3 Tokoni

Kotou Taupau He Loto Fakafetaʼi

KOTEĀ ʼAĒ ʼE AKOI MAI ʼI TE TOHI-TAPU? “Iā meʼa fuli pē kotou fai he ʼu fakafetaʼi.”—1 Tesalonika 5:18.

HE KO’Ē ʼE FAIGATAʼA? ʼE tou māʼuʼuli nei ʼi te lotolotoiga ʼo te hahaʼi ʼe fiatuʼu pea ʼe mole natou loto fakafetaʼi, ʼaē ko he ʼu aga ʼe feala pē ke tou muliʼi. (2 Timoteo 3:1, 2) Tahi ʼaē meʼa, ʼe lagi tou logoʼi ʼe lahi age te ʼu gāue ʼaē ʼe tou fia hilifaki ki totatou maʼuli ʼaē kua maʼumaʼua ʼaupitō. ʼI te lahi fau ʼaē ʼo tatatou mafasia ʼi te ʼu faigataʼaʼia peʼe ko tatatou tōkakaga ki te kumi ʼo te ʼu koloa ʼaē ʼe tou loto kiai, ʼe mole kei tou maʼu ai he temi ke tou leleiʼia te ʼu meʼa ʼaē kua tou maʼu peʼe ke tou fakafetaʼi ki te ʼu meʼa ʼaē ʼe fai mai e ʼihi kiā tātou.

KOTEĀ ʼAĒ ʼE FEALA KE KOTOU FAI? Kotou toʼo he temi moʼo metitāsioʼi te ʼu meʼa lelei ʼaē ʼe kotou maʼu ʼi te temi nei. ʼO mulimuli ki te faʼahi ʼaia, ʼe lagi kotou logoʼi anai ʼe taʼomia koutou e te ʼu fihifihia. Kae kotou vakaʼi age muʼa te faʼifaʼitaki ʼa te Hau ko Tavite. ʼI ʼihi temi neʼe taʼomia tona loto ʼuhi ko tona ʼu fihifihia. Kae logolā te ʼaluʼaga ʼaia, neʼe faikole fēnei ia Tavite ki te ʼAtua: “Neʼe au metitāsio ki tau ʼu gāue fuli; ʼaki he lotolelei neʼe au fia tokagaʼi tuʼumaʼu te ʼu gāue ʼo tou ʼu nima.” (Pesalemo 143:3-5) Logolā tona ʼu fihifihia, neʼe loto fakafetaʼi tuʼumaʼu pē ia Tavite pea neʼe nofo fiafia pē ia.

Kotou metitāsioʼi te ʼu meʼa ʼaē neʼe fai e ʼihi moʼo tokoni atu kiā koutou, pea mo kotou fakahā tokotou loto fakafetaʼi ʼaē ki tanatou ʼu faiga ʼaia. Neʼe tuku mai e Sesu te faʼifaʼitaki lelei ʼo ʼuhiga mo te faʼahi ʼaia. Ohagē lā, ʼi te temi ʼaē neʼe liligi ai e tona kaumeʼa ko Malia ia te lolo totogi kovi ki tona ʼulu pea mo tona ʼu vaʼe, ko ʼihi neʼe natou feʼekeʼaki fēnei: “Koteā ʼaē kua fai ai te maumau lolo magoni ʼaenī?” a Ko nātou ʼaē neʼe natou valokiʼi te faʼahi ʼaia, ʼi tanatou manatu neʼe tonu ke fakatau te lolo pea ke foaki te falā ki te hahaʼi māsisiva. Neʼe tali fēnei age e Sesu: “Kotou haganoa kiā te ia. He koʼē ʼe kotou faiga ke kotou fakakinakinaʼi ia ia?” Neʼe ina toe ʼui fēnei age: “Neʼe ina fai te meʼa ʼaē ʼe ina lavaʼi.” (Maleko 14:3-8; Soane 12:3) Ko te faʼahi ʼaē neʼe tokagaʼi tāfito e Sesu ʼe mole ko te aga ʼaē neʼe mole fai e Malia, kae neʼe loto fakafetaʼi ia Sesu ki te aga ʼaē neʼe ina fai.

Ko ʼihi ʼe hoki puli he tahi ʼi tonatou fāmili, pe ko honatou kaumeʼa peʼe ko honatou tapuakina, pea hoki natou manatuʼi ai leva. ʼE feala ke mole hoko te faʼahi ʼaia mokā ʼe kotou fakakaukauʼi te ʼu meʼa lelei ʼaē ʼe kotou maʼu ʼi temi nei! He koʼē ʼe mole kotou fakakaukauʼi he ʼu meʼa ʼe kotou fakafetaʼi kiai peʼe kotou tohi te ʼu meʼa ʼaia?

Mai tona ʼaluʼaga ʼaē “ko te meʼa ʼofa lelei fuli pē” ʼe haʼu mai te ʼAtua, koia tou loto fakafetaʼi kiā te ia ʼi te faikole. (Sake 1:17) ʼI tatatou fai tuʼumaʼu te faʼahi ʼaia, ʼe feala ai ke tokoni mai kiā tātou ke tou maʼu he loto fakafetaʼi pea mo he maʼuli fakafeʼauga.—Filipe 4:6, 7.

[Nota]

[Paki ʼo te pasina 6]

ʼE kotou fakahā koa tokotou loto fakafetaʼi ki te ʼu meʼa ʼaē ʼe fai atu e te hahaʼi maʼa koutou?