Ko Te Tagata Neʼe Ina Fetogi Ia Te Mālamanei

Ko te ʼu lauʼi miliale hahaʼi neʼe natou māʼuʼuli pea mo mamate ʼi te kele nei. Ko te tokolahi ʼo nātou kua galoʼi ʼi te temi nei. Kae ko te tokosiʼi neʼe natou fetogi ia te ʼaluʼaga ʼo te hisitolia, pea ʼe lagi ʼiloga ʼi tokotou maʼuli ʼi te ʼaho fuli.

ʼE KOTOU ʼaʼala ake ʼi te ʼuhu pea mo kotou teuteu ke kotou ʼolo ʼo gāue. ʼE kotou mūhi ia te hila ʼi takotou lolotoga teuteu. ʼE kotou toʼo he tohi peʼe ko he nusipepa ke kotou lau ʼi te kā. ʼE kotou manatuʼi ʼo toʼo takotou foʼi ʼakau ʼaē neʼe fakatotonu atu e te tōketā moʼo tauʼi ia te mikolope ʼe kotou mahaki ai. Neʼe hoki kamata age pē tokotou ʼaho, kae kua kotou maʼu ia te ʼu lelei ʼo te gāue neʼe fai e ʼihi tagata maʼuhiga.

Ko Michael Faraday Neʼe tupu ʼi te taʼu 1791, ko te tagata physicien Pilitānia ʼaia neʼe ina faʼu ia te masini hila pea mo te dynamo. Ko te ʼu meʼa ʼaē neʼe maʼu e te tagata ʼaia neʼe tokoni ai ke fakaʼaogaʼi lahi e te tagata ia te hila.

Ko Tsʼai Lun Neʼe gāue maʼa te fale hau ʼi Siaina, pea ʼe lau ko Tsʼai Lun ʼaē neʼe ina maʼu ia te faʼahiga puleʼaki moʼo faʼu ke lahi ia te pepa, lagi ʼi te taʼu 105 ʼo totatou temi.

Ko Johannes Gutenberg Lagi ʼi te taʼu 1450, ko te tagata Siamani ʼaia neʼe ina faʼu ia te ʼuluaki masini tā tohi. Ko te tā tohi ʼe ina fakafealagia ke maʼu e te hahaʼi he ʼu tohi ʼe mole totogi kovi, pea ko te tokolahi ʼe feala ke natou ʼiloʼi ia te ʼu logo ʼo ʼuhiga mo he ʼu tuʼuga manatu kehekehe.

Ko Alexander Fleming ʼI te taʼu 1928, ko te tagata fai kumi Ekosi ʼaia neʼe ina maʼu ia te faitoʼo ʼe higoa ko te pénicilline. Ko te ʼu faitoʼo ʼaia ʼaē ko te ʼu antibiotiques kua lahi tona fakaʼaogaʼi ʼi te temi nei moʼo tauʼi ia te ʼu mikolope.

ʼE mahino papau ia, ko te ʼu meʼa foʼou ʼaē neʼe maʼu e te ʼu tagata tokosiʼi neʼe fakafealagia ai ki te hahaʼi e lauʼi miliale ke natou māʼuʼuli lelei age peʼe ke natou faitoʼo ni ʼu mahaki.

Kae ʼe ʼi ai te tagata e tahi ʼe lahi age ʼi te ʼu tagata fuli. ʼE mole ʼiloa ia te tagata ʼaia he neʼe ina maʼu ia he ʼu meʼa foʼou ʼi te poto fakatagata peʼe ko he meʼa faitoʼo maʼuhiga. Kae ko te tagata ʼaia ʼaē neʼe mate kua hili kiai taʼu e 2 000, neʼe ina tuku ia he logo, ko he logo mālohi ʼe maʼu ai te ʼamanaki pea mo te fakalotofīmālie. Kā natou fakafuafua te malave ʼo tana logo ki te maʼuli ʼo te hahaʼi ʼi te kele kātoa, tokolahi ʼe natou manatu tahi anai ki te ʼui ʼaē ʼe ko ia te tagata ʼaē neʼe ina fetogi ia te mālamanei.

Ko te tagata ʼaia neʼe ko Sesu Kilisito. Koteā te logo ʼaē neʼe ina fakamafola? Pea ʼe malave feafeaʼi ia te logo ʼaia ki tokotou maʼuli?