Kotou Fakaovi Ki Te ʼAtua

“ ʼE Ke Agatonu Anai”

2 SAMUELE 22:26

KO TE meʼa ʼaē ʼe feala ke tou mamahi lahi age ʼe ko te kākāʼi tātou e he tahi ʼe tou falala ki ai. Ko he agamāhani ʼaia ʼi totatou temi ʼi te mālama heʼe agatonu ʼaenī. (2 Timoteo 3:1-5) ʼE feala koa ke tou falala ʼe nofo agatonu kātoa anai he tahi kiā tātou? Tou vakaʼi muʼa ia te ʼu ʼaluʼaga neʼe hoko ki te Hau ko Tavite ʼi te temi muʼa.

ʼI tona temi maʼuli, ko Tavite neʼe hoko ki ai ia te ʼu aga fakakākā ʼaupitō. Neʼe maʼua ke hola tuʼumaʼu pē kae neʼe mole ina fai he meʼa ʼe kovi pea neʼe fakatagaʼi ʼuhi ko te maheka ʼo te ʼuluaki hau ʼo Iselaele ia Saulo. ʼI tona fāmili totonu, ko Mikale te ʼohoana ʼo Tavite, neʼe mole agatonu ki tona ʼohoana kae “neʼe fehiʼa kiā [Tavite] ʼi tona loto.” (2 Samuele 6:16) Ko Ahitofele, te tagata fai tokoni ʼaē neʼe falala ki ai ia Tavite, neʼe ina lavakiʼi ia ia pea mo kau ki te agatuʼu ʼaē kiā Tavite. Ko ai te tupuʼaga ʼo te fakatuʼutuʼu kovi ʼaia? ʼE mole ko he tahi kehe, ko Apisalone pē te foha ʼo Tavite! ʼI te ʼu aga fakakākā ʼaē neʼe hoko tuʼumaʼu kiā Tavite, neʼe lotovaivai ai koa pea mo manatu ʼe mole he tahi ʼe feala ke agatonu tuʼumaʼu?

ʼE tou maʼu tona tali ʼi te ʼu palalau ʼa Tavite iā 2 Samuele 22:26. ʼI tona ʼuhiga tagata tui mālohi, ko Tavite, ʼi te hiva fakatuketuke ʼe ina ʼui fēnei ʼo ʼuhiga mo Sehova ʼAtua: “Aki ia ia ʼaē ʼe agatonu ʼe ke agatonu anai kiā ia.” Neʼe ʼiloʼi papau e Tavite tatau aipē pe neʼe kākāʼi ia ia e niʼihi, kae ko Sehova ʼe agatonu pē anai ki ai.

Tou vakavakaʼi fakalelei age muʼa te ʼu palalau ʼa Tavite. Ko te kupu Fakahepeleo ʼaē neʼe fakaliliu ʼaki te kupu “ ʼagatonu” ʼe feala ke toe fakaliliu ʼaki ki te kupu “manavaʼofa.” Ko te agatonu moʼoni ʼe fakatafito ki te ʼofa. Ko Sehova ʼi tona ʼofa, ʼe pipiki kiā nātou ʼaē ʼe agatonu kiā te ia. a

ʼE kotou toe fakatokagaʼi, ko te agatonu ʼe mole ko he meʼa pē ʼe kita logoʼi ʼi tokita loto; kae ʼe tonu ke hā ʼi tatatou aga. Neʼe hā ʼi te aga ʼa Sehova tana agatonu, pea ʼe ko te faʼahi ʼaia neʼe feala ke fakamoʼoni kiai ia Tavite ʼi tona maʼuli. ʼI te ʼu temi faigataʼa ʼo te maʼuli ʼo Tavite, neʼe hā te agatonu ʼa Sehova kiā Tavite ʼo ina puipui pea mo takitaki te hau agatonu ʼaia. Neʼe ʼiloi papau e Tavite ko Sehova tokotahi pē ʼaē neʼe feala ke ina haofaki ia ia “ ʼi te nima ʼo tona ʼu fili.”—2 Samuele 22:1.

Koteā te fakaʼuhiga ʼo te ʼu palalau ʼa Tavite kiā tātou? Ko Sehova ʼe ina taupau maʼu tana agatonu pea ʼe mole fetogi ia ʼi he temi. (Sake 1:17) ʼE mulimuli tuʼumaʼu pē ki tana ʼu pelesepeto pea ʼe agatonu tuʼumaʼu pē ki te ʼu fakapapau ʼaē ʼe ina fai. ʼI tana tahi pesalemo neʼe tohi fēnei e Tavite: “Ko Sehova . . . ʼe mole ina liʼaki anai tana hahaʼi agatonu.”—Pesalemo 37:28.

ʼE maʼuhiga kiā Sehova ia tatatou agatonu. ʼE maʼuhiga kiā ia tatatou fakalogo agatonu kiā te ia pea ʼe ina fakalotomālohiʼi tātou ke tou faʼifaʼitakiʼi ia ia ʼo tou fakahā totatou agatonu ki ʼihi. (Efesi 4:24; 5:1) Kapau ʼe tou fakahā totatou agatonu ʼi te ʼu ʼaluʼaga ʼaia, ʼe tou falala ʼe mole ina liʼakina anai tātou. Tatau aipē pe neʼe fai mai he ʼu aga kākā ʼe ʼihi kiā tātou, kae ʼe feala ke tou falala ki te agatonu ʼa Sehova, heʼe tokoni mai ke tou lava tauʼi ia te ʼu fihifihia fuli pē ʼo te maʼuli. ʼE kotou fia fakaovi koa kiā Sehova ‘ia Ia ʼaē ʼe Agatonu’?—Fakahā 16:5.

[Nota]