Koteā ʼAē Neʼe Fai e Sesu Moʼo Fakakolōliaʼi Ia Te Faitotonu ʼa Te ʼAtua?

“Neʼe momoli e te ʼAtua ia [Kilisito] ohagē ko he mōlaga ʼo te faifakalelei, ʼaki te tui ʼaē ki tona taʼataʼa. Neʼe fai ia te faʼahi ʼaia ke fakahā ai tana faitotonu.”—LOMA 3:25.

1, 2. (a) Koteā ʼaē ʼe akoʼi mai ʼi te Tohi-Tapu ʼo ʼuhiga mo te ʼaluʼaga ʼo te mālamanei? (b) Koteā ia te ʼu fehuʼi ʼaē kā tou vakaʼi anai ʼi te ʼalatike ʼaenī?

 ʼE TOU ʼiloʼi lelei ia te fakamatala ʼaē ʼe tuʼu ʼi te Tohi-Tapu ʼo ʼuhiga mo te agatuʼu ʼaē neʼe hoko ʼi te ʼōloto ʼo Eteni. ʼE tou logoʼi fuli ʼi totatou kakano ia te ʼu fua kovi ʼo te agahala ʼa Atama, ohagē ko tona fakamahino mai ʼi te ʼu palalau ʼaenī: “ ʼAki pē te tagata e tahi neʼe hū te agahala ki te mālamanei, pea ʼaki te agahala te mate, pea koia kua mafola ai te mate ki te tagata fuli pē koteʼuhi kua natou agahala fuli.” (Loma 5:12) ʼE ʼaoga kiā tātou ke fakamolemole mai te ʼAtua, heʼe logolā tatatou ʼu faiga fakamālotoloto ke tou fai ia te meʼa ʼaē ʼe totonu, kae ʼe tou lakahala aipē. Māʼia mo te ʼapositolo ko Paulo neʼe lāuga fēnei: “Ko te meʼa lelei ʼaē ʼe au fakaʼamu kiai ʼe mole au fai au, kae ko te meʼa kovi ʼaē ʼe mole au fakaʼamu kiai, koʼenā te meʼa ia ʼaē ʼe au fai. ʼI tagata fakaʼofaʼofa leva ko au!”—Loma 7:19, 24.

² ʼUhi ko totatou nātulā agahala, ʼe malaga ai ia te ʼu fehuʼi maʼuhiga ʼaenī: Neʼe lava feafeaʼi kiā Sesu ʼo Nasaleti ke tupu tagata kae haohaoa ia mai te agahala, pea he koʼē neʼe papitemaʼi ia ia? Neʼe fakakolōliaʼi feafeaʼi e Sesu ia te faitotonu ʼa Sehova ʼi tona faʼahiga maʼuli? Kae tāfito, koteā te ʼu meʼa kua lava hoko ʼaki te mate ʼo Kilisito?

Neʼe Fakafihiʼi Te Faitotonu ʼa Te ʼAtua

 3. Neʼe kākāʼi feafeaʼi e Satana ia Eva?

³ Ko totatou ʼu ʼuluaki mātuʼa, ia Atama mo Eva, neʼe nā fai te aga fakavale, he neʼe nā fakafisi ki te pule faʼitaliha ʼo te ʼAtua kae nā tali nāua ia te takitaki ʼo “te gata olisinale, ia ia ʼaē ʼe fakahigoaʼi ko Tēvolo pea mo Satana.” (Fakh. 12:9) Tou vakaʼi age muʼa pe neʼe hoko feafeaʼi ia te faʼahi ʼaia. Neʼe fakafihiʼi e Satana ia te pule faitotonu ʼa Sehova ʼAtua, ʼo ina lagaʼi ia te fehuʼi ʼaenī  kiā Eva: “ ʼE moʼoni koa lā neʼe ʼui atu e te ʼAtua ke ʼaua naʼa kolua kai ki te ʼakau fuli pē ʼaē ʼi te ʼōloto?” Neʼe toe tala age e Eva ia te fakatotonu ʼaē neʼe fakahā lelei age e te ʼAtua, ʼe ʼi ai te fuʼu ʼakau ʼe mole tonu ke nā kai kiai, heʼe nā mamate ai anai. Pea neʼe tukugākoviʼi e Satana ia te ʼAtua ʼo ina ʼui ʼe gutuloi. Neʼe ʼui fēnei e te Tēvolo: “ ʼE mole kolua mamate anai.” ʼOsi ʼaia pea neʼe ina kākāʼi ia Eva ke tui ko te ʼAtua neʼe ina fufū he meʼa ʼe lelei pea kapau ʼe ina kai ia te fuaʼi ʼakau, pea ʼe liliu anai ohagē ko te ʼAtua, ʼo fakalogo pē kiā ia totonu te filifili peʼe kofea te aga ʼaē ʼe lelei pea mo te aga ʼaē ʼe kovi.—Sen. 3:1-5.

 4. Koteā ʼaē kua tupu ai ia te fakalogo ʼa te mālamanei ki te pule fakafeagai ʼa Satana?

⁴ Neʼe lau e Satana, ʼe lahi age anai te maʼuli fiafia ʼa te mālamanei mo kapau ʼe natou māʼuʼuli faʼifaʼitaliha mai te ʼAtua. Neʼe mole lagolago ia Atama ki te faitotonu ʼa te pule faʼitaliha ʼa te ʼAtua, kae neʼe fakalogo ia ki tona ʼohoana ʼo nā kai ki te fuaʼi ʼakau ʼaē neʼe tapuʼi. Neʼe pulihi ai e Atama tona ʼuhiga haohaoa iā muʼa ʼo Sehova pea ina hili kiā tātou ia te kavega fakamamahi ʼo te agahala pea mo te mate. ʼI te hoko ʼo te ʼaluʼaga ʼaia, kua fakalogo leva ia te mālamanei ki te pule fakafeagai ʼa Satana, ia “te ʼatua ʼo te tuʼu ʼo te ʼu faʼahiga meʼa ʼaenī.”—2 Ko. 4:4; Loma 7:14.

 5. (a) Neʼe fakahoko feafeaʼi e Sehova tana fakatotonu? (b) Koteā ia te ʼamanaki ʼaē neʼe foaki e te ʼAtua ki te hōloga ʼo Atama mo Eva?

⁵ Ohagē pē ko tana fakatotonu, neʼe tauteaʼi e Sehova ia Atama mo Eva ki te mate. (Sen. 3:16-19) Kae neʼe mole fakaʼuhiga ai leva ʼe mole hoko anai ia te fakatuʼutuʼu ʼa te ʼAtua. Kailoa ia! ʼI tana tauteaʼi ia Atama mo Eva, neʼe foaki e Sehova ki tonā hōloga ia he ʼamanaki. Neʼe ina fakahā tana fakatuʼutuʼu ʼaē ke ina fakatupu ia he “hako” ʼe maumauʼi anai e Satana ʼi tona muliʼi vaʼe. Kae ko te lavea ʼo te Hako ʼaia ʼo te fakapapau, ʼe mole anai pea ʼe ina “maumauʼi anai [ia Satana] ʼi [tona] ʼulu.” (Sen. 3:15) ʼE fakamahinohino ʼi te Tohi-Tapu ia te manatu tāfito ʼo ina ʼui fēnei ʼo ʼuhiga mo Sesu Kilisito: “Ko te tupuʼaga lā ʼaia ʼo te hā mai ʼo te ʼAlo ʼo te ʼAtua, ke ina maumauʼi ia te ʼu gāue ʼa te Tēvolo.” (1 Soa. 3:8) Kae neʼe fakakolōliaʼi feafeaʼi ia te faitotonu ʼa te ʼAtua ʼaki ia te aga ʼa Sesu pea mo tana mate?

Te Fakaʼuhiga ʼo Te Papitema ʼo Sesu

 6. ʼE tou ʼiloʼi feafeaʼi neʼe hao Sesu mai te agahala ʼa Atama?

⁶ Kā lahi anai ia Sesu, neʼe tonu ke haohaoa ohagē ko Atama, ʼi te temi ʼaē neʼe kei haohaoa ai. (Loma 5:14; 1 Ko. 15:45) Ko tona fakaʼuhiga neʼe tonu kiā Sesu ke tupu haohaoa. Neʼe lava feafeaʼi ia te faʼahi ʼaia? Neʼe fakamahinohino lelei age e te ʼāselo ko Kapeliele kiā Malia, te faʼē ʼa Sesu, ʼo ina ʼui fēnei: “ ʼE hifo anai te laumālie māʼoniʼoni kiā te koe, pea ko te mālohi ʼo te Māʼoluga ʼAupitō ʼe ina ʼūgaki anai koe ʼaki tona malumalu. Koia ʼaē, ko te tamasiʼi ʼaē kā tupu ʼe ʼui anai ʼe māʼoniʼoni, ʼAlo ʼo te ʼAtua.” (Luka 1:35) ʼI te kei veliveli ʼa Sesu, neʼe lagi fakahā age e Malia he ʼu faʼahi neʼe hoko ʼi tana tupu ake. Koia, ʼi te ʼaho ʼaē neʼe maʼu atu ia Sesu ʼi te fale lotu e Malia pea mo Sosefo, tana tamai tauhi, neʼe ina fehuʼi fēnei kiā nāua: “E mole kolua ʼiloʼi koa lā ʼe tonu ke au nofo ʼi te fale ʼo taku Tamai?” (Luka 2:49) ʼE mahino mai, talu tana kei veliveli, neʼe ʼiloʼi ia e Sesu ko ia ko te ʼAlo ʼo te ʼAtua. Koia ʼaē neʼe maʼuhiga ʼaupitō ai kiā ia te fakakolōliaʼi ʼo te faitotonu ʼa te ʼAtua.

 7. Koteā ia te ʼu koloa maʼuhiga ʼaē neʼe maʼu e Sesu?

⁷ Neʼe fakahā e Sesu tana fia fai ki te ʼu meʼa fakalaumālie he neʼe kau tuʼumaʼu ki te ʼu fono fakalotu. ʼUhi ko te haohaoa ʼo tona ʼatamai, ʼe mahino ia neʼe ako pea mo mahino Sesu ki te ʼu koga tohi fuli, ʼaē neʼe logo kiai pea mo lau ʼi te Koga Tohi-Tapu Fakahepeleo. (Luka 4:16) Neʼe toe ʼi ai mo tona tahi koloa maʼuhiga: ko he sino haohaoa neʼe feala ke sākilifisioʼi maʼa te mālamanei. ʼI te temi ʼaē neʼe papitema ai, neʼe lolotoga faikole Sesu pea mo lagi metitāsioʼi ia te lea fakapolofetā ʼo Pesalemo 40:6-8.—Luka 3:21; lau ia Hepeleo 10:5-10. a

 8. He koʼē neʼe mole loto e Soane Patita ke ina papitemaʼi ia Sesu?

⁸ ʼI te kamata neʼe mole loto e Soane Patita ke ina papitemaʼi ia Sesu. Koteā tona tupuʼaga? He neʼe papitemaʼi e Soane ia te kau Sutea moʼo fakahā ʼaki ai tanatou fakahemala ʼaē ʼi tanatou talagataʼa ki te Lao. ʼUhi ko tana kāiga ʼaē mo Sesu,  neʼe ʼiloʼi e Soane ko Sesu neʼe ko he tagata faitotonu pea neʼe mole ʼaoga ke fakahemala he neʼe mole ʼi ai hana agahala. Neʼe ʼui fakalelei age e Sesu kiā Soane neʼe tonu ia ke ina papitemaʼi. Neʼe fakamahino fēnei age e Sesu: “Heʼe ko tona faʼahiga fai ʼaia, ʼaē ʼe tonu ai ke tā fakahoko ia meʼa fuli pē ʼaē ʼe totonu.”—Mat. 3:15.

 9. Neʼe koteā te fakaʼuhiga ʼo te papitema ʼo Sesu?

⁹ ʼI tona ʼuhiga tagata haohaoa, neʼe lagi mahino kiā Sesu neʼe feala, ohagē ko Atama, ke ina fakatupu he fānau haohaoa. Kae neʼe mole he temi neʼe fakaʼamu ai ia Sesu ki he kā haʼu fēia, he neʼe mole ko te finegalo ʼaia ʼo Sehova ʼo ʼuhiga mo ia. Neʼe fekauʼi ifo e te ʼAtua ia Sesu ki te kele ke ina fakahoko ia te ʼu gāue ʼo te Hako ʼo te fakapapau, peʼe ko te Mēsia. Ohagē lā ko te sākilifisioʼi ʼo tona maʼuli haohaoa. (Lau ia Isaia 53:5, 6, 12.) ʼE mahino papau ia, ko te papitema ʼo Sesu ʼe mole tatau tona fakaʼuhiga pea mo tatatou papitema. Neʼe mole foaki e Sesu tona maʼuli kiā Sehova, he neʼe kua kau ia ki te puleʼaga ʼo Iselaele ʼaē neʼe kua foaki ki te ʼAtua. Kae neʼe fakaʼuhiga ia tona papitema ki tana momoli ʼo ia totonu moʼo fakahoko ia te finegalo ʼo te ʼAtua ohagē ko tona fakakikite ʼi te Tohi-Tapu ʼo ʼuhiga mo te Mēsia.

10. Koteā ʼaē neʼe pipiki ki te finegalo ʼo te ʼAtua ʼo ʼuhiga mo te Mēsia, pea neʼe tali feafeaʼi e Sesu?

¹⁰ Ko te finegalo ʼo Sehova ʼo ʼuhiga mo Sesu neʼe pipiki kiai mo tana fakamafola ia te logo lelei ʼo te Puleʼaga ʼo te ʼAtua, tana fai ʼo ni ʼu tisipulo, pea mo tana teuteuʼi ʼo nātou ki tanatou gāue ki ʼamuli, ʼaē ko te fai ʼo he ʼu tisipulo. Ko te momoli ʼaē e Sesu ʼo ia totonu, neʼe toe fakaʼuhiga foki ki tana lotolelei ʼaē ke ina kātakiʼi ia te ʼu fakataga pea mo he mate fakamataku, moʼo lagolago ki te pule faʼitaliha faitotonu ʼa Sehova ʼAtua. ʼUhi ʼaē he neʼe ʼofa moʼoni ia Sesu ki tana Tamai ʼaē ʼi selō, neʼe ko he meʼa fakafiafia kiā ia te fai ʼo te finegalo ʼo te ʼAtua pea mo tana foaki ia tona sino ko he sākilifisio. (Soa. 14:31) Neʼe toe fiafia ʼi tana ʼiloʼi ʼaē ko te maʼuhiga ʼo tona maʼuli haohaoa neʼe ko he mōlaga ʼaia ki te ʼAtua moʼo totogi totatou fakaʼāteaina mai te pōpula ʼaē ki te agahala pea mo te mate. Neʼe fiafia koa te ʼAtua ʼi te momoli e Sesu ia ia totonu moʼo fakahoko ia te ʼu maʼua lalahi ʼaia? ʼE mahino papau ia!

11. Neʼe fakahā feafeaʼi e Sehova tana tali leleiʼi ia Sesu ʼe ko te Mēsia ʼaē neʼe fakapapauʼi mai, peʼe ko Kilisito?

¹¹ Ko te ʼu tagata fuli e toko fā ʼaē neʼe natou tohi ia te ʼu Evaselio neʼe natou fakamoʼoni ki te fakahā fakalelei e Sehova ʼAtua ia tana tali leleiʼi ia Sesu, ʼi tana papitema ʼi te vai ʼo Solotane. Neʼe fakamoʼoni fēnei e Soane Patita: “Neʼe au sio ki te laumālie ʼe hifo mai te lagi ohagē he lupe, pea neʼe nofo kiā [Sesu]. . . . Pea neʼe au sio ki te meʼa ʼaia, pea neʼe au fakamoʼoni ko ia nei ʼe ko te ʼAlo ʼo te ʼAtua.” (Soa. 1:32-34) Tahi ʼaē meʼa, ʼi te lakaga ʼaia neʼe tala fēnei e Sehova: “Ko ia nei ko toku ʼAlo, ia te ʼofaina, ʼaenī kua au fiafia ʼaupitō iā te ia.”—Mat. 3:17; Mko. 1:11; Luka 3:22.

Neʼe Agatonu ʼo Aʼu Ki Tona Mate

12. ʼI te hili ʼo tana papitema, koteā ʼaē neʼe fai e Sesu lolotoga ia te ʼu taʼu e tolu vaelua?

¹² Lolotoga teitei taʼu e tolu vaelua, neʼe tokaga tāfito ia Sesu ki te akoʼi ʼo te hahaʼi ʼo ʼuhiga mo tana Tamai pea mo te faitotonu ʼo te pule faʼitaliha ʼa te ʼAtua. Neʼe gaʼegaʼe ʼi tana ʼu feʼaluʼaki lalo ʼi te Kele ʼo Te Fakapapau, kae neʼe mole he meʼa neʼe feala ke ina tāʼofi ia ia ʼo ʼuhiga mo tana fai fagonogono kātoa ki te moʼoni. (Soa. 4:6, 34; 18:37) Neʼe akoʼi e Sesu ia te hahaʼi ʼo ʼuhiga mo te Puleʼaga ʼo te ʼAtua. ʼAki tana fakamālōlō fakamilakulo ia te hahaʼi māhahaki, mo tana fafaga te hahaʼi kaugamālie ʼaē neʼe pakupaku, pea mo tana fakatuʼuake ia te kau mate, neʼe ina fakahā ai ia te ʼu gāue ʼaē kā fakahoko anai e te Puleʼaga ʼo te ʼAtua maʼa te mālamanei.—Mat. 11:4, 5.

13. Koteā ʼaē neʼe akoʼi mai e Sesu ʼo ʼuhiga mo te faikole?

¹³ Neʼe mole ʼui e Sesu ʼe ko ia te matapuna ʼo tana ʼu faiakonaki pea mo tana ʼu fakamālōlō ʼo te hahaʼi mai tanatou ʼu mahaki, kae neʼe ina tuku ia he faʼifaʼitaki fakaofoofo ʼi tana foaki ʼaki he agavaivai ia te fakavikiviki kiā Sehova. (Soa. 5:19; 11:41-44) Neʼe toe fakahā e Sesu ia te ʼu faʼahi maʼuhiga ʼaupitō ʼaē ʼe tonu ke tou faikole  kiai. ʼE tonu ke tou faikole ke “fakatapuhā” ia te huafa ʼo te ʼAtua ko Sehova, pea ke fetogi e te pule faʼitaliha pea mo faitotonu ʼa te ʼAtua ia te pule agakovi ʼo Satana, ke feala ai ke “fai [Tona] finegalo ʼi te kele, ohagē ko selō.” (Mat. 6:9, 10) Neʼe toe ʼekenaki tātou e Sesu ke tou maʼuliʼi te ʼu faikole ʼaia ʼo tou “kumi muʼa te puleʼaga pea mo [te] faitotonu [ʼa te ʼAtua].”—Mat. 6:33.

14. Logolā ko Sesu neʼe haohaoa, kae he koʼē neʼe maʼua ke faiga mālohi moʼo fakahoko ia tana gāue ʼi te fakatuʼutuʼu ʼa te ʼAtua?

¹⁴ ʼI te ovi mai ʼo te temi ʼaē neʼe tonu ke mate fakasākilifisio ai, neʼe mahino māmālie kiā Sesu ia te maʼua mamafa ʼaē neʼe tonu ke ina fakahoko. Ko te fakatuʼutuʼu ʼo tana Tamai pea mo tona matagafua, neʼe fakalogo ki te kātakiʼi e Sesu ia tona ʼu ʼahiʼahi heʼe faitotonu pea mo tona mate fakamataku. Iā ʼaho e nima ʼi muʼa ʼo tona mate, neʼe faikole fēnei ia Sesu: “ ʼI te temi nei kua hoha toku nefesi, pea koteā te meʼa ke au ʼui? Tamai haofaki au mai te hola ʼaia. Kae ko te tupuʼaga lā ʼaia ʼo taku kaku mai ki te hola ʼaia.” Hili tana fakahā ia te ʼu meʼa ʼaē neʼe ina logoʼi ʼi tona loto, neʼe mole manatu pē ia Sesu kiā ia totonu, kae neʼe tokaga tāfito ki te faʼahi ʼaē neʼe maʼuhiga tāfito pea mo faikole fēnei: “Tamai, fakakolōliaʼi tou huafa.” Neʼe tali age aipē e Sehova ʼo ina ʼui fēnei: “Neʼe kua au fakakolōliaʼi, pea ʼe au toe fakakolōliaʼi anai.” (Soa. 12:27, 28) ʼEī, neʼe lotolelei e Sesu ke ina kātakiʼi ia te ʼahiʼahi lahi ʼaupitō ʼo tona agatonu, ʼaē neʼe mole heʼeki he tagata neʼe kua fakalaka ai. Kae ʼi tana logo ki te ʼu folafola ʼaia ʼo tana Tamai ʼe ʼi selō, ʼe mahino papau ia neʼe maʼu ai e Sesu he falala mālohi ʼe ina lava fakakolōliaʼi anai pea mo lagavaka te pule faʼitaliha ʼo Sehova. Pea neʼe ina fakahoko ia tana ʼu gāue ʼaia!

Te ʼu Meʼa ʼAē Kua Lava Hoko ʼAki Te Mate ʼo Sesu

15. ʼI muʼa ʼo tana mate, he koʼē neʼe ʼui fēnei e Sesu: “Ko te meʼa ʼaia kua hoko”?

¹⁵ ʼI te tautau ʼa Sesu ʼi te pou fakamamahi pea mo tana ʼamanaki mate, neʼe ina ʼui fēnei: “Ko te meʼa ʼaia kua hoko!” (Soa. 19:30) ʼE ko te ʼu meʼa lalahi ʼaia ʼaē neʼe lava fakahoko e Sesu ʼaki te tokoni ʼa te ʼAtua lolotoga te ʼu taʼu e tolu vaelua, talu mai tana papitema ʼo aʼu ki tana mate! ʼI te mate ʼa Sesu, neʼe hoko ia te mafuike mālohi, pea ko te ofisie Loma ʼaē neʼe ina fakahoko te tūʼā ʼo Sesu, neʼe ina ʼui fēnei: “ ʼE moʼoni ia, ko ia nei neʼe ko te ʼAlo ʼo te ʼAtua.” (Mat. 27:54) ʼE mahino ia neʼe sio ia te ofisie ʼaia ki te manukiʼi e te hahaʼi ia Sesu ʼi tana ʼui ko ia te ʼAlo ʼo te ʼAtua. Logolā ia te ʼu mamahi fuli ʼaē neʼe kātakiʼi e Sesu, kae neʼe ina taupau tana agatonu pea mo fakamoʼoni ai ko Satana ʼe gutuloi. ʼO ʼuhiga mo nātou fuli ʼaē ʼe natou lagolago ki te pule faʼitaliha ʼa te ʼAtua, neʼe fai e Satana ia te fakafifihi ʼaenī: “Ko meʼa fuli ʼaē ʼe maʼu e te tagata, ʼe ina foaki anai ia moʼo haofaki tona maʼuli.” (Sopo 2:4) ʼAki tana nofo agatonu, neʼe fakahā ai e Sesu neʼe feala pē kiā Atama mo Eva ke nā nonofo agatonu ʼi tonā ʼahiʼahiʼi, ʼaē neʼe mole faigataʼa. Ko te meʼa ʼaē ʼe maʼuhiga tāfito, heʼe ko te maʼuli pea mo te mate ʼa Sesu neʼe ina hikihiki pea mo fakakolōliaʼi ia te faitotonu ʼo te pule faʼitaliha ʼa Sehova. (Lau ia Tāʼaga Lea 27:11.) Neʼe hoko koa he tahi age ʼu meʼa ʼaki te mate ʼo Sesu? ʼEī!

16, 17. (a) He koʼē neʼe feala ke ʼui ko te kau fakamoʼoni ʼa Sehova ʼaē neʼe māʼuʼuli ʼi muʼa atu ʼo Kilisito, ʼe ko he kau faitotonu iā muʼa ʼo te ʼAtua? (b) Neʼe fakapale feafeaʼi e Sehova ia te nofo agatonu ʼo tona ʼAlo, pea koteā ʼaē ʼe haga fai e te ʼAliki ko Sesu Kilisito?

¹⁶ Neʼe tokolahi te ʼu kaugana ʼa Sehova neʼe māʼuʼuli ʼi muʼa ʼo te haʼu ʼa Sesu ki te kele. Neʼe natou agatonu iā muʼa ʼo te ʼAtua pea neʼe fakahā age kiā nātou ʼe toe fakatuʼuake anai nātou. (Isa. 25:8; Tan. 12:13) Kae koteā ia te tafitoʼaga lelei ʼaē neʼe feala ke fakaʼaogaʼi e te ʼAtua māʼoniʼoni ko Sehova, moʼo fakahoko ia te ʼamanaki taulekaleka ʼaia ki te hahaʼi agahala? ʼE fakamahino fēnei ʼi te Tohi-Tapu: “Neʼe momoli e te ʼAtua ia [Sesu Kilisito] ohagē ko he mōlaga ʼo te faifakalelei, ʼaki te tui ʼaē ki tona taʼataʼa. Neʼe fai ia te faʼahi ʼaia ke  fakahā ai tana faitotonu, koteʼuhi neʼe ina fakamolemole te ʼu agahala ʼaē neʼe fai ʼi te temi muʼa, ʼaē neʼe kātaki fualoa ai te ʼAtua, ke feala hana fakahā tana faitotonu ʼi te temi ʼaenī, koteʼuhi ke faitotonu ia, māʼia mokā ina tala ʼe faitotonu te tagata ʼaē ʼe tui kiā Sesu.”—Loma 3:25, 26. b

¹⁷ Neʼe fakapale e Sehova ia Sesu ʼo ina fakatuʼuake ia ia ki he tuʼulaga ʼe māʼoluga age ʼi tona tuʼulaga ʼāfea ʼi muʼa ʼo tana haʼu ki te kele. ʼI te temi nei, kua maʼu e Sesu ia te maʼuli tuputupua ʼi tona ʼuhiga laumālie fakakolōlia. (Hep. 1:3) ʼI tona ʼuhiga Pelepitelō Lahi pea mo Hau, ʼe hoko atu te tokoni ʼa te ʼAliki ko Sesu Kilisito ki tana ʼu tisipulo ke natou fakakolōliaʼi ia te faitotonu ʼa te ʼAtua. Pea ʼe tou loto fakafetaʼi ʼaupitō heʼe ko tatatou Tamai ʼaē ʼi selō, ia Sehova, ʼe ina Fakapale ia nātou fuli ʼaē ʼe natou fai ia te gāue ʼaia pea mo tauhi agatonu kiā te ia, ʼo mulimuli ki te faʼifaʼitaki ʼo tona ʼAlo!—Lau ia Pesalemo 34:3; Hepeleo 11:6.

18. Koteā ʼaē kā tou talanoa anai kiai ʼi te ʼalatike ako ʼaē kā hoa mai?

¹⁸ Ko te hahaʼi agatonu fuli talu mai iā Apele, neʼe natou maʼu he ʼu felōgoi lelei mo Sehova he neʼe natou tui pea mo falala ki te Hako ʼaē neʼe fakapapauʼi mai. Neʼe ʼiloʼi e Sehova ʼe taupau anai e tona ʼAlo ia tana agatonu pea ʼaki tana mate, ʼe ina foaki anai he mōlaga haohaoa maʼa “te agahala ʼa te mālamanei.” (Soa. 1:29) Ko te mate ʼa Sesu, ʼe toe fua lelei ki te hahaʼi ʼaē ʼe māʼuʼuli ʼi te temi nei. (Loma 3:26) Koia, koteā te ʼu lelei ʼaē ʼe feala ke kotou maʼu ʼaki te totogi ʼaē neʼe foaki e Kilisito? ʼE tou talanoa anai kiai ʼi te ʼalatike ako ʼaē kā hoa mai.

[ʼU nota]

ʼE Kotou Tali Feafeaʼi Anai?

• Neʼe fakafihiʼi feafeaʼi ia te faitotonu ʼa te ʼAtua?

• Koteā te fakaʼuhiga ʼo te papitema ʼo Sesu?

• Koteā te ʼu meʼa ʼaē kua lava hoko ʼaki te mate ʼo Sesu?

[ʼU fehuʼi ʼo te ako]

[Paki ʼo te pasina 10]

ʼE kotou ʼiloʼi koa peʼe koteā ia te fakaʼuhiga ʼo te papitema ʼo Sesu?