Te Gāue ʼa Te Laumālie Māʼoniʼoni ʼi Te Fakahoko ʼo Te Finegalo ʼa Sehova

“[Ko] taku folafola ʼaē ʼe mavae ʼi toku gutu . . . ʼe lava lelei anai [ʼi] te meʼa ʼaē neʼe au fekauʼi kiai.”—ISA. 55:11.

 1. Tuku mai he faʼifaʼitaki moʼo fakahā te kehekehe ʼo te kupu fakatuʼutuʼu pea mo te kupu finegalo.

 KOTOU fakakaukauʼi ia he ʼu tagata e toko lua ʼe nā teuteuʼi hanā folau ki he kolo mamaʼo ʼi tanā motokā. Ko te ʼuluaki tagata ʼe ina teuteuʼi fakalelei ʼaki he mape te ʼu ala fuli ʼaē ʼe maʼua ke ina toʼo ke kaku ki te kolo ʼaia. Ko te lua tagata ʼe ina ʼiloʼi lelei ia te faʼahi ʼaē kā ʼalu kiai, kae ʼe ina toe ʼiloʼi mo te tahi age ʼu ala ʼe feala ke ina toʼo ke kaku kiai. ʼE kua nofo teuteu ia moʼo fetogi tana ʼalu mo kapau ʼe hoko he fihifihia ʼi te folau. ʼI te faʼifaʼitaki ʼaia, ʼe hā lelei te kehekehe ʼo he tagata ʼe mulimuli pē ki he fakatuʼutuʼu, pea mo he tagata ʼe ʼi ai tona finegalo. Ko he fakatuʼutuʼu ʼe hagē ko he folau neʼe tohi fakalelei tona fakaʼaluʼalu ʼo mulimuli pē ki he mape. Ko te fakahoko ʼo he finegalo ʼe mole gata pē ki te mulimuli ʼo he fakatuʼutuʼu, kae ʼe toe kau kiai te fealagia ʼaē ke fai he ʼu puleʼaki kehekehe moʼona fakahoko.

2, 3. (a) Koteā ʼaē ʼe kau ki te finegalo ʼo Sehova, pea koteā te puleʼaki neʼe ina fai ʼi te temi ʼaē neʼe agahala ai ia Atama pea mo Eva? (b) He koʼē ʼe tonu ke tou mālama lelei ki te fakaʼaluʼalu ʼo te finegalo ʼo Sehova?

² Kā fakahoko e Sehova te ʼu meʼa ʼaē ʼe loto kiai, ʼe mole ina fai he fakatuʼutuʼu ʼe mole feala ke fetogi, kae ʼe ʼi ai tona finegalo ʼe ina fakahoko anai ʼaki te temi. (Efe. 3:11) ʼE kau ki tona finegalo ʼaia te meʼa ʼaē neʼe ina loto kiai ʼi te kamata maʼa te hahaʼi pea mo te kele—ko te kele neʼe tonu ke liliu ko he palatiso ʼe fonu ai te hahaʼi haohaoa ʼe māʼuʼuli ʼo heʼegata ʼi te tokalelei pea mo te fiafia. (Sen. 1:28) ʼI te temi ʼaē neʼe agahala ai ia Atama mo Eva, neʼe fai atu aipē e Sehova he puleʼaki ʼo ina foimo fai he ʼu fakatuʼutuʼu ke hoko moʼoni ia tona finegalo. (Lau ia Senesi  3:15.) Neʼe fakakikite e Sehova ʼo ʼuhiga mo tona ʼohoana fakatā ʼe ina fakatupu anai he “hako,” peʼe ko he Foha, kā ina fakaʼauha anai ia Satana ʼaē neʼe ina fakatupu te agahala, pea mo ina fakatokatoka te ʼu malaʼia fuli neʼe hoko ʼuhi ko ia.—Hep. 2:14; 1 Soa. 3:8.

³ ʼE mole he mālohi ʼi selō peʼe ʼi te kele ʼe feala ke ina tāʼofi te fakahoko ʼo te finegalo ʼaē neʼe fakahā e te ʼAtua. (Isa. 46:9-11) He koʼē ʼe feala hatatou tui papau kiai? Heʼe fakaʼaogaʼi e Sehova tona laumālie māʼoniʼoni moʼo fakahoko te faʼahi ʼaia. ʼAki te toe mālohi fakaofoofo ʼaia ʼe feala ke tou tui papau ai, ko te finegalo ʼa te ʼAtua “ ʼe lava lelei anai.” (Isa. 55:10, 11) ʼE maʼuhiga ke tou mālama lelei ki te fakaʼaluʼalu ʼo te finegalo ʼo te ʼAtua. Ko totatou maʼuli ʼi te kā haʼu ʼe fakalogo ki tona fakahoko. Tahi ʼaē faʼahi, ʼe feala ke fakamālohiʼi tatatou tui mokā tou sio ki te ʼu gāue ʼaē ʼe fai e Sehova ʼaki tona laumālie māʼoniʼoni. Koia, tou vakaʼi te gāue ʼa te laumālie māʼoniʼoni—ʼi te temi kua ʼosi, ʼi te temi nei, pea mo te kā haʼu—ʼi te fakahoko ʼo te finegalo ʼo Sehova.

Te Gāue ʼa Te Laumālie Māʼoniʼoni ʼi Te Temi Muʼa

 4. Neʼe fakahā māmālie feafeaʼi e Sehova tona finegalo?

⁴ ʼI te ʼu temi ʼāfea, neʼe fakahā māmālie e Sehova tona finegalo. ʼI te kamata, ko te higoa ʼo te Hako ʼaē neʼe fakapapau neʼe ko he “meʼa fakalilo tapu.” (1 Ko. 2:7) Lolotoga taʼu e 2 000 neʼe mole fai e Sehova he tahi fakamahino ʼo ʼuhiga mo te hako ʼaia. (Lau ia Senesi 12:7; 22:15-18.) Neʼe fai e Sehova kiā Apalahamo te fakapapau neʼe tonu ke ʼi ai tona fakahoko lahi. ʼI tana fakaʼaogaʼi te ʼu kupu “ ʼaki tou hākoga,” neʼe fakahā lelei e Sehova ko te Hako ʼe ko he tagata ʼe kau anai ʼi te hōloga ʼo Apalahamo. ʼE mahino ia, ko Satana neʼe ina sivisivi fakalelei te ʼu palalau ʼaia ʼi te temi ʼaē neʼe fakahā ai te logo maʼuhiga ʼaia. Neʼe loto tāfito ai e te Fili ʼaia ke ina fakaʼauha peʼe fakahalaʼi te hōloga ʼo Apalahamo moʼo tāʼofi te fakahoko ʼo te finegalo ʼo Sehova. Kae neʼe mole feala ke ʼi ai hona ikuʼaga kovi, he neʼe kua lolotoga gāue te laumālie māʼoniʼoni fakapulipuli ʼa te ʼAtua. ʼO feafeaʼi?

5, 6. Neʼe fakaʼaogaʼi feafeaʼi e Sehova tona laumālie māʼoniʼoni moʼo puipui ʼihi neʼe kau ʼi te hōloga ʼaē neʼe taki ki te Hako?

⁵ Neʼe fakaʼaogaʼi e Sehova tona laumālie māʼoniʼoni moʼo puipui ʼihi tagata mo fafine ʼi te hōloga ʼaē neʼe taki ki te Hako. Neʼe ʼui fēnei e Sehova kiā Apalahamo: “Ko au ko te meʼa tali tau maʼa koe.” (Sen. 15:1) Neʼe ko he fakapapau moʼoni ʼaia. Ohagē lā, ʼi te taʼu 1919 ʼi muʼa ʼo totatou temi, neʼe nonofo fakatemi ia Apalahamo mo Sala ʼi te kolo ko Kelale. Ko Apimeleke, te hau ʼo Kelale, neʼe mole ina ʼiloʼi ko Sala neʼe ko te ʼohoana ʼo Apalahamo, koia neʼe ina puke ia Sala pea ina fakatuʼutuʼu ai ke ʼohoana mo ia. Neʼe ko Satana koa ʼaē neʼe aga fakakākā, ʼo ina faiga ke ʼaua naʼa fānauʼi e Sala te hōloga ʼo Apalahamo? ʼE mole fakahā mai ʼi te Tohi-Tapu te potu ʼaia. Kae ʼe fakamatala mai ai te puleʼaki ʼaē neʼe fai e Sehova. ʼAki he moemisi, neʼe ina fakatokaga age kiā Apimeleke ke ʼaua naʼa fāfā kiā Sala.—Sen. 20:1-18.

⁶ Neʼe mole hoko tuʼa tahi pē ia te faʼahi ʼaia. Neʼe lahi te tahi ʼu ʼaluʼaga ʼaē neʼe puipui ai e Sehova ia Apalahamo pea mo tona ʼu kāiga. (Sen. 12:14-20; 14:13-20; 26:26-29) Koia neʼe feala ai ke tohi fēnei e te tagata fai pesalemo ʼo ʼuhiga mo Apalahamo pea mo tona hōloga: “[Ko Sehova] neʼe mole ina tuku ke kaihaʼa nātou e he tagata, kae ʼuhi ko nātou neʼe ina fakatonutonuʼi he ʼu hau, ʼo ina ʼui māʼana: ‘ ʼAua naʼa kotou fāfā ki taku ʼu fakanofo, pea ʼaua naʼa kotou fai he meʼa ʼe kovi ki taku ʼu polofetā.’ ”—Pes. 105:14, 15.

 7. Neʼe puipui feafeaʼi e Sehova te puleʼaga ʼo Iselaele?

⁷ ʼAki tona laumālie māʼoniʼoni, neʼe puipui e Sehova te puleʼaga ʼāfea ʼo Iselaele, ʼaē neʼe tonu ke tupu mai ai te Hako ʼo te fakapapau. ʼAki tona laumālie, neʼe foaki e Sehova tana Lao kiā Iselaele, ʼaē neʼe taupau ai te tauhi moʼoni pea neʼe mole ʼulihi ia te kau Sutea ʼi te faʼahi fakalaumālie, ʼi te faʼahi fakasino, pea mo tana ʼu aga. (Eke. 31:18; 2 Ko. 3:3) ʼI te temi ʼo te ʼu Tuʼi Fakamāu, neʼe foaki e Sehova ʼaki tona laumālie he mālohi makehe ki ʼihi tagata ke natou haofaki ia Iselaele mai tonatou ʼu fili. (Ktf. 3:9, 10) Lolotoga te ʼu sēkulō ʼaē ʼi muʼa ʼo te tupu ake ʼa Sesu, ia te koga tāfito ʼo te hōloga ʼo Apalahamo, neʼe lagi ʼaoga ia te laumālie māʼoniʼoni moʼo puipui te kolo ʼo Selusalemi, mo Petelehemi, pea mo te fale lotu—ko te  ʼu potu fuli ʼaia neʼe ʼaoga moʼo fakahoko ia te ʼu lea fakapolofetā neʼe fai ʼo ʼuhiga mo Sesu.

 8. Koteā ʼaē ʼe hā lelei mai ai, neʼe gāue te laumālie māʼoniʼoni ʼi te maʼuli pea mo te minisitelio ʼo te ʼAlo ʼo te ʼAtua?

⁸ Ko te laumālie māʼoniʼoni neʼe gāue tuʼumaʼu ʼi te maʼuli pea mo te fai fakamafola ʼa Sesu. ʼI te fatu ʼo Malia, neʼe fakahoko e te laumālie māʼoniʼoni te gāue neʼe mole heʼeki hoko he meʼa fēia ʼi he temi; neʼe ina fakafealagia ki he fafine heʼe haohaoa ke faitama pea mo fānauʼi ia he Tama ʼe haohaoa, neʼe mole feala ke mate. (Luka 1:26-31, 34, 35) Ki muli age, neʼe puipui e te laumālie te kiʼi tamasiʼi ko Sesu ke ʼaua naʼa mate ʼi he tuʼutāmaki. (Mat. 2:7, 8, 12, 13) ʼI te lagi taʼu 30 ʼo Sesu, neʼe fakanofo ia ia e te ʼAtua ʼaki te laumālie māʼoniʼoni, ʼo ina fakanofo ia ia ke ina maʼu te tofiʼa ʼo te hekaʼaga fakahau ʼo Tavite, pea mo hinoʼi ia ke fai fakamafola. (Luka 1:32, 33; 4:16-21) ʼAki te laumālie māʼoniʼoni, neʼe maʼu ai e Sesu te mālohi moʼo fakahoko he ʼu milakulo, ʼo ina faitoʼo te kau mahaki, mo fafaga te hahaʼi pakupaku, pea mo fakatuʼuake te kau mate. Ko te ʼu gāue fakaofoofo ʼaia neʼe ko he ʼu fakamelomelo ʼo te ʼu tapuakina ʼe feala ke tou ʼamanaki kiai ʼi te puleʼaga hau ʼo Sesu.

9, 10. (a) Neʼe ʼiloga feafeaʼi te takitaki ʼa te laumālie māʼoniʼoni ia te kau tisipulo ʼa Sesu ʼi te ʼuluaki sēkulō? (b) Koteā te fakatuʼutuʼu foʼou maʼuhiga neʼe fakahā ʼi te ʼuluaki sēkulō ʼo ʼuhiga mo te fakahoko ʼo te finegalo ʼo Sehova?

⁹ Talu mai te Penikositē ʼo te taʼu 33 ʼo totatou temi, neʼe kamata fakaʼaogaʼi e Sehova tona laumālie moʼo fakanofo ia nātou ʼe kau ʼi te lua koga ʼo te hako ʼo Apalahamo, pea tokolahi iā nātou ʼaia neʼe mole hifo moʼoni mai tona hōloga. (Loma 8:15-17; Kal. 3:29) ʼE hā lelei mai, neʼe gāue te laumālie māʼoniʼoni maʼa te kau tisipulo ʼa Sesu ʼi te ʼuluaki sēkulō, ʼo tokoni age kiā nātou ke natou fakamafola ʼaki he lototoʼa pea mo foaki he mālohi ke natou fakahoko ni ʼu gāue lalahi. (Gāue 1:8; 2:1-4; 1 Ko. 12:7-11) ʼAki te ʼu fai milakulo ʼaia, neʼe fakahā e te laumālie te fakatuʼutuʼu foʼou maʼuhiga ʼi te fakahoko ʼo te finegalo ʼo Sehova. Neʼe mole kei loto e Sehova ke ina fakaʼaogaʼi ia te fakatuʼutuʼu ʼāfea neʼe fai talu mai ni ʼu sēkulō, ʼaē neʼe fakatafito ki te tauhi ʼi te fale lotu ʼo Selusalemi. Neʼe kua lagolago ki te kōkelekāsio Fakakilisitiano neʼe hoki fakatuʼu. Talu mai ai, neʼe haga Sehova ʼo fakaʼaogaʼi te kōkelekāsio fakanofo ʼaia moʼo fakahoko tona finegalo.

¹⁰ Neʼe fakaʼaogaʼi e Sehova ia tona laumālie māʼoniʼoni ʼi te ʼu temi ʼāfea ʼi te ʼu ʼaluʼaga ʼaenī neʼe tou vakaʼi: moʼo puipui, peʼe foaki ia he mālohi makehe, peʼe fakanofo ia he hahaʼi. Neʼe ina fai te ʼu gāue ʼaia moʼo fakahaʼele ki muʼa te fakahoko ʼo tona finegalo. Kae ʼe feafeaʼi iā ʼaho nei? ʼE fakaʼaogaʼi feafeaʼi e Sehova tona laumālie māʼoniʼoni moʼo fakahoko tona finegalo? ʼE maʼuhiga ke tou ʼiloʼi te faʼahi ʼaia, heʼe tou fia gāue tahi mo te laumālie. Koia, tou vakaʼi ia ʼaluʼaga e fā ʼaē ʼe fakaʼaogaʼi ai e Sehova tona laumālie māʼoniʼoni ʼi te temi nei.

Te Gāue ʼa Te Laumālie Māʼoniʼoni ʼi Te Temi Nei

11. Koteā ʼaē ʼe hā mai, ko te laumālie māʼoniʼoni ʼe ko he mālohi ʼe tokoni ke maʼa te hahaʼi ʼa te ʼAtua, pea ʼe kotou lava fakahā feafeaʼi ʼe kotou tali te laumālie ʼaia?

¹¹ ʼUluaki, ko te laumālie māʼoniʼoni ʼe ko he mālohi ʼe tokoni ki te hahaʼi ʼa te ʼAtua ke natou nonofo maʼa. Ko nātou ʼaē ʼe lagolago ki te fakahoko ʼo te finegalo ʼo Sehova ʼe tonu ke natou maʼa ʼi te ʼu aga ʼe natou fai. (Lau ia 1 Kolonito 6:9-11.) Ko ʼihi ʼaē kua liliu ko he kau Kilisitiano moʼoni, ʼi muʼa atu neʼe natou fai ia te ʼu aga heʼeʼaoga ohagē ko te fai folonikāsio, te tono, pea mo fai tagata pea mo te fai fafine. Ko te ʼu holi ʼaē ʼe taki ki te ʼu agahala ʼaia ʼe feala ke mālohi ʼaupitō. (Sake 1:14, 15) Kae ko te hahaʼi ʼaia neʼe “fakamaʼa,” ʼo hā lelei ai kua natou fai he ʼu fetogi ʼaoga ʼi tonatou maʼuli ke leleiʼia nātou e te ʼAtua. Koteā ʼaē ʼe tokoni ki he tahi ʼe ʼofa ki te ʼAtua ke ina lava tauʼi tana holi ki he aga ʼe kovi? Iā 1 Kolonito 6:11, ʼe fakahā mai ʼe feala ke ina fai “ ʼaki te laumālie ʼo te ʼAtua.” Kapau ʼe kotou taupau ke maʼa takotou ʼu aga, pea ʼe kotou fakahā ai ko te laumālie māʼoniʼoni ʼe ko he mālohi ʼe ina takitaki tokotou maʼuli.

12. (a) ʼI te meʼa ʼaē neʼe hā ki te polofetā ko Esekiele, ʼe takitaki feafeaʼi e Sehova tana kautahi? (b) ʼE kotou fakahā feafeaʼi anai ʼe kotou gāue tahi mo te laumālie?

¹² Lua, ʼe fakaʼaogaʼi e Sehova tona laumālie moʼo taki tana kautahi ki te faʼahi ʼaē ʼe loto kiai. ʼI te meʼa ʼaē neʼe hā ki te polofetā ko Esekiele, ko te koga ʼo te kautahi ʼa Sehova ʼaē ʼi selō ʼe  fakatatau ki he sāliote ʼaē ʼe feʼaluʼaki tuʼumaʼu moʼo fakahoko ia te finegalo ʼo Sehova. Koteā ʼaē ʼe ina uga te sāliote ke ʼalu ki he faʼahi? ʼE ko te laumālie māʼoniʼoni. (Esk. 1:20, 21) Tou manatuʼi ko te kautahi ʼa Sehova ʼe ʼi ai tona ʼu koga e lua, te ʼuluaki koga ʼi selō pea mo tona lua ʼi te kele. Kapau ʼe takitaki e te laumālie te koga ʼaē ʼi selō, pea ʼe toe moʼoni ʼo ʼuhiga mo te koga fakakelekele. Kapau ʼe kotou fakalogo ki te takitaki ʼaē ʼe tuku mai e te koga fakakelekele ʼo te kautahi ʼo Sehova, pea ʼe kotou fakahā ai ʼe kotou muliʼi fakalelei te sāliote ʼaē ʼi selō ʼo Sehova pea mo kotou gāue tahi mo tona laumālie māʼoniʼoni.—Hep. 13:17.

13, 14. (a) Ko ai ʼaē ʼe natou faʼufaʼu ia te “taʼiake ʼaia” neʼe talanoa kiai ia Sesu? (b) Tuku mai he faʼifaʼitaki ʼo te gāue ʼa te laumālie māʼoniʼoni moʼo fakamālamaʼi te ʼu moʼoni Fakatohi-tapu. (Vakaʼi te fakamatala ʼaē ʼe ʼātakai “ ʼE Kotou Mulimuli Koa Ki Te Mālama ʼAē ʼe Tuputupu?”)

¹³ Tolu, ko te laumālie māʼoniʼoni ʼe tokoni mai ke tou mālama lelei ki te ʼu moʼoni Fakatohi-tapu. (Taag. 4:18) Kua fualoa nei ia te fakaʼaogaʼi ʼo te nusipepa ʼaenī e “te tagata kaugana agatonu mo poto” moʼo fakamafola ia he mālama fakalaumālie ʼe tuputupu tuʼumaʼu. (Mat. 24:45) Ohagē lā, kotou vakaʼi tatatou mahino ʼo ʼuhiga mo te hahaʼi ʼaē ʼe natou faʼufaʼu ia te “taʼiake” ʼaē neʼe talanoa kiai ia Sesu. (Lau ia Mateo 24:32-34.) Koteā te taʼiake ʼaē neʼe talanoa kiai ia Sesu? ʼI te ʼalatike “Ko Te ʼi Henī ʼa Kilisito—Koteā Tona Fakaʼuhiga Kiā Koutou?” neʼe fakamahino mai ai, ko Kilisito neʼe mole talanoa ia ʼo ʼuhiga mo te kau agakovi, kae ʼo ʼuhiga mo tana kau tisipulo, ʼaē neʼe ʼamanaki fakanofo ʼaki te laumālie māʼoniʼoni. a Ko te kau tisipulo fakanofo ʼa Sesu, ʼi te ʼuluaki sēkulō pea mo te temi nei, ʼe ko nātou ʼaē neʼe tonu ke natou mamata ki te fakaʼiloga pea mo mahino lelei kiai, ʼe ko Sesu “kua ovi mai ki te ʼu matapā.”

¹⁴ Koteā te fakaʼuhiga ʼo te fakamahino ʼaia kiā tātou? Logolā ʼe mole feala ke tou ʼiloʼi papau te loaloaga ʼo te maʼuli ʼa “te taʼiake ʼaia,” kae ʼe lelei ke tou manatuʼi ʼihi puani ʼo ʼuhiga mo te kupu “taʼiake”: ʼi te agamāhani, ʼe fakaʼuhiga ki he hahaʼi taʼu kehekehe kae ʼe natou māʼuʼuli tahi ʼi he temi ʼo te hisitolia; pea ko te temi ʼaia ʼe mole loaloaga fau, pea ʼe ʼi ai tona gataʼaga. (Eke. 1:6) Koia, ʼe tonu ke tou mahino feafeaʼi ki te kupu “taʼiake” ʼi te ʼu palalau ʼa Sesu? ʼE mahino papau ia, neʼe fia ʼui e Sesu, ko te kau fakanofo ʼaē neʼe lolotoga māʼuʼuli ʼi te temi ʼaē neʼe kamata hā ai te fakaʼiloga ʼo Sesu ʼi te 1914, ʼe māʼuʼuli tahi anai mo te tahi kau Kilisitiano neʼe fakanofo ʼi te ʼu taʼu ki muli age. Pea ko te tahi kau fakanofo ʼaia ʼaē kā natou sio mata anai ki te kamata ʼo te toe mamahi lahi. Ko te taʼiake ʼaia neʼe ʼi ai tona kamataʼaga, pea ʼe toe ʼi ai anai mo tona gataʼaga.  ʼI te fakahoko ʼo te ʼu agaaga kehekehe ʼo te fakaʼiloga ʼo Sesu, ʼe mahino lelei mai ai kua ovi mai te mamahi lahi. Kapau ʼe kotou nonofo ʼalaʼala ʼo sivi te ʼu meʼa ʼe hoko, pea ʼe kotou fakahā ai takotou fia mālama ki te ʼu fakamahino Fakatohi-tapu, pea mo takotou mulimuli ki te takitaki ʼo te laumālie māʼoniʼoni.—Mko. 13:37.

15. Koteā ʼaē ʼe hā mai, ʼe ko te laumālie māʼoniʼoni ʼaē ʼe ina tuku mai he mālohi ke tou tala te logo lelei?

¹⁵ Fā, ko te laumālie māʼoniʼoni ʼe ina tuku mai he mālohi ke tou tala te logo lelei. (Gāue 1:8) Kanapaulā neʼe mole tokoni te laumālie ki te faʼahi ʼaia, ʼe lava fakamafola feafeaʼi anai koa ia te logo lelei ʼi te keke kātoa? Kotou fakakaukauʼi age muʼa ia te faʼahi ʼaenī: neʼe kotou lagi kau iā nātou ʼaē neʼe umiuminoa, pea neʼe lagi kotou ʼui fēia, ‘Mole feala anai ʼi he ʼaho ke au ʼalu ʼo fakamafola ʼi te ʼu ʼapi!’ Kae ʼi te temi nei, kua kotou faʼafai ʼi te gāue ʼaia. b Tokolahi te kau Fakamoʼoni ʼa Sehova agatonu neʼe natou hoko atu tanatou fai fakamafola logolā te ʼu fakafeagai pea mo te ʼu fakataga. Ko te laumālie fakaʼatua pē ia ʼaē ʼe feala ke ina tuku mai ia te mālohi ke tou tauʼi he ʼu ʼaluʼaga fakamataku pea mo fai he ʼu gāue ʼe mole tou lavaʼi ʼaki pē totatou mālohi. (Mik. 3:8; Mat. 17:20) Kapau ʼe kotou lagolago mālohi ki te fai fakamafola, pea ʼe kotou fakahā ai ʼe kotou gāue tahi mo te laumālie ʼaia.

Te Gāue ʼo Te Laumālie Māʼoniʼoni ʼi Te Kā Haʼu

16. He koʼē ʼe feala ke tou tui papau, ʼe puipui anai e Sehova tana hahaʼi lolotoga te mamahi lahi?

¹⁶ ʼI te kā haʼu, ʼe fakaʼaogaʼi anai e Sehova tona laumālie māʼoniʼoni ʼi he ʼu ʼaluʼaga fakaofoofo moʼo fakahoko ʼo tona finegalo. Tou vakaʼi muʼa tona fakaʼaogaʼi ʼaē moʼo puipui ʼo tana hahaʼi. Ohagē ko te meʼa ʼaē neʼe kua tou ʼosi vakaʼi, neʼe fakaʼaogaʼi e Sehova tona laumālie ʼi te temi muʼa moʼo puipui ni ʼu tagata mo fafine takitokotahi, ʼo fēia pē mo te puleʼaga kātoa ʼo Iselaele. Koia ʼe feala ai hatatou tui papau ʼe ina fakaʼaogaʼi anai te laumālie mālohi ʼaia moʼo puipui tana hahaʼi lolotoga te mamahi lahi ʼaē kua ovi mai. ʼE mole ʼaoga ke tou feʼekeʼaki pe feafeaʼi anai te faʼahiga puipui ʼaē kā fai e Sehova ʼi te temi ʼaia. Kae ʼe tonu ke tou falala, ʼe mole he meʼa ʼe feala anai ke ina tāʼofi te sio ʼa Sehova kiā nātou ʼe ʼoʼofa kiā Ia peʼe tāʼofi tona laumālie māʼoniʼoni ke kaku kiā nātou.—2 Fkma. 16:9; Pes. 139:7-12.

17. ʼE fakaʼaogaʼi feafeaʼi anai e Sehova tona laumālie māʼoniʼoni ʼi te mālama foʼou?

¹⁷ ʼE fakaʼaogaʼi feafeaʼi anai e Sehova tona laumālie māʼoniʼoni ʼi te mālama foʼou ʼaē kā haʼu? ʼAki te laumālie ʼaia, ʼe tohi anai te ʼu takaiga tohi foʼou ʼaē kā ʼavahi ʼi te temi ʼaia. (Fakh. 20:12) Koteā ʼaē kā tuʼu anai ʼi te ʼu takaiga tohi ʼaia? ʼE mahino papau ia, ʼe tuʼu anai te ʼu fakatotonu fuli ʼa Sehova ʼo ʼuhiga mo totatou maʼuli lolotoga te ʼu taʼu e afe. ʼE kotou fakaʼamu koa ke kotou vakaʼi ia te ʼu fakatotonu ʼi te ʼu takaiga tohi ʼaia? ʼE tou fakatalitali ki te mālama foʼou ʼaia ʼo tou fakaʼamu ke hoko vave mai. ʼE fakaofoofo anai te maʼuli ʼi te temi ʼaē kā fakaʼaogaʼi ai e Sehova tona laumālie māʼoniʼoni moʼo fakahoko tona finegalo ki te kele pea mo te hahaʼi ʼe natou nofoʼi.

18. Koteā ʼaē ʼe tonu ke tou fakatotonu ke tou fai?

¹⁸ ʼAua naʼa galo kiā tātou ʼi he temi, ko te finegalo ʼo Sehova ʼe hoko moʼoni anai, heʼe ina fakaʼaogaʼi tona laumālie māʼoniʼoni moʼona fakahoko, pea ko te mālohi ʼaia ʼe lahi tokotahi ʼi te ʼatulaulau. Ko tokotou maʼuli ʼe fakalogo ki te finegalo ʼaia kā hoko anai. Koia, kotou fakatotonu ke kotou kole mamahi kiā Sehova tona laumālie māʼoniʼoni pea mo kotou muliʼi tana takitaki. (Luka 11:13) ʼE feala ai anai hakotou maʼuli ohagē ko te meʼa neʼe finegalo kiai e te ʼAtua ʼi te kamata: ʼe kotou maʼuli anai ʼo heʼegata ʼi te Palatiso ʼi te kele.

[ʼU nota]

ʼE Kei Kotou Manatuʼi Koa?

• Koteā te ʼu ʼaluʼaga ʼaē neʼe fakaʼaogaʼi ai e Sehova tona laumālie māʼoniʼoni ʼi te temi muʼa, ke hoko tona finegalo?

• ʼE fakaʼaogaʼi feafeaʼi e Sehova tona laumālie ʼi te ʼu temi ʼāfea?

• ʼE fakaʼaogaʼi feafeaʼi anai e Sehova tona laumālie māʼoniʼoni ʼi te kā haʼu moʼo fakahoko kātoa tona finegalo?

[ʼU fehuʼi ʼo te ako]

[Talanoa ʼo te pasina 20]

ʼE Kotou Mulimuli Koa Ki Te Mālama ʼAē ʼe Tuputupu?

ʼE haga foaki e Sehova tona mālama ki tana hahaʼi ke natou mahino ki te ʼu moʼoni ʼi te Tohi-Tapu. Koteā ʼihi fakamahino foʼou ʼaē neʼe tā ʼi Te Tule Leʼo?

▪ ʼI te lea fakatā ʼa Sesu ʼo ʼuhiga mo te meʼa fakatupu, koteā te puani lelei ʼe feala ke tou tāʼofi ʼo ʼuhiga mo te tuputupu ʼi te faʼahi fakalaumālie? (Mat. 13:33)—ʼAho 1 ʼo Sūlio 2008, pāsina 29-30.

▪ ʼE fakagata ʼāfea te pāui ʼa te kau Kilisitiano fakanofo ke māʼuʼuli ʼi selō?—ʼAho 1 ʼo Maio 2007, pāsina 30-31.

▪ Koteā te fakaʼuhiga ʼo te ʼui ʼaē ke tou tauhi kiā Sehova “ ʼaki te laumālie”? (Soa. 4:24)—ʼAho 15 ʼo Sūlio 2002, pāsina 15.

▪ Ko te malaʼe fea ʼaē ʼe tauhi ai te toe hahaʼi tokolahi? (Fakh. 7:15)—ʼAho 1 ʼo Maio 2002, pāsina 30-31.

▪ Ko te temi fea ʼaē ʼe fai ai te vaheʼi ʼo te ʼu ovi mai te ʼu tao? (Mat. 25:31-33)—ʼAho 15 ʼo ʼOketopeli 1995, pāsina 18-28.