ʼU Fafine ʼOhoana, He Koʼē ʼe Tonu Ke Kotou Fakalogo Ki Te Takitaki?

“Ko te pule ʼo te fafine, ko te tagata.”—1 Ko. 11:3.

1, 2. (a) Koteā ʼaē neʼe tohi e te ʼapositolo ko Paulo ʼo ʼuhiga mo te takitaki pea mo te fakalogo ʼaē neʼe fakatuʼutuʼu e Sehova? (b) Ko te ʼu fehuʼi fea ʼaē kā tou vakaʼi anai ʼi te ʼalatike ʼaenī?

 NEʼE ko Sehova ʼaē neʼe ina fakatuʼutuʼu ia te ʼu tuʼulaga ʼaē neʼe talanoa kiai ia te ʼapositolo ko Paulo, ʼi tana tohi fēnei: “Ko te pule ʼo te tagata fuli pē, ko Kilisito” pea “ko te pule ʼo Kilisito, ko te ʼAtua.” (1 Ko. 11:3) ʼI te ʼalatike ʼaē neʼe kua tou ʼosi vakaʼi, neʼe fakahā ai neʼe ko he pilivilēsio kiā Sesu pea mo he fiafia ia tana fakalogo ki tona Pule, ia Sehova ʼAtua, pea ko te ʼu tehina Kilisitiano ʼe ko Kilisito ia tonatou pule. Ko Kilisito neʼe agalelei, mo agamalū, mo loto manavaʼofa, pea neʼe mole manatu pē kiā ia totonu ʼi tana felōgoi ʼaē mo te hahaʼi. ʼE maʼua ke liliu ʼo fēia ia te ʼu tehina ʼo te kōkelekāsio ʼi tanatou felōgoi ʼaē mo te hahaʼi, kae tāfito mo ʼonatou ʼohoana.

² Kae ʼe feafeaʼi ʼo ʼuhiga mo te ʼu fafine ʼohoana? Ko ai tonatou pule? Neʼe tohi fēnei e Paulo: “Ko te pule ʼo te fafine, ko te tagata.” ʼE tonu koa ke feafeaʼi te manatu ʼa te ʼu fafine ʼohoana ʼo ʼuhiga mo te ʼu palalau ʼaia? ʼE tonu koa ke natou muliʼi ia te pelesepeto ʼaia mokā ko tonatou ʼohoana ʼe mole ko he Fakamoʼoni ʼa Sehova? Ko te fakalogo ki te takitaki ʼa te tagata ko tona fakaʼuhiga koa ʼe mole tonu ke palalau ia te fafine mokā tonu ke fai he ʼu puleʼaki? Koteā ʼaē ʼe feala ke tupu ai ia te vikiʼi ʼo te fafine ʼohoana?

 “ ʼE Au Fai Anai Hona Tokoni”

3, 4. He koʼē ʼe ʼi ai te ʼu lelei mai te fakatuʼutuʼu ʼaē ʼo te takitaki ʼi te maʼuli fakataumātuʼa?

³ Neʼe ko te ʼAtua ʼaē neʼe ina fakatuʼutuʼu pe ko ai te pule fāmili. ʼI te kua ʼosi fakatupu ʼo Atama, neʼe ʼui fēnei e Sehova ʼAtua: “ ʼE mole lelei ke nofo tokotahi te tagata. ʼE au fai anai hona tokoni ke liliu ko hona fakakātoa.” ʼI te kua fakatupu ʼaē ʼo Eva, neʼe fiafia ʼaupitō ia Atama ʼi tana maʼu hona kaumeʼa pea mo hona tokoni, ʼo ina ʼui fēnei: “Ko ia ʼaenī ko te hui ʼo toku hui pea mo te kakano ʼo toku kakano.” (Sen. 2:18-24) Neʼe maʼu e Atama mo Eva ia te ʼamanaki taulekaleka ʼaē ke nā liliu ko te ʼu mātuʼa ʼo te hahaʼi haohaoa fuli pē, ʼaē kā māʼuʼuli anai ʼo heʼegata ʼi te fiafia ʼi te palatiso ʼi te kele kātoa.

⁴ Neʼe puli ia te ʼaluʼaga haohaoa ʼaē ʼi te ʼōloto ʼo Eteni ʼuhi ko te talagataʼa ʼo tatatou ʼu ʼuluaki mātuʼa. (Lau ia Loma 5:12.) Kae neʼe mole fetogi ia te fakatuʼutuʼu ʼo te pule fāmili. Kā mulimuli lelei kiai, pea ʼe maʼu ia te ʼu lelei pea mo te fiafia lahi ʼi te nofo ʼohoana. ʼE hagē pē anai ko Sesu ʼi tana fakalogo ki tona Pule, ia Sehova. ʼI tana maʼuli ʼi selō ʼi muʼa ʼo tana tupu tagata ʼaē ʼi te kele, ko Sesu neʼe “fiafia [iā] muʼa [ʼo Sehova] ʼi te temi fuli pē.” (Taag. 8:30) Mai tona ʼaluʼaga ʼaē ʼe tou agahala, koia ʼe mole kei fakahoko lelei ai e te tagata tana takitaki, ʼo fēia ki te fafine ʼe mole kei ina lavaʼi tana fakalogo kātoa ʼaē ki tona pule. Kae kā haga faiga te tagata ʼohoana pea mo te fafine ʼohoana ke nā fai ia te meʼa ʼaē ʼe lelei, ʼe iku ia te fakatuʼutuʼu ʼaia ʼi te temi ʼaia ki he fiafia lahi ʼaupitō ʼi te maʼuli fakataumātuʼa.

 5. He koʼē ʼe tonu ke maʼuhiga ki te taumātuʼa ia te tokoni ʼaē ʼe tou maʼu iā Loma 12:10?

⁵ Ko te meʼa maʼuhiga ʼaupitō ke fiafia ai te nofo ʼohoana, ʼe ko te maʼuliʼi e te taumātuʼa ia te tokoni ʼaenī neʼe fai ki te kau Kilisitiano fuli: “ ʼI te ʼofa fakatautēhina, ke kotou feʼofamamahiʼaki. Ke kotou ʼuluaki tuʼumaʼu ʼi te fefakamaʼuhigaʼaki.” (Loma 12:10) Pea ko te taumātuʼa ʼe tonu ke nā gāue kinakina ke nā “liliu ʼo feagaleleiʼaki, fonu ʼi te manavaʼofa, ʼo . . . fefakamolemoleʼaki.”—Efe. 4:32.

Ko Te ʼOhoana ʼe Mole Ko He Fakamoʼoni ʼa Sehova

6, 7. Koteā ʼaē ʼe feala ke hoko mo kapau ko he fafine ʼohoana Kilisitiano ʼe haga fakalogo pē ki tona ʼohoana ʼaē ʼe mole ko he Fakamoʼoni?

⁶ ʼE feafeaʼi mokā ko tokotou ʼohoana ʼe mole ko he kaugana ʼa Sehova? ʼI te agamāhani, ʼe ko te tagata ʼohoana ʼaē ʼe mole ko he Fakamoʼoni. Kapau koia, pea ʼe tonu ke feafeaʼi te aga ʼa te tuagaʼane? ʼE tali fēnei ʼi te Tohi-Tapu: “Koutou fafine, kotou fakalogo ki ʼokotou ʼohoana totonu, koteʼuhi ke feala ki niʼihi ʼe mole fakalogo ki te folafola, ke natou tafoki mai ʼuhi ko te aga ʼo tonatou ʼu ʼohoana, kae heʼeki fai he palalau, he neʼe natou sisio mata ki takotou aga ʼaē ʼe maʼa pea mo he fakaʼapaʼapa ʼe lahi ʼaupitō.”—1 Pet. 3:1, 2.

⁷ ʼE ʼui ʼi te Folafola ʼa te ʼAtua ko te fafine ʼe tonu ke haga fakalogo ki tona ʼohoana ʼaē ʼe mole ko he Fakamoʼoni. Ko tana fai ia te aga ʼaē ʼe lelei, ʼe feala ke ina uga ia tona ʼohoana ke ina fia ʼiloʼi te tupuʼaga ʼo tana agalelei. ʼE feala ai ki te tagata ʼohoana ke ina fia ʼiloʼi ia te ʼu akonaki ʼaē ʼe tui kiai tona ʼohoana Kilisitiano pea mo lagi ina tali ia te moʼoni.

8, 9. Koteā ʼaē ʼe feala ke fai e he fafine Kilisitiano mo kapau ko tona ʼohoana ʼaē ʼe mole ko he Fakamoʼoni ʼe mole fetogi ia logolā tana fai ia te aga ʼe lelei?

⁸ Kae ʼe feafeaʼi mokā ʼe mole fetogi te aga ʼo te ʼohoana ʼaē ʼe mole ko he Fakamoʼoni? ʼI te Tohi-Tapu, ʼe fakalotomālohiʼi ia te tuagaʼane ke ina fakahā ʼi te temi fuli pē ia te ʼu kalitātē Fakakilisitiano, logolā tona faigataʼa. Ohagē lā, ʼe tou lau fēnei iā 1 Kolonito 13:4: “Ko te ʼofa ʼe kātaki fualoa.” Koia, ʼe lelei anai mokā haga fakalogo te tuagaʼane “ ʼaki te agavaivai pea mo te agamalū, mo te faʼa kātaki,” ʼo ina kātakiʼi ʼi te ʼofa. (Efe. 4:2) ʼAki te tokoni ʼa te mālohi gāue ʼa te ʼAtua, ia tona laumālie māʼoniʼoni, ʼe feala ke ina fakahā ia te ʼu kalitātē Fakakilisitiano māʼia pē lā ʼi te ʼu ʼaluʼaga faigataʼa.

⁹ Neʼe tohi fēnei e Paulo: “ ʼE au maʼu te mālohi kiā meʼa fuli, ʼuhi ko ia ʼaē ʼe ina foaki mai te mālohi.” (Filp. 4:13) ʼAki te laumālie ʼo te ʼAtua, ʼe feala ki te Kilisitiano ke ina fakahoko he ʼu tuʼuga meʼa ʼe mole feala anai ke ina fai ʼaki pē ia tona mālohi ʼo ia totonu. Ohagē lā, kā gaohi koviʼi he tahi e tona ʼohoana, ʼe feala ke ina fia liufaki age  te aga ʼaia. Kae ʼe ʼui fēnei ʼi te Tohi-Tapu ki te kau Kilisitiano fuli: “ ʼAua naʼa kotou liufaki ki he tahi te kovi ʼuhi ko te kovi. . . . Koteʼuhi neʼe tohi fēnei: ‘ ʼE ʼaʼaku te lagavaka; ʼe au liufaki anai te totogi, ko te ʼui ʼaia ʼa Sehova.’ ” (Loma 12:17-19) ʼO toe fēia pē, ʼe tokoni fēnei mai kiā tātou iā 1 Tesalonika 5:15: “Kotou tōkakaga ke mole he tahi ʼe ina liufaki te kovi ʼaki te kovi, kae kotou haga kumi tuʼumaʼu te meʼa ʼaē ʼe lelei, ia koutou pea maʼa te hahaʼi fuli pē.” ʼAki te tokoni ʼa te laumālie māʼoniʼoni ʼo Sehova, ko te meʼa ʼaē ʼe mole tou lavaʼi ʼaki totatou mālohi, ʼe liliu anai ia ko he meʼa kua feala ke tou fai. Koia, ʼe lelei hatatou faikole ke foaki mai e te laumālie māʼoniʼoni ʼo te ʼAtua te meʼa ʼaē ʼe hala iā tātou!

10. Neʼe feafeaʼi te aga ʼa Sesu mokā neʼe fai age e te hahaʼi he palalau kovi pea mo agakovi age kiā te ia?

¹⁰ Neʼe tuku e Sesu ia he faʼifaʼitaki fakaofoofo ʼi tana ʼu felōgoi mo te hahaʼi ʼaē neʼe natou fai he ʼu palalau kovi pea mo agakovi age kiā te ia. ʼE ʼui fēnei iā 1 Petelo 2:23: “Kā lea koviʼi ia ia, ʼe mole ina tali ʼaki he leakovi. Kā mamahi ia ia, ʼe mole ina fakapōgi, kae ʼe ina haga tuku aipē kiā ia ʼaē ʼe fakamāu ʼaki te faitotonu.” ʼE fakalotomālohiʼi tātou ke tou mulimuli ki tana faʼifaʼitaki lelei ʼaia. ʼAua naʼa kotou fia liufaki te kovi mokā agakovi atu niʼihi. Ohagē ko te tokoni ʼaenī ʼe fai ki te kau Kilisitiano fuli pē, “kotou . . . fonu ʼi te manavaʼofa, mo te agavaivai, ʼaua naʼa kotou liufaki te kovi ki te kovi peʼe ko te laukovi ki te laukovi.”—1 Pet. 3:8, 9.

ʼE Tonu Koa Ke Natou Nonofo Fakalogologo?

11. Koteā ia te pilivilēsio lahi ʼaē ʼe toe maʼu anai e ʼihi fafine Kilisitiano?

¹¹ Ko te fakalogo ki te takitaki ʼa te tagata ʼohoana, ko tona fakaʼuhiga koa ʼe mole feala ki te fafine ke ina fakahā tana manatu mokā fai he ʼu tonu fakafāmili peʼe ko he tahi age ʼu faʼahi? Kailoa ia. Neʼe foaki e Sehova ki te hahaʼi fafine ʼo fēia mo te hahaʼi tagata te ʼatu ʼu pilivilēsio. Kotou fakakaukauʼi age muʼa ia te pilivilēsio lahi ʼaē ʼe maʼu e te toko 144 000 ke natou liliu ko he ʼu hau pea mo he ʼu pelepitelō ʼi selō ʼi te takitaki ʼa Kilisito mokā ina puleʼi anai ia te kele nei! ʼE kau iā nātou ʼaia te hahaʼi fafine. (Kal. 3:26-29) ʼE mahino mai, ʼi te ʼu fakatuʼutuʼu ʼaē neʼe fai e Sehova neʼe ina foaki age ki te ʼu fafine ia he ʼu gāue ke natou fakahoko.

12, 13. Kotou tuku mai he faʼifaʼitaki ʼe fakahā ai neʼe lea fakapolofetā ʼihi fafine.

¹² Ohagē lā, ʼi te temi muʼa, neʼe lea fakapolofetā ʼihi fafine. Neʼe fakakikite fēnei iā Soele 2:28, 29: “ ʼE au folahi moʼoni anai toku laumālie ki te faʼahiga kakano fuapē, pea ʼe mahino papau ia, ʼe lea fakapolofetā anai tokotou ʼu foha pea mo tokotou ʼu ʼofafine. . . . ʼO fēia mo te kau tagata kaugana pea mo te kau fafine kaugana, ʼi te ʼu ʼaho ʼaia, ʼe au folahi anai kiā nātou toku laumālie.”

¹³ Ko te ʼu tisipulo ʼe toko 120 ʼa Sesu ʼaē neʼe natou fakatahitahi ʼi te fale fata ʼi Selusalemi ʼi te Penikositē ʼo te taʼu 33 ʼo totatou temi, neʼe ko te ʼu fafine pea mo te ʼu tagata. Neʼe folahi ia te laumālie māʼoniʼoni ʼo te ʼAtua kiā nātou fuli ʼaia. Neʼe feala ai ke talanoa ia Petelo ʼo ʼuhiga mo te fakakikite ʼaē neʼe fai e te polofetā ko Soele pea mo ina fakaʼuhiga ia te ʼu palalau ʼaia ki te ʼu tagata pea mo te ʼu fafine. Neʼe ʼui fēnei e Petelo: “Koʼenī te meʼa ʼaē neʼe tala ʼaki te polofetā ko Soele: ‘Pea ʼi te ʼu ʼaho fakamuli,’ ko te folafola ʼaia ʼa te ʼAtua, ‘ ʼe au folahi anai te koga ʼo toku laumālie ki te ʼu faʼahiga kakano kehekehe, pea ʼe lea fakapolofetā anai ʼokotou foha pea mo ʼokotou ʼofafine . . . pea ʼo fēia mo taku ʼu tagata kaugana pea mo taku ʼu fafine kaugana ʼe au folahi anai kiā nātou toku laumālie ʼi te ʼu ʼaho ʼaia, pea ʼe natou lea fakapolofetā anai.’ ”—Gāue 2:16-18.

14. Koteā te gāue neʼe fai e te ʼu fafine moʼo fakamafola ia te Lotu Fakakilisitiano ʼi te ʼuluaki sēkulō?

¹⁴ ʼI te ʼuluaki sēkulō, neʼe maʼuhiga ia te gāue ʼaē neʼe fai e te ʼu fafine moʼo fakamafola ia te Lotu Fakakilisitiano. Neʼe natou fakamafola ki te hahaʼi ia te Puleʼaga ʼo te ʼAtua pea mo natou fai te ʼu gāue neʼe pipiki ki te fai fakamafola ʼaia. (Luka 8:1-3) Ohagē lā, neʼe higoaʼi e te ʼapositolo ko Paulo ia te tuagaʼane ko Foepene ko “he minisi ʼo te kōkelekāsio ʼaē ʼi Senekele.” Pea ʼi tana momoli tana ʼu ʼalofa ki tona ʼu kaugā gāue, neʼe talanoa ia Paulo ki ʼihi fafine agatonu, ʼo kau ai ia “Tolufano pea mo Tufosa, ko te ʼu fafine ʼe nā gāue kinakina ʼi te ʼAliki.” Neʼe toe talanoa ʼo ʼuhiga mo “Pelesile, totatou ʼofaina, he neʼe ina  fai ia te ʼu tuʼuga gāue kinakina ʼi te ʼAliki.”—Loma 16:1, 12.

15. Koteā te gāue ʼe fai e te ʼu fafine moʼo fakamafola ia te Lotu Fakakilisitiano ʼi totatou temi?

¹⁵ ʼI totatou temi, ʼi te toko fitu miliona tupu hahaʼi ʼaē ʼe natou fakamafola ia te logo lelei ʼo te Puleʼaga ʼo te ʼAtua ʼi te mālamanei kātoa, ʼe kaugamālie ia te ʼu fafine ʼe natou taʼiake kehekehe. (Mat. 24:14) Tokolahi iā nātou, ko te ʼu pioniē kātoa, ko te ʼu misionea, mo natou kau ʼi te ʼu fāmili ʼo te ʼu Petele. Neʼe hiva fēnei e te tagata fai pesalemo ko Tavite: “ ʼE fakahā totonu e Sehova te folafola; ko nātou fafine ʼaē ʼe natou fagonogono te logo lelei ko he foʼi kautau lahi.” (Pes. 68:11) ʼI moʼoni leva ʼo te ʼu palalau ʼaia ʼi totatou temi! ʼE maʼuhiga kiā Sehova ia te gāue ʼaē ʼe fai e te ʼu fafine moʼo tala ia te logo lelei pea mo fakahoko ia tona finegalo. ʼE mahino papau ia, ko tana fakamaʼua ʼaē ke fakalogo te ʼu fafine Kilisitiano ʼe mole fakaʼuhiga ia ke natou nonofo fakalogologo.

Ko Te ʼu Fafine e Lua Neʼe Mole Nā Nonofo Fakalogologo

16, 17. ʼE fakahā feafeaʼi ʼi te faʼifaʼitaki ʼa Sala, ko te ʼu fafine ʼe mole natou nonofo fakalogologo ʼi te maʼuli fakataumātuʼa?

¹⁶ Kapau neʼe foaki e Sehova ia te ʼatu ʼu pilivilēsio ki te ʼu fafine, ʼe mole tonu koa lā ki te ʼu tagata ʼohoana ke natou fakalavelave ki ʼonatou ʼohoana ʼi muʼa ʼo hanatou fai he ʼu tonu maʼuhiga? ʼE ko hanatou agapoto anai ʼaia. ʼE fakamatala ʼi te Tohi-Tapu te ʼu meʼa neʼe hoko, ʼe fakahā ai ko te ʼu fafine ʼohoana neʼe natou palalau pe neʼe natou fai he tonu logolā neʼe mole fakalavelave age e tonatou ʼohoana ia tanatou manatu. Tou vakaʼi ia te ʼu faʼifaʼitaki e lua.

¹⁷ Ko Sala, te ʼohoana ʼo te pāteliaka ko Apalahamo, neʼe ina ʼui tuʼumaʼu age kiā ia ke ina kapu ia tona lua ʼohoana pea mo tana tama he neʼe mole nā aga fakaʼapaʼapa. “Neʼe mole leleiʼia ʼaupitō e Apalahamo ia te faʼahi ʼaia”—kae neʼe mole ko te manatu ʼaia ʼa te ʼAtua. Neʼe ʼui fēnei e Sehova kiā Apalahamo: “Ke mole he meʼa ʼi te ʼu meʼa ʼaē ʼe palalau tuʼumaʼu atu e Sala ʼe ke ʼita ai ʼo ʼuhiga mo te tama pea ʼo ʼuhiga mo tou kaugana fafine. Fakalogo ki tona leʼo.” (Sen. 21:8-12) Neʼe fakalogo Apalahamo kiā Sehova, ʼo mulimuli ki te leʼo ʼo Sala, pea mo ina fakahoko ia tana kole.

18. Koteā ʼaē neʼe fai e Apikaela?

¹⁸ Kotou toe manatuʼi mo Apikaela, te ʼohoana ʼo Napale. ʼI te hola ʼaē ʼa Tavite mai te Hau maheka ko Saulo, neʼe ina fakatuʼu tona nofoʼaga ʼo ovi ki te ʼu faga ovi ʼa Napale. Neʼe mole toʼo e Tavite pea mo tana ʼu tagata ia te ʼu koloa ʼo te tagata maʼu koloa ʼaia, kae neʼe natou puipui ia tana faga ovi. Kae ko Napale, “neʼe aga fefeka pea neʼe kovi tana ʼu aga,” pea neʼe ina “haga ʼo munaʼi” ia te ʼu tagata ʼa Tavite. Neʼe ko he tagata “neʼe mole hona ʼaoga,” neʼe ‘agavale.’ ʼI te kole age e te ʼu tagata ʼa Tavite ʼaki he aga fakaʼapaʼapa hanatou meʼa kai, neʼe fakafisi age ia Napale. Neʼe koteā ʼaē neʼe fai e Apikaela ʼi tana ʼiloʼi te meʼa ʼaē neʼe hoko? Neʼe mole gū ia kiā Napale, kae “neʼe ʼalu fakavilivili ʼo toʼo ia foʼi pane e lua geau, mo te ʼu foʼi ʼipu vino lalahi e lua, mo te ʼu pipi e nima, mo te ʼu kato pulapula neʼe taʼo e nima, mo te ʼu keke vite magemage e teau pea mo te ʼu keke fiku e lua geau” pea neʼe ina foaki age kiā Tavite pea mo tana ʼu tagata. Neʼe lelei koa ia te meʼa ʼaē neʼe fai e Apikaela? ʼEī, heʼe ko ʼihi ʼu meʼa neʼe hoko ki muli age, ʼe fakahā ʼaki ai neʼe lelei ia te fakatuʼutuʼu ʼaē neʼe ina fai. ʼE ʼui fēnei ʼi te Tohi-Tapu: “Neʼe tāʼi e Sehova ia Napale, ʼo mate ai.” Ki muli age, neʼe ʼohoanaʼi e Tavite ia Apikaela.—1 Sam. 25:3, 14-19, 23-25, 38-42.

 ‘Te Fafine ʼAē ʼe Tonu Ke Vikiʼi’

19, 20. Koteā ʼaē ʼe tupu ai ia he vikiʼi moʼoni ʼo he fafine ʼohoana?

¹⁹ ʼI te Tohi-Tapu, ʼe vikiʼi ia te fafine ʼohoana ʼaē ʼe mulimuli ki te ʼu pelesepeto ʼa Sehova. ʼI te Tohi-Tapu, ʼi te tohi ʼo Tāʼaga Lea, ʼe vikiʼi ai ia “te fafine ʼohoana ʼaē ʼe faiva,” ʼo ʼui fēnei: “ ʼE maʼuhiga age ia ʼi he ʼu feo matalelei. Ko te loto ʼo tona tagata pule ʼe falala kiā te ia, pea neʼe ina maʼu tuʼumaʼu pē tona ʼu koloa. ʼE ina foaki kiā ia ia te meʼa ʼaē ʼe lelei, kae mole ko te meʼa ʼaē ʼe kovi, ʼi te ʼaho fuli pē ʼo tona maʼuli.” Tahi ʼaē meʼa, “neʼe ina ʼavahi tona gutu ʼaki te poto, pea ko te lao ʼo te manavaʼofa ʼe ʼi tona ʼalelo. ʼE ina tokagaʼi te ʼu gāue pea mo te ʼu aga ʼo tona loto fale, pea ʼe mole ina kai te pane ʼo te piko. Neʼe tutuʼu ake tana ʼu tama pea neʼe natou vikiviki ia ia; ko tona pule ʼe tuʼu ake pea ʼe ina vikiviki ia ia.”—Taag. 31:26-28.

²⁰ Koteā ʼaē ʼe tupu ai ia he vikiʼi moʼoni ʼo he fafine ʼohoana? ʼE ʼui fēnei iā Tāʼaga Lea 31:30: “Ko te fofoga matalelei ʼe feala pē ke kākā, pea ko te matalelei ʼe feala ke vaʼiganoa; kae ko te fafine ʼaē ʼe manavasiʼi kiā Sehova, ko ia ʼaia kā ina maʼu te ʼu fakavikiviki.” Ko ia ʼaē ʼe manavasiʼi kiā Sehova ʼe toe fakalogo ʼaki he lotolelei ki te fakatuʼutuʼu fakaʼatua ʼo ʼuhiga mo te takitaki. “Ko te pule ʼo te fafine, ko te tagata,” ohagē pē “ko te pule ʼo te tagata fuli pē, ko Kilisito,” pea “ko te pule ʼo Kilisito, ko te ʼAtua.”—1 Ko. 11:3.

Tou Fakafetaʼi Ki Te Meʼa ʼOfa ʼa Te ʼAtua

21, 22. (a) Koteā te ʼu tupuʼaga ʼaē ʼe tonu ai ke fakafetaʼi te ʼu Kilisitiano ʼohoana ki te meʼa ʼofa ʼa te ʼAtua ʼaē ko te nofo ʼohoana? (b) He koʼē ʼe tonu ke tou fakaʼapaʼapa ki te fakatuʼutuʼu ʼa Sehova ʼo ʼuhiga mo te pule pea mo te takitaki? (Vakaʼi ia te fakamatala ʼaē ʼe ʼātakai ʼi lalo nei.)

²¹ ʼE lahi te ʼu tupuʼaga ʼe feala ai ki te ʼu Kilisitiano ʼaē kua ʼohoana ke natou fakafetaʼi ki te ʼAtua! ʼE feala hanatou māʼuʼuli fakatahi fakafiafia ʼi tonatou maʼuli fakataumātuʼa. Pea tāfito lā ʼe feala ke fakafetaʼi ia he taumātuʼa ki te meʼa ʼofa ʼa te ʼAtua ʼaē ko te nofo ʼohoana, heʼe nā maʼu ai ia te fealagia ʼaē ke nā fakatahiʼi tonā ʼu maʼuli pea mo nā haʼele fakatahi mo Sehova. (Lute 1:9; Mik. 6:8) Ko Ia ʼAē Neʼe Ina Fakatuʼutuʼu ia te nofo ʼohoana, ʼe ina ʼiloʼi lelei te ʼu meʼa ʼaē ʼe ʼaoga ke fiafia ai ia te maʼuli fakataumātuʼa. Kapau ʼe tou mulimuli tuʼumaʼu pē ki tana ʼu pelesepeto, pea logolā te ʼu temi maveuveu ʼaē iā ʼaho nei kae ‘ko te fiafia ʼo Sehova ʼe liliu anai ko totatou kolo tau.’—Neh. 8:10.

²² Ko he tagata ʼohoana Kilisitiano ʼe ʼofa ki tona ʼohoana ohagē ko ia totonu, ʼe ina fai anai tana takitaki ʼaki he agalelei pea mo he loto tokaga. Ko tona ʼohoana ʼaē ʼe pipiki ki te ʼAtua ʼe ʼofainaʼi moʼoni anai, heʼe lagolago pea mo fakaʼapaʼapa kiā ia. Pea ko te meʼa ʼaē ʼe maʼuhiga tāfito, ko te faʼifaʼitaki ʼaē ʼe nā tuku ʼi tonā maʼuli fakataumātuʼa, ʼe fakamaʼuhigaʼi ai anai totatou ʼAtua ko Sehova, ʼaē ʼe tonu ke fakavikiviki.

ʼE Kei Kotou Manatuʼi Koa?

• Koteā te fakatuʼutuʼu ʼa Sehova ʼo ʼuhiga mo te takitaki pea mo te fakalogo?

• He koʼē ʼe tonu ki te taumātuʼa ke nā fefakamaʼuhigaʼiʼaki?

• ʼE tonu ke feafeaʼi ia te aga ʼa he tuagaʼane ki tona ʼohoana ʼaē ʼe mole ko he Fakamoʼoni?

• He koʼē ʼe tonu ke ʼiloʼi e te ʼu tagata ʼohoana ia te manatu ʼo tonatou ʼohoana ʼi muʼa ʼo te fai ʼo he ʼu tonu maʼuhiga?

[ʼU fehuʼi ʼo te ako]

[Fakamatala ʼo te pasina 22]

He Koʼē ʼe Tonu Ke Tou Fakaʼapaʼapa Ki Te Pule?

ʼI tana ʼu meʼa maʼuli popoto ʼaē neʼe fakatupu e Sehova, neʼe ina fakatuʼutuʼu te pule pea mo te takitaki. Neʼe fai ia te faʼahi ʼaia ke fua lelei maʼa te kau ʼāselo pea mo te hahaʼi. ʼE fakafealagia ai kiā nātou ke natou fakaʼaogaʼi ia tonatou loto faʼifaʼitaliha pea mo fakamaʼuhigaʼi ia te ʼAtua ʼaki tanatou tauhi ʼaē kiā te ia ʼi te logo tahi.—Pes. 133:1.

Ko te kūtuga ʼo te kau Kilisitiano fakanofo ʼe natou fakamoʼoni ki te pule pea mo te takitaki ʼa Sesu Kilisito. (Efe. 1:22, 23) Ki muli age, moʼo fakamoʼoni ki te pule ʼa Sehova, ko “te ʼAlo ʼe toe fakalogo anai mo ia kiā Ia ʼaē neʼe ina tuku ia meʼa fuli kiā te ia ke liliu te ʼAtua ko meʼa fuapē maʼa te hahaʼi fuapē.” (1 Ko. 15:27, 28) Koia, ʼe tuha ai ki te hahaʼi ʼaē kua foaki tonatou maʼuli ki te ʼAtua ke natou lagolago ki te fakatuʼutuʼu ʼi te kōkelekāsio pea mo te fāmili! (1 Ko. 11:3; Hep. 13:17) ʼI tatatou fai fēia, ʼe tou maʼu ai anai ia tona ʼu fua lelei, heʼe ʼofa anai Sehova kiā tātou pea mo ina tapuakina tātou.—Isa. 48:17.