Ia Sesu Kilisito​—Te Malave ʼo Tana Logo Ki Tokotou Maʼuli

“Neʼe au haʼu ke natou maʼu te maʼuli pea ke natou maʼu ʼo lahi ʼaupitō.”—SOANE 10:10.

NEʼE haʼu tāfito Sesu Kilisito ki te kele ko te foaki kae mole ko te tali. ʼAki tona minisitelio, neʼe ina foaki ia te meʼa ʼofa maʼuhiga ki te hahaʼi, ʼe ko he logo neʼe fakahā ai ia te moʼoni ʼo ʼuhiga mo te ʼAtua pea mo Tona finegalo. Ko nātou ʼaē ʼe natou tali ki te logo ʼaia, ʼe feala ke natou maʼu ia he maʼuli ʼe fiafia ʼi te temi nei, pea ʼe fakamoʼoni kiai e te ʼu lauʼi miliona kau Kilisitiano moʼoni. a Kae ko te faʼahi tāfito ʼo te logo ʼaē neʼe fakamafola e Sesu, ʼe ko te meʼa ʼofa ʼaē ʼe maʼuhiga ʼaupitō: ko tona maʼuli haohaoa ʼaē neʼe ina foaki maʼa tātou. Ko tatatou maʼu ia te maʼuli fiafia ʼo heʼegata ʼe fakalogo ki tatatou tokagaʼi ia te faʼahi tāfito ʼaia ʼo tana logo.

Te meʼa ʼofa neʼe foaki e te ʼAtua pea mo Kilisito Neʼe ʼiloʼi e Sesu ʼe mamahi anai ʼi tona matehi e tona ʼu fili. (Mateo 20:17-19) Kae ʼi te ʼu palalau maʼuhiga ʼaē ʼe tou lau iā Soane 3:16, neʼe ina ʼui fēnei: “Ko te ʼAtua, ʼi tona ʼofa lahi ki te mālamanei, neʼe ina foaki mai tona ʼAlo ʼulu tokotahi, koteʼuhi ko ʼaē ʼe tui kiā te ia, ke ʼaua naʼa fakaʼauha kae ke ina maʼu ia te maʼuli heʼegata.” Neʼe toe ʼui e Sesu neʼe haʼu ke ina “foaki tona nefesi [peʼe ko tona maʼuli] moʼo totogi ʼaki ʼo te tokolahi.” (Mateo 20:28) He koʼē neʼe ina ʼui ʼe ina foaki anai ia tona maʼuli kae neʼe mole ina ʼui ʼe toʼo anai tona maʼuli?

ʼI tona ʼofa lahi ʼaupitō, neʼe fakatuʼutuʼu e te ʼAtua maʼa te hahaʼi ke haofaki nātou mai te agahala pea mo tana ʼu fua kovi, ʼaē ko te heʼe haohaoa pea mo te mate. Neʼe fai e te ʼAtua ia te faʼahi ʼaia ʼo ina fekauʼi mai ia tona ʼAlo ʼulu tokotahi ke haʼu ki te kele ʼo mate fakasākilifisio. Neʼe lotolelei e Sesu ke ina fakahoko ia te faʼahi ʼaia, ʼo ina foaki tona maʼuli haohaoa maʼa tātou. Ko te fakatuʼutuʼu ʼaia, ʼaē ʼe higoa ko te totogi, ʼe ko te meʼa ʼofa ʼaē ʼe lahi tokotahi ʼaē neʼe foaki mai e te ʼAtua ki te mālamanei. b Ko he meʼa ʼofa ʼe feala ke ina taki ki te maʼuli heʼegata.

Te meʼa ʼaē ʼe tonu ke kotou fai Ko te totogi ʼe ko he meʼa ʼofa koa maʼa koutou? ʼE fakalogo ia te faʼahi ʼaia kiā koutou. Koʼenī tona fakatā: ʼE foaki atu e he tahi ia he meʼa ʼofa neʼe ina kofukofu lelei. ʼE mahino ia ʼe hoki liliu ko hokotou meʼa ʼofa mokā kotou toʼo pea mo tali ia te meʼa ʼofa ʼaia. ʼO toe fēia pē, ʼe foaki atu e Sehova ia te totogi kiā koutou, kae ʼe liliu anai ia te meʼa ʼofa ʼaia ko hakotou meʼa ʼā koutou totonu, mokā kotou toʼo pea mo tali ia te meʼa ʼofa ʼaia. ʼO feafeaʼi?

Neʼe ʼui e Sesu ʼe ko nātou ʼaē ʼe “tui” kiā te ia ʼaē kā natou maʼu anai ia te maʼuli heʼegata. ʼE hā takotou tui ʼi tokotou faʼahiga maʼuli. (Sake 2:26) Ko te tui kiā Sesu ko tona fakaʼuhiga ʼaē ke kotou fakaʼalutahi tokotou maʼuli mo tana ʼu akonaki pea mo tana ʼu gāue. Moʼo fai ia te faʼahi ʼaia, ʼe tonu ke kotou ʼiloʼi lelei ia Sesu pea mo tana Tamai. Neʼe ʼui fēnei e Sesu: “Ko te fakaʼuhiga ʼaenī ʼo te maʼuli heʼegata, ke natou ako ke natou ʼiloʼi ia koe, te ʼAtua moʼoni e tahi, pea mo ia ʼaē neʼe ke fekauʼi mai, ia Sesu Kilisito.”—Soane 17:3.

Kua hili kiai taʼu e 2 000, neʼe tala e Sesu Kilisito ia he logo neʼe ina fetogi te maʼuli ʼa te ʼu lauʼi miliona hahaʼi ʼi te kele kātoa. ʼE kotou fia maʼu koa he tahi ʼu manatu ʼo ʼuhiga mo te logo ʼaia pea mo ʼiloʼi te meʼa ʼaē ʼe tonu ke kotou fai ʼo fēia mo te hahaʼi ʼaē ʼe kotou ʼoʼofa ai, ke kotou maʼu ia te ʼu lelei ʼo te logo ʼaia, mole gata pē ʼi te temi nei, kae ʼo talu ai? ʼE fiafia anai te kau Fakamoʼoni ʼa Sehova ʼi hanatou tokoni atu.

ʼI te ʼu ʼalatike ʼaē ʼe hoa mai, ʼe kotou ʼiloʼi lelei age anai ia Sesu Kilisito, te tagata ʼaē neʼe ina fakamafola ia he logo ʼe feala ke ina fetogi tokotou maʼuli ʼo talu ai.

[ʼU nota]