼe tonu ke takitaki e te laumālie māʼoniʼoni tatatou ʼu gāue ʼi te ʼaho fuli pē. Iā Kalate kāpite 5, ʼe fakahā ai ia te kehekehe ʼo te takitaki kita e te laumālie māʼoniʼoni pea mo te takitaki kita e te kakano.—Lau ia Kalate 5:17, 18.

 5. Kapau ʼe tou mulimuli ki te laumālie māʼoniʼoni, ko te ʼu gāue fea ʼaē ʼe tou liʼaki?

⁵ Kapau ʼe takitaki koutou e te laumālie māʼoniʼoni, ʼe kotou faiga ke kotou liʼaki ia te ʼu gāue ʼo te kakano. ʼE kau ki te ʼu gāue ʼaia “te fai folonikāsio, te heʼemaʼa, te māmio kovi, te tauhi tamapua, te ʼu gaohi meʼa fakatemonio, te ʼu fehiʼa, te fefihiʼaki, te maheka, te ʼu ʼita kovi, te ʼu kē, te ʼu mavetevete, te ʼu magaʼi lotu, te ʼu fuaʼā, te ʼu ʼinu fakavale, te ʼu fakafiafia fakavalevale.” (Kal. 5:19-21) Ko tona ʼuhiga, “ ʼaki te laumālie ʼe kotou tāmateʼi ia te ʼu gāue ʼo te sino.” (Loma 8:5, 13) ʼE tokoni atu anai ia te laumālie māʼoniʼoni ke kotou tokagaʼi tāfito ia te ʼu meʼa ʼo te laumālie pea mo mulimuli ki tana takitaki, kae ʼe mole kotou tuku ke puleʼi koutou e te ʼu holi ʼo te kakano.

 6. ʼAki he faʼifaʼitaki, kotou fakahā pe koteā ʼaē ʼe maʼua ke tou fai ke tou fakahā ai ia te fua ʼo te laumālie.

⁶ ʼI te gāue ʼa te laumālie māʼoniʼoni kiā koutou, ʼe kotou maʼu ai ia te ʼu kalitātē ʼo te ʼAtua, “te fua ʼo te laumālie.” (Kal. 5:22, 23) Kae ʼe mahino kiā koutou, ʼe tonu ke lahi takotou ʼu faiga. Koʼenī  tona faʼifaʼitaki: Ohagē lā ko he tagata gāue kele. ʼE mahino ia ʼe ʼaoga kiā ia ia te laʼā pea mo te vai; kapau ʼe mole ʼi ai te laʼā mo te vai, pea ʼe mole feala anai ke ʼamanaki e te tagata ke ina utu he meʼa. ʼE feala ke tou fakatatau ia te laumālie māʼoniʼoni ki te laʼā. ʼE ʼaoga ke tou maʼu ia te laumālie māʼoniʼoni ke tou fakahā ia te fua ʼo te laumālie. Kae koteā ʼaē kā hoko mo kapau ʼe mole gāue kinakina ia te tagata? (Taag. 10:4) ʼEī, ke fua lelei pea ke lahi ia te ʼu kalitātē ʼo te laumālie māʼoniʼoni iā koutou, ʼe fakalogo ki takotou faʼahiga gāueʼi ia tokotou loto ʼaē ʼe fakatātā ki he kele. Koia, kotou fai kiā koutou ia te fehuʼi ʼaenī: ‘ ʼE au tuku koa ia te laumālie māʼoniʼoni ke fua iā au ʼaki haku mulimuli kiai?’

 7. He koʼē ʼe maʼuhiga ʼaupitō ia te ako pea mo te metitāsio mo kapau ʼe kotou fia maʼu ia te fua ʼo te laumālie?

⁷ Ke lelei tanatou taʼukai, ʼe toe ʼaoga ki te ʼu tagata gāue kele ke natou fakapala tanatou ʼu gāueʼaga. Ke feala hakotou fakahā ia te fua ʼo te laumālie, ʼe ʼaoga kiā koutou ia te ʼu vai ʼo te moʼoni ʼaē ʼe tou maʼu ʼi te Tohi-Tapu pea ʼi te ʼu kōkelekāsio Fakakilisitiano iā ʼaho nei. (Isa. 55:1) Neʼe lagi kua kotou fakahā lelei ki te hahaʼi tokolahi ko te Tohi-Tapu ʼe ko te fua ʼo te laumālie māʼoniʼoni. (2 Tim. 3:16) Pea ko te kalasi ʼo te kaugana agatonu mo poto ʼe ina foaki mai ia te ʼu fakamahino ʼaē ʼe ʼaoga lahi kiā tātou, ʼo te ʼu vai maʼa ʼo te moʼoni ʼo te Tohi-Tapu. (Mat. 24:45-47) ʼE fakahā lelei mai ia te ʼu meʼa ʼe tonu ke tou fai. Ke feala ke malave ia te laumālie māʼoniʼoni kiā tātou, ʼe tonu ke tou lau pea mo metitāsio ki te Folafola ʼa te ʼAtua. Kapau ʼe kotou fai ia te ʼu faʼahi ʼaia, ʼe kotou mulimuli ki te ʼu faʼifaʼitaki lelei ʼa te kau polofetā ʼaē neʼe natou “ako fakamālotoloto pea mo kumi fakalelei” ia te ʼu logo ʼaē neʼe fakahā age kiā nātou. ʼE lelei ke kotou tokagaʼi, māʼia mo te ʼu ʼāselo neʼe natou fia ʼiloʼi ia te ʼu moʼoni fakalaumālie ʼo ʼuhiga mo te Hako ʼaē neʼe fakapapau pea mo te kōkelekāsio Fakakilisitiano kua fakanofo.—Lau ia 1 Petelo 1:10-12.

ʼE Feafeaʼi Te Malave ʼo Te Laumālie Māʼoniʼoni Kiā Tātou?

 8. He koʼē ʼe maʼuhiga kiā koutou ke kotou kole kiā Sehova tona laumālie?

⁸ ʼE mole gata ʼaki pē ia takotou ako ia te Tohi-Tapu pea mo tona metitāsioʼi. ʼE ʼaoga ke kotou haga kole ia te tokoni pea mo te takitaki ʼa Sehova. ʼE feala “ke ina fai ke mahu ʼaupitō ʼo laka age iā meʼa fuli pē ʼaē ʼe tou kole peʼe tou loto kiai.” (Efe. 3:20; Luka 11:13) Kae koteā ʼaē kā kotou tali anai mokā fehuʼi fēnei atu e he tahi: “He koʼē ʼe tonu ke au haga kole mo kapau kua ʼiloʼi e te ʼAtua ‘te ʼu meʼa ʼaē ʼe ʼaoga kiā au ʼi muʼa ʼo haku kole kiā te ia’?” (Mat. 6:8) Koteʼuhi ʼaki takotou kole ia te laumālie māʼoniʼoni, ʼe kotou fakamoʼoni ai ʼe kotou falala kiā Sehova. Ohagē lā, kapau ʼe haʼu he tahi ʼo kumi tokoni atu, ʼe kotou fai anai ia meʼa fuli moʼo tokoni kiā ia, he neʼe ina kole atu ke kotou tokoni age, ʼo ina fakahā ai ia tana falala ʼaē kiā koutou. (Vakaʼi ia Tāʼaga Lea 3:27.) ʼO toe fēia pē, ʼe fiafia Sehova ʼi takotou kole age ia tona laumālie, pea ʼe ina foaki atu anai kiā koutou.—Taag. 15:8.

 9. Ko te kau ki te ʼu fono, ʼe lava tokoni feafeaʼi ke malave kiā koutou ia te laumālie ʼo te ʼAtua?

⁹ ʼE feala hakotou mahino ki te tahi ʼaluʼaga ʼe malave mālohi ai ia te laumālie ʼo te ʼAtua kiā koutou, ʼe ko tatatou ʼu fono mo tatatou ʼu fakatahi. ʼE maʼuhiga ʼaupitō ke tou faiga ke tou kau pea mo fakalogo lelei ia te polokalama. Ko te fai ʼo te faʼahi ʼaia ʼe tokoni atu ke kotou mahino ki “te ʼu meʼa loloto ʼa te ʼAtua.” (1 Ko. 2:10) ʼE toe ʼi ai mo te ʼu fua lelei ʼo te fai tuʼumaʼu ʼo he ʼu tali. Kotou fakakaukauʼi ia te ʼu fono ʼaē neʼe kotou kau kiai ʼi te ʼu vāhaʼa e fā ʼaenī kua hili. Neʼe tuʼa fia takotou hiki tokotou nima, ʼo kotou tali, ʼo kotou fakahā ai takotou tui? ʼE tonu koa ke kotou tuputupu ʼi te faʼahi ʼaia? Kapau koia, kotou fai he tonu ʼo ʼuhiga mo te ʼu meʼa ʼaē ʼe kā kotou fai anai ʼi te ʼu vāhaʼa kā haʼu. ʼE tokagaʼi anai e Sehova ia takotou  fia tali pea ʼe ina foaki atu anai ia tona laumālie, ʼaē kā tokoni atu ke lahi age takotou lagolago ki te ʼu fono ʼaē ʼe kotou kau kiai.

10. Kapau ʼe tou haʼele ʼaki ia te laumālie, koteā te fakaafe ʼaē ʼe tonu ke tou fai ki te hahaʼi?

¹⁰ Kapau ʼe tou haʼele ʼaki ia te laumālie, ʼe tonu ke tou tali ki te fakaafe ʼaē ʼe tou lau iā Fakahā 22:17, ʼaē ʼe ʼui fēnei ai: “Ko te laumālie pea mo te fafine ʼohoana ʼe nā ʼui tuʼumaʼu: ‘Haʼu!’ Pea ko ʼaē ʼe fagono ke ina ʼui fēnei: ‘Haʼu!’ Pea ko ʼaē ʼe fia ʼinu ke haʼu; ko ʼaē ʼe loto kiai ke ina toʼo noa te vai ʼo te maʼuli.” Ko te laumālie, ʼaē ʼe gāue ʼaki ia te kalasi ʼa te fafine ʼohoana kua fakanofo, ʼe ina fakahoko atu te fakaafe ʼaia ʼo ʼuhiga mo te vai ʼo te maʼuli. Kapau neʼe kotou tali ia te pāui ʼaē “haʼu!” ʼe kotou lotomālohi koa ʼo kotou ʼui fēnei: “Haʼu!”? Ko he toe pilivilēsio lahi tatatou lava kau ki te gāue ʼaia ʼaē ʼe ina haofaki te ʼu maʼuli!

11, 12. Koteā te gāue ʼaē ʼe fai e te laumālie māʼoniʼoni ʼi te gāue fai fakamafola?

¹¹ Ko te gāue maʼuhiga ʼaia ʼe fakahoko nei ʼaki ia te takitaki ʼa te laumālie māʼoniʼoni. ʼE tou lau ʼi te Tohi-Tapu pe neʼe gāue feafeaʼi ia te laumālie māʼoniʼoni ʼi te ʼuluaki sēkulō, moʼo ʼavahi ʼo te ʼu telituale foʼou maʼa te ʼu misionea. Ko te ʼapositolo ko Paulo pea mo tona ʼu kaumeʼa neʼe “tapuʼi age kiā nātou e te laumālie māʼoniʼoni ke natou tala ia te folafola ʼi te tisitilike ʼo Asia”; pea neʼe toe tapuʼi age kiā nātou ke natou ʼolo ki Pitinia. ʼE mole tou ʼiloʼi lelei pe neʼe tāʼofi feafeaʼi nātou e te laumālie ke mole natou ʼolo ki te ʼu koga meʼa ʼaia, kae ko te meʼa ʼaē ʼe hā lelei mai ʼe ko te laumālie neʼe ina taki ia Paulo ʼi te ʼu gāueʼaga lalahi ʼo Eulopa. Neʼe sio ki te meʼa neʼe hā kiā ia, neʼe ko te tagata Masetonia ʼe ina kole ke tokoni age.—Gāue 16:6-10.

¹² Iā ʼaho nei, ko te laumālie ʼo Sehova ʼe ina takitaki fēia ia te gāue fai fakamafola ʼi te mālamanei kātoa. ʼE mole fakaʼaogaʼi ia he ʼu meʼa ʼe hā fakamilakulo moʼo foaki ia he takitaki, kae ʼe takitaki e Sehova te kau fakanofo ʼaki ia te laumālie māʼoniʼoni. Pea ko te laumālie ʼe ina uga ia te ʼu tehina mo tuagaʼane ke natou fai ia meʼa fuli pē ʼe natou lavaʼi ʼi te fai fakamafola pea mo te faiako. ʼE mahino papau ia kua kotou kau ki te gāue maʼuhiga ʼaia. ʼE feala koa ke lahi age takotou fiafia ʼi te gāue lelei ʼaia?

13. ʼE lava feafeaʼi hakotou fakalogo ki te takitaki ʼa te laumālie māʼoniʼoni? Kotou tuku mai he faʼifaʼitaki.

¹³ ʼE feala ke kotou fakalogo ki te takitaki ʼa te laumālie māʼoniʼoni ʼaki takotou maʼuliʼi ia te ʼu tokoni ʼaē ʼe foaki maʼa te hahaʼi ʼa te ʼAtua. Kotou tokagaʼi ia te finemui ko Mihoko mai Saponia. Mole heʼeki faʼa fualoa tana toʼo te selevisi pioniē, pea neʼe manatu ia ʼe mole poto ʼi te fai ʼo te ʼu ʼaʼahi; neʼe manatu ia ʼe mole ina ʼiloʼi peʼe feafeaʼi hana palalau ke tupu ʼaki ai he fia logo ʼa te hahaʼi. ʼI te temi ʼaia, neʼe foaki ʼi Te Minisitelio ʼo Te Puleʼaga ia te ʼu tokoni ʼaoga moʼo fai he ʼu ʼaʼahi ʼe nounou. Pea neʼe tā ia te kaupepa lahi (Fakafalani) Une vie pleinement satisfaisante : Comment ? Neʼe ʼaoga tāfito ia te kaupepa lahi ʼaia ʼi te telituale Saponia. Neʼe mulimuli ia Mihoko ki te ʼu tokoni ʼo ʼuhiga mo te fakaʼaogaʼi ʼo te kaupepa lahi ʼaia, tāfito peʼe feafeaʼi tona fakaʼaogaʼi moʼo fai he ʼu ʼaʼahi ʼe nounou. Mole tuai, pea neʼe kamata tana ʼu ako Tohi-Tapu mo nātou ʼaē neʼe natou fakafisi ki muʼa atu ia te ako. ʼE ina ʼui fēnei: “Kua au maʼu taku ʼu tuʼuga ako, ko ako e 12, pea neʼe tonu ke au kole ki ʼihi ke natou fakatalitali!” Koia, kā kotou haʼele ʼaki ia te laumālie, mo maʼuliʼi te takitaki ʼaē ʼe foaki e te ʼu kaugana ʼa Sehova, ʼe feala ai ke kotou utu lahi.

Kotou Falala Ki Te Laumālie ʼo Te ʼAtua

14, 15. (a) ʼE lava feafeaʼi ki he hahaʼi agahala hanatou agatonu ki tanatou foaki ʼaē ʼo tonatou maʼuli ki te ʼAtua? (b) ʼE lava feafeaʼi hakotou maʼu te ʼu kaumeʼa ʼaē ʼe lelei age?

¹⁴ ʼI takotou liliu ko he ʼu minisi ʼa Sehova, ʼe kotou maʼu ia he minisitelio ʼe tonu ke kotou fakahoko. (Loma 10:14) ʼE lagi kotou manatu ʼe mole  heʼeki kotou popoto ʼi te fakahoko ʼo te taʼi maʼua ʼaia. Kae ohagē ko te kau fakanofo, ʼe ko te ʼAtua ʼaē ʼe ina fakaliliu koutou ke kotou popoto. (Lau ia 2 Kolonito 3:5.) ʼE feala ke kotou agatonu ki takotou foaki tokotou maʼuli ki te ʼAtua ʼaki takotou fai te ʼu meʼa ʼe kotou lavaʼi pea mo falala ki te laumālie ʼo te ʼAtua.

¹⁵ ʼE moʼoni, ʼe mole ko he meʼa faigafua kiā tātou hahaʼi agahala, hatatou agatonu ki tatatou foaki totatou maʼuli ki totatou ʼAtua haohaoa, ia Sehova. Ko te faʼahi ʼe ina fakaliliu ʼo faigataʼa, ko ʼihi ʼaē neʼe kotou fakatahi mo nātou ʼi muʼa atu, ʼe lagi mole natou mahino ki tokotou faʼahiga maʼuli foʼou pea mo lagi “talanoa kovi ʼo ʼuhiga mo koutou.” (1 Pet. 4:4) Kae ʼaua naʼa galo kiā koutou, kua kotou maʼu ia he ʼu fakakaumeʼa foʼou, pea ko te ʼu kaumeʼa ʼaē ʼe maʼuhiga age ʼe ko Sehova pea mo Sesu Kilisito. (Lau ia Pesalemo 2:21-23.) ʼE toe maʼuhiga foki ke kotou feʼiloʼiʼaki mo te ʼu tehina mo tuagaʼane ʼo tokotou kōkelekāsio, ʼaē ʼe kau ki “te fāmili kātoa ʼo te ʼu tehina” ʼi te mālamanei. (1 Pet. 2:17; Taag. 17:17) Ko Sehova, ʼaki tona laumālie, ʼe tokoni atu anai ke kotou maʼu hokotou ʼu kaumeʼa ʼe natou uga anai koutou ki he ʼu meʼa ʼe lelei.

16. He koʼē, ohagē ko Paulo, ʼe feala ke kotou “fiafia ʼi te ʼu vaivaiʼia”?

¹⁶ Māʼiapē lā mo takotou maʼu he ʼu kaumeʼa ʼe tokoni atu ʼi te kōkelekāsio, kae ʼe kei lagi faigataʼa kiā koutou te tauʼi ʼo te ʼu faigataʼaʼia ʼo te ʼaho fuli. ʼAki te ʼu meʼa ʼaē ʼe tonu ke kotou tauʼi, ʼe lagi kotou liliu ai ʼi ʼihi temi ʼo mole kei kotou lava kātakiʼi, ohagē ʼe kotou tauʼi ia he ʼu fihifihia ʼe mole puli anai ʼi he temi. ʼE ko te temi tāfito ʼaia ke kotou haga ai kiā Sehova, ʼo kotou kole ia tona laumālie māʼoniʼoni. Neʼe tohi fēnei e te ʼapositolo ko Paulo: “ ʼI te temi ʼaē ʼe au vaivai ai, ʼe ko te temi ʼaia ʼaē ʼe au mālohi ai.” (Lau ia 2 Kolonito 4:7-10; 12:10.) Neʼe ʼiloʼi e Paulo ko te laumālie ʼo te ʼAtua ʼe feala ke tokoni ki te ʼu faʼahiga vaivaiʼia kehekehe pē. Koia, ko te mālohi gāue ʼo te ʼAtua ʼe feala ke ina fakamālohiʼi koutou ʼi te ʼu temi ʼaē ʼe kotou vaivavai ai pea mokā ʼaoga ke tokoni atu. Neʼe tohi e Paulo neʼe feala ke “fiafia ʼi te ʼu vaivaiʼia.” Neʼe ina logoʼi ia te gāue ʼa te laumālie māʼoniʼoni iā te ia ʼi te temi ʼaē neʼe vaivai ai. ʼE feala ke kotou logoʼi mo koutou ia te faʼahi ʼaia!—Loma 15:13.

17. ʼE lava tokoni feafeaʼi atu ia te laumālie māʼoniʼoni ke kotou ʼolo ki te koga meʼa ʼaē ʼe kotou fia ʼolo kiai?

¹⁷ ʼE ʼaoga kiā tātou ia te laumālie ʼo te ʼAtua ke feala ai hatatou foaki totatou maʼuli kiā te ia. Tou toʼo he faʼifaʼitaki: Ohagē lā ʼe kotou foe he vaka tuʼu lā. Ko takotou fakatuʼutuʼu ke kotou tauhi kiā Sehova ʼo talu ai. Ko te laumālie māʼoniʼoni ʼe hagē ko te matagi ʼaē ʼe kotou fia fakaʼaogaʼi ke kotou tau haohaoa ki te koga meʼa ʼaē ʼe kotou fia ʼolo kiai. ʼE mole kotou loto ke feʼāveʼaki koutou ʼi hē mo hē e te laumālie ʼo te mālama ʼa Satana. (1 Ko. 2:12) ʼI hona ʼaluʼaga fakatā, ʼe tonu ke kotou ʼiloʼi ia te matagi ʼaē ʼe totonu pea mo kotou fakaʼaogaʼi. ʼE ko te laumālie māʼoniʼoni ʼaia. ʼAki ia te Folafola ʼa te ʼAtua pea mo tana kautahi ʼaē ʼe takitaki e tona laumālie, ʼe uga anai koutou e te laumālie māʼoniʼoni ki te ala ʼaē ʼe totonu.

18. Koteā ʼaē ʼe kotou fakatotonu ʼi te temi nei ke kotou fai, pea koteā tona tupuʼaga?

¹⁸ Kapau neʼe kotou ako mo te kau Fakamoʼoni ʼa Sehova, ʼo kotou fakatahi fiafia mo nātou, kae mole heʼeki kotou foaki tokotou maʼuli kiā Sehova pea mo papitema, kotou fai kiā koutou ia te fehuʼi ʼaenī: ‘He koʼē ʼe au lotolotolua?’ Kapau ʼe mahino kiā koutou ia te gāue ʼa te laumālie māʼoniʼoni moʼo fakahoko ia te finegalo ʼo Sehova iā ʼaho nei, pea mo kotou leleiʼia ia tana gāue, pea kotou fai te meʼa ʼaē neʼe kotou ako ʼe totonu. ʼE tapuakina lahi anai koutou e Sehova. ʼE ina foaki lahi atu anai kiā koutou ia tona laumālie māʼoniʼoni. Kapau kua kotou papitema talu mai fualoa, ʼe mahino ia neʼe kua kotou logoʼi ia te mālohi ʼo te laumālie māʼoniʼoni. Neʼe kotou sio pea mo logoʼi te mālohi ʼaē neʼe foaki atu e te ʼAtua ʼaki tona laumālie. ʼE feala ke hoko atu ia te faʼahi ʼaia, ʼeī, ʼi te temi kā haʼu ʼaē ʼe heʼegata. Koia, kotou fakatotonu ke kotou haga haʼele ʼaki te laumālie māʼoniʼoni.

ʼE Kei Kotou Manatuʼi Koa?

• Koteā te fakaʼuhiga ʼo te “haʼele ʼaki te laumālie”?

• Koteā ʼaē kā tokoni atu ke kotou “haga haʼele ʼaki te laumālie”?

• Koteā ʼaē ʼe feala ke kotou fai ke kotou agatonu ki takotou foaki tokotou maʼuli ki te ʼAtua?

[ʼU fehuʼi ʼo te ako]

[Paki ʼo te pasina 15]

ʼE tonu ke kotou faiga lahi moʼo gāueʼi ia tokotou loto ʼaē ʼe fakatātā ki he kele

[Paki ʼo te pasina 17]

ʼE takitaki koa koutou e te laumālie ʼo te ʼAtua?